2 Ané betébosú befára ya bora bé bot bejudio bé ngá kaŋle ñí ádzó Pablo;

bé ŋga yémle fe ñí,

3 béé dzaa ñí engóngɔ́ɔ́ ná ábúlu Pablo á Yerusalen,

ákoan béé lám ná bá ywíñ Pablo ókaŋŋ été.

4 Ve Festo ñí a ngá yalan ná bá kálá Pablo á Sesarea;

ya fe ná avítsaŋ tám émyen ñí a nkún fe kólo a kéñ ó wéñ.

5 Véa a ngá dzó ná:

“Bora bé bot béye ébe mína bé kéŋ bíabe bɔ́ ó wéñ.

Édɔ é ne ná,

ngé mbéa dzam enziŋ a ne ébe mot te,

bé bwaale ñí.”

6 Niané a ngá bera tɔbɔ bábe bɔ́ ané melú mmom ngé ki awóm,

éde Festo a ngá sigi á Sesarea.

É mos mbɔ́ɔ́ ó ngá belan véa,

ané a ngá ke tɔbɔ ósí ékóánn bá kík medzó,

éde fe a ngá mánan ná bé nzu ya Pablo.

7 Niané a ngá sian,

ané béjudio bé ngá sɔ́ á Yerusalen bé mana ñí luŋ méféŋŋ,

bé ŋga sóman ñí ya abwiññ mam ya bora bisɔ́mán;

eé tɔɔ́ ná bébyen bá bĕé mbé ki lére ná me ne été.

8 Pablo ñí eé kam ya émyen,

éde a ngá dzó ná:

“Meé ndzí bɔ nsémm enziŋ mfá métsiŋŋ bejudio,

ngé mfá templo,

ngé ki mfá Sesar.”

9 Ve Festo ñí eé kómo ábɔ bejudio mbeŋ,

ané a ngá síli Pablo ná:

“Ye wa kómo ke á Yerusalen ná ó wéñ bé kík wa misaŋ ébe ású dam ébe é mam má?”

10 Éde Pablo a ngá yalan ná:

“Me ntɔɔ́ yaá é vóm Sesar aa kík misaŋ.

Vóm te,

éñe fe bá yian ma kík misaŋ.

Amvála ané wámyen wa túga dɔ yem ededea mbeŋ meé ndzí bɔ bejudio etɔm enziŋ.

11 Ngé maá bɔ fá etɔm enziŋ ye ná ma yian wú,

măá tep awú.

Ve,

ngé dzam enziŋ ye é mam é bot bá sóman ma é sés bébélá,

mot enziŋ ĕé belé nguu ye ákee ma ébe bɔ́.

Ma kee Sesar ádzó dam.”

12 Véa,

niané Festo a ngá mana wókgan bábe mífafak mí bot myeñ,

ané a ngá yalan ya Pablo ná:

“Oó kee yaá Sesar ádzó dwe,

éñe fe wa ke ó wéñ.”

13 Niané ayomm melú enziŋ é ngá lot,

éde kéza Agripa bá Bernise bé ngá sian á Sesarea,

bé kéñ vé Festo mbamba ásɔ́ɔ́.

14 Bé tɔɔ́ ó véa abwiññ melú,

ané Festo a ngá kaŋle kéza ádzó Pablo,

ñí ná:

“Felis aá ke aa lík mot enziŋ á mbok ó vá.

15 Me tɔɔ́ á Yerusalen,

éde betébosú befára ya mikúkúmá bejudio bé ngá sɔ́ ya ñí bisɔ́mán,

béé dzaa ma ná me kík ñí nsaŋ ná,

aa ku.

16 Ané me ngá yalan ya bɔ́ ná,

beromano bĕé belé fúlú ná bá kee mot enziŋ meku,

ngé kaa ná mot te aa kéá bábe é bot bá sóman ñí asú ya asú,

á mfá ye ná á kam ya émyen ébe é mam bá sóman ñí.

17 Niané bé ngá kóán ó vá,

kaa ádzímle tám,

ané me ngá tɔbɔ ósí ékóánn bá kík medzó é mos ó ngá belan véa,

me mánan fe ná bé nzu ya mot te.

18 Niané bébwaale béñ bé ngá tébe béé ndzí lére bitɔm binziŋ bíye ébí me ngá yana mfá weñ.

19 Fáve mam menziŋ méye á nyébé weba émɔ bé ngá sóman ñí,

ya fe mfá mot enziŋ bá lwée ná Yesus;

ñí a wú yaá fe.

Éñí Pablo aa dzó ná a ne ntétéá.

20 Ma mĕé ngá yem ámvála me ne fas ádzó te,

éde me ngá síli Pablo ná ngé aa kómo ke á Yerusalen,

á mfá ye ná bé kík ñí misaŋ ádzó te ó wéñ.

21 Ve,

Pablo ñí a ngá dzaa ná bé kálá ñí ó vá ná bé kík ádzó deñ ébe Sesar.

Ané me ngá mánan ná bé kálá ñí akekwíñ ané ma ye ñí lóm ébe Sesar.”

22 Éde Agripa a ngá dzó Festo ná:

“Mámyen ma ma kómo fe ñí wók.”

Festo ñí ná:

“Ookírí wa ye ñí wók.”

23 É mos ó ngá belan véa,

éde Agripa bá Bernise bé ngá nzu ñíi ábéá medzó été ya abwiññ ewúmá,

bábe bekomandée,

ya bora bé bot béye kísoan te.

Ané Festo a ngá mánan ná bé nzu ya Pablo.

24 Éde a ngá dzó ná:

“Á kéza Agripa ya é bot bése bíabe bɔ́ bí ne ó vá éyɔŋ dí;

yénŋán é mot ayɔŋ bejudio áse,

ané á Yerusalen,

ané o vá,

é ngá dzaa ma,

deé yónán ná é mot ñí ăá yian bera niŋ.

25 Ve,

ma me ngá koan ná eé ndzí bɔ dzam enziŋ dá yian ya awú;

ve,

niané émyen a ngá kee ádzó deñ Sesar,

ané me ngá kík ná ma lóm ñí.

26 Ve mĕé belé dzam enziŋ bébélá ye me ne tsili ndzwée wɔm á mfá ébe mot te.

Á kéza Agripa,

dzam te édɔ mé sɔ́ ya mot te ébe ású denan,

ádaŋdaŋ ébe ású dwe,

á mfá ye ná niané bá mana ñí fas,

ma me ne belé dzam ye átsili.

27 Amú me téa ná e ne kaa ayílí ná,

bá lóm mbok kaa álére bítɔm bá sóman ñí ya byɔ.”