Bá yáán ya Bernabé bá Saulo
13
Ékóánn bebwíni é mbé Ántiokia,
é mbé é belé bekúlu medzó ya beyágale:
Bernabé;
ya Simeón éñí bé ngá lwée ná Nsút Mot;
ya Lusio mot ye á Sirene;
ya Manaén éñí bá Erodes Antipas bé ngá vém vóm mbɔ́ɔ́;
ya Saulo.
Hechos 13.1-13
2 É tám bé ngá dzémle ekóánn bá kaŋ Ntí,
béé ki bidzí,
ané Mfúfúp Nsísim a ngá dzó ná:
“Kánaŋán ma Bernabé bá Saulo mfá éséññ me lwée yaá bɔ́.”
3 Éde niané bé ngá mana ki bidzí,
béé yaglan fe,
ané bé ngá bere bɔ́ mó,
bé lóm bɔ́.
Bernabé bá Saulo bá ke á Tsípre
4 Niané Mfúfúp Nsísim a ngá lóm bɔ́,
ané bé ngá ke á Seleusia;
véa,
éñe bé ngá kígán máŋ bé kéñ á Tsípre.
5 Niané bé ngá sian á Salamina,
bé ŋga kat efíá Nzamá á besinagoga bejudio.
Bé mbé bé belé fe Juan ané mvwála weba.
6 Niané bé ngá mana tóban etuŋŋ áse akekwíñ á Pafos,
ané bé ngá koan ya mot enziŋ a tɔɔ́ mwann judio,
mbɔ mekeŋŋ,
nnéneá nkúlu medzó,
a tɔɔ́ eyola ná Barjesus.
7 Mot te,
a mbé bá ndzwée Sergio Paulo,
mfefák mot.
Éde Sergio te a ngá lóm ná bé lwée Bernabé bá Saulo amú ná a ngá dzéŋ ná á wók éfíá Nzamá.
8 Ve,
Elimas,
néa fe éyola mbɔ mekeŋŋ te é ngá yíli,
ñí á ŋga dzip bɔ́,
eé dzéŋ fe ná ndzwée a nza bwíni.
9 Ve,
Saulo éñe fe a ne Pablo,
a tɔɔ́ ndzálánn ya Mfúfúp Nsísim,
éde a ngá bem Simón te mís,
10 a dzóo ñí ná:
“Á wa,
o ne ndzálánn ya meduk mése,
ya abé áse,
é mwán déble.
Wa síŋ fe nzósoó áse!
Ye wăá ye dzɔgɔ ná wa nzaman bétételé menzenn Ntí?
11 Dággé áwola dí,
é wéá Ntí ó ne wa á ngamm áyát!
Wa nzu tɔbɔ ndzímm kaa áyén nlódzóp oyomm tám.”
Etéññ te ébyen ané dzíbi ya nkút bí ngá ku ñí ó mís,
á ŋga ke aa vút eé dzéŋ é mot enziŋ aa ke ya ñí énam.
12 Niané ndzwée a ngá yén é dzam é ngá bɔban,
éde a ngá bwíni eé kám áyágalé Ntí.
Pablo bá Bernabé bá ke Ántiokia Pisidia
13 Niané Pablo ya nsámá bot weñ bé ngá tée á Pafos,
ané bé ngá ke sim á Perge Panfilia,
éde Juan a ngá kánan bábe bɔ́,
a búlán á Yerusalen.
14 Ané bé ngá lot Perge,
bé sian Ántiokia Pisidia.
Véa,
niané bé ngá ñíi á sinagoga été é mos Sátará,
éde bé ngá tɔbɔ ósí.
Hechos 13.14-52
15 Niané bé ngá mana láŋ nkɔɔ́ métsiŋŋ ye émá bekúlu medzó,
ané betébosú béye á sinagoga bé ngá lóm ná bé dzó bɔ́ ná:
“Á bɔbédzaŋ,
ngé míní belé efíá melépgá enziŋ mfá bot,
kɔ́bɔgán dɔ.”
16 Éde Pablo a ngá tébe,
a vé ndem ya wéá,
a dzóo ná:
“Á befám béye Israel ya é bot bá kɔ Nzamá wɔŋŋ,
béágán.
