Nkɔ́bɔ Esteban
7
Éde ntébosú befára a ngá síli ñí ná:
“Ye é ne dzam te é ne néa?”
2 Ané Esteban a ngá yalan ná:
“Á bɔbédzaŋ ya betará,
béágán:
Nzamá ye á dúmá a ngá yéne ébe é tará wea Abraam,
eyɔŋ a mbé a tɔɔ́ á Mesopotamia,
kaa ná á ke tɔbɔ Árán.
3 Éde Nzamá a ngá dzó ñí ná:
‘Kólogé é sí dwe ya bívúvúmán bwe été,
kéŋ é sí ma ye wa lére.’
4 Ané Abraam a ngá kólo é sí bekaldeo,
a kéñ tɔbɔ Árán.
Véa,
niané éséá a ngá wú,
ané Nzamá a ngá sɔ́ ya ñí é sí míní tɔɔ́ ñí áwola dí.
5 Éde,
eé ndzí ñí vé efús sí vóm te,
ngé ki áfóo a ne téle ábɔ deñ;
ve,
Nzamá a ngá kyaa ñí ná aa ye vé é mvɔŋ dá nzu ébe éñe sí te.
Ákoan ná a tɔɔ́ kaa mwán.
6 Néa,
éñe Nzamá a ngá kɔ́bɔ ya Abraam ná é mvɔŋ dzeñ,
da ye bɔ beyéŋ é nza sí,
da ye bɔ aloá,
bá ye bɔ́ tsíble táŋ mibú mitet mí nii.
7 Ané é sí da ye bɔ́ biñ mikómm ná bé séan ya bɔ́,
ma ye kík sí te misaŋ;
eyɔŋ te éde bá ye kólo sí te á mfá ye ná bé nzu ma ákaŋ é vóm wí.
8 Éde a ngá vé Abraam elat nkíkgán akeé;
niané Abraam a ngá byéñ Isaak ané a ngá kele ñí álú mmom.
Amvála te Isaak ñí a ngá bɔ Jakob,
ntéññ mbɔ́ɔ́ fe Jakob ñí a ngá kele é bwán béñ awóm ya bé beáñ ébɔ́ bé ne bímvámvámm bí ngá tára áyɔŋ dea.
9 Éde bimvámvámm bíte,
akála evínn bé ngá kuan José ya é bot bé ngá ke Égipto.
Ve,
Nzamá a mbé bá ñí;
10 ané Nzamá a ngá vea ñí mídzuúk míse a ngá yén été,
a vé fe ñí abwará ya kén ébe ású Faraón kéza ye Égipto.
Éde kéza te a ngá nɔ́man José ŋgɔ́vina Égipto ye é ndá dzeñ áse.”
11 “Ané nzeñ ya bora midzuúk bí ngá sian Égipto ngúrá ya á Kanaán;
éde betará ébɔ́ kaa fe ábelé bidzí.
12 Niané Jakob a ngá wók ná bidzí bí ne Égipto,
ané a ngá lóm betará ékena ósúá;
13 édí beáñ édɔ José a ngá lík ná bɔbéñaŋ bé yem ñí,
Faraón ñí á yem fe áyɔŋ José.
14 Éde José a ngá bána éséá Jakob ya é mvɔŋ bot dzeñ áse Égipto.
Bé mbé bot mewóm zaŋgbéá ya bot bé tán.
15 Ané Jakob a ngá ke Égipto á wú ó wéñ bábe betará.
16 Éde bé ngá ke ya biveés á Sikem,
bé dzep byɔ é sɔŋ Abraam a ngá kus ya táŋ ngoós ébe é bwán Ammor á Sikem.”
17 “Éyɔŋ é tám Nzamá a ngá kyaa Abraam e ngá nzu da yit,
éde ayɔŋ Israel é ngá vém,
é fwiñ fe Égipto.
18 Akekwíñ ané kéza mfé a ngá tébe Égipto éñe kaa áyem José.
19 Kéza te,
ya meduk a ngá tsíble betará ya áduk áyɔŋ dea,
eé mánan bɔ́ ná bé lama míkéŋá mí bwán myeba á mfá ye ná mí nzá niŋ.
20 Tám te édɔ Moisés a ngá byála,
ané Nzamá a ngá yén ñí mvéáñ,
éde beéséá bé ngá yála ñí á ndá éséá táŋ ngwan é léa.
21 Ané bé ngá lama ñí,
éde Faraón ngwan dzeñ e ngá twáa ñí,
yála fe ñí ané é mwán weñ émyen.
