Ananías bá Safira
5
Ve,
mot a mbé eyola ná Ananías,
bá ngéá Safira bé ngá kuan afóo sí.
2 Éde a ngá kána abímm moann ye é táŋ a ngá kuan,
ngéá ñí eé yem fe dɔ;
ané a ngá ke kee baapostol ábímm avɔ́ɔ́.
3 Ve,
Pedro a ngá síli ñí ná:
“Á Ananías,
amú dzé Sátan á dzéñ wa á nlém été,
ná o kɔ́bɔ Mfúfúp Nsísim mineá,
o kána fe abímm moann ye áfóo sí o mvá kuan.
4 Kaa ná o kuan dɔ,
ye ná afóo sí dăá tɔɔ́ éedwe?
Niané o kuan fe dɔ,
ye ná moann te wăá tɔɔ́ ábɔ ñí é dzam wa kómo?
Amú dzé o bán á nlém we été ná wa bɔ dɔ?
Se bot ébe o bɔ mineá,
fáve Nzamá.”
5 Niané Ananías a ngá wók bifíá bíte ané a ngá ku mbim.
Éde wɔŋŋ ó ngá bíra biñ é bot bése bé ngá wók dɔ.
6 Ané bendómán bé ngá sɔ́,
bé mana wɔ́gɔ mbim,
bé kéñ wɔ dzep.
7 A ngá bɔ ná,
niané tám e ngá lot ané méwola mé léa,
éde ngéá Ananías ñí a ngá sian,
éñe kaa áyem é dzam é bɔban.
8 Véa,
éñe Pedro a ngá síli ñí ná:
“Katge ma,
ye é táŋ moann ñí,
édɔ míní kuan afóo sí?”
Ané ñí a ngá yalan ná:
“Ãá,
táŋ te.”
9 Éde Pedro a ngá dzó ñí ná:
“Amú dzé míní kwíñ kíŋŋ fɔ́ɔ́,
ná mína bóble Nsísim Ntí?
Yénŋe mébɔ é bot bé mvá dzep ñí nnóm,
mé téle á mbéñ má má ye fe ke ya wa.”
10 Etéññ te ébyen,
ané Safira a ngá ku Pedro mbim mébɔ ósí.
Éde niané bendómán bé ngá sian á ndá,
bé koan ya ñí a bóo mbim ané bé ngá vea ñí,
bé kéñ ñí dzep nnóm á mféŋŋ.
11 Éde wɔŋŋ ó ngá bíra mana biñ ekóánn bebwíni ése ya é bot bése bé ngá wók mam méte.
Abwiññ biyágán bí mam ya mendem
12 Éde é mó baapostol,
abwiññ biyágán bí mam ya mendem bí ngá bɔban bot été.
Bésesé bé ngá koan ya nlém mbɔ́ɔ́ á yát Salomón.
13 Afáŋbɔ ná,
bot bése bé ngá bíra bɔ́ sák,
ve mot enziŋ ĕé ngá nzomo ná aa fulan ya bɔ́.
14 Éde,
ébá bé ngá bɔ béé bwíni Ntí,
bé ngá ke bá kɔglan mora nɔmɔ,
ané befám ya fe biningá.
15 Akekwíñ ané,
bé ngá kúlu mikúkwann á bwann binɔŋŋ été,
béé bwíi myɔ á nseŋ á mfá ye ná,
é tám Pedro aa lot,
ngé e ne bɔban ná ávwéñ deñ é nama mbɔ́ɔ́ enziŋ ye été.
Hechos 5.15-20
16 É meá mé ne Yerusalen á miféŋŋ,
má nkuna bot ó ngá sɔ́ fe ya mikúkwann ya ébá misísim mí mvin mí ngá ndágle,
bésesé bé ngá tɔbɔ fe mvwaá.
Bá dzéŋ baapostol ásí
17 Ntébosú befára a ngá tébe bábe é bot bése bábe bɔ́ bé mbé nyébé besaduseo,
bé ngá tɔbɔ ndzálánn ya abéánn,
18 éde bé ngá kee baapostol mó ó ñúu,
bé dum fe bɔ́ á ndá mibok ndén.
19 Ané ángel Ntí a ngá kúu mibéñ mí ndá mibok á alú,
a kúlu bɔ́,
a dzóo fe bɔ́ ná:
20 “Keŋán átébe betételé á templo été,
míní kat fe bot fwéñ bifíá bíse bíye mfefeñ éniŋ dzí.”
21 Niané bé ngá wók dɔ,
éde bé ngá ñíi á templo été ekúná kírí,
bé ŋga yágale bot.
Ané tám te ntébosú befára a ngá sɔ́ ya é bot bábe bɔ́ bé mbé,
éde bé ngá bɔ ekóánn medzó bábe mikúkúmá míse míye Israel,
ané bé ngá lóm kíŋŋ á ndá mibok ná bé nzu ya baapostol.
