Yesus aa kúlán nzenn
14
“Kaa tɔbán nzamzámánn á milém myenan été.
Mína bwíni Nzamá,
bwíniŋán fe ma.
2 É ndá Tará é ne ya abwiññ bitɔbɔga;
ngé é bɔ kaa bɔ néa,
ngé me dzó yaá mína dɔ;
amú ná ma ke koman vóm á mfá wenan.
El único camino a Dios (Juan 14.1-14)
3 Éde,
ngé me kéñ,
me koman fe vóm á mfá wenan,
ma ye bera sɔ́,
véa mámyen me ñɔŋ mína,
á mfá ye ná mína míní tɔbɔ fe é vóm me tɔɔ́.
4 Mína mína yem fe nzenn ye é vóm ma ke.”
5 Ané Tomás a ngá dzó ñí ná,
“Á Ntí,
bĭá yem vóm mbé wa ke,
é ne bía yem nzenn á yá?”
6 Éde Yesus a ngá dzó ñí ná,
“Ma me ne Nzenn,
ya Bébélá,
ya fe Eniŋ.
Mot enziŋ ăá ye ke ébe Tará,
kaa ané fáve ébe ma.
7 Ngé á bɔ ná míní yem yaá ma,
ngé mína aa ye fe yem Tará.
Atéé ye éndagá,
mína yem ñí,
míní yén yaá fe ñí.”
Yesus aa kúlán Tará Nzamá
8 Ané Felipe a ngá dzó ñí ná,
“Á Ntí,
síígé bía lére Tará,
véa a mana.”
9 Éde Yesus a ngá dzó ñí ná,
Á Felipe ye ná ábímm tám me tɔbɔ yaá bíabe mína,
ye ná ó ngén kaa ma yem?
Éñí a yén yaá ma,
a yén yaá Tará;
wa dzó á yá ná,
‘Léregé bía Tará?’
10 Ye wăá bwíni ná me ne ébe Tará,
Tará ñí a ne fe ébe ma?
Bífíá ma kɔ́bɔ mína,
măá kɔ́bɔ byɔ ya é nguu dzam mámyen,
ve é Tará a tɔɔ́ ébe ma,
éñe a lére míbɔann myeñ.
11 Bwíniŋán ma ná me tɔɔ́ ébe Tará,
Tará fe ébe ma.
Ngé é sés néa,
bwíniŋán ákála mibɔann míbyen.
12 Ma dzó mína bébélá ya bébélá ná,
éñí aa bwíni ma,
míbɔann ma bɔ ñí aa ye fe myɔ bɔ;
aa ye bɔ émí myá daŋ ya minén ya émí,
amú ná ma ke ébe Tará.
13 Éde édí áse mína dzaa ébe éyola dam,
ma ye dɔ bɔ,
á mfá ye ná Tará á ñɔŋ dúmá ébe Mwán.
14 Ngé míní dzaa ma dzam ébe éyola dam,
ma ye dɔ bɔ.
Ngaá Mfúfúp Nsísim
15 Ngé mína dziŋ ma,
mína ye baale mémvéná mam.
Jesús habla del Espíritu Santo (Juan 14.15-31)
16 Véa ma ye dzaa Tará,
ané ñí aa ye fe mína vé Mfoŋ milém mfé,
ná á tɔbɔ mínabe bɔ́ kɔ́mm áse.
17 Nsísim ye á bébélá éñí bot béye é sí ñí bé sés ñɔŋ,
amú ná băá yén ñí,
băá yem ki ñí.
Ve mína,
mína yem ñí amú ná a tɔɔ́ mínabe bɔ́,
aa ye fe mína tɔbɔ été.
18 Măá ye mína lík bɔbéñúŋŋ;
ma ye nzu ébe mína.
19 Oyomm abɔ́ŋŋ tám,
bot béye é sí ñí băá ye ma bera yén.
Ve mína,
mína ye ma yén;
amú ná me ne ntétéá,
mína mína ye fe tɔbɔ betétéá.
20 Tám te édɔ mína ye yem ná me ne ébe Tará,
mína míní ne ébe ma,
ma me ne fe ébe mína.
21 Éñí a belé mémvéná mam,
a baale fe mɔ,
mot te éñe aa dziŋ ma.
Éde éñí ñí aa dziŋ ma,
Tará aa ye ñí dziŋ;
ma ma ye fe ñí dziŋ,
véa mámyen me léreban ébe éñe.
22 Ané Judas (se éñí Iskariote) a ngá síli ñí ná,
“Á Ntí,
dzé é bɔ yaá ná éñe wámyen wá ye léreban fáve ébe bía,
ve se ébe bot béye é sí ñí?”
23 Véa Yesus ñí a ngá yalan ya ñí ná,
Ngé mot aa dziŋ ma,
aa ye baale éfíá dam;
véa Tará aa ye ñí dziŋ;
éde bía ye sɔ́ ébe mot te,
bí bɔ etɔbɔga ébe éñe.
24 É mot ăá dziŋ ma,
ăá baale bífíá byam;
éfíá dá mína wók dí,
é sés áandam,
ve fáve édí éñí a lóm yaá ma,
édí Tará.
25 Me dzó yaá mína é mam má,
me tɔɔ́ bíabe mína.
26 Ve Mfoŋ milém,
Mfúfúp Nsísim,
éñí Tará aa ye lóm ébe éyola dam,
aa ye mína yágale mam mése,
aa ye fe mína vé osímánn ye é dzam áse me dzó yaá mína.”
27 Ma lík mína ya mvwaá,
é mvwaá dam édɔ ma vé mína;
măá vé mína dɔ ané éniŋ dzí dá vé dɔ.
Milém myenan mí táa kelebe óyóp,
mí táa ki kɔ wɔŋŋ.
28 Míní mvá wók ané ma dzó mína ná,
‘Ma ke,
véa ma ye bera sɔ́ ébe mína.’
Ngé á bɔ ná mína dziŋ ma,
ngé mína ye sán ná ma ke ébe Tará;
amú ná Tará éñe aa daŋ ya ma.
29 Éde ma me dzó yaá mína dɔ éