8
Saulo ñí a mbé fe ó véa,
eé yébe ná bé ywíñ Esteban.
Saulo aa dzéŋ bebwíni ásí
A ngá bɔ ná mos te éde bé ngá bíra dzéŋ ékóánn bebwíni é mbé á Yerusalen ásí.
Ané bebwíni bésesé bé ngá mana myaman á mebeŋŋ mé sí méye á Judea ya Samaria,
veveé ve baapostol.
2 Éde,
béfám bá kaŋ Nzamá bé ngá dzep Esteban,
béé bíra fe yi ákála deñ.
3 Ve,
Saulo ñí a ngá tsam ekóánn bebwíni,
á ŋga ñíi mendá ya mendá,
eé dulu befám ya biningá,
eé fet bɔ́ míbok.
Felipe a ne á Samaria
4 Édɔ é ne ná,
bebwíni bé ngá ke bá myaman,
bé ngá ke bá kat mbamba fwéñ.
Hechos 8.4-25
5 Ané Felipe a ngá sigi á kísoan á Samaria eé kat bot é mbamba fwéñ Kristo.
6 Niané bot bé ngá wók ya áyén méndem a ngá bɔ,
ané bot bése ya nlém mbɔ́ɔ́ bé ngá túga béá édí Felipe a ngá kɔ́bɔ.
7 Amú ná ábwiññ bot misísim mí mvin mí mbé ó ñúu,
mí ngá kwíñ myeé yónán kíŋŋ oyaáp ó yóp;
mibóbók ya miyéyém myá mí ngá séñban fe.
8 Éde mesán menén mé ngá bɔ á kísoan te.
9 Mot enziŋ ñí a mbé kísoan te a tɔɔ́ eyola ná Simón,
a ngá bɔ eé bɔ aŋgaŋ,
eé kpoo bot avoó á Samaria,
eé lére fe bot ná,
émyen a ne mora mot enziŋ.
10 Éde bot bése,
atéé ye nzeze bot akekwíñ bora bé bot,
bé ngá túga ñí béá,
béé dzó ná:
“Éñí éñe bá lwée ná,
é mora nguu Nzamá.”
11 Bé ngá túga ñí béá amú ná,
abwiññ tám ó mvús,
ya aŋgaŋ deñ,
a ngá bɔ eé kpoo bɔ́ avoó.
12 Ve,
niané bé ngá bwíni mbamba fwéñ ye édzwée ngɔ́mán Nzamá,
ya éyola Yesukristo,
Felipe a ngá kat bɔ́;
ané bé ngá duuban,
befám ya biningá.
13 Atwaa Simón émyen ñí a ngá bwíni fe;
éde niané a ngá duuban,
á ŋga wulu nsámá bá Felipe eé ku fe avoó ya méndem,
ya é bora biwólo bí mam bí ngá bɔban.
14 Niané é baapostol bé mbé á Yerusalen bé ngá wók ná Samaria ñí a ñɔŋ yaá fe éfíá Nzamá,
ané bé ngá lóm bɔ́ Pedro bá Juan.
15 Niané bé ngá ke,
éde bé ngá yaglan ya besamaritano á mfá ye ná bé ñɔŋ Mfúfúp Nsísim.
16 Amú ákoan ná Mfúfúp Nsísim ăá bé sigi ébe mot enziŋ ye ébe bɔ́,
bé mbé nduubán fáve ya éyola Ntí Yesus.
17 Tám te,
ané baapostol bé ngá bere bɔ́ mó;
éde bé ngá ñɔŋ fe Mfúfúp Nsísim.
18 Niané Simón a ngá yén ná,
baapostol bá bere bot mó,
bot béte bé ŋga ñɔŋ Mfúfúp Nsísim,
ané a ngá lére bɔ́ moann,
19 eé dzó ná:
“Váán fe ma nguu te á mfá ye ná,
é mot áse má ye bere mó,
ñí á ñɔŋ Mfúfúp Nsísim.”
20 Ve,
Pedro a ngá dzó ñí ná:
“Kéŋ wú ya é moann we,
amú wa tém ná o ne ñɔŋ é dás Nzamá ya moann!
21 Wĕé belé ngap ngé ki maa éséññ dí,
amú ná nlém we ó sés nzósoó ósú Nzamá.
