Pablo aa ke ya Timoteo
16
Éde fe Pablo a ngá sian á Derbe,
ya á Listra;
nyága enziŋ a mbé ó véa,
a tɔɔ́ eyola ná Timoteo.
Ñiá a mbé mbwíni ngwan Judia;
ve,
éséá ñí a mwann griego.
2 Timoteo te a mbé a belé mbamba ngañiá énzénzaŋ bebwíni béye á Listra,
ya Íkonio.
3 Pablo a ngá kómo ná bá ñí bé ke.
Éde a ngá ñɔŋ ñí,
a kele fe ñí,
amú béjudio bé mbé mevóm méte,
akála ná bésesé bé ngá yem ná éséá a mbé mwann griego.
4 É tám bé ngá ke bá lot békísoan,
bé ngá ke bá kat bɔ́ ná bé baale míkíkgán baapostol,
ya betébosú bé ngá mana kík á Yerusalen.
5 Amvála te bíkóánn bebwíni bí ngá mana biñ nguu á mbwínánn été,
táŋ bebwíni da é ŋga vém fe kada mos.
Pablo aa lot á Masedonia
6 Éde bé ngá kígán ábeŋŋ sí ye á Frigia ya Galasia;
a tɔɔ́ ná,
Mfúfúp Nsísim a ngá kili bɔ́ ná bé táa kat efíá Asia.
7 Éde,
niané bé ngá sian á Misia,
bé ŋga vak ná bá ñíi á Bitinia;
ve,
Nsísim Yesus weé ndzí bɔ́ dɔ lík.
8 Ané bé ngá lot á Misia,
bé sis ósí á Troas.
9 Éde Pablo a ngá yén á nyénánn ye á nsísim été á alú mot enziŋ ye á Masedonia a téle tételé,
eé bíra dzaa Pablo ná:
“Nzaá á Masedonia ná o vwála bía.”
10 Niané Pablo a ngá yén dɔ,
ané bí ngá yem mvéáñ ná Nzamá a lwée yaá bía ná bí kat bɔ́ mbamba fwéñ.
Éde etéññ te ébyen,
a ngá dzéŋ ná bí ke á Masedonia.
Pablo bá Silas bá ke á Filipos
11 Éde bí ngá tée á Troas,
bí kéñ tételé á Samotrasia,
é mos ó ngá belan véa,
bí kéñ á Neápolis.
Hechos 16.11-40
12 Akólo ye ó véa,
bí kéñ á Filipos,
é kísoan e ne ya eban ábeŋŋ sí ye á Masedonia.
Beromano ébɔ́ bé ngá dzwée dɔ.
Ané bí ngá lot melú menziŋ ó véa.
13 É mos Sátará,
ané bí ngá kwíñ á kísoan átán,
bí kéñ bebeñ óswíñ,
é vóm bí ngá tém ná bá bɔ béé yaglan.
Éde bí ngá tɔbɔ ósí,
bí ŋga kɔ́bɔ ya é biningá bé ngá mana kóán ó véa.
14 Miningá enziŋ a ngá béá,
a tɔɔ́ eyola ná Lidia;
a mbé nkuan bítóp bí ne ededea mvéáñ [púrpura],
miningá ye á kísoan Tiatira,
a ngá kaŋ fe Nzamá.
Éde Ntí a ngá kúu ñí nlém ná á túga béá édí Pablo a ngá kɔ́bɔ.
15 Niané a ngá duuban ya é ndá bot dzeñ,
ané a ngá bíra dzaa ná:
“Ngé mína ñɔŋ ná me ne mbwíni Ntí,
ñíigán é ndá dzam ná míní tɔbɔ ó véa.”
Ané a ngá wún bía.
16 A ngá bɔ ná,
é tám bí ngá ke é vóm bí ngá bɔ bíí yaglan,
éde oloá ngwan miningá enziŋ ó mbé ó belé nsísim ndendee,
ó ngá nzu koan ya bía.
Ngwan miningá te e ngá bɔ deé vé bémása béñ abwiññ abúánn ya mbɔann aŋgaŋ.
17 Ngwan miningá te e ngá nzu da bee bíabe Pablo,
deé yónán deé dzó ná:
“É bot bá kat mína fwéñ nzenn ye ákoroga bá,
bá séan ya é Nzamá aá daŋ oyaáp ó yóp.”
18 Niané a ngá bɔ eé bɔ dzam te abwiññ melú,
éde ákoan ná dá é ŋga bíra yaá ndágle Pablo,
ané a ngá veŋan eé dzó nsísim te ná:
“Ya éyola Yesukristo,
ma mánan wa ná,
kólogé ébe éñe.”
Ané ó ngá kólo etéññ te ébyen.
19 Ve,
niané bémása béñ bé ngá yén ná oyan ye ábúánn deba é kólo yaá,
éde bé ngá biñ Pablo bá Silas,
bé kéñ bá dulu bɔ́ akekwíñ á nseŋ mákít été ébe betébosú,
é vóm bá kík medzó.
