Pablo bá Silas bé ne a Tesalonika
17
Niané bé ngá mana lot Ánfípolis ya Apolonia,
éde bé ngá sian á Tesalonika é vóm bejudio bé mbé bé belé sinagoga.
Hechos 17.1-13
2 Ané Pablo a ngá ke ñíi á sinagoga eé kóán bábe bejudio amvála ané é mbé ñí fúlú;
éde Besátará bé léa a ngá kéá bábe bɔ́ mam méye mítsili été,
3 á ŋga kúu mitsili eé lére bɔ́ ná,
é ngá yian ná Kristo á dzuk,
a wómo fe á miwúán été,
ya ná:
“É Yesus ma kat mína fwéñ ñí,
éñe a ne Kristo.”
4 Ané bot benziŋ béye ébe bɔ́ bé ngá yébe fwéñ te,
éde bé ngá fulan bábe Pablo ya Silas;
ya é mora nkuna bé Griego ó ngá kɔ Nzamá wɔŋŋ,
ya fe bora bé biningá.
5 Ve,
bejudio bá bé ngá tɔbɔ ndzálánn ya evínn,
éde bé ngá ñɔŋ bembéa bé bot béye á nseŋ,
ná bábe bɔ́,
bé bɔ nkuna bot,
bé ŋga bɔ nzɔgɔ á kísoan.
Éde bé ngá ñíi é ndá Jasón ya nguu ná bá dzéŋ Pablo bá Silas á mfá ye ná bé kee bɔ́ nkuna bot te.
6 Niané bé ngá bɔ kaa ákoan ya bɔ́,
ané bé ngá ke bá dulu Jasón ya bebwíni benziŋ ébe bedzwée béye á kísoan béé yónán ná:
“É bot bé mana yaá ndágle eniŋ ngúrá bá,
bé sɔ́ yaá fe ó vá.
7 Jasón ñí a ñɔŋ yaá bɔ́ é ndá dzeñ;
bot béte bése bá bɔ é mam mé ne métsiŋŋ Sesar á ngamm áyát;
bá dzó fe ná kéza mfé a ne,
éñe a ne Yesus.”
8 Niané nkuna bot ya bedzwée béye á kísoan bé ngá wók dɔ,
éde bé ngá nzaman.
9 Niané bé ngá ñɔŋ Jasón ya é bot bevɔ́ɔ́ alamán,
bé dzáma bɔ́.
Pablo bá Silas bá ke á Berea
10 Éde etéññ te ébyen,
á alú bebwíni bé ngá dzíga lóm Pablo bá Silas á Berea.
Niané bé ngá sian ó véa,
ané bé ngá ñíi á sinagoga bejudio été.
11 Béjudio bé mbé ó véa,
bé mbé añep ádaŋ ébá béye á Tesalonika,
amú ná bé ngá ñɔŋ éfíá Nzamá ya nló ntakgán,
béé fas mitsili kada mos,
mfá ádága ngé mam méte mé mbé néa.
12 Éde abwiññ bot béye été bé ngá bwíni,
ya fe bora bé biningá bégriega ya abímm befám.
13 Ve,
niané bejudio béye á Tesalonika bé ngá yem ná Pablo á ŋga kat yaá fe éfíá Nzamá á Berea,
ané bé ngá ke ó wéñ ná bá ke fuk ya ándágle bot.
14 Éde etéññ te ébyen bebwíni bé ngá dzíga lóm ná Pablo á ke akekwíñ á nsá máŋ;
ve,
Silas bá Timoteo bé ngá lígi ó véa.
Hechos 17.14-34
15 Ané é bot bé ngá ke léran ya Pablo,
bá ke ya ñí akekwíñ Átenas.
Niané a ngá mánan bɔ́ ná Silas bá Timoteo bé dzíga ke koan ya ñí,
éde bé ngá búlán.
Pablo a ne Átenas
16 É tám Pablo a ngá yana bɔ́ Átenas,
nsísim weñ ó ŋga yóŋ ñí été niané a ngá yén kísoan e tɔɔ́ ndzálánn ya biyemá.
17 Édɔ é ne ná,
á sinagoga,
Pablo a ngá bɔ eé dwaan bábe bejudio ya é bot bá kɔ Nzamá wɔŋŋ,
á mora nseŋ mákít kada mos ñí ya é bot bé ngá bɔ béé lot ó véa.
