Pedro aa kat fwéñ ná meyɔŋ mefé má ñɔŋ Mfúfúp Nsísim
11
Ané baapostol ya bebwíni bé mbé bé tɔɔ́ á Judea bé ngá wók ná,
meyɔŋ mefé mé ñɔŋ yaá éfíá Nzamá.
Hechos 11.1-17
2 Éde niané Pedro a ngá búlán á Yerusalen,
ané é bot [bebwíni] bé mbé nkíkgán akeé bé ngá vé ñí bidzo.
3 Béé dzó ná:
“Oó ñíi yaá é ndá é bot bé sés nkíkgán akeé,
o ŋga dzí fe mínabe bɔ́.”
4 Ané Pedro a ngá tára ná aa túga bɔ́ kat eé dzó ná:
5 “Me mbé á kísoan Jope meé yaglan,
éde me tɔɔ́ á nsísim me ngá yén nyénánn dzóm deé sigi á dzóp ané mora etóp é kele ya melɔ́ mé nii.
Ané é ngá sɔ́ é vóm me mbé me tɔɔ́.
6 Niané me ngá bem dɔ mís,
me túga dága,
éde me ngá yén bétsít bé ne ya mebɔ mé nii ya bétsít béye áfan,
ya ébá bá dulu mebum ósí,
ya fe anwann.
7 Éde fe me ngá wók kíŋŋ deé dzó ma ná:
‘Á Pedro,
tébegé,
ywíñŋe,
o dzí fe.’
8 Ve,
ma me ngá yalan ná:
‘Á Ntí é sés bɔban amvála enziŋ,
amú ná é dzóm é ne abé ngé ki mvin dăá bé daŋ ánu dam tám enziŋ.’
9 Ané kíŋŋ e ngá sɔ́ á dzóp éyɔŋ beáñ deé yalan ná:
‘É dzóm Nzamá á fúbu yaá,
wa o táa dɔ lwée ná abé.’
10 Dzam te é ngá bɔban biyɔŋ bí léa,
ané dzóm te áse é ngá búlán á dzóp été.
11 Etéññ te ébyen,
éde bot bé léa bé mbé bé téle é ndá me mbé,
é bot bé ngá lóm ma,
béé sɔ́ á Sesarea.
12 Ané Nsísim a ngá dzó ma ná me ke bíabe bɔ́ kaa ásigbe.
Éde bíabe bebwíni bé saman bí ngá ke,
bí ñíi fe é ndá mot te.
13 Ané a ngá kaŋle bía ámvála a ngá yén ángel a téle é ndá dzeñ a dzóo ñí ná:
‘Lómŋe bot á Jope,
o bána Simón,
éñí bá lwée ná Pedro;
14 éñe aa ye wa kɔ́bɔ bífíá wa ye tɔbɔ ya byɔ nkoránn,
wa,
ya é ndá bot dzwe ése.’
15 Niané me ngá tára ná ma kɔ́bɔ,
éde Mfúfúp Nsísim a ngá sian ébe bɔ́ amvála ané a ngá tára fe bía sian.
16 Ané me ngá síman éfíá Ntí amvála ané a ngá kɔ́bɔ,
eé dzó ná:
‘É ne ná Juan a ngá du ya mendzímm,
ve mína,
mína ye duuban ya Mfúfúp Nsísim.’
17 Éde fe,
ngé Nzamá a vé yaá bɔ́ dás ntéññ mbɔ́ɔ́ ané bía,
é bot bé mana yaá bwíni Ntí Yesukristo;
me mbé nzá ná,
ma me mbé dzip Nzamá?”
18 Niané bé ngá wók mam méte,
éde bé ngá sis bivóó,
bé ŋga vé fe Nzamá dúmá,
béé dzó ná:
“Nde Nzamá a vé yaá fe meyɔŋ mefé ná me dzoban á mfá ye ná me niŋ!”
Hechos 11.18-30
Ekóánn bebwíni ye Ántiokia
19 Véa,
é bot bé ngá mana myaman amú éndáglé é ngá sɔ́ ákála áwú Esteban,
bé ngá ke kwíñ á Fenisia,
ya á Tsípre ya Ántiokia,
ébɔ́ kaa ákɔ́bɔ mot enziŋ éfíá Nzamá,
fáve bejudio etámm.
20 Ve,
befám benziŋ béye été bé mbé bot béye á Tsípre,
ya fe á Sirene,
bé ngá sian Ántiokia,
bé ŋga kɔ́bɔ ya begriego béé kat bɔ́ é fwéñ Ntí Yesus.
21 É nguu Ntí e mbé ébe bɔ́.
Ané abwiññ bot e ngá mana fe bwíni Ntí.
22 Niané ékóánn bebwíni é mbé á Yerusalen é ngá wók fwéñ te,
ané bé ngá lóm Bernabé Ántiokia.
23 Éde niané Bernabé a ngá sian Ántiokia,
a yén fe ábwará Nzamá,
ané a ngá sán;
á ŋga lép fe bésesé ná,
ya nlém nzósoó bé tɔbɔ mbán ébe Ntí.
24 Bernabé te a mbé mbamba mot,
a tɔɔ́ fe ndzálánn ya Mfúfúp Nsísim ya mbwínánn.
Éde,
abwiññ bot é ngá kɔglan ébe Ntí.
25 Ané Bernabé a ngá ke á Tarso ná aa ke dzéŋ Saulo.
Niané a ngá koan ya ñí,
ané a ngá sɔ́ ya ñí Ántiokia.
26 Éde bé ngá tɔbɔ bábe ekóánn bebwíni táŋ ngúrá mbú,
béé yágale fe abwiññ bot.
Ántiokia,
éñe bé ngá lwée beyága eyɔŋ ósúá ná Bekrísten.
27 Melú méte bekúlu medzó benziŋ bé ngá kólo á Yerusalen ná bá ke Ántiokia.
28 Ané mbɔ́ɔ́ ye ébe bɔ́ a tɔɔ́ eyola ná Agabo a ngá tébe eé lére bot ya Nsísim ná nzeñ ndén é nkún nzu bɔ ébe sí áse.
Nzeñ te e ngá bɔban é tám Klaudio a mbé Sesar.
29 Éde beyága,
kada mot ya ábímm a mbé a belé,
bé ngá kík ná bá lóm bebwíni bé mbé bé tɔɔ́ á Judea mvwálán.
30 Ané bé ngá bɔ dɔ,
béé lóm betébosú béye á Judea mvwálán te.
Bernabé bá Saulo ébɔ́ bé ngá lóm ya wɔ́.