Pedro bá Kornelio
10
Mot enziŋ a mbé á Sesarea a tɔɔ́ eyola ná Kornelio;
a mbé kaba ye á nsámá biteá bé ngá lwée ná Italiana.
Hechos 10.1-48
2 A ngá dzálá memvéná mé Nzamá mvéáñ ya ákɔ fe ñí wɔŋŋ,
bá é ndá bot dzeñ ése.
A ngá bíra vé mibúbúá,
eé yaglan fe ya Nzamá tám áse.
3 Éde bebeñ méwola mé léa ye ngɔgáse,
a ngá túga yén ángel Nzamá á nyénánn ye á nsísim,
eé ñíi é vóm á mbé,
a dzóo ñí ná:
“Á Kornelio!”
4 Ané a ngá bem ángel mís,
eé bíra kɔ wɔŋŋ,
éde a ngá dzó ná:
“Á Ntí,
a ne á yá?”
Ané ángel a ngá dzó ñí ná:
“Méyaglán mwe ya bívévé bywe bí bét yaá ósímánn ósú Nzamá.
5 Éde áwola dí,
lómŋe bot á Jope,
o bána mot enziŋ bá lwée ná Simón,
a tɔɔ́ fe eyola ná Pedro.
6 Pedro te,
a tɔɔ́ ébe é mot bá lwée ná Simón,
nkom bikop bí tsít,
é ndá dzeñ á nsá máŋ.”
7 Ákoan ná ángel a ngá kɔ́bɔ ya ñí á ke yaá,
ané Kornelio a ngá lwée bebɔ biséññ bé beáñ béye é ndá dzeñ,
ya mwann benzima mbɔ́ɔ́ ye a ngá kaŋ Nzamá,
eé séan fe ya Kornelio.
8 Niané a ngá mana bɔ́ dɔ kaŋle ásesé,
éde a ngá lóm bɔ́ á Jope.
9 É mos ó ngá belan véa,
béé ke ókaŋŋ été,
ákoan ná bé ntɔɔ́ bebeñ á kísoan,
ané Pedro a ngá bét á ndá áyóp,
bebeñ énzénzaŋ ó mos,
ná aa ke yaglan.
10 Éde eé wók nzeñ,
á ŋga kómo dzí;
é tám bé ngá yám bidzí,
11 ané Pedro a ngá tára ná aa yén á nsísim été dzóp dá yɔ́ŋbe,
dzóm deé fonan ya mora etóp,
é kele ya melɔ́ mé nii,
deé sigi fe ásí.
12 Été,
bétsít bé ne ya mebɔ mé nii bé mbé ya ébá bá dulu mebum ósí,
ya fe anwann.
13 Ané kíŋŋ e ngá dzó ñí ná:
“Á Pedro,
tébegé,
o ywíñ,
o dzí fe.”
14 Ve,
Pedro ñí a ngá yalan ná:
“Á Ntí,
é sés bɔban amvála enziŋ!
Amú ná măá bé tára dzí dzóm enziŋ ye é ne abé,
é tɔɔ́ fe mvin.”
15 Éde kíŋŋ e ngá bera kɔ́bɔ éyɔŋ beáñ ná:
“É dzóm Nzamá á fúbu yaá,
wa o táa dɔ lwée ná abé.”
16 Dzam te é ngá bɔban biyɔŋ bí léa;
éde etéññ te ébyen,
dzóm te é ngá bét á dzóp été.
17 É tám Pedro a mbé aa voó néa,
eé fas fe á nlém weñ été ná,
nyénánn ye á nsísim mé yén wi,
wá yíli á yá.
Véa,
éñe é bot Kornelio a ngá lóm,
bé ngá síli é ndá Simón,
ané bé ngá sian á mbéñ.
18 Éde bé ngá lwée,
bé síli fe ngé é Simón bá lwée ná Pedro a tɔɔ́ ó véa.
19 Eyɔŋ Pedro ñí a ngá fas nyénánn te,
ané Nsísim a ngá dzó ñí ná:
“Dággé,
bot bé léa bá dzéŋ wa.
20 Édɔ é ne ná,
tébegé,
o sigi,
kéŋ fe mínabe bɔ́ kaa ásigbe,
amú ná ma me lóm bɔ́.”
21 Ané Pedro a ngá sigi [é vóm é bot Kornelio a ngá lóm bé mbé],
a dzóo bot béte ná:
“Ma éñí,
ma me ne é mot mína dzéŋ.
Akála dzé míní sɔ́?”
22 Éde bé ngá yalan ná:
“Kaba Kornelio éñe á lóm bía.
A ne nzósoó mot aa kɔ fe Nzamá wɔŋŋ,
a belé mbamba ngañiá áyɔŋ bejudio áse.
Mfúfúp ángel ó mánan ñí ná á bána wa é ndá dzeñ,
á mfá ye ná á béá bífíá bywe.”
23 Ané Pedro a ngá bɔ bɔ́ ná bé ñíi,
a bwíi fe bɔ́ á ndá.
É mos ó ngá belan véa,
éde a ngá tébe a kéñ bábe bɔ́.
Ané bebwíni benziŋ béye á Jope bá bé ngá ke fe ñí lére.
24 Éde bé ngá sian á Sesarea é mos mbɔ́ɔ́ ó ngá belan véa.
Kornelio ñí eé yana bɔ́,
ané a ngá mana bána bívúvúmán byeñ ya bémvwíññ bábe bɔ́ bé ngá bíra wókgan.
