Judas aa kuan Yesus
18
Niané Yesus a ngá mana kɔ́bɔ,
ané a ngá kíkgán otoŋtóŋŋ Kedrón bábe béyága beñ,
bé kéñ á mfá mbɔ́ɔ́ áyát,
é vóm áfúp é mbé,
a ñíi été bábe béyága beñ.
2 (Judas,
é mot a ngá kuan ñí,
ñí a ngá yem fe vóm te,
amú ná Yesus a ngá bɔ eé kóán ó weñ bábe beyága beñ abwiññ biyɔŋ.)
Jesús traicionado y arrestado (Juan 18.1-14)
3 Éde Judas a ngá ñɔŋ nsámá benzima ya méwasíli betébosú befára ya émá befariseo,
ané a ngá ke ó wéñ ya beláma,
ya miduná,
ya fe byém mélúmán.
4 Véa Yesus ñí eé yem é mam mése mé ŋga nzu ñí ku áyóp,
ané a ngá ke bɔ́ síli ná,
“Mína dzéŋ nzá?”
5 Éde bé ngá yalan ya ñí ná,
“Bía dzéŋ Yesus mwann Nasareno.”
Ané a ngá dzó bɔ́ ná,
“Ma ñí.”
(Judas,
éñí a ngá kuan ñí,
á mbé bábe bot béte.)
6 Éyɔŋ a ngá dzó bɔ́ ná,
“Ma ñí,”
éde bésesé bé ngá yit ó mvús,
bé mana ku ósí.
7 Véa éñe Yesus a ngá bera bɔ́ síli ná,
“Nzá mína dzéŋ?”
Ané bá bé ngá yalan ná,
“Bía dzéŋ Yesus mwann Nasareno.”
8 Éde Yesus a ngá dzó ná,
“Me dzó yaá mína ná,
ma me ne ñí.
Édɔ ná,
ngé ma mína dzéŋ,
líkgán ná ébá bé ke.”
9 (A ngá dzó dɔ á mfá ye ná éfíá a ngá kɔ́bɔ é dzálában,
ná,
“Ébá o ngá vé ma,
meé ndzí dzímle mbɔ́ɔ́ enziŋ ye été.”)
10 Véa éñe Simón Pedro a ngá vea nzwaokeŋ á mbé a belé,
a baa óloá ntébosú befára,
ané a ngá kík ñí álɔ́ meyóm.
(Oloá te ó mbé eyola ná Malko.)
11 Éde Yesus a ngá dzó Pedro ná,
“Niigé nzwaokeŋ ábámm été.
Ye ná măá yian ñú é kɔ́p Tará a vé yaá ma?”
Bá ke ya Yesus ébe Anás
12 Dzam te édɔ nsámá bénzima,
ya komandée,
ya fe méwasíli bejudio,
bé ngá biñ Yesus,
bé mana ñí ká.
13 Éde bé ngá tára ke ya ñí ébe Anás,
amú ná a mbé Kaifas nkiá,
éñí a mbé ntébosú befára ye á mbú te.
14 (Kaifas te éñe fe ñí a mbé é mot a ngá lére betébosú béye bejudio ná,
é ne mvéáñ ná mot mbɔ́ɔ́ éñe á wú akála nnam ngúrá.)
Pedro aa kat Yesus éyɔŋ ósúá
15 Éde Simón Pedro a ngá ke aa bee Yesus bá nyága mbɔ́ɔ́.
(Ntébosú befára ñí a ngá yem fe nyága te,
ané a ngá ñíi bá Yesus á yát ntébosú befára été.)
Pedro niega conocer a Jesús y Anás pregunta a Jesús (Juan 18.15-27)
16 Ve Pedro ñí a mbé a téle á mbeñ ósí átán.
Akála te édɔ nyága mbɔ́ɔ́ te,
éñí ntébosú befára a ngá yem a ngá ke kɔ́bɔ ya é miningá a ngá kálá mbéñ,
a bɔ Pedro ná á ñíi.
17 Véa éñe mbɔ biséññ miningá te eé kálá mbéñ,
éde a ngá dzó Pedro ná,
“Nde wa o sés nyága mbɔ́ɔ́ ye béyága é mot ñí?”
Ané a ngá dzó ná,
“Me sés ñí.”
18 (Véa áloá ntébosú befára,
ya mewasíli mé mbé mé téle ó véa,
méé wók ndúán,
éñí bé ngá mana koman,
akála ná avép é mbé.
Pedro ñí a mbé fe a téle bábe bɔ́,
eé wók ndúán.)
Bá síli Yesus misílí
19 Dzam te édɔ ntébosú befára a ngá síli Yesus mfá béyága beñ ya fe ébe ayágalé deñ.
20 Ané Yesus a ngá yalan ya ñí ná,
“Me ngá ke fe ma kɔ́bɔ ya bot éyéá été.
Eyɔŋ ése me ngá ke ma vé ayágalé á sinagoga,
ya á templo été,
é vóm bejudio bése bá kóán,
meé ndzí kɔ́bɔ dzam enziŋ ásweññ.
21 Amú dzé ma wa síli dɔ?
Síligé é bot bé ngá wók é dzam me ngá kɔ́bɔ bɔ́.
