Pablo a ne étuŋŋ bá lwée ná Malta
28
Niané bí ngá mana kwíñ mvwaá,
éde bí ngá ñú táŋ ná etuŋŋ te é ne eyola ná Malta.
Hechos 28.1-14
2 Ané bot béye ó véa bé ngá bíra bía daŋ ábɔ añep,
amú ná mveŋ deé nɔ́ŋ,
avép dá é tɔɔ́ fe,
éde bé ngá mana bía ñɔŋ bésesé,
ané bé ngá mana koman ndúán.
3 Niané Pablo a ngá ke aa twáa mikɔ́t mítem minziŋ eé wea myɔ á ndúán été,
éde ñó deé mára ayóŋ e ngá bembe Pablo énam.
4 Éyɔŋ bot béye ó véa béte bé ngá yén ñó e kele ñí énam,
ané bé ngá ke bá dzó bevɔ́ɔ́ ya ébá bevɔ́ɔ́ ná:
“Kaa bisó é mot ñí a ne nywíñbot;
Nzósoó ăá lík ná á niŋ,
afáŋbɔ ná á sɔ́ mvwaá ó máŋ été.”
5 Édɔ é ne ná,
Pablo ñí a ngá sámle ñó te á ndúán été,
éñe kaa áwórán mbéa dzam enziŋ.
6 Tám te bá béé yana ná á nkún vús,
ngé ki ná á ku mbim etéññ te ébyen.
Ve abwiññ tám é ngá lot béé seŋ dɔ.
Niané bé ngá yén ná mbéa dzam enziŋ ăá lot ya ñí,
ané bé ngá tsén menu bé ŋga dzó ná a ne nzamá enziŋ.
7 Éde vóm te bebeñ,
ntébosú ye etuŋŋ te,
a tɔɔ́ eyola ná Publio,
a mbé a belé mefóo mésí,
ané a ngá ñɔŋ bía,
a tɔɔ́ fe bía é ndá dzeñ ya añep táŋ melú mé léa.
8 Ané a ngá bɔ ná éséá Publio a mbé a bóo eé dzuk ya okwann avép ya ntwíi.
Éde Pablo a ngá ñíi é vóm á mbé á ŋga yaglan,
a bere fe ñí mó,
a séñ ñí.
9 Niané dzam te é ngá bɔban,
ané é bot befé bé mbé bé belé akwann étuŋŋ été ó véa,
bá bé ŋga ke fe ébe éñe,
bé ŋga séñban.
10 Ané bot béte bé ngá mana fe bía vé ngaŋŋ memvála mése.
Éde ákoan ná bí ŋga tée yaá,
ané bé ngá dzálá bía ya é byém bí ngá yi.
Pablo aa sian á Roma
11 Niané ngwan é léa é ngá lot,
ané bí ngá tée ya byéa ye Álejandria bá lwée ná Mibyás Befám.
Byéa te ó ngá lot metám mé avép étuŋŋ te.
12 Éde niané bí ngá sim ósí á Sirakusa,
ané bí ngá tɔbɔ ó véa táŋ melú mé léa.
13 Atéé ye ó véa,
bí kéñ,
bí sian fe á Regio.
Niané alú avɔ́ɔ́ é ngá lot,
ané evúŋ ye á nkeññ é ngá tára,
éde nia melú mé beáñ bí sian á Puteoli.
14 Ané bí ngá koan ya bebwíni ó véa,
éde bé ngá kyaa bía ná bí tɔbɔ bíabe bɔ́ táŋ melú zaŋgbéá.
Néa,
bí ngá ke sian á Roma.
15 Éde niané bebwíni béye á Roma bé ngá wók ná bía sian,
ané bé ngá nzu tóban ya bía akekwíñ á bekísoan Apio ya Mendá Beyéŋ Mé Léa.
Niané Pablo a ngá yén bɔ́,
eé vé Nzamá akíba,
ané a ngá biñ nguu.
Hechos 28.15-31
16 Éde é tám bí ngá sian á Roma été,
[ané kaba a ngá kee komandée mibok],
ané bé ngá lík Pablo ná á tɔbɔ etámm,
ve mwann benzima eé kálá ñí.
