Bá bɔ ekóánn á Yerusalen
15
Éde bot benziŋ bé ngá sigi á Judea,
bé ŋga yágale bebwíni ná:
“Ngé mína kaa ákíkban mekeé amvála ané métsiŋŋ Moisés má dzó,
míní sés tɔbɔ nkoránn.”
Hechos 15.1-35
2 Ané Pablo bá Bernabé bé ngá bɔ abwiññ mikɔ́bɔ ya bisó bábe bot béte.
Éde bé ngá bán ná Pablo bá Bernabé ya bebwíni benziŋ bé ke ébe baapostol ya betébosú á Yerusalen mfá ákéá dzam te.
3 Niané ekóánn bebwíni é ngá lóm bɔ́ ané bé ngá lot á Fenisia ya Samaria,
béé ke bá kaŋle ámvála meyɔŋ mefé mé ngá bwíni Nzamá;
éde dzam te é ngá bíra vé bebwíni bése mesán.
4 É tám bé ngá sian á Yerusalen,
ané ekóánn bebwíni,
ya baapostol,
ya betébosú bé ngá ñɔŋ bɔ́.
Éde Pablo bá Bernabé bé ngá mana kat fwéñ é mam mése Nzamá a ngá bɔ́ ébe ébɔ́.
5 Ve,
bebwíni benziŋ béye bé ngá tára bɔ á nyébé befariseo bé ngá tébe béé dzó ná:
“Bá yian bɔ́ kík mekeé,
bé mánan fe bɔ́ ná bé dzálá métsiŋŋ Moisés.”
6 Ané baapostol ya betébosú bé ngá bɔ ekóánn mfá átée dzam te.
7 Niané bé ngá kɔ́bɔ ayaáp éde Pedro a ngá tébe,
a dzóo bɔ́ ná:
“Á bɔbédzaŋ,
mína yem amvála ané Nzamá a ngá tɔ́p ma mélú ó mvús énzénzaŋ denan été,
á mfá ye ná ébe ánu dam,
meyɔŋ mefé mé wók mbamba fwéñ,
mé bwíni fe.
8 Ané é Nzamá aa yem milém mi bot,
a ngá vé ngañiá ná aa ñɔŋ bɔ́ a vé bɔ́ Mfúfúp Nsísim ntéññ mbɔ́ɔ́ ané bía.
9 Nzamá eé ndzí ki bɔ obea ngamm ébe bɔ́ ya bía,
éde a ngá fúbu mílém myeba ya mbwínánn.
10 Áwola dí,
amú dzé mína bóble Nzamá,
ná mína kele é kíŋŋ bebwíni mbaga ó ne ná,
atwaa betará ya bía bébyen bĭí mbé wɔ́ nzomo?
11 Ve,
bía bwíni ná bí ne nkoránn amú é mvɔmm Ntí Yesus,
ntéññ mbɔ́ɔ́ fe ané ébɔ́.”
12 Ané ekóánn bot ngúrá é ngá sis evóó,
bé ŋga béá ané Bernabé bá Pablo bé ngá kaŋle ábímm mendem ya bora biyágán bí mam Nzamá a ngá bɔ ébe bɔ́ á meyɔŋ mefé été.
13 Niané bé ngá mana sis evóó,
éde Jakobo a ngá yalan ná:
“Á bɔbédzaŋ,
béágán ma.
14 Simón a kaŋle yaá amvála ané Nzamá aá fép meyɔŋ mefé éyɔŋ ósúá,
ná á ñɔŋ énzénzaŋ deba ngúrá ayɔŋ mfá eyola deñ.
15 Dzam te dá vegan fe ya bífíá bekúlu medzó,
amvála ané é ne ntsilann ná:
16 ‘Niané mam méte má lot,
ma ye bera lóŋ é ndá bot David é ngá tsam.
Ma ye bera lóŋ é mvɔŋ bot dzeñ,
ma ye dɔ bera téle.
17 á mfá ye ná méyɔŋ mése mevɔ́ɔ́ mé ngá lígi,
émá ékígá dam é ntɔɔ́ ébe bɔ́,
bé dzéŋ Ntí.
18 Ntí,
éñí aá bɔ é mam má,
aa dzó ná,
bé yem yaá mɔ mbéámbéá.’ ”
19 Ya dzam te,
ma kík ná bé táa ndágle é bot bá búlán ébe Nzamá méyɔŋ mefé été.
20 Ve déá,
bé tsili bɔ́ kálara ná bé táa kop nkaŋann biyemá ya nsémm eveák ya ndzíán é tsít da wú abúk ya fe mekií.
