22
“Á bot,
bɔbédzaŋ ya betará,
béágán ma áwola dí amvála ané ma kam ya mámyen ébe ású denan.”
2 Niané bé ngá wók Pablo aa kɔ́bɔ ya bɔ́ á nkɔ́bɔ Ebreo,
ané bé ngá bíra daŋ sis bivóó.
Éde a ngá dzó ná:
3 “Me ne mwann judio,
mbyálánn ye á Tarso ye á Silisia.
Ve,
bá yála ma é kísoan ñí mébɔ ósí Gamaliel,
bé ngá yágale ma amvála ané bá túga baale métsiŋŋ betará,
ma me tɔɔ́ fe abéánn ya Nzamá,
ámvála mína bésesé míní ne dɔ émuú.
4 É bot bá bee é Nzenn Kristo,
bá me ngá dzéŋ fe ásí akekwíñ áwú;
meé ká bɔ́,
meé dum fe bɔ́ á míbok,
befám ya biningá,
5 amvála ané Ntébosú befára a ne ma ngañiá ya mikúkúmá míse.
Éñe fe me ngá ñɔŋ bekálara ébe ébɔ́ mfá bɔbédzaŋ bejudio.
Éde me ngá ke á Damasko á mfá ye ná me nzu ya mibok mí mbé ó wéñ á Yerusalen ná bé vé myɔ akira.”
6 “Ve,
a ngá bɔ ná,
meé ke á nzenn,
ákoan ná me ntɔɔ́ bebeñ á Damasko,
ané énzénzaŋ ó mos,
ásítem ná mikwikwiñ mí mora eyéá ye á dzóp mí mana ma boman.
7 Ané me ngá ku ósí,
éde me ngá wók kíŋŋ deé dzó ma ná:
‘Á Saulo,
á Saulo,
akála dzé wa dzéŋ ma ásí?’
8 Ané me ngá síli ná:
‘Á Ntí,
o ne nzá?’
Éde ñí a ngá yalan ná:
‘Ma me ne Yesus mwann Nasareno éñí wa dzéŋ ásí.’
9 É bot bíabe bɔ́ bí mbé,
bébélá ná bé ngá yén eyéá te,
ve béé ndzí wók é kíŋŋ e ngá kɔ́bɔ ya ma.
10 Ané me ngá síli ná:
‘Á Ntí,
nzá dzam ma yian bɔ?’
Éde Ntí a ngá yalan ya ma ná:
‘Tébegé,
kéŋ á Damasko,
ó wéñ,
éñe bá ye wa kat é mam mése bé téle yaá wa ná o bɔ.’
11 Ákoan ná me sés fe yén akála ná eyéá te é ngá bíra feañ,
ané é bot bíabe bɔ́ bí mbé bé ngá ke ya ma énam,
mé sian á Damasko.”
12 “Ané mot enziŋ a tɔɔ́ eyola ná Ananías,
a ngá baale metsiŋŋ mvéáñ,
béjudio bése bé mbé bé tɔɔ́ ó véa,
bá bé ngá vé fe ñí mbamba ngañiá.
13 Éde Ananías te a ngá nzu ébe ma,
ané a ngá tébe ma á mféŋŋ a dzóo ma ná:
‘Á mwadzaŋ Saulo,
beragá áyén.’
Éde me ngá yén ñí etéññ te ébyen.
14 Ané a ngá dzó ná:
‘É Nzamá betará a tɔ́p yaá wa á mfá ye ná o yem nkómánn weñ,
o yén Nzósoó Mot,
o wók fe bifíá bíye ánu deñ.
15 Amú ná wa ye bɔ é ngañiá weñ ébe bot bése mfá édí o yén yaá,
ya áwók.
16 Dzé fe wa yana áwola dí?
Tébegé,
o yónán éyola Ntí,
duubán fe á mfá ye ná mísémm mwe mí tɔbɔ nsopbán!’ ”
17 “Éde a ngá bɔ ná,
niané me ngá búlán á Yerusalen,
me tɔɔ́ á templo,
meé yaglan,
ané me ngá yén Ntí á nsísim,
18 eé dzó ma ná:
‘Bɔɔ́ge avóó,
dzígá kólo á Yerusalen!
Amú băá ye yébe é ngañiá wa ye vé mfá wɔm.’
19 Ané me ngá dzó ná:
‘Á Ntí,
bébyen bá yem mvéáñ ná me ngá wulu,
meé fet á mibok ya áyít fe é bot bá bwíni wa á besinagoga été.
20 Ya é tám mékií é ngañiá we Esteban mé ngá swii,
mámyen ma me mbé fe me téle,
meé yébe dɔ.
Ma fe me ngá baale bítóp é bot bé ngá ywíñ ñí.’
21 Éde Ntí a ngá dzó ma ná:
‘Kéŋ!
Amú ná ma ye wa lóm oyaáp ébe meyɔŋ mefé.’ ”
Pablo a ne ébe komandée.
22 Ané bé ngá súgan ñí béá akekwíñ efíá te,
véa bé ŋga bére mekíŋŋ béé dzó ná:
“Veagé mot te éniŋ dzí,
amú ná dăá yian ná ámvála mot dí é niŋ.”
23 Éde béé yón,
béé wea bítóp byeba,
béé fwíi fe mbúlgé ó yóp,
24 ané komandée a ngá mánan ná bé ñíŋle Pablo á kpatéle,
a mánan fe ná bé fas ñí ya eyíra mfá átúga yem akála dzé bá yónán ñí á ngamm áyát aaná.
25 Ve,
éyɔŋ bé ngá ñue ñí ya mikɔɔ́,
éde Pablo a ngá síli é kaba á mbé téle ó véa ná:
“Ye atsiŋŋ dá yébe ná o yít mwann Romano kaa ná bé kík ñí misaŋ?”
26 Niané kaba a ngá wók dɔ,
éde a ngá yit komandée bebeñ eé kat ñí ná:
“Wa kómo bɔ dzé!
Amú ná é mot ñí a ne mwann Romano.”
27 Ané komandée a ngá yit Pablo bebeñ a síli ñí ná:
“Katge ma,
ye o ne mwann Romano?”
Éde a ngá yalan ná:
“Ãá.”
28 Ané komandée a ngá dzó ná:
“Ma ma wún ná me bɔ mwann Romano ya abwiññ moann.”
Éde Pablo a ngá dzó ná:
“Ve,
ma me ne ñí ábyálá.”
29 Etéññ te ébyen,
ané é bot bé mbé ná bé nkún ñí ke fas,
bé ngá kólo ñí míféŋŋ.
Komandée ñí á ŋga kɔ fe wɔŋŋ niané a ngá yem ná a ne mwann Romano,
ya fe ná aá ká ñí.
Pablo a ne ekóánn medzó bejudio dá dzwée
30 Éde é mos ó ngá belan véa,
komandée eé kómo túga yem bébélá étɔm bejudio bé ngá sóman Pablo,
ané a ngá vé ñí filí,
a mánan fe ná betébosú befára ya ekóánn medzó ése bí kóán.
Ané a ngá sigi ya Pablo a tɔɔ́ ñí ébe ású deba.
Hechos 22.30-23.10