Ékena Pablo á Yerusalen
21
Éde niané bí ngá mana kánan bíabe bɔ́,
ané bí ngá tée ya byéa,
bí kéñ tételé,
bí sian á Kos.
É mos ó ngá belan véa,
bí sian á Rodas,
atéé ye ó véa,
bí sian á Pátara.
Hechos 21.1-14
2 Ané bí ngá koan ya byéa mfé,
weé ke á Fenisia,
éde bí ngá daŋ wɔ́,
bí kígán.
3 Niané bí ngá yén Tsípre oyaáp,
ané bí ngá lík ñí á mfá meyéá,
bí ŋga ke nzósoó á Siria,
bí sim ósí á Tiro,
amú ná bé ngá yian vugu mibaga á byéa été ó véa.
4 Niané bí ngá duan ya bebwíni ó véa,
éde bí ngá tɔbɔ melú zaŋgbéá ó véa.
Bebwíni béte,
ya nsísim,
bé ngá kɔ́bɔ Pablo ná a táa bét á Yerusalen.
5 Niané melú méte mé ngá lot,
ané bí ngá kólo ná bía ke,
éde bésesé,
beyéá ya bwán bé ngá ke léran ya bía akekwíñ bí ngá mana kólo á kísoan été.
Niané bí ngá mana kútbe ó sí á nsá máŋ bí ŋga yaglan,
6 bí mana fe ke bía yáán bevɔ́ɔ́ ya ébá bevɔ́ɔ́,
bí kéñ daŋ á byéa été.
Éde bá bé ngá mana búlán á mendá meba.
7 Ané bí ngá tée á Tiro bí mana ékena dea á byéa été á Tolemaida.
Éde bí ngá bérán ya bebwíni,
bí tɔbɔ fe bíabe bɔ́ alú avɔ́ɔ́.
8 Ané é mos ó ngá belan véa,
bí tée bí kéñ fe sian á Sesarea.
Éde bí ngá ñíi é ndá Felipe nkat mbamba fwéñ,
éñí á mbé mbɔ́ɔ́ ye é bot zaŋgbéá bé ngá vwála baapostol,
ané bí ngá tɔbɔ bíabe bɔ́.
9 Felipe te,
a mbé a belé bindúnn bíngwan bí nii ná bí ngá kúlu medzó.
10 Éde bí tɔɔ́ ó véa melú menziŋ,
ané nkúlu medzó mbɔ́ɔ́ a tɔɔ́ eyola ná Agabo a ngá sɔ́ á Judea.
11 Niané a ngá nzu ébe bía a twáa é kaná Pablo a mana dɔ ká ó mó ya mebɔ meñ,
éde a ngá dzó ná:
“Mfúfúp Nsísim éñe aa kɔ́bɔ é mam má ná é mot a ne ya é kaná ñí,
bejudio bá ye ñí ká aaná á Yerusalen,
bé kee fe ñí é mó meyɔŋ mefé.”
12 Nia áwók dɔ,
bíabe bot béye ó véa,
bí ŋga bíra dzaa Pablo ná a táa ke á Yerusalen.
13 Ané Pablo ñí a ngá yalan ná:
“Dzé mína bɔ,
míníí yi,
míníí vé fe ma eywiññ á nlém?
Amú ná me ntɔɔ́ nkomann ná ma ke wú á Yerusalen ákála éyola Ntí Yesus,
se fáve ná bá ká ma mebɔ etámm.”
14 Amú bĭí mbé ñí wún,
éde bí ngá sis bivóó bíí dzó ná:
“Nkómánn Ntí éwɔ ó bɔɔ́ge.”
15 Niané melú méte mé ngá lot,
bí mana koman,
ané bí ngá bét á Yerusalen.
Hechos 21.15-26
16 Éde beyága benziŋ béye á Sesarea bé ngá nzu léran ya bía,
bé kéñ ya bía ébe Mnason mot ye á Tsípre,
nnomm nyága ná,
bíabe bɔ́ bí tɔbɔ.
Pablo aa fép Jakobo
17 Nia ásian á Yerusalen,
ané bebwíni bé ngá ñɔŋ bía ya mesán.
18 Éde é mos ó ngá belan véa,
bíabe Pablo bí ngá ke yén Jakobo,
betébosú bésesé bá bé mbé fe.
19 Niané bí ngá mana bɔ́ sómo,
éde Pablo a ngá tára ná aa kaŋle bɔ́ kada dzam áse ye é mam Nzamá a ngá bɔ énzénzaŋ meyɔŋ mefé mfá ye éséññ Nzamá deñ.
20 Niané bá bé ngá wók dɔ,
ané bé ngá vé Nzamá dúmá,
éde bé ngá dzó ñí ná:
“Á mwadzaŋ,
dággé,
binzuk bejudio bí ne ná bí mana yaá bwíni;
bésesé béte bá bíra fe dziŋ metsiŋŋ;
21 bé kat yaá fe bɔ́ fwéñ ná wa ke wa yágale béjudio bé tɔɔ́ bábe meyɔŋ mefé ná bé lík métsiŋŋ Moisés;
weé dzó bɔ́ ná bé táa kele é bwán beba,
bé táa ki baale omvúgá.
22 Nzá dzam dá yian bɔban?
Kaa bisó bá bá ye fá wók ná o sɔ́ yaá.
