Áwú Jakobo ya mbok Pedro
12
Melú méte,
éde kéza Erodes a ngá dea bot benziŋ béye ékóánn bebwíni mó ó ñúu,
ná a ndágle bɔ́.
Hechos 12.1-19
2 Ané a ngá ywíñ Jakobo mwanñaŋ Juan ya nzwaokeŋ.
3 Niané Erodes a ngá yén ná bejudio bé yén yaá dzam te mvéáñ,
éde fe a ngá bera biñ Pedro,
a mbé melú bá dzí mífémm mí ne kaa levadura.
4 Niané a ngá biñ ñí,
ané a ngá fet ñí á mbok,
a téle fe misámá benzima mí nii;
kada nsámá benzima ó belé benzima bé nii ná bé mɔ́mɔ Pedro;
a ngá kómo fe ná,
niané Paskua da mana,
aa ye ñí lére ósú bot.
5 Éde bé ngá mɔ́mɔ ñí á ndá mibok.
Ve,
ekóánn bebwíni é ngá bíra yaglan ya Nzamá mbán,
ákála Pedro.
Angel aa kúlu Pedro á mbok
6 É tám Erodes a mbé ná a nkún ñí lére bot,
alú te ébyen,
Pedro a mbé a bóo óyó énzénzaŋ benzima bé beáñ,
a tɔɔ́ nkáán ya bekalamekéná bé beáñ,
benzima bé téle fe á mbéñ béé kálá ndá mibok.
7 Véa,
éde ángel Ntí a ngá yéne,
ané eyéá é ngá mana ñaban ódzídzina été.
Éde ángel a ngá kut Pedro ó mveañ,
a suk ñí óyó,
a dzóo fe ñí ná:
“Dzígá tébe!”
Ané bekalamekéná bé ngá swálán ñí ó mó.
8 Éde ángel a ngá dzó ñí ná:
“Bwátge byém,
o bwát fe mengop mébɔ!”
Éde Pedro a ngá bɔ dɔ néa.
Ané ángel a ngá dzó ñí ná:
“Bwátge ékót dwe,
o bee fe ma!”
9 Éde a ngá kwíñ eé bee ángel,
éñe kaa áyem ná é dzam ángel a ngá bɔ é mbé bébélá.
Ve,
a ngá tém ná a ne nyénánn ye á nsísim.
10 Niané bé ngá lot nsámá benzima ósúá ye éwí beáñ,
ané bé ngá sian á mbéñ bikyeñ,
éwí ó ngá dága á kísoan.
Éde mbéñ te ó ngá kúuban bɔ́ etámm.
Niané bé ngá kwíñ átán,
ná bé ngén bá wulu á nseŋ,
etéññ te ébyen,
ané ángel a ngá dzáŋ Pedro.
11 Niané Pedro a ngá biñ kén,
éde a ngá dzó ná:
“Áwola dí,
bébélá me yem yaá ná Ntí éñe á lóm ángel weñ,
éñe fe a koro yaá ma é mó Erodes été,
ya é dzam áse ayɔŋ bejudio é mvá ma kómo bɔ.”
12 Niané Pedro a ngá ñú táŋ dzam te,
éde a ngá ke é ndá María ñiá Juan,
éñí a mbé eyola mésóm ná Markos,
é vóm abwiññ bot é mbé é kóán deé yaglan.
13 Niané Pedro a ngá lwée á mbéñ áká,
ané mbɔ biséññ ngwan miningá e tɔɔ́ eyola ná Rode a ngá ke ná aa ke dága.
14 Niané a ngá yem é kíŋŋ Pedro,
éde ya mesán éñe kaa fe ákúu mbéñ,
a búlán mbíí á ndá été,
a kat bot fwéñ ná Pedro a téle á mbéñ.
15 Ané bé ngá dzó ñí ná:
“Wa kwan á nlém!”
Ve,
ñí á ŋga yémle ná a ne Pedro.
Éde bé ngá dzó ná:
“A ne ángel weñ.”
16 Ve,
Pedro ñí a ngá tsíni eé lwée.
Niané bé ngá kúu mbéñ,
bé yén ñí,
ané bé ngá ku avoó.
17 Éde a ngá lére bɔ́ ndem ya wéá ná bé sis bivóó,
á ŋga kat bɔ́ fwéñ ámvála Ntí á kúlu ñí á mbok.
Ané a ngá dzó ná:
“Katgán Jakobo ya bebwíni mam méte.”
Éde a ngá kólo,
a kéñ vóm mfé.
18 Niané kírí e ngá léne,
ané ngíniŋe ndén e ngá bɔban énzénzaŋ benzima ná,
dzé é bɔ yaá Pedro.
19 Niané Erodes a ngá mana ñí dzéŋ,
éñe kaa ákoan ya ñí,
éde a ngá mana fas benzima,
ané a ngá mánan ná bé ke bɔ́ ywíñ.
Éde a ngá kólo á Judea a kéñ á Sesarea,
ané a ngá tɔbɔ ó wéñ.
Hechos 12.19-25
Áwú Erodes
20 Erodes a ngá bíra yéá ya bot béye á Tiro ya Sidón,
éde bot béte bébyen bé ngá kwíñ kíŋŋ bé kéñ ñí yén.
Bá tára mana lat amvwíññ ya Blasto,
mbaale ndá Érodes,
ná bá dzaa mvwaá,
amú ná bé ngá ñɔŋ bidzí ábeŋŋ sí kéza.
21 É mos bé ngá tsini,
Erodes a baga bitóp bí kéza,
a tɔɔ́ fe ósí ekóánn bá kík misaŋ,
á ŋga kɔ́bɔ ya bɔ́.
22 Ané nkuna bot ó ngá lugu ñí weé dzó ná:
“É kíŋŋ nzamá enziŋ édɔ ñí,
se éñí mot!”
23 Etéññ te ébyen,
éde ángel Ntí a ngá bími ñí,
amú ná eé ndzí vé Nzamá dúmá,
ané misɔ́ŋŋ mí ngá dzí ñí,
a wú.
24 Éde éfíá Nzamá é ngá vém ya áfwiñ.
25 Éde niané Bernabé bá Saulo bé ngá mana kee mivwálán,
ané bé ngá kólo á Yerusalen,
bé kéñ fe ya Juan éñí a mbé eyola mésóm ná Markos.