22 Dzobgán ye ábé dwe dí,
o dzaa Ntí engóngɔ́ɔ́,
a ne bɔ tám enziŋ ná aa ye dzwii ósímánn ó ne wa á nlém été.
23 Amú me téa ná,
o ne ndzálánn ya nlém eywiññ,
o ne fe nkáán á nsémm été.”
24 Ané Simón a ngá yalan ná:
“Mína yaglánán ákála dam ósú Ntí,
á mfá ye ná dzam enziŋ ye émá míní kɔ́bɔ é táa nzu ébe ma.”
25 Ve,
mfá Pedro bá Juan,
niané bé ngá mana vé ngañiá ya ákɔ́bɔ éfíá Ntí,
éde bé ngá búlán á Yerusalen,
béé kat fe abwiññ meá besamaritano mbamba fwéñ.
Felipe bá mot ye Étiopía
26 Éde ángel Ntí a ngá kɔ́bɔ ya Felipe eé dzó ná:
“Tébegé,
kéŋ fe á nzenn nkeññ,
éñí e ne éyáŋŋ été,
éñí da sigi atéé ye á Yerusalen,
deé ke á Gasa.”
Hechos 8.26-40
27 Ané a ngá tébe,
a kéñ.
Véa,
éñe Felipe a ngá koan ya mwann Etiope,
a mbé eyee.
Mot te a mbé ŋgɔ́vina ye á Kandase,
a tɔɔ́ fe mbaale ákúmm ése kéza miningá ye Étiopía.
Mot te a ngá sɔ́ kaŋ Nzamá á Yerusalen,
28 á ŋga búlán a tɔɔ́ ékálík mikalbeñ áyóp,
eé láŋ ábá nkúlu medzó Esaía.
29 Éde Nsísim a ngá dzó Felipe ná:
“Yitge ékálík te bebeñ ná o koan ya dɔ.”
30 [Ané Felipe a ngá mára mbíí],
a koan ya dɔ.
Éde a ngá wók eé láŋ ábá nkúlu medzó Esaía;
ané Felipe a ngá síli ñí ná:
“Ye wa wók é dzam wa láŋ?”
31 Éde a ngá yalan ya ñí ná:
“Ma ye dɔ wók á yá kaa é mot aa lére ma dɔ?”
“Bé ngá ke ya ñí amvála ané bá ke ya ntómá é vóm bá kík biyémm,
amvála ané mwann ntómá a ne evóó ósú ébe éñí aa kík wɔ mivwaát,
néa eé ndzí kúu ánu deñ.
33 Bé ngá lére ñí osoán,
ébɔ́ kaa ñí ákík misaŋ tételé;
ve nzá aa ye láŋ myee bot weñ?
Amú ná bá kík ñí eniŋ ónzáŋ é sí ñí.”
34 Ané é mot a mbé eyee a ngá síli Felipe ná:
“Ma dzaa wa engóngɔ́ɔ́ ná o kat ma;
mfá nzá nkúlu medzó aa kɔ́bɔ é dzam dí?
Ye mfá weñ émyen,
ngé ki mfá mot enziŋ mfé?”
35 Éde Felipe a ngá kúu ánu,
á ŋga kat ñí é mbamba fwéñ Yesus,
átára ye ntsili a ngá láŋ.
36 É tám bé ngá ke ókaŋŋ été,
ané bé ngá sian vóm enziŋ a tɔɔ́ ya mendzímm,
éde mot te a ngá dzó ná:
“Ngé wa bwíni ya nlém óse,
é ne bɔban.”
Ané mot te a ngá yalan ná:
“Ma yébe ná Yesukristo éñe a ne é Mwán Nzamá.”]
38 Éde a ngá mánan ekálík ná eé tébe.
Ané bé beáñ bé ngá sigi mendzímm été,
éde Felipe a ngá du ñí.
39 É tám bé ngá kólo mendzímm été,
ané Nsísim Ntí ó ngá dzíga vea Felipe ó véa,
é mot a mbé eyee kaa fe ñí ábera yén.
Éde a ngá tsíni ékena deñ ya mesán.
40 Ákoan ná Felipe ñí a ntɔɔ́ Ásoto,
eé kat mbamba fwéñ á bekísoan bése a ngá ke aa lot,
akekwíñ ané a ngá sian á Sesarea.