Pablo aa kam ya émyen
24
Niané é ngá lot melú mé tán,
éde ntébosú befára Ananías a ngá sian á Sesarea ya mikúkúmá minziŋ ya ntébe nzaŋŋ Tértulo.
Ané Tértulo te a ngá lére bítɔm Pablo ébe ŋgɔ́vina.
Hechos 24.1-27
3 “Á ndzwée Felis,
bía wórán abwiññ mvwaá ya é tsén mam eé mana yaá bɔ mfá mvéáñ ye áyɔŋ dea amú nkée we.
Bía láŋ ásesé te vóm áse;
abwiññ akíba ya wa.
4 Ve á mfá ye ná me táa wa bɔ sɔ́m ayaáp,
ma bíra wa dzaa engóngɔ́ɔ́ ya áñep dwe ná o béá bía oyomm tám.
5 Amú bí yén yaá ná é mot ñí a ne ebúúbúu,
aa boman eniŋ ngúrá eé sɔŋ bejudio ná bé bɔ metsamann,
éñe fe ané nló mbéa nyébé benasareno.
6 Atwaa templo da a vak yaá fe ná aa bɔ dɔ nzeze;
[éde bí ngá biñ ñí bía bébyen bí ŋga kómo fe ñí kík misaŋ amvála ané métsiŋŋ mea má lóm.
7 Ve éde komandée Lisia a ngá nzu duman a dut bía ñí é mó mea été.
8 Ané a ngá mánan é bot bé ngá sóman ñí ná bé nzu ébe wa.]
Wámyen wa o ne ñí fas á mfá ye ná o túga yem é mam mése bía sóman ñí ya mɔ.”
9 Bejudio bá bé ngá ke fe bá yébe mɔ béé dzó ná mam méte mé ne bébélá.
10 Éde ŋgɔ́vina a ngá vé Pablo ndem ná ñí a kɔ́bɔ;
ané Pablo a ngá dzó ná:
“Ma yem ná é ntɔɔ́ abwiññ mibú o tɔɔ́ nkík misaŋ ye áyɔŋ dí,
éde ma wórán mesán ná ma kam ya mámyen.
11 O ne ebúbú ye áyén ná dăá bé lot awóm melú ya melú mé beáñ avé mé ke kaŋ á Yerusalen.
12 Béé ndzí koan ya bía mot enziŋ bíí bɔ bisó á templo été,
ngé ki ná meé sɔŋ nkuna bot á besinagoga,
ngé ki á kísoan été.
13 Bé sés wa lére dzam enziŋ ye é mam bá sóman ma ya mɔ éndagá.
14 Ve,
édí ma mem,
é ne ná ma kaŋ é Nzamá bímvámvámm byea,
amvála ané é Nzenn bá lwée ná mbéa nyébé.
Ma bwíni é dzam ése é ne métsiŋŋ été,
ya mítsilann bekúlu medzó.
15 Ámvála oyan me belé ébe Nzamá,
amvála te fe bá bé belé ná bot bé nkún wómo miwúán été,
ané benzósoó bé bot ané mbéa bé bot.
16 Dzam te édɔ mámyen ma vé nguu tám áse ná me baale ósímánn ye á nlém wɔm mfúbánn ósú Nzamá,
ya ósú bot.”
17 “Nia abwiññ mibú,
éde me ngá búlán ná ma nzu kee é sí dam bivévé,
ya metúnŋa.
18 Tám te,
ákoan ná me mana yaá tun ñúu á templo,
mĕé mbé á nkuna bot été,
nzɔgɔ da deé ndzí ki bɔban ó véa;
Ve bejudio benziŋ béye Ásia bé mbé ó véa.
19 Ébɔ́ bá yian nzu ébe wa béé sóman ma,
ngé é ne ná bé belé ma dzam enziŋ;
20 ngé ki ná,
é bot bé ne ó vá bé katge étɔm bé ngá koan ya dɔ ébe ma,
éyɔŋ me mbé me téle ósú ékóánn medzó béjudio.
21 Tám enziŋ a ne bɔ fáve é dzam avɔ́ɔ́,
me ngá bére kíŋŋ énzénzaŋ deba été ná:
‘Bá kík ma misaŋ ébe ású denan émuú,
akála ma bwíni ná miwúán myá ye wómo.’ ”
22 Éde,
ákoan ná Felis ñí a tára yaá túga yem mfá Nzenn Ntí,
ané a ngá dzó ná:
“Éyɔŋ komandée Lisia aa ye sɔ́;
véa,
éñe ma ye kík ádzó denan.”
23 Éde a ngá mánan kaba ná aa baale Pablo;
ve a belé filí,
kaa ki ákili mot enziŋ ye é bot béñ ná a táa belan ya ñí.
24 Niané ayomm melú é ngá lot,
éde Felis a ngá sian bá ngéá Drusila,
ñí á tɔɔ́ ngwan judia,
ané Felis a ngá lwée Pablo,
éde a ngá wók ñí mfá á mbwínánn ébe Kristo Yesus.
25 Ve,
niané Pablo a ngá kɔ́bɔ á mfá nzósoó ya ádzwée nlém ya nkíkgán misaŋ ó ne ná ó nkún sian,
ané Felis eé kɔ wɔŋŋ a ngá dzó ná:
“Béŋ ke éndagá,
ma ye wa bera lwée éyɔŋ ma ye belé tám.”