23
Éde Pablo a ngá bem ekóánn medzó mís,
ané a ngá dzó ná:
“Á bɔbédzaŋ,
anzukwíñ émuú me niŋ yaá ósú Nzamá ya mbamba ósímánn ye á nlém ósesé.”
2 Éde ntébosú befára Ananías a ngá mánan é bot bé mbé bé téle Pablo míféŋŋ ná bé bími ñí ánu.
3 Eyɔŋ te Pablo ñí a ngá dzó ñí ná:
“Nzamá a nkún wa bími,
mfim ó ne nwáan mfúm!
Wa o tɔbɔ ná wa kík ma misaŋ ya metsiŋŋ,
wa wa tsam metsiŋŋ weé mánan ná bé bími ma.”
4 Éde é bot bé mbé ñí bebeñ bé ngá síli ñí ná:
“Ye wa tea ntébosú befára Nzamá?”
5 Ané Pablo a ngá yalan ná:
“Á bɔbédzaŋ mĕé mvá yem ná éñe a ne ntébosú befára,
amú e ne ntsilann ná:
‘O táa kɔ́bɔ ntébosú ye áyɔŋ dwe abé!’ ”
6 Éde Pablo eé yem ná ngúrá á mfá bot béye ékóánn ó ne besaduseo,
éwí mbɔ́ɔ́ wá befariseo,
ané a ngá bére kíŋŋ ékóánn medzó été ná:
“Á bɔbédzaŋ,
me ne mwann fariseo,
é mwán befariseo,
bá kík ma misaŋ amú me belé oyan ye ná miwúán myá ye wómo.”
7 Niané a ngá dzó dɔ,
éde mikɔ́bɔ mí ngá bɔ befariseo bábe besaduseo.
Ané bot bé ngá kánan énzénzaŋ.
8 Amú besaduseo bá dzó ná nwómán miwúán ó sés,
baángel bá bé sés ki,
ngé ki misísim;
ve befariseo bá bá yébe mam méte mése.
9 Éde nzɔgɔ ndén e ngá bɔban.
Ané beyágale métsiŋŋ benziŋ béye mpatí befariseo bé ngá tébe béé bíra yémle béé dzó ná:
“Bĭí téa mbéa dzam enziŋ ébe é mot ñí;
ngé nsísim o kɔ́bɔ yaá ya ñí,
ngé ki ángel,
e ne dzé?”
10 Niané nzɔgɔ e ngá ke dá bɔ ndén,
komandée á ŋga kɔ wɔŋŋ ná bé nza sák Pablo;
ané a ngá mánan ná nsámá benzima ó sigi ná ó ke ñí vea énzénzaŋ deba été,
ó kéñ fe ya ñí á kpatéle.
11 Álú avɔ́ɔ́ é ngá belan véa,
éde Ntí a ngá yéne ébe éñe eé dzó ñí ná:
“Yémŋe nguu!
Amú ná ámvála o vé yaá é mam mam ngañiá á Yerusalen,
amvála te fe dá yian ná o vé ngañiá á Roma.”
Hechos 23.11-35
Bá tébe enginiŋe ná bé ywíñ Pablo
12 Niané kírí e ngá léne,
ané bejudio bé ngá tébe enginiŋe,
bé tsini bébyen ya nkanann sɔŋ béé dzó ná băá dzí ngé áñú akekwíñ ané bá ywíñ Pablo.
13 É bot bé ngá tébe enginiŋe te bé ngá lot táŋ bot mewóm mé nii.
14 Éde bot béte bé ngá ke ébe betébosú befára ya fe ébe mikúkúmá,
ané bé ngá dzó ná:
“Bía bébyen bí mana yaá tsini ya nkanann sɔŋ ná bĭá kyak dzóm enziŋ akekwíñ ané bía ywíñ Pablo.
15 Éde áwola dí,
mína ya bot béye ekóánn medzó,
dzógán komandée ná á nzu ya Pablo,
a téle ñí ébe ású denan,
míní lére ané ngé mína kómo túga fas dzam enziŋ ye étɔm deñ.
Véa,
bía tɔbɔ nkomann ná bía ywíñ ñí kaa ná a sian.”