22 Éde Moisés a ngá mana yága é kén ése bé Egipsio,
a mbé fe ewólo bífíá ya míbɔann myeñ.”
23 “Ve,
niané a ngá dzálá mibú mewóm mé nii,
ané é ngá sɔ́ ñí á nlém ná á fép bɔbéñaŋ,
bwann bé Israel.
24 Éde niané Moisés a ngá yén béé ndágle mbɔ́ɔ́ enziŋ ye été,
ané a ngá kam ya ñí,
a ywíñ mwann egipsio,
eé kun é mot bé ngá ndágle.
25 Moisés a ngá tém ná bɔbéñaŋ bá ye yem ná,
Nzamá a lóm yaá ñí ná bé tɔbɔ nkoránn ébe é nguu Deñ;
ve,
ébɔ́ kaa dɔ áyem.
26 É mos ó ngá belan véa,
éde Moisés a ngá koan ya bwann bé Israel bé beáñ béé yítan,
ñí eé kómo bɔ́ vaŋ á mfá ye ná bé tɔbɔ mvwaá,
ané a ngá dzó ná:
‘Á bot míní ne bɔbéñaŋ!
Ákála dzé mína bébyen mína dzugan?’
27 Ve,
é mot a ngá yít éñí mbɔ́ɔ́ a ngá sɔ́gle Moisés eé dzó ná:
‘Nzá a ngá téle wa ndzwée ya nkík misaŋ wea?
28 Ye ma wa kómo fe ywíñ amvála ané o ngá ywíñ mwann egipsio ooŋgɔgɔ́?’
29 Niané Moisés a ngá wók bifíá bíte,
ané a ngá túp,
a kéñ bɔ ntɔbɔ á sí ye Madián,
ó wéñ éñe a ngá byéñ bwán bé beáñ.”
30 “Niané mibú mewóm mé nii mí ngá lot,
éde ángel a tɔɔ́ á nkaba ndúán a mwann elé,
a ngá yéne ébe éñe á nkoó Sinaí éyáŋŋ été.
31 Ané Moisés a ngá ku avoó niané a ngá yén dzam te,
éde a ngá yit bebeñ ná á túga dága,
véa a ngá wók é kíŋŋ Ntí deé dzó ná:
32 ‘Ma me ne é Nzamá beésúá;
é Nzamá Abraam,
Isaak ya Jakob.’
Moisés á ŋga ku ngom,
éñe kaa fe ánzomo ná a dága.
33 Éde Ntí a ngá dzó ñí ná:
‘Veagé mengop mebɔ,
amú ná é vóm o téle wi,
ó ne é sí é ne éki.
34 Me túga yaá yén éndáglé áyɔŋ dam dá dzuk Égipto.
Me wók yaá míyónn myeba,
me sigi yaá fe ná ma koro bɔ́.
Áwola dí,
nzaá á mfá ye ná me lóm wa Égipto.’ ”
35 “Moisés te émyen éñe bé ngá tep béé síli ná:
‘Nzá a ngá téle wa ndzwée ya nkík misaŋ?’
Éñe Nzamá a ngá lóm ná a ke bɔ ané ndzwée ya nkoro,
ya é nguu ángel a ngá yéne ébe éñe á mwann elé.
36 Éñe a ngá vea bɔ́,
eé bɔ bora biyágán bí mam ya mendem á sí ye Égipto,
Évélé máŋ,
ya éyáŋŋ été táŋ mibú mewóm mé nii.
37 Moisés te fe émyen a ngá dzó bwann bé Israel ná:
‘Énzénzaŋ bɔbéñɔŋ,
Nzamá aa ye mína téle nkúlu medzó mfé amvála ané ma.’
38 Éñe fe a mbé ya ékóánn bot bábe betará éyáŋŋ été.
Éñe ángel a ngá kɔ́bɔ ya ñí á nkoó Sinaí;
a ngá ñɔŋ fe bifíá bíye éniŋ ná á kalan mína byɔ.”
39 “Ve,
betará béé ndzí ki ñí kómo bɔ mewók;
éde bé ngá tep ñí,
bé búlán fe Égipto á mílém myeba été,
40 béé dzó Aarón ná:
‘Bɔɔ́ge bía bénzamá bá ye bía wulu ósú;
amú ná,
é Moisés a ngá sɔ́ ya bía Égipto ñí,
bĭá yem é dzam é bɔ yaá ñí.’
41 Éde melú méte bé ngá bɔ eyemá mwann ñát,
bé ŋga vé fe dɔ metúnŋa,
bé ŋga sán fe ya éyemá é mó meba mé ngá bɔ.