18 Éde é bot bá dziŋ nyemann benziŋ Bipikureo ya Bistoiko bé ngá bɔ mikéá bábe Pablo.
Bevɔ́ɔ́ benziŋ béé dzó ná:
“Mfɔfɔ́p wí,
wá kómo dzó á yá?”
Ébá bevɔ́ɔ́ bá ná:
“Bí téa ñí ané nkat fwéñ biyágán benzamá.”
Amú ná a ngá kat é fwéñ Yesus ya nwómán miwúán.
19 Ané bé ngá ñɔŋ ñí,
bé kéñ ya ñí Áreópago,
béé síli ñí ná:
“Ye bí ne yem nzá mfefeñ áyágalé wa vé dí?
20 Amú ná wa sɔ́ ya bía biyágán bí mam binziŋ á melɔ́ mea,
éde bía kómo yem mam méte má kómo yíli á yá?”
21 Bot bése béye Átenas ya béyéŋ bé mbé ó véa,
bĕé ngá bɔ béé lot é tám deba ébe dzam enziŋ afé,
fáve ná bá wók ngé ki ákɔ́bɔ mfefeñ dzam enziŋ afé.
22 Ané Pablo a ngá tébe tételé énzénzaŋ Áreópago eé dzó ná:
“Á bot béye Átenas,
me téa ná,
mína daŋ ñɔŋ míyébé míse.
23 Amú ná,
meé lot á nseŋ,
meé túga fe dága mévóm mína kaŋ benzamá,
ané mé koan ya eyemá evɔ́ɔ́,
é tɔɔ́ ntsilann ná:
‘Mfá é Nzamá bot bé ne kaa áyem.’
Édɔ é ne ná,
é Nzamá mína kaŋ kaa ñí áyem,
Nzamá te éñe ma kat mína fwéñ.”
24 “Nzamá te,
éñe a ngá vele eniŋ ya é dzóm áse é ne été.
Éñe a ne Ntí ye á dzóp ya sí,
ăá tɔbɔ ki bétemplo bá lóŋ ya mó,
25 băá séan ki ya ñí ya mó,
amvála ané ngé aa yi dzóm enziŋ;
amú ná,
éñe aa vé byém bíse eniŋ,
ya mvebe,
ya mam mése.”
26 “Ébe mot mbɔ́ɔ́ éñe a ngá bɔ meyɔŋ mé bot mése á mfá ye ná mé tɔbɔ á sí áse;
aa tára mana téle métám ya mévóm má ye bɔ bítɔbɔga byeba;
27 á mfá ye ná mé dzéŋ Nzamá,
ná ngé má ke má bóp mé koan ya ñí amvála enziŋ;
afáŋbɔ ná,
ñí a sés ki mot enziŋ ye ébe bía oyaáp.
28 Amú ná,
éñe bía niŋ ya áfógan ébe éñe,
bí ne fe ébe éñe;
amvála ané béyem mikaná benan bá bé dzó yaá fe ná:
‘Amú ná bía bí ne fe é mvɔŋ dzeñ.’
29 Édɔ é ne ná,
bí tɔɔ́ é mvɔŋ Nzamá;
bĭá yian tém ná nswánn weñ ó ne bɔ efonann ya éyemá é ne mbɔann ya koŋ,
ngé ngoós,
ngé akwá,
amú akéŋŋ ya ósímánn bot.
30 É tɔɔ́ ná,
Nzamá a lot yaá metám méye á ndzímán áyóp.
Áwola dí,
aa mánan ná,
mevóm mése bot bése bé dzoban;
31 amú ná,
a téle yaá mos mbɔ́ɔ́ ná aa kík eniŋ ngúrá misaŋ ya nzósoó ébe Mot Mbɔ́ɔ́,
éñe fe a téle yaá,
amvála te a ngá lére dɔ bot bése,
éyɔŋ a ngá wómo ñí á miwúán été.”
32 Niané bé ngá wók adzó nwómán miwúán,
ané bé ngá tára ná bá biñ nzem;
ve,
ébá bevɔ́ɔ́ bá bé ngá dzó ná:
“Bí mbera wók dzam te eyɔŋ efé.”