20 Éde bé ngá téle bɔ́ ébe ású bekík medzó,
ané bé ngá dzó ná:
“É bot bá,
bá ndágle é kísoan dea,
a tɔɔ́ ná bé ne bejudio.
21 Bá yágale bía méfúlú bía beromano atsiŋŋ dea dăá yébe ná bí ñɔŋ,
ngé ki ávú.”
22 Éde nkuna bot ó ngá tébe bɔ́ á ngamm áyát;
véa,
niané bekík medzó bé ngá ñap bɔ́ bitóp,
ané bé ngá mánan fe ná bé yít bɔ́ ya mikás.
23 Niané bé ngá mana bɔ́ yít abwiññ,
éde bé ngá fet bɔ́ á mbok,
bé mánan nkálá mibok ná á túga bɔ́ kálá.
24 Niané ñí a ngá ñɔŋ nlómánn te,
ané a ngá ke bɔ́ á fet ódzídzina á ndá été,
a ká fe bɔ́ mebɔ ábom élé.
25 Ve,
bebeñ ané énzénzaŋ álú,
Pablo bá Silas bé ŋga yaglan ya áyee Nzamá byeá,
mibok myá mí ŋga wók fe bɔ́.
26 Éde,
etéññ te ébyen sí e ngá bíra sukban,
ané mbókga ndá mibok ó ngá fógan.
Áwola te ébyen,
éde mibéñ míse mí ngá mana yɔ́ŋbe,
bekalamekéná bá bé mana fe swálán mibok míse.
27 Niané nkálá mibok a ngá vee óyó,
a yén fe mibéñ míye á ndá mibok mí yɔ́ɔ,
éde a ngá twáa nzwaokeŋ ná a nkún ywíñ émyen,
eé tém ná mibok mí mana yaá túp.
28 Ve,
Pablo a ngá yónán oyaáp ó yóp eé dzó ná:
“O táa bɔ wámyen mbéa dzam enziŋ,
amú ná bía bésesé bí ne ó vá.”
29 Éde a ngá dzaa ná bé lére ñí eyéá.
Ané a ngá ñíi mbíí eé ku ngom,
a kútbe ó sí ébe ású Pablo bá Silas.
30 Éde a ngá ke ya bɔ́ átán,
a síli bɔ́ ná:
“Á bot,
ma yian bɔ á yá á mfá ye ná me tɔbɔ nkoránn?”
31 Ané bé ngá yalan ñí ná:
“Bwíniŋé Ntí Yesus,
véa éñe,
wa ye tɔbɔ nkoránn,
wa ya é ndá bot dzwe.”
32 Éde bé ngá kat ñí éfíá Ntí ya bot bése béye é ndá dzeñ.
33 Niané a ngá ñɔŋ bɔ́ áwola te ébyen á alú,
a mana fe bɔ́ sop mevéŋŋ,
etéññ te ébyen ané a ngá duuban,
éñe ya é mvɔŋ dzeñ áse.
34 Éde a ngá ke ya Pablo bá Silas á ndá,
a kom bɔ́ téble ya bidzí,
eé bíra fe sán ná a bwíni yaá Nzamá ya é ndá bot dzeñ ése.
35 Niané kírí é ngá léne,
éde bekík medzó bé ngá lóm benzima ná,
bé ke dzó ná:
“Dzámaŋé bot béte.”
36 Ané nkálá mibok a ngá kat Pablo bifíá bíte ná:
“Bekík medzó bé lóm ná,
bé dzáma mína.
Édɔ é ne ná,
áwola dí,
kwíñŋán míní kéñ fe mvwaá.”
37 Ve,
Pablo ñí a ngá dzó bɔ́ ná:
“Bé ngá tára bía mana yit éndendaŋ été,
a tɔɔ́ ná bí ne beromano,
ébɔ́ kaa bía átára kík misaŋ,
bé fet yaá bía á mbok.
Éndagá ye bé ŋga kúlu yaá bía ásweññ?
É sés bɔban amvála enziŋ!
Bébyen bé nzá bía kúlu átán.”
38 Éde,
benzima bé ngá ke kat bekík medzó bifíá bíte.
Niané bé ngá wók ná Pablo bá Silas bé ne beromano,
ané bé ngá kɔ wɔŋŋ.
39 Niané bé ngá sɔ́,
bé dzaa bɔ́ bidzwiigá,
béé kúlu fe bɔ́,
ané bé ngá dzaa bɔ́ engóngɔ́ɔ́ ná bé kólo á kísoan été.
40 Éde,
niané bé ngá kwíñ á mbok,
ané bé ngá ke é ndá Lidia.
Niané bé ngá yén bebwíni,
bé mana fe bɔ́ lép,
ané bé ngá ke.