Dággé bot béte bá yem é dzam me ngá dzó.”
22 Véa Yesus ñí eé dzó mam méte,
ané awasíli avɔ́ɔ́ ye édí é mbé é téle ñí bebeñ é ngá bími Yesus abéáñ ámáŋŋ,
deé dzó ná,
“Ye ná éñe wa yalan ya ntébosú befára néa.”
23 Éde Yesus a ngá yalan ya ñí ná,
“Ngé mé dzími kɔ́bɔ,
léregé édí ye é ne abé.
Vé ngé mé yem kɔ́bɔ,
akála dzé wa bími ma?”
24 Véa éñe Anás a ngá lóm ñí nkáán ébe Kaifas,
ntébosú befára.
Pedro aa bera kat Yesus
25 Éde Simón Pedro ñí a mbé a téle eé wók ndúán,
ané bé ngá síli ñí ná,
“Nde wa o sés mot mbɔ́ɔ́ ye béyága beñ?”
Éde a ngá kat dɔ,
eé dzó ná,
“Me sés éñe.”
26 Véa mot mbɔ́ɔ́ ye áloá ntébosú befára,
éñí a mbé évúvúmán é mot Pedro a ngá kík alɔ́ a ngá dzó ñí ná,
“Nde măá yén wa áfúp mína ñí?”
27 Véa éñe Pedro a ngá bera dɔ kat,
etéññ te ébyen ané nnóm kúp a ngá lɔ́ŋ.
Bé ne ya Yesus ébe Pilato
28 Véa éñe bé ngá kólo ya Yesus é ndá Kaifas,
bé kéñ ya ñí á kpatéle (ákoan ná ekúná kírí é ntɔɔ́).
Éde bébyen bé ngá bɔ kaa ñíi á kpatéle,
ná bé ne dzí Paskua,
á mfá ye ná bé nza kop mvin.
Pilato le pregunta a Jesús (Juan 18.28-40)
29 Véa éñe Pilato a ngá kwíñ átán,
a kéñ é vóm bé mbé,
a síli ná,
“Nzá esɔ́mán míní belé ya dɔ é mot ñí?”
30 Ané bé ngá yalan ya ñí ná,
“Ngé é mot ñí á bɔ kaa ábɔ mbéa mot,
ngé bĭá nzu wa ñí ákee.”
31 Véa éñe Pilato a ngá dzó bɔ́ ná,
“Mína bébyen keŋán ya ñí,
míní kík ñí misaŋ ámvála nkɔɔ́ métsiŋŋ wenan wá dzó.”
Ané betébosú béye bejudio bé ngá yalan ya ñí ná,
“Bĭí belé filí ye ná,
bí vé mot nsaŋ áwú.”
32 (Dzam te é ngá bɔban á mfá ye ná éfíá Yesus a ngá kɔ́bɔ,
é dzálában,
eé lére nzá ámvála awú á mbé ná á nkún nzu wú.)
33 Véa éñe Pilato a ngá bera ñíi á kpatéle été,
ané a ngá lwée Yesus,
a síli ñí ná,
“Ye wa ó ne é Kéza bejudio?”
34 Éde Yesus a ngá yalan ná,
“Ye wa dzó dɔ deé sɔ́ ébe wámyen,
ngé ki ná bot befé ébɔ́ bé dzó wa dɔ,
á mfá wɔm?”
35 Véa éñe Pilato a ngá yalan ná,
“Ye me ne mwann Judio?
É bot bwe,
bábe betébosú befára,
ébɔ́ bé kee ma wa.
Dzé ó bɔ?”
36 Éde Yesus a ngá yalan ná,
“Édzwée ngɔ́mán dam é sés édí ye é sí ñí.
Ngé édzwée ngɔ́mán dam é bɔ édí ye é sí ñí,
ngé bebɔ biséññ bam bá lúman á mfá ye ná bé bɔ ma kaa kee é mó betébosú béye bejudio.
Ve éndagá édzwée ngɔ́mán dam e sés édí ye ó vá.”
37 Véa éñe Pilato a ngá dzó ñí ná,
“Dá yíli fá ná o ne kéza?”
Ané Yesus a ngá yalan ná,
“Wa wa dzó ná me ne kéza.
Dzam te édɔ me byála yaá ya dɔ,
akála te édɔ fe me sɔ́ yaá dɔ é sí ñí,
á mfá ávé ngañiá ye édí é ne bébélá;
éñí áse a ne bébélá mot aa wók é kíŋŋ dzam.”
38 Éde Pilato a ngá síli ñí ná,
“Dzé é ne bébélá?”
Niané a ngá dzó dɔ,
ané a ngá bera ke koan ya bejudio,
a dzó bɔ́ ná,
“Măá koan ya etɔm enziŋ ébe éñe.
39 Ve,
dá é ntɔɔ́ mína fúlú ná ó Paskua,
bá vé mína mbok mbɔ́ɔ́ filí.
Ye mína kómo ná me vé mína kéza bejudio filí?”
40 Véa éñe bé ngá bera yónán ná,
“Se éñí te!
Ve,
Barrabás!”
(Barrabás te ñí a mbé nzeé midzɔ́ŋŋ.)