42 Éde Nzamá a ngá kólo ébe bɔ́,
a kee fe bɔ́ ná bé kaŋ nsámá melúmán ye á dzóp,
amvála ané é ne ntsilann ábá bekúlu medzó ná,
Á ndá bot Israel,
Ye ma míní ngá kík biyémm ya ávé metúnŋa éyáŋŋ été
táŋ mibú mewóm mé nii?
43 Ané míní ngá ke mína baga bíbemm Molok,
ya ótéteñ é nzamá wenan Renfán,
bíyemá míní ngá bɔ ná mína kaŋ byɔ.
Édɔ é ne ná,
ma ye ke ya mína á Babilonia áyát.”
44 “Éyáŋŋ été,
beésúá bé mbé bé belé Ebemm ngañiá,
ámvála Nzamá a ngá mánan Moisés ná á bɔ dɔ,
amvála ané évagle a ngá yén é mbé.
45 Niané bé ngá ñɔŋ etɔbɔga te,
ané betará bábe Josue bé ngá ñíi ya dɔ é sí bé ngá ñɔŋ.
Sí te Nzamá a ngá mana kum meyɔŋ mefé ébe ású betará.
Éñe é ngá lígi ó véa akekwíñ mélú David.
46 David te éñe a ngá yén abwará ósú Nzamá,
éde a ngá dzaa Nzamá ná,
ngé a ne ñí vé é vóm a ne lóŋ é Nzamá Jakob ndá.
47 Ve,
Salomón éñe a ngá lóŋ ñí ndá.
48 Afáŋbɔ ná,
éñí aa daŋ oyaáp ó yóp,
ăá tɔbɔ méndá mé ne nlóŋán ya mó;
amvála te édɔ nkúlu medzó aa dzó ná:
49 ‘Dzóp é ne étɔɔ́ édzwée dam,
sí da é ne fe étéle mebɔ dam.
Nzá ámvála ndá mína ye ma lóŋ?
Ngé ki ná:
Vóm mbé wá ye bɔ áwaabé dam?
Néa,
éñe Ntí aa dzó.
50 Ye se é mó mam émɔ mé ngá bɔ é byém bíse bí?’ ”
51 “Míní ne mikíp,
míní tɔɔ́ fe ye milém,
ya melɔ́ amvála ané é bot bé ne kaa ábwíni.
Mína fe ntéññ mbɔ́ɔ́ míní ne Mfúfúp Nsísim á ngamm áyát tám áse ané beésúá.
52 Nkúlu medzó mbé beésúá béé ndzí ñí dzéŋ ásí?
Bé ngá ywíñ ébá bé ngá tára bɔ́ kat fwéñ ásɔ́ɔ́ nzósoó mot.
Éde áwola dí,
míní veŋan yaá bekuan bot ya beywíñ bot.
53 Mína é bot míní ngá ñɔŋ metsiŋŋ ánu baángel,
mína kaa mɔ ádzálá.”
Áwú Esteban
54 Niané bé ngá wók mam méte,
ané bé ngá bíra yéá mílém myeba été,
bé ŋga sóm fe aywá ya Esteban.
55 Ve,
Esteban ñí a tɔɔ́ ndzálánn ya Mfúfúp Nsísim,
éde a ngá bem mís á dzóp a yén é dúmá Nzamá,
Yesus ñí a téle fe á mfá méyóm Nzamá.
56 Ané a ngá dzó ná:
“Dággán!
Me téa dzóp é yɔ́ɔ,
é Mwán Mot ñí a téle fe Nzamá á mfá meyóm!”
57 Éde bé ngá yónán kíŋŋ oyaáp ó yóp,
béé dzip melɔ́,
ané bé ngá tée nkuna,
bé mana ñí ke súgan ó ñúu.
58 Éde bé ngá kúlu ñí á kísoan átán,
bé ŋga lúm ñí mekwá.
Ané bengañiá bé ngá kee bítóp byeba ndómán enziŋ e tɔɔ́ eyola ná Saulo.
59 É tám bé ngá lúm ñí mekwá,
Esteban a ngá lwée eé dzó ná,
“Á Ntí Yesus,
ñɔŋŋe nsísim wɔm.”
60 Véa,
éde a ngá kútbe ó sí a yónán kíŋŋ oyaáp ó yóp ná:
“Á Ntí,
o táa bɔ́ láŋ nsémm te!”
Niané a ngá dzó dɔ,
ané a ngá ke óyó.