2 Niané a ngá tóban mebeŋŋ mésí méte,

eé lép bɔ́ ya abwiññ bifíá,

éde a ngá sian á Gresia.

3 Ané ngá tɔbɔ ó véa ngwan é léa.

Éyɔŋ a mbé ná a nkún ke á Siria,

ákoan ná bejudio bé mana tébe Pablo enginiŋe.

Éde a ngá kík ná aa búlán á Masedonia.

4 Ané bé ngá ke léran ya ñí ná:

Sópater [é mwán Pirro],

mot ye á Berea;

ya Aristarko bá Sekundo,

bot béye á Tesalonika;

ya Gayo,

mot ye á Derbe;

ya Tikiko bá Trófimo,

bot béye Ásia;

ya fe Timoteo.

5 Bot béte,

ébɔ́ bé ngá tára ke,

bé ŋga yana bía á Troas.

6 Ve,

bía bí ngá tée á Filipos.

Niané mélú bá dzí mifémm mí ne kaa levadura mé ngá lot,

nia melú mé tán,

éde bí ngá koan ya bɔ́ á Troas,

ané bí ngá tɔbɔ ó véa melú zaŋgbéá.

7 É mos ósúá ye á sóánn,

niané bí ngá mana kóán ná bí kaban mfémm,

ané Pablo a ngá kɔ́bɔ ya bɔ́,

amú a mbé ná a nkún ke é mos ó ngá belan véa.

Éde a ngá kɔ́bɔ ayaáp akekwíñ énzénzaŋ alú.

8 Abwiññ beláma bé mbé é vóm bí mbé bí kóán á ndá ndága ó yóp.

9 Éde ndómán enziŋ é mbé e tɔɔ́ ó wúna e tɔɔ́ eyola ná Eutiko.

Niané Pablo a ngá tsíni eé kɔ́bɔ abwiññ tám,

ané ndómán te óyó ó ngá bíra ñí biñ,

ákoan ná a ntɔɔ́ óyó,

ané a ngá kóbo atéé ye é ndága léa a ku ásí.

Éde bé ngá ke ñí bóro ákoan ná a ntɔɔ́ mbim.

10 Ané Pablo a ngá sigi a límbe ñí áyóp a wúbán fe ya ñí,

éde a ngá dzó ná:

“Míní táa sigan,

amú ná a ngén ntétéá.”

11 Ané Pablo a ngá bera bét,

nia mana kaban mfémm ya ádzí,

éde a ngá kɔ́bɔ ayaáp akekwíñ bíléne bí kírí,

ané a ngá ke.

12 Éde bé ngá ke ya ndómán te ntétéá,

ané bot bése bé ngá bíra tɔbɔ ya mesán.

13 Ané bí ngá ke ósú á byéa été,

éde bí ngá kígán máŋ akekwíñ Ásón ná bí ñɔŋ Pablo ó wéñ,

amú éñe a ngá tsini dɔ néa,

ná émyen aa ke ósí.

14 É tám a ngá nzu tóban ya bía Ásón,

ané bí ngá ñɔŋ ñí á byéa été,

éde bí ngá ke á Mitilene.

15 Atéé ye ó véa,

bí kígán máŋ,

é mos ó ngá belan véa bí lot á Kío á mféŋŋ.

Éde véa,

bí ngá kígán akekwíñ á Samos é mos mbɔ́ɔ́,

[véa bí lot oyomm tám a Trogilio] éwí mbɔ́ɔ́ ó véa,

ané bí ngá sian á Mileto.

16 Amú Pablo aá kík ná aa daŋ Éfeso áyóp á mfá ye ná a nzá bem Ásia,

amú a mbé a belé avóó ná,

ngé é ne bɔban ná á tɔbɔ á Yerusalen é mos Pentekostés.

17 Á Mileto éñe Pablo a ngá bána betébosú béye ékóánn bebwíni ye Éfeso.

18 Éyɔŋ bé ngá nzu ébe éñe,

éde a ngá dzó bɔ́ ná:

“Mína yem atéé ye é mos ósúá mé ngá tára téle mebɔ Ásia,

nzá amvála me ngá tɔbɔ bíabe mína tám áse,

19 meé séan ya Ntí ya nsilann ñúu ósí ya míige ó mís ya mebóblé mé ngá sɔ́ ma,

amú énginiŋe bejudio bé ngá tébe.