Pablo a ne á Roma
17 A ngá bɔ ná,
niané melú mé léa mé ngá lot,
éde Pablo a ngá bána é bot bé mbé bora bé bwann béjudio ekóánn.
Niané bé ngá mana kóán,
ané a ngá dzó bɔ́ ná:
“Á bɔbédzaŋ,
bá kee ma á mbok atéé ye á Yerusalen é mó beromano été,
ma kaa áke áyɔŋ dam á ngamm áyát ngé ki méfúlú bimvámvámm.
18 Éde beromano béte,
niané bé ngá mana ma fas,
ané bé ngá kómo ma dzáma,
amú ná mĕé mbé mé belé etɔm ná me ngá yian wú ya dɔ.
19 Ve,
akála ná bejudio bé ngá tep nkíkgán te.
Édɔ é mbé ma ntsinann ná me kee Sesar ádzó dam,
se ná me belé dzam enziŋ ye ásóman áyɔŋ dam.
20 Édɔ é ne ná,
amú dzam te édɔ é lík ná me bána mína á mfá ye ná me yén mína ya ákɔ́bɔ fe ya mína,
akála ná me tsini ya é kalamekéná ñí,
amú é dzam Israel aa yana.”
21 Ané bé ngá dzó ñí ná:
“Bía bĭá bé ki ñɔŋ bekálara á Judea mfá we;
mwadzaŋ enziŋ,
ñí eé ndzí ki sian ébe bía eé kat ngé ákɔ́bɔ bía mbéa dzam enziŋ mfá we.
22 Ve bía kómo wók ébe wámyen é dzam wa síman,
akála ná bía wórán ná bá kɔ́bɔ nyébé te ábé mevóm mése.”
23 Ané bé ngá mana tsini ngúrá mos,
éde mos te,
abwiññ bot é ngá mana sian é vóm Pablo á mbé a tɔɔ́,
ané atéé ye kíkírí akekwíñ ngɔgáse,
Pablo a ngá vé bɔ́ mekéá,
eé vé fe bɔ́ ngañiá ye édzwée ngɔ́mán Nzamá,
eé dzéŋ ná áwún bɔ́ mfá Yesus atéé ye métsiŋŋ Moisés anzukwíñ ébe bekúlu medzó.
24 Éde bevɔ́ɔ́ benziŋ a ngá wún bɔ́ ya édí a ngá kɔ́bɔ;
ébá bevɔ́ɔ́ bá kaa ábwíni.
25 Amvála te édɔ bé ngá kánan kaa fe áwókgán bébyen ya bébyen.
Ve Pablo aá súgan bɔ́ kɔ́bɔ efíá ná:
“Mfúfúp Nsísim a ngá túga kɔ́bɔ ya beésúá ébe nkúlu medzó Esaía eé dzó ná,
26 ‘Kéŋ dzó áyɔŋ dí ná:
mína ye béá ya melɔ́,
ve mínăá ye wók amvála enziŋ;
mína ye dága ya mís,
ve mínăá ye yén amvála enziŋ.
27 Amú ná nlém áyɔŋ dí ó mana yaá bɔ aleét,
ya ndzuúk bá béá ya melɔ́ meba.
Mís má mé dzip yaá fe bɔ́.
A nza bɔ tám enziŋ ná bé yén ya mís,
bé wók ya melɔ́ bé wórán ya nlém,
béé búlán ébe ma,
ma me séñ fe bɔ́.’ ”
28 “Éde yemŋán ná meyɔŋ mefé émɔ bá lóm ákoroga Nzamá dí,
émɔ fe má ye wók.”
29 [Niané a ngá mana dɔ dzó,
ané bejudio bé ngá kánan béé bíra kéá bébyen ya bébyen.]
30 Ané Pablo a ngá lígi a tɔɔ́ é ndá dzeñ a ngá lén táŋ mibú mí beáñ,
á ŋga bɔ eé ñɔŋ é bot bése bé ngá ke ébe éñe,
31 eé kat fwéñ édzwée ngɔ́mán Nzamá,
eé yágale fe é mam Ntí Yesukristo,
ya filí ése,
kaa endáglé.
Hechos -conclusión