21 Amú ná atéé ye myee bot ókuá,
bá kat fwéñ nkɔɔ́ métsiŋŋ Moisés ébe kada kísoan,
béé láŋ fe mɔ á besinagoga kada Sátará.
Bá lóm bebwíni bé sés bejudio kálara
22 Éde véa,
baapostol,
ya betébosú,
ya ekóánn bebwíni áse bé ngá yén mvéáñ ná bé tɔ́p bot benziŋ énzénzaŋ deba ná bé lóm bɔ́ Ántiokia ya Pablo bá Bernabé;
bé mbé ná:
Judas,
éñe fe bé ngá lwée ná Barsaba;
ya Silas.
Bot béte bé mbé betébosú énzénzaŋ bebwíni.
23 Ané bé ngá lóm bɔ́ ya é kálara ñí:
“Á bebwíni míní ne á meyɔŋ mefé été;
Ántiokia,
ya Siria,
ya Silisia;
bía baapostol,
ya betébosú,
ya bebwíni,
mbólán.
24 É tɔɔ́ ná bía wók fwéñ ná,
bot benziŋ béye ébe bía,
baá ke mína ndágle ya bifíá,
béé nzaman mína;
se bía bía lóm bot béte [béé dzó fe mína ná mína yian keleban ya ádzálá metsiŋŋ].
25 Édɔ é ne ná,
niané bí kwíñ kíŋŋ,
ané bí yén mvéáñ ná bí tɔ́p bot bí lóm bɔ́ ébe mína bábe míndzindziŋŋ mí bɔbédzaŋ Bernabé bá Pablo.
26 Bot béte,
bé kee yaá bíniŋ byeba ákála éyola Ntí wea Yesukristo.
27 Édɔ é ne ná,
bí lóm yaá Judas bá Silas;
ébɔ́ ya bifíá,
bá ye túga kaŋle mam mevɔ́ɔ́ á mevɔ́ɔ́ méte.
28 Amú ná,
bíabe Mfúfúp Nsísim bí yén mvéáñ ná,
bí táa mína bera vé mbaga enziŋ,
fáve é mam má,
émɔ má yian.
29 Míní táa kop ndzíán é byém bé vé yaá biyemá metúnŋa,
ya mekií mé tsít,
ya bétsít bá wú abúk,
ya nsémm eveák;
ngé míní ki mam méte,
mína bɔ mvéáñ.
Mvwaá ya mína.”
30 Éde bé ngá mana yáán ya bɔ́,
bé kéñ Ántiokia;
ané bé ngá mana kóán bot,
bé kee bɔ́ kálara.
31 Niané bá bé ngá láŋ ñí,
éde bé ngá sán amú melépgá méte.
32 Judas bá Silas,
bé tɔɔ́ fe bekúlu medzó,
ya abwiññ bífíá bé ŋga vwála mílém bebwíni ya áyéme fe bɔ́.
33 Niané bé ngá lot oyomm tám enziŋ ó véa,
ané bebwíni bé ngá yáán ya bɔ́ á mvwaá été,
á mfá ye ná bé búlán ébe é bot bé ngá lóm bɔ́.
34 [Ve,
Silas a ngá kík ná a lígi.]
35 Ve,
Pablo bá Bernabé bá bé ngá lígi Ántiokia,
béé yágale éfíá Ntí béé kat fe mbamba fwéñ ya abwiññ bot afé.
Pablo bá Bernabé bá kánan
36 Niané ayomm melú enziŋ é ngá lot,
ané Pablo a ngá dzó Bernabé ná:
“Bí beragá ke bía fép bebwíni á kísoan áse bí ngá kat éfíá Ntí,
á mfá ye ná bí yén ámvála bé né.”
Hechos 15.36-16.10
37 Bernabé a ngá kómo fe ke ya Juan,
éñí bé ngá lwée ná Markos.
38 Ve,
Pablo ñí ĕé ngá yén mvéáñ ná,
bé ke ya Markos te,
amú ná aá lík bɔ́ etámm á Panfilia,
eé ndzí ki kómo tsini ná á bɔ eséññ bábe bɔ́.
39 Éde metsamann menén mé ngá bɔ énzénzaŋ deba;
édɔ bé ngá kánan mbɔ́ɔ́ ébe éñí mbɔ́ɔ́.
Véa,
Bernabé a ngá ñɔŋ Markos a kígán máŋ a kéñ á Tsípre
40 Ané Pablo ñí a ngá tɔ́p Silas.
Niané ekóánn bebwíni é ngá mana yáán ya ñí ábwará Ntí été,
éde a ngá ke.
41 Ané a ngá ke aa wulu Siria ya Silisia eé ke aa vé bíkóánn bebwíni nguu.