17 É Nzamá ayɔŋ Israel dí,
aá tɔ́p betará;
ané a ngá bére bɔ́ ó yóp bé tɔɔ́ beyéŋ á sí ye Égipto,
éde a ngá vea bɔ́ á sí te ya éwólo wéá deñ.
18 A ngá nzomo bɔ́ éyáŋŋ été táŋ ané mibú mewóm mé nii.
19 Niané a ngá mana tsam meyɔŋ zaŋgbéá á sí ye á Kanaán,
ané a ngá kee bɔ́ sí te,
ná eé bɔ é ngap deba.
20 Dzam te áse é mbé táŋ mibú mitet mí nii ya mibú mewóm mé tán.”
“Véa,
a ngá vé bɔ bekík medzó,
akekwíñ ébe nkúlu medzó Samuel.
21 Akólo ye ó véa éde bé ngá dzaa kéza,
ané Nzamá a ngá vé bɔ́ Saúl,
é mwán Sís,
mot ye áyɔŋ Benjamín;
táŋ mibú mewóm mé nii.
22 Niané Nzamá a ngá vea ñí,
éde a ngá téle bɔ́ kéza David,
éñe fe a ngá vé ngañiá eé dzó ná:
‘Me yén yaá David,
é mwán Esaí ná,
a ne é mot nlém wɔm wá dziŋ;
éñe aa ye bɔ nkómánn wɔm óse.’
23 Éde,
ébe é mvɔŋ David,
Nzamá a sɔ́ yaá ya Nkoro bot Israel,
Yesus,
amvála ané ngaá é mbé.
24 Kaa ná Yesus á sian,
Juan a ngá tára kat bot béye Israel bése fwéñ ná bé duuban á mfá ye ná bé dzoban misémm.
25 Éyɔŋ Juan a ngá bɔ ná,
á ŋga mana yaá éséññ deñ,
éde a ngá dzó ná:
‘Mína tém ná me ne nzá?
Me sés éñí.
Ve,
dággán mot aa nzu ma á mvús,
me se mot ye a ne ñí tsii mengop mébɔ.’ ”
26 “Á bɔbédzaŋ béye é mvɔŋ bot Abraam,
ya é bot bá kɔ Nzamá wɔŋŋ bé ne énzénzaŋ denan,
bía bé ngá lóm éfíá ákoroga dí.
27 Amú ná é bot bé tɔɔ́ á Yerusalen ya bétébosú beba,
ébɔ́ kaa áyem Yesus,
kaa ki ábís bífíá bekúlu medzó bá láŋ kada Sátará,
bé ngá dzálá byɔ é tám bé ngá vé ñí meku.
28 Afáŋbɔ ná,
ébɔ́ kaa áyén étɔm enziŋ ná a ngá yian wú,
bé ngá dzaa Pilato ná á ywíñ Yesus.
29 Niané bé ngá mana dzálá é mam mése mé mbé ntsilann mfá Weñ,
ané bé ngá sili ñí élé,
bé dzep ñí ó sɔŋ.
30 Ve,
éde Nzamá a ngá wómo ñí miwúán été.
31 Á ŋga yéne táŋ abwiññ melú ébe é bot bábe bɔ́ bé ngá tée á Galilea akekwíñ á Yerusalen;
éde áwola dí,
bot béte bé ne béngañiá béñ á bot été.”
32 “Bía kat fe mína mbamba fwéñ ná,
é ngaá bé ngá kyaa betará,
33 Nzamá a dzálá yaá bía dɔ,
bía é bot bí ne é bwán beba;
aá bɔ dɔ,
niané a ngá wómo Yesus,
amvála ané é ne ntsilann á Salmo beáñ ná:
‘Wá o ne é mwán wɔm,
me byéñ yaá wa émuú.’
34 Édí é ne ná Nzamá aá wómo ñí míwúán été ná á bɔ kaa ábera wú,
a ngá dzó dɔ aaná:
‘Ma ye mína vé mífúfúp ya bébélá mengaá me ngá kyaa David.’
