2 Véa,

éñe a ngá koan ya mwann Judio,

a tɔɔ́ eyola ná Akila,

ebíbyála ye á Ponto,

ákoan ná a ndem sɔ́ Ítalia bá ngéá Prisila,

amú ná Klaudio a ngá mánan ná bejudio bése bé kólo á Roma.

Ané Pablo a ngá ke koan ya bɔ́.

3 É tɔɔ́ fe ná bábe bɔ́ bé mbé asúkéséññ avɔ́ɔ́,

ná bá lóŋ mendá bíkop bétsít;

éde a ngá tɔbɔ bábe bɔ́ béé bɔ eséññ.

4 Mos mí Sátará míse á sinagoga Pablo a ngá bɔ eé dwaan,

eé dzéŋ ná á wún bejudio,

ya begriego.

5 Niané Silas bá Timoteo bé ngá sɔ́ á Masedonia,

eyɔŋ te Pablo a ngá vé é tám dzeñ áse ná aa kat Efíá,

eé vé bejudio ngañiá ya bébélá ná Yesus éñe a ne Kristo.

6 Ve,

bé ngá sóán béé tea fe ñí.

Éde,

niané a ngá mana sas bítóp byeñ,

ané a ngá dzó ná:

“Mékií menan mé tɔbɔgé á míló myenan áyóp;

me ne nkeññ;

atéé ye áwola dí,

ma ye ke ébe meyɔŋ mefé.”

7 Éde,

niané a ngá kólo ó véa,

a kén ñíi é ndá mot enziŋ a tɔɔ́ eyola ná Tito Justo;

mot te a mbé nkáŋ Nzamá;

é ndá dzeñ da eé mbé fe á sinagoga á mféŋŋ.

8 Éde Krispo,

ntébosú ye á sinagoga,

a ngá bwíni Ntí ya é ndá bot dzeñ ése;

ya fe abwiññ bot béye á Korinto,

nia áwók efíá Nzamá,

bé bwíni,

bé duuban fe.

9 Éde Ntí a ngá dzó Pablo ya nyénánn ye á nsísim á alú ná:

“O táa kɔ wɔŋŋ!

Tsíniŋé ya nkɔ́bɔ!

O táa dzip anu!

10 Amú me ne ébe wa,

abwiññ bot é ne fe ma é kísoan ñí.

Mot enziŋ ñí ăá ye ki wa kee mó ó ñúu ná a dzugu wa.”

11 Ané Pablo a ngá tɔbɔ ó véa táŋ ngúrá mbú ya ngwan é saman,

eé yágale bɔ́ éfíá Nzamá.

12 É tɔɔ́ ná Galión a mbé ŋgɔ́vina ye Ákaya,

éde bejudio bé ngá kwíñ kíŋŋ dea,

bé kéñ Pablo á ngamm áyát ané bé ngá ke ya ñí ébe ású ékóánn bá kík misaŋ;

13 béé dzó ná:

“É mot ñí aa ke aa dzó bot ná bé kaŋ Nzamá amvála nkɔɔ́ métsiŋŋ wăá lére bía.”

14 Niané Pablo a ngá bɔ ná a nkún kúu anu,

éde Galión a ngá dzó bejudio ná:

“Á bejudio,

ngé ábɔ ntéé ngé mora etɔm enziŋ,

é ne nzósoó ná me nzomo mína;

15 ve ngé é ne mam méye bifíá ya biyola ya metsiŋŋ menan,

mína bébyen fasgán dɔ,

măá kómo kík mam méte misaŋ.”

16 Éde a ngá tsílán bɔ́ ékóánn été.

17 Ané bésesé bé ngá biñ Sóstenes ntébosú ye á sinagoga bé ŋga bími ñí ébe ású ékóánn bá kík misaŋ;

ve Galión ĕé ngá bís dzam enziŋ ye été.

18 Éde,

niané Pablo a ngá bera tɔbɔ abwiññ melú ó véa,

ané a ngá yáán ya bebwíni,

a kígán máŋ a kéñ á Siria.

Prisila bá Akila bé mbé fe bábe bɔ́.

Á Senkrea,

éñe Pablo a ngá keŋban ntwíññ amú átsiŋŋ émyen a ngá tsini.

19 Éde bé ngá sian Éfeso,

ané a ngá lík bɔ́ ó véa.

Éde ñí a ngá ñíi á sinagoga,

eé dwaan bábe bejudio.

20 Ané bé ngá dzaa ñí ná á tɔbɔ bábe bɔ́ abwiññ tám,

ve eé ndzí dɔ yébe,

21 ve déá a ngá yáán eé dzó ná:

[Ma yian tɔbɔ á Yerusalen ná me dzémle é fét da nzu].

“Ve,

ngé Nzamá aa yébe,

ma ye mína bera fép eyɔŋ efé.”

Ané a ngá tée Éfeso.

22 Éde a ngá sian á Sesarea,

niané a ngá ke bérán ya ekóánn bebwíni,

ané a ngá sigi Ántiokia.

23 Niané a ngá mana lot tám enziŋ ó véa,

éde a ngá kólo,

eé túga ke aa boman ábeŋŋ sí ye á Galasia,

ya édí ye á Frigia,

eé ke aa yém beyága bése.

24 Éde ebíbyála mwann judio enziŋ ye Álejandria é ngá sian Éfeso é tɔɔ́ eyola ná Apolos,

a mbé fe nkékéŋŋ nkɔ́bɔ ya nyem Mitsilann.

25 Mot te,

bot bá bíra ñí mana yága é nzenn Ntí,

a mbé a belé nguu á nlém,

ané a ngá kɔ́bɔ ya áyágale bot é mam Yesus nzósoó,

afáŋbɔ ná a ngá yem fáve nduann Juan.

26 Ané mot te a ngá tára kɔ́bɔ kaa ákɔ wɔŋŋ á sinagoga été.

Ve,

niané Prisila bá Akila bé ngá wók ané aa kɔ́bɔ,

éde bé ngá ke ya ñí évwíñ.

Ané bé ngá túga ñí sóŋan tételé é nzenn Nzamá.

27 Éyɔŋ Apolos te a ngá kómo ke Ákaya,

éde bebwíni bé ngá vé ñí dɔ nguu,

bé tsili fe beyága béye ó wéñ kálara ná bé ñɔŋ ñí.

Niané a ngá sian ó véa,

ané a ngá bíra vwála é bot bé ngá mana bwíni amú é mvɔmm Nzamá.

28 Amú ná a ngá daŋ kpéá bejudio éyéá été,

eé lére á mitsili été ná Yesus éñe a ne Kristo.