20 Meé ndzí ki dzɔgɔ ná ma kat mína é mam mé ne ya eban ya áyágale mína éyéá été,

ya mendá ya mendá.

21 Meé ke ma vé bejudio ya begriego ngañiá ná bé búlán ébe Nzamá,

béé bwíni Ntí wea Yesukristo.

22 Éde áwola dí,

dággán ná ma ke á Yerusalen nsísim weé tsíni ma,

ma kaa ki áyem é dzam dá ye lot ya ma ó wéñ;

23 fáve ná ébe kada kísoan Mfúfúp Nsísim aa vé ma ngañiá eé dzó ná mengara ya bindáglé,

ébyɔ byá yana ma.

24 Ve,

mfá wɔm,

măá daŋ ñú táŋ ná éniŋ dzam é ne ma ya eban enziŋ,

fáve ná me mana ásúk éséññ dam ya éséññ Nzamá me ngá ñɔŋ ébe Ntí Yesus ná me vé mbamba fwéñ ye abwará Nzamá ngañiá.”

25 “Éde áwola dí,

dággán,

ma yem ná mot enziŋ ye ébá bésesé me ngá ke ma kat édzwée ngɔ́mán Nzamá énzénzaŋ deba,

ăá ye bera yén ású dam.

26 Édɔ é ne ná,

é mos wí,

ma kat mína ná me ne nkeññ ébe mékií mé bot bése.

27 Amú meé ndzí dzɔgɔ ná má kat mína nkómánn Nzamá óse.

28 Tɔbɔgán nkée mína bébyen,

ya fe mbamm mítómá Mfúfúp Nsísim,

éñí a téle yaá mína betébosú ná míní baale ékóánn bebwíni Ntí [Nzamá],

édí a ngá wún mfá weñ ya mékií meñ émyen.

29 Ma yem fá ná,

ákoan ná me ke yaá,

bot benziŋ bá ye sɔ́ ébe mína bé tɔɔ́ ané bibyó ná byăá ye dzɔgɔ mbamm mitómá,

30 ya fe ná énzénzaŋ mína bébyen,

bot bá ye tébe béé kɔ́bɔ mbéa bé mam á mfá ye ná bé dulu beyága é ngamm deba.

31 Édɔ é ne ná,

mɔ́mɔŋán míníí síman fe ná táŋ mibú mí léa,

ané alú ané ó mos,

meé ndzí sim ná ma lép kada mot mbɔ́ɔ́ ya mbɔ́ɔ́ ye ébe mína ya míige ó mís.”

32 “Éde áwola dí,

ma kee mína ébe Nzamá ya éfíá abwará deñ,

édɔ é ne mína bɔ ná míní vém ya ávé fe mína ngap énzénzaŋ ye ébá bésesé bé ntɔɔ́ mitɔ́pbán.

33 Meé ndzí ñamle é ngoós ngé é koŋ ngé ki ábwát mot enziŋ.

34 Mína bébyen mína yem ná é mó má mé ngá dzálá míkómánn myám ya émí ébá bíabe bɔ́ bí mbé.

35 Éde,

ébe mam mése me lére yaá mína ná,

amvála te édɔ bá yian bɔ eséññ mfá ávwála biŋgóŋgɔ́ɔ́ bí bot,

ya ásímánn fe bífíá Ntí Yesus émyen a ngá dzó ná:

‘Mvɔmm da daŋ ná o vé ye ná o ñɔŋ.’ ”

36 Niané a ngá mana kɔ́bɔ mam méte ané a ngá kútbe ó sí,

á ŋga yaglan ya bɔ́ bésesé.

37 Éde bésesé bé ngá bíra yi béé wúbán ya Pablo,

béé ñáŋ fe ñí memáŋŋ,

38 bé ŋga daŋ ywian amú éfíá a ngá kɔ́bɔ bɔ́ ná băá ye bera yén ású deñ.

Ané bé ngá ke léran ya ñí akekwíñ á byéa.