35 Amú dzam te,
aa bera fe dzó á Salmo mfé ná:
‘Wăá ye lík ná ntɔ́pbán mot we ó bweñ.’
36 Amú ná,
niané David a ngá mana séan ya myee bot weñ á nkómánn Nzamá été,
ané a ngá ke óyó [áwú],
éde bé ngá dzep ñí énzénzaŋ beéséá été,
é ñúu deñ da e mana fe bweñ.
37 Ve,
éñí Nzamá a ngá wómo míwúán été,
eé ndzí bweñ.
38 Á bɔbédzaŋ,
yemŋán ná mfá Yesus te,
bía kat mína fwéñ ndzámann misémm.
39 Éde é mam mése bĕé mbé mína láŋ ná míní ne nzósoó á nkɔɔ́ métsiŋŋ Moisés été,
é mot áse aa bwíni ñí,
bá láŋ ñí ná a ne nzósoó.
40 Tɔbɔgán ya nkée ná,
édí é ne ntsilann mébá bekúlu medzó été,
é táa nzu ébe mína,
ná:
41 ‘Dággán,
á bebyana bot,
kpáán mevoó,
wán fe.
Amú ná ma bɔ mora dzam mélú menan;
é dzam mínăá ye yébe amvála enziŋ,
atwaa mot á kat mína dɔ.’ ”
42 Niané bé ngá kwíñ átán,
ané bé ngá bíra dzaa Pablo bá Bernabé ná,
bé bera bɔ́ kat fwéñ bifíá bíte é Sátará mbɔ́ɔ́.
43 Éde niané ekóánn bá kaŋ Nzamá é ngá mana,
ané abwiññ bejudio ya é bot bé ngá bee nyébé béjudio béé kɔ Nzamá wɔŋŋ bé ngá bee Pablo bá Bernabé;
éde bá bé ngá kɔ́bɔ ya álép fe bɔ́ ná,
bé tɔbɔ mbán ábwará Nzamá été.
44 É mos Sátará ó ngá belan véa,
bebeñ ané kísoan ngúrá e ngá mana kóán ná bá wók éfíá Ntí.
45 Ve,
niané bejudio bé ngá yén nkuna bot,
éde bé ngá tɔbɔ ndzálánn ya abéánn,
bé ŋga dwaan ya é mam Pablo a ngá kɔ́bɔ,
béé tea fe ñí.
46 Ané Pablo bá Bernabé,
béé kɔ́bɔ kaa ákɔ wɔŋŋ,
béé dzó ná:
“É ngá yian ná mína bé tára kat éfíá Nzamá.
Ve,
amú ná mína tep dɔ,
mína bébyen mína lére ná mínăá yian ya éniŋ é ne mbéámbéá.
Yénŋán ná,
bí ŋga búlán yaá ébe meyɔŋ mefé.
47 Amú ná,
néa,
éñe Ntí aá mánan bía,
eé dzó ná:
‘Me téle yaá wa ná,
o ne meyɔŋ mefé eyéá,
á mfá ye ná o ke ya akoroga
akekwíñ é vóm sí da súgu.’ ”
48 Éde niané meyɔŋ mefé mé ngá wók dɔ,
ané bé ngá sán bé ŋga vé éfíá Ntí dúmá,
éde ébá bé mbé ntɔ́pbán mfá éniŋ é ne mbéámbéá bé ngá mana bwíni.
49 Ané éfíá Ntí é ngá ke dá ñeŋ ábeŋŋ sí áse.
50 Ve,
bejudio bá bé ngá mana fuk é bora bé biningá bá kaŋ Nzamá ya betébosú béye á kísoan.
Amvála te,
bé ngá dzéŋ Pablo bá Bernabé ásí,
éde bé ngá tsílán bɔ́ ábeŋŋ sí deba.
51 Ané Pablo bá Bernabé bá bé ngá sas mbúlgé mébɔ meba,
é tɔɔ́ ndem ná bá lúm vóm te mvús.
Éde bé ngá ke Íkonio.
52 Ané beyága bé ngá tɔbɔ ndzálánn ya mesán ya fe Mfúfúp Nsísim.