Hechos 5.21-42
22 Ve,
niané mewasíli mé ngá ke sian á ndá mibok,
ébɔ́ kaa ákoan ya mot été,
éde bé ngá búlán bé kéñ kat fwéñ ná:
23 “Bí koan ya ndá mibok e fet ásesé mvéáñ,
benzima bá bé téle fe á mbéñ,
ve,
niané bí kúu dɔ,
bĭá koan ya mot enziŋ été.
24 Éde,
niané ndzwée bekálá templo bábe betébosú befára bé ngá wók bifíá bíte,
ané bébyen bé ngá tɔbɔ nzamzámánn béé síli ná dzam te dá ye ke súgan á yá.
25 Ané mot enziŋ a ngá nzu bɔ́ kat fwéñ ná:
‘Dággán ná,
é bot míní ngá nii á mbok,
bé téle betételé á templo été béé yágale bot.’ ”
26 Éde ndzwée bekálá templo a ngá ke ya mewasíli,
a sɔ́ ya baapostol,
ve kaa bɔ́ ándágle,
amú ná bé ngá kɔ wɔŋŋ ná bot bé nza bɔ́ lúm mekwá.
27 Niané bé ngá sɔ́ ya bɔ́,
ané bé ngá téle bɔ́ ékóánn medzó été;
éde ntébosú befára a ngá síli bɔ́ ná:
28 “Ye bíí ndzí mína kili ná míní táa yágale bot ya eyola te amvála enziŋ?
Ve,
míní dzálá yaá Yerusalen ya áyágalé denan,
mína kómo fe bía kee étɔm ye áwú mot te.”
29 Éde Pedro bábe é baapostol bevɔ́ɔ́ bé ngá yalan ná:
“Dá yian ná Nzamá éñe bí daŋ bɔ mewók álot bot.
30 É Nzamá bétará bea aá wómo Yesus,
éñí míní ngá ywíñ niané míní ngá kele ñí élé.
31 Éñe Nzamá a bére yaá ó yóp á mfá méyóm weñ,
a tɔɔ́ yaá fe Ntébosú ya Nkoro bot,
ná á vé Israel edzoban ya ndzámann misémm.
32 Bía bí ne mam méte bengañiá ya fe Mfúfúp Nsísim.
Mfúfúp Nsísim te éñe Nzamá a vé yaá ébe é bot bése bá bɔ ñí mewók.”
33 Éde niané bé ngá wók dɔ,
ané bé ngá bíra yéá,
bé ŋga kómo fe bɔ́ ywíñ.
34 Ané mwann fariseo enziŋ a tɔɔ́ eyola ná Gamaliel a mbé nyágale metsiŋŋ,
nnam ngúrá wɔ́ ó ngá séme fe ñí,
éde a ngá tébe tételé ékóánn medzó été,
a mánan ná bé kúlu baapostol átán oyomm tám.
35 Ané a ngá dzó bɔ́ ná:
“Á bot béye Israel,
mína bébyen tɔbɔgán ya nkée ya édí míní nkún nzu bɔ é bot bá.
36 Amú ná métám ó mvús,
Teudas a ngá tébe a dzóo ná émyen a ne mora mot,
éde bot táŋ mitet mí nii bé ngá bee ñí á mvús;
ve niané bé ngá ywíñ ñí,
é bot bése bé ngá bɔ ñí mewók,
bá bé mana fe tsaman,
ané é ngá súgan nzeze.
37 Ó mvús véa,
é tám eláŋ bot,
éde Judas mwann Galileo ñí a ngá tébe,
eé fuk bot a dulu fe bɔ́ é ngamm deñ,
ané bé ngá ywíñ ñí,
é bot bése bé ngá bɔ ñí mewók,
bá bé mana fe tsaman.
38 Éde éndagá ma dzó mína ná,
kánaŋán ya é bot bá,
líkgán bɔ́;
amú ná ngé é dzam dí ya mbɔann wí ó ne éwí bot,
wá ye mana síbi.
39 Ve déá,
ngé ó ne éwí Nzamá,
míní sés wɔ́ tsam;
a nza bɔ ná tám enziŋ,
nde míní ngá lúman yaá ya Nzamá.”
Ané a ngá wún bɔ́.
40 Éde bé ngá lwée baapostol,
niané bé ngá mana bɔ́ yít,
ané bé ngá kili bɔ́ ná bé táa bera kɔ́bɔ ye éyola Yesus.
Éde bé ngá dzáma bɔ́.
41 Ve,
baapostol bá bé ngá kólo ékóánn medzó été béé sán,
amú Nzamá aá vé bɔ́ abwará ná bé ñɔŋ osoán ákála éyola Yesus.
42 Melú mése á templo ya á mendá ya mendá bĕé ngá vwat ná bá yágale bot ya ákat fe mbamba fwéñ ná Yesus éñe a ne Kristo.