16 Ve,
niané é mwán Pablo kéá e ngá wók olám te,
ané a ngá ñíi á kpatéle été,
a kat dɔ Pablo.
17 Éde Pablo a ngá lwée kaba mbɔ́ɔ́ a dzóo ñí ná:
“Kéŋ ya é ndómán ñí ébe komandée!
Amú ná a belé dzam enziŋ ye ákat ñí.”
18 Ané a ngá ñɔŋ ñí,
a kéŋ ya ñí ébe komandée,
a dzóo ñí ná:
“Mwann mbok Pablo,
éñe á lwée ma,
á dzaa fe ma ná me nzu ya é ndómán ñí ébe wa,
amú ná a belé dzam ye ádzó wa.”
19 Éde komandée a ngá biñ ñí énam,
a kéñ ya ñí évwíñ,
ané a ngá síli ñí ná:
“Wa kómo ma ákat á yá?”
20 Ané a ngá yalan ná:
“Bejudio bé mana yaá tsini ná bá ye wa dzaa ná o ke ya Pablo ekóánn medzó ookírí,
ané ngé bá kómo túga yem dzam enziŋ ébe éñe.
21 Édɔ é ne ná,
o táa bɔ́ yébe!
Amú ná befám álot mewóm mé nii bé ŋga yana yaá ñí ya olám.
Bot béte bébyen bé mana yaá tsini ya nkanann sɔŋ ná băá ye dzí ngé áñú akekwíñ ané bá ywíñ Pablo.
Áwola dí bé ntɔɔ́ nkomann,
bá yana nkíkgán we.”
22 Éde komandée a ngá yáán ya ndómán te,
a mánan ñí ná:
“O táa dzó mot enziŋ ná o kúlán yaá ma dɔ.”
Bá lóm Pablo ébe ŋgɔ́vina Felis
23 Ané komandée a ngá lwée bekaba bé beáñ a dzóo ná:
“Komŋán benzima mitet mí beáñ;
bénzima bá wulu ya mikalbeñ bá mewóm zaŋgbéá;
ébá bá bá wulu ya mekɔŋŋ bá mitet mí beáñ,
á mfá ye ná bé ke á Sesarea méwola ebuú ye alú.
24 Komŋán fe míkalbeñ myá ye ke ya Pablo mvwaá ébe ŋgɔ́vina Felis.”
25 Éde fe a ngá tsili kálara eé dzó aaná:
26 “Ma Klaudio Lisias:
Á ndzwée ŋgɔ́vina Felis,
á mbóló!
27 Bejudio bé ngá biñ é mot ñí,
ákoan ná bé nkún ñí ywíñ,
ané me ngá sian ya nsámá benzima.
Niané me ngá wók ná a ne
bá sóman ñí,
ané me ngá ke ya ñí ékóánn medzó deba.
29 Éde,
me ngá koan ná,
bá sóman ñí akála mam méye métsiŋŋ meba;
ve,
kaa etɔm enziŋ ye ná aa yian wú ngé ki mbok.
30 Niané me wórán ná olám ó ntɔɔ́ yaá ná bá ywíñ ñí,
ané me lóm wa ñí etéññ te ébyen,
me dzó yaá fe é bot bá sóman ñí ná
bé kɔ́bɔ ébe ású dwe é dzam bá sóman ñí ya dɔ.”
31 Éde benzima bé ngá ñɔŋ Pablo ámvála bé ngá mánan bɔ́,
bé kéñ ya ñí ébe Antipatris á alú.
32 É mos ó ngá belan véa,
ané bé ngá lík ná benzima bá wulu ya mikalbeñ bé tsíni ósú ya Pablo,
eyɔŋ te bá bé búlán á kpatéle.
33 Niané bá bé ngá sian á Sesarea,
éde bé ngá kee ŋgɔ́vina kálara,
bé lére fe Pablo ébe ású deñ.
34 Nia ŋgɔ́vina a mana láŋ kálara,
ané a ngá síli Pablo ná a ne mot ye abeŋŋ avé.
Éyɔŋ a ngá yem ná a ne mot ye á Silisia,
35 éde a ngá dzó ná:
“Ma ye wók ádzó dwe éyɔŋ é bot bá sóman wa bá ye sɔ́.”
Ané a ngá mánan ná bé kálá ñí á kpatéle Erodes.