“Bá vé wa ná o kɔ́bɔ á mfá ye ná o kam ya wámyen.”

Ané Pablo a ngá sám wéá ó yóp,

á ŋga kam ya émyen,

ñí ná:

2 “Á Kéza Agripa,

ma wórán mvɔmm émuú ná me nkún nzu kam ya mámyen ébe ású dwe ya é mam mése bejudio bá sóman ma ya mɔ;

3 ádaŋdaŋ ná wámyen wa túga yem méfúlú mése ya míkéá bejudio bébyen ya bébyen bé belé.

Dzam te áse,

éde ma dzaa wa engóngɔ́ɔ́ ná o túga ma béá ya nlém ó bóo wa ósí.”

4 “Ané bejudio bése bá yem éniŋ dzam ásɔ́ ye á mɔ́ŋŋ,

me tɔɔ́ énzénzaŋ áyɔŋ dam été,

ya fe á Yerusalen.

5 Bá bem ma tára yem é ntɔɔ́ yaá abwiññ tám;

ngé bá kómo dɔ mem,

me ngá niŋ me tɔɔ́ mwann fariseo,

nsámá wá daŋ túga yémle metsiŋŋ á nyébé wea.

6 Éde áwola dí,

bá kík ma misaŋ akála ná me belé oyan ye é ngaá Nzamá a ngá vé betará.

7 É ngaá,

awóm meyɔŋ ya meyɔŋ mé beáñ mea,

má bíra kaŋ Nzamá alú ya ó mos kaa áwaabe;

meé yana ngaá te.

Á kéza,

oyan te,

éwɔ bejudio bá sóman ma ya wɔ.

8 Amú dzé mína kík ná míní sés yébe ná Nzamá aa wómo bewú?”

9 “Bébélá mámyen me ngá tára tém ná ma yian bɔ éyola Yesus ye á Nasaret abwiññ mbéa bé mam;

10 amvála te édɔ fe me ngá bɔ dɔ á Yerusalen.

Niané me ngá ñɔŋ edzwée ébe betébosú befára,

se fáve ná me ngá fet abwiññ bebwíni míbok;

éyɔŋ dá bé ngá ywíñ bɔ́,

ma me ngá yébe fe dɔ.

11 Abwiññ biyɔŋ,

me ngá ke ma ke á besinagoga bése meé vé bɔ́ akira,

meé tsíni bɔ́ ná bé téa Nzamá.

Me ngá daŋ bíra yéá ya bɔ́,

mé ŋga ke fe ma dzéŋ bɔ́ ásí akekwíñ békísoan béye mésí mefé.”

12 “Eséññ te édɔ me ngá ke ya dɔ á Damasko,

me belé édzwée ya nlómánn betébosú befára.

13 Á kéza,

ve ókaŋŋ été énzénzaŋ ó mos,

me ngá yén eyéá ye á dzóp.

Eyéá te deé bíra feañ ádaŋ nlódzóp,

ané é ngá mana ma boman ya é bot bése bíabe bɔ́ bí ngá ke ékena.

14 Éde bía bésesé bí ngá mana ku ósí,

ané me ngá wók kíŋŋ deé dzó ma á nkɔ́bɔ Ebreo ná:

‘Á Saulo,

á Saulo,

amú dzé wa dzéŋ ma ásí?

É ne ndzuúk ná wa bími abɔ á nsɔŋ.’

15 Ané me ngá síli ná:

‘Á Ntí,

o ne nzá?’

Éde Ntí a ngá dzó ná:

‘Ma me ne Yesus,

éñí wa dzéŋ ásí.

16 Ve,

kólogé ósí,

o tébe tételé,

amú ná me sɔ́ yaá yéne ébe wa á mfá ye ná ma téle wa awasíli ya ngañiá ye é mam o yén yaá ébe ma,

ya fe émá ma ye bera yéne ya mɔ ébe wa.

17 Ma ye wa koro é mó bejudio ya émá meyɔŋ mefé,

éñe fe ma lóm wa ébe ébɔ́,

18 ná mís mé kúuban bɔ́,

ya dzam te bé veŋan béé lúm dzíbi mvús,

bé sɔ́ éyéá été.

Bé veŋan béé lúm fe édzwée Sátan mvús,

bé sɔ́ ébe Nzamá,

béé ñɔŋ ndzámann mísémm ya etɔɔ́ énzénzaŋ mítɔ́pbán mí bot,

ákála mbwínánn ébe ma.’ ”

19 “Ya dzam te,

á kéza Agripa,

meé ndzí bɔ nyénánn ye á dzóp te melɔ́.

20 Fáve ná,

me ngá tára bɔ meé kat bot béye á Damasko fwéñ ya bot béye á Yerusalen;

véa,

Judea áse,

ya meyɔŋ mefé ná bé dzoban,

bé veŋan ébe Nzamá,

bé bɔ fe é mam má yian ya é bot bé dzoban yaá.

21 Amú dzam te édɔ bejudio bé ngá biñ ma á templo,

bé ŋga kómo fe ma ywíñ.

22 Ve,

amú Nzamá éñe aá vwála ma,

édɔ me ngén ma vé abobot ya bora bé bot ngañiá anzukwíñ émuú,

kaa ákɔ́bɔ dzam afé,

fáve é mam bekúlu medzó ya Moisés bé ngá kɔ́bɔ ná me nkún bɔban,

23 ná:

‘Kristo aa ye yén midzuúk éñe fe a tára wómo míwúán été,

néa éñe aa ye kat Israel ya meyɔŋ mefé fwéñ éyéá.’ ”

24 É tám Pablo a ngá kam ya émyen néa,

éde Festo a ngá yónán kíŋŋ oyaáp ó yóp eé dzó ná:

“Á Pablo wa kwan á nlém!

Abwiññ meyágalé é lík yaá wa ná o dzímle kén!”

25 Pablo ñí a ngá yalan ná:

“Á ndzwée Festo măá kwan á nlém;

fáve ná ma kɔ́bɔ bé bébélá bifíá ya kén.

26 Amú é kéza ma kɔ́bɔ ya ñí ya mebúnn aa yem mam méte.

Ma yébe dɔ ná ăá dzími dzam enziŋ ye été,

amú deé ndzí bɔ vóm enziŋ ásweññ.

27 Á kéza Agripa,

ye wa bwíni bekúlu medzó?

Ma yem ná wa bwíni.”

28 Éde Agripa a ngá dzó Pablo ná:

“Wa kómo ma wún ná me bɔ Krísten avítsaŋ tám!”

29 Pablo ñí ná:

“Ngé me ne ke yaglan ya Nzamá ná ané avítsaŋ tám,

ané abwiññ ki,

se fáve wa etámm,

fáve ná,

é bot bése mína wók ma émuú,

míní bɔ ané ma,

ve se békalamekéná bá.”

30 [Niané a ngá mana dzó mam méte],

éde kéza a ngá tébe bá ŋgɔ́vina ya Bernise ya é bot bábe bɔ́ bé mbé bé tɔɔ́ ósí;

31 ané bé ngá ke évwíñ,

bé ŋga ke bá kɔ́bɔ bébyen ya bébyen ná:

“É mot ñí ăá bɔ dzam enziŋ ná aa yian wú ngé ki mbok.”

32 Éde Agripa a ngá dzó Festo ná:

“Ngé é mot ñí émyen á bɔ kaa ákee Sesar ádzó deñ,

ngé bé kúlu yaá ñí á mbok.”