25 Éyɔŋ Pedro a ngá ke ñíi á ndá,
ané Kornelio a ngá kólo ná aa ke tóban ya ñí,
éde a ngá kútbe Pedro mebɔ ó sí ná aa kaŋ ñí.
26 Ve,
Pedro ñí a ngá téle ñí eé dzó ná:
“Tébegé!
Mámyen ma me ne fe mot.”
27 Pedro á ŋga léan bá ñí,
éde a ngá ñíi,
a koan ya abwiññ bot á ndá été.
28 Éde Pedro a ngá dzó bɔ́ ná:
“Mína yem amvála avé é ne kaa áyian ná mwann judio á fulan bá mot ye ayɔŋ afé,
ngé ki áyit ñí bebeñ.
Ve,
Nzamá a lére yaá ma ná,
me táa lwée mot enziŋ ná abé ngé ki mvin.
29 Amú dzam te,
niané baá lwée ma,
ané me sɔ́ kaa ádwaan.
Éde ma síli ná,
akála dzé mína lwée ma?”
30 Ané Kornelio a ngá dzó ná:
“Ámvála áwola dí,
é ntɔɔ́ melú mé nii,
me ngá yaglan á ndá dzam été,
bebeñ méwola mé léa ye ngɔgáse;
véa,
mot enziŋ a tébe ma ósú,
a baga bitóp byee feañ,
31 a dzóo ma ná:
‘Á Kornelio,
Nzamá a wók yaá méyaglán mwe,
bívévé bywe byá a síman yaá fe.
32 Édɔ é ne ná,
lómŋe bot á Jope ná o bána é Simón bá lwée ná Pedro;
éñe a tɔɔ́ é ndá Simón nkom bikop bí tsít,
á nsá máŋ.’
33 Etéññ te ébyen ané me ngá lóm ná bé lwée wa,
wa o bɔ yaá fe mvéáñ ná o sɔ́ yaá.
Éde áwola dí ó vá,
bía bésesé bí ne ósú Nzamá,
ná bía béá é mam mése Ntí á mánan wa.”
Pedro aa kat mbamba fwéñ ébe Kornelio
34 Ané Pedro a ngá kúu anu eé dzó ná:
“Bébélá,
me yem yaá ná,
Nzamá ăá tsígí mot enziŋ;
35 ve,
ébe meyɔŋ mése,
éñí aa kɔ Nzamá wɔŋŋ,
a bɔ fe é mam mé ne nzósoó éñe Nzamá aa ñɔŋ.
36 Éfíá Nzamá a ngá lóm bwán béye Israel,
eé kat mbamba fwéñ ye á mvwaá ébe Yesukristo,
éñí a ne Ntí bot bése.
37 Mína yem é dzam é ngá bɔban á Judea ngúrá;
atéé ye á Galilea,
niané Juan a ngá mana kat bot fwéñ ná bá yian duuban;
38 ma kɔ́bɔ mfá Yesus éñí a ne mot ye á Nasaret;
ámvála Nzamá a ngá vé ñí ya Mfúfúp Nsísim,
ya edzwée,
ya ámvála a ngá ke aa wulu eé bɔ bot mbeŋ;
eé séñ fe ébá bésesé déble a ngá tsíble,
amú ná Nzamá a mbé ébe éñe.
39 Bía bí ne bengañiá é mam mése a ngá bɔ á Yerusalen ya é vóm áse bejudio bé tɔɔ́.
Éñe fe bé ngá kele élé,
bé ywíñ ñí.
40 Ve,
Nzamá aá wómo ñí álú léa,
a lík fe ná a nzu yéne ébe bía;
41 se ébe nnam ngúrá,
fáve ébe bengañiá,
ébá Nzamá a ngá tára tɔ́p.
Bía é bot bíabe Émyen bí ngá dzí ya áñú niané a ngá wómo miwúán été.
42 Éñe aá mánan bía ná bí kat bot fwéñ,
bí vé fe bot ngañiá ná éñe Nzamá a téle yaá ané Nkík misaŋ ébe betétéá ya miwúán.
43 bekúlu medzó bése bá vé ñí ngañiá ná,
éñí áse aa bwíni ñí,
aa ye ñɔŋ ndzámann misémm ákála éyola Yesus te.”
Meyɔŋ mefé má ñɔŋ Mfúfúp Nsísim
44 Ákoan ná Pedro a ngén aa kɔ́bɔ bifíá bíte,
ané Mfúfúp Nsísim a ngá sian ébe é bot bése bé ngá wók éfíá Nzamá.
45 Éde béjudio bé mbé bebwíni bé ngá ke lére Pedro,
bé ngá ku avoó ná,
meyɔŋ mefé má mé ñɔŋ yaá fe Mfúfúp Nsísim dás.
46 Amú ná bé ngá wók béé kɔ́bɔ mikɔ́bɔ,
béé bére fe Nzamá ó yóp.
47 Ané Pedro a ngá síli ná:
“É bot bé ñɔŋ yaá Mfúfúp Nsísim bá amvála avɔ́ɔ́ ané bía,
ye mot enziŋ a ne bɔ́ kam ya mendzímm á mfá ye ná bé táa duuban?”
48 Éde Pedro a ngá mánan ná bé du bɔ́ ya éyola Yesukristo.
Véa,
ané bé ngá dzaa Pedro ná á bera lígi ayomm melú.