23 Édɔ é ne ná,
bɔɔ́ge é dzam bía dzó wa dí.
Bí belé bot bé nii ó vá ná bébyen bé mana yaá tsini metsiŋŋ.
24 Ñɔŋŋe bot béte,
tunŋe é ñúu dwe mínabe bɔ́,
yáágán fe mfá weba ná bé keŋ miló myeba ntwíññ.
Amvála te,
bot bése bá ye yem ná é mam bé ngá kat bɔ́ fwéñ mfá we mé sés bébélá;
fáve ná wámyen,
wa wa niŋ fe weé dzálá metsiŋŋ.
25 Á mfá ye méyɔŋ mefé mé mana yaá bwíni,
bí tsili yaá bɔ́ kálara é mam bí kík yaá ná bé táa kop é byém bá vé biyemá metúnŋa,
ya mekií,
ya é tsít dá wú abúk,
ya fe nsémm eveák.”
Bá biñ Pablo óngóo á Templo été
26 Ané Pablo a ngá ñɔŋ bot béte,
é mos ó ngá belan véa,
éde a ngá tun ñúu bábe bɔ́,
á kéñ á templo ná aa ke lére é mos bá ye mana tun méñúu meba,
ya fe é dzóm bá ye vé metúnŋa kada mot ye ébe bɔ́.
27 É tám a ngá bɔ ná melú zaŋgbéá mé nkún dzálában,
éde bejudio béye Ásia bé ngá yén ñí óngóo á Templo été,
ané bé ngá tára ná bá fuk nkuna bot óse,
éde bé ngá kee ñí mó ó ñúu,
Hechos 21.27-22.29
28 béé yónán ná:
“Á befám béye Israel,
vwálagán bía!
É mot ñí,
éñe aa ke aa wulu mevóm mése,
eé yágale bot bése é mam mé ne áyɔŋ dea á ngamm áyát,
ya á metsiŋŋ,
ya fe é vóm wí!
Atwaa a ñíŋle yaá fe begriego óngóo á Templo été,
a bɔ yaá fe é vóm ó ne éki wí nzeze.”
29 Amú ná bá tára ñí yén á kísoan bá Trófimo mwann Efesio,
néa,
éñe bé ngá tém ná Pablo aá ke ya ñí á templo.
30 Éde kísoan ngúrá é ngá fógan,
ané bot bé ngá ke bá sɔ́ mibíí;
bé mana nzu biñ Pablo bé kéñ bá dulu ñí óngóo á Templo átán,
etéññ te ébyen bé mana dzip mibéñ.
31 Ákoan bé ŋga dzéŋ yaá ná bé ywíñ ñí,
éde fwéñ e ngá bét ébe komandée ye á nsámá biteá ná,
Yerusalen áse á mana yaá nzaman.
32 Etéññ te ébyen,
ané komandée a ngá ñɔŋ benzima ya bekaba,
a dzíga sigi mbíí ébe bot béte.
Niané bé ngá yén komandée ya benzima,
éde bé ngá dzɔgɔ ná bá bími Pablo.
33 Véa,
éñe komandée a ngá nzu bebeñ ébe Pablo a biñ ñí,
a mánan fe ná bé ká ñí ya bekalamekéná bé beáñ;
eé síli ná a ne nzá,
nzá dzam ki á bɔ.
34 Ve,
á nkuna bot été,
bevɔ́ɔ́ bé ngá yónán ngúrá dzam,
ébá bevɔ́ɔ́ bá édí avɔ́ɔ́,
akekwíñ ané komandée ĕé mbé yem bébélá étɔm enziŋ akála nzɔgɔ.
Ané a ngá mánan ná bé ke ya ñí á kpatéle.
35 Éde a ngá bɔ ná,
niané a ngá sian ékaza,
benzima bé baga Pablo akála mbéa ngíniŋe nkuna bot ó ngá bɔ.
36 Amú ná nkuna bot ye á nnam ó ngá bee bɔ́ weé yónán ná:
“Á wá!”
Pablo aa kɔ́bɔ ya nkuna bot
37 É tám a ngá bɔ ná bé nkún ke ya ñí á kpatéle été,
ané Pablo a ngá síli komandée ná:
“Ye o ne ma yébe ná me dzó wa dzam enziŋ?”
Éde ñí a ngá síli ñí ná:
“Ye wa yem nkɔ́bɔ griego?
38 Se wa o ne é mwann Egipsio a ngá bɔ ná bé byana edzwée mélú ó mvús a kéñ fe éyáŋŋ été ya beywíñ bot binzuk bí nii?”
39 Ané Pablo a ngá dzó ná:
“Me ne mwann judio,
ye á Tarso ye á sí Silisia,
mɔ́ŋanam ye é kísoan e ne ya eban.
Ma dzaa wa ná ó lík ma ná me kɔ́bɔ ya nnam”
40 Éde,
komandée a ngá lík ñí ná á bɔ dɔ.
Ané Pablo a ngá tébe ékaza,
éde a ngá vé nnam ndem ya wéá.
Niané bot bé ngá mana sis bivóó,
ané Pablo a ngá kɔ́bɔ ya bɔ́ á nkɔ́bɔ Ebreo eé dzó ná: