16
Me dzó yaá mína é mam má á mfá ye ná míní nza kɔp obaá.
2 Bá ye tsílán ya mína á besinagoga,
akekwíñ ná tám da nzu ná,
éñí aa ywíñ mína,
aa ye tém ná aa vé Nzamá nkaŋann.
3 Éde bá ye bɔ mam méte amú ná béé ndzí yem Tará ngé ki ma.
4 Ve me dzó yaá mína é mam má,
á mfá ná niané áwola deba é kwíñ yaá,
míní síman ná maá kɔ́bɔ ya mína ya mɔ.
Éséññ Mfúfúp Nsísim
Meé ndzí mína mɔ tára ádzó,
amú ná me mbé me tɔɔ́ bíabe mína.
5 Ve éndagá mé ŋga ke yaá ébe éñí a ngá lóm ma,
mot enziŋ ye ébe mína ñí ăá síli ki ma ná,
‘Wa ke ó vé?’.
Más enseñanza sobre el Espíritu Santo (Juan 16.5-33)
6 Ve fáve ná eywiññ dá é dzéñ yaá mína mílém akála ná me dzó yaá mína é mam má.
7 Ve dzam te édɔ ma kɔ́bɔ mína bébélá ná,
é ne mína ya abúánn ná me ke;
amú ná ngé ma bɔ kaa áke,
Mfoŋ milém ñí ăá ye fe sɔ́ ébe mína.
Ve ngé me kéñ,
ma ye mína ñí lóm.
8 Éde éyɔŋ aa ye sian,
aa ye bwaale bot á mfá nsémm,
á mfá nzósoó,
ya á mfá nkíkgán misaŋ;
9 ébe á mfá nsémm,
amú ná băá bwíni ma;
10 ébe á mfá nzósoó,
amú ná ma ke ébe Tará,
mína mínăá ye ki ma bera yén;
11 ébe á mfá nkíkgán misaŋ,
amú ná ntébosú ye éniŋ dzí bé kík yaá ñí nsaŋ.
12 Me ngén me belé abwiññ mam ye ádzó mína,
ve míní sés mɔ ñɔŋ éndagá.
13 Ve niané Nsísim,
éñí a ne bébélá aa ye sian,
éñe aa ye wulu ya mína á bébélá áse été.
Amú ná ăá ye kɔ́bɔ ya é nguu dzeñ émyen,
fáve ná aa ye kɔ́bɔ édí áse aa wók,
aa ye fe mína kat fwéñ ébe édí é ntɔɔ́ ná dá nzu.
14 Éñe aa ye ma vé dúmá,
amú ná aa ye ñɔŋ édí é ne áandam,
a kat fe mína dɔ fwéñ.
15 Ásesé Tará a belé é ne éewɔm;
dzam te édɔ me dzó yaá mína dɔ ná,
aa ñɔŋ édí é ne áandam a lére mína dɔ.
Yesus aa búlán ébe Tará
16 Oyomm abɔ́ŋŋ tám mínăá ye ma yén,
véa oyomm abɔ́ŋŋ tám afé,
mína ye ma bera yén.
17 Ané beyága benziŋ béye béyága béñ bé ngá dzó bevɔ́ɔ́ ya ébá bevɔ́ɔ́ ná,
“É dzam aa dzó dí,
dá yíli á yá ná,
‘oyomm abɔ́ŋŋ tám mínăá ye ma yén;
véa oyomm abɔ́ŋŋ tám afé,
mína ye ma bera yén,
ya fe ná,
‘amú ná ma ke ébe Tará’?”
18 Dzam te édɔ bé ngá dzó ná,
“Nzá dzam aa dzó dí ná,
‘oyomm abɔ́ŋŋ tám’?
Bĭá yem ngúrá dzam aa kɔ́bɔ.”
19 Yesus ñí eé yem ná bá kómo ñí síli nsílí,
éde a ngá dzó bɔ́ ná,
Ye é dzam dí édɔ mína kɔ́bɔ mína ya mína,
ná mé dzó ná,
‘Oyomm abɔ́ŋŋ tám mínăá ye ma yén;
véa oyomm abɔ́ŋŋ tám afé,
mína ye ma bera yén’?
20 Ma kɔ́bɔ mína bébélá ya bébélá ná,
mína ye yi,
ya fe átɔbɔ eywiññ,
ve bot béye é sí ñí bá ye sán;
mína ye tɔbɔ ya eywiññ,
ve éywiññ denan dá ye veŋan mesán.
21 É tám miningá á ŋga byéñ yaá,
aa wók mitéñ,
amú ná áwola deñ é kwíñ yaá;
ve niané mwán a byála yaá,
éñe kaa fe síman mítéñ a mvá wók,
akála mesán,
amú ná a sɔ́ yaá mwann mot éniŋ.
22 Amvála te fe mína áwola dí,
mína míní ntɔɔ́ fe eywiññ;
ve ma ye mína bera yén,
véa mílém myenan mí ŋga sán,
mot enziŋ ñí ăá ye ki mína vea mésán menan.
23 Mos te,
mínăá ye ma síli dzam enziŋ.
Ma kɔ́bɔ mína bébélá ya bébélá ná,
ngé míní dzaa Tará dzam enziŋ,
ya éyola dam,
aa ye mína dɔ vé.
24 Anzukwíñ áwola dí mína mínăá bé dzaa dzam enziŋ ya éyola dam;
dzaagán,
véa mína ye ñɔŋ,
á mfá ye ná mésán menan mé tɔbɔ ndzálánn abóm.
25 Me kɔ́bɔ yaá ya mína é mam má á mikaná été,
tám da nzu,
éyɔŋ măá ye fe bera kɔ́bɔ ya mína á mikaná été,
ve fáve ná ma ye kɔ́bɔ ya mína édí Tará éyéá été.
26 Mos te mína ye dzaa ya éyola dam,
éde măá dzó mína ná ma ye yaglan ya Tará ákála denan,
27 akála ná Tará émyen aa dziŋ mína,
amú ná míní dziŋ yaá ma,
míní bwíni yaá fe ná éñe maá sɔ́ ébe Nzamá.
28 Maá sɔ́ ébe Tará,
me sian éniŋ dzí;
ve ma bera lík éniŋ dzí,
véa me kéñ ébe Tará.
29 Ané béyága beñ bé ngá dzó ñí ná,
Dággé!
Éndagá éñe ó ŋga kɔ́bɔ yaá ya bía éyéá été,
kaa fe kɔ́bɔ ya mikaná.
30 Éyɔŋ dzí éñe bí yem yaá ná wa yem mam mése,
wăá yi ki ná mot enziŋ á síli wa dzam,
akála te édɔ fe bía bí bwíni yaá ya dɔ ná éñe waá sɔ́ ébe Nzamá.
31 Éde Yesus ñí a ngá yalan ya bɔ́ ná,
Ye ná áwola dí édɔ míní ŋga bwíni yaá?
32 Dággán ná áwola dá nzu,
é ntɔɔ́ fe,
édí mína ye tɔbɔ myeann,
kada mot mfá weñ émyen,
véa míní lík ma etámm;
ve ma me sés etámm,
amú ná Tará a ne bía ñí.
33 Me kɔ́bɔ yaá mína é mam má á mfá ye ná míní belé mvwaá ébe ma.
Mína yén midzuúk ébe éniŋ dzí,
ve biñŋán nguu ná,
me wún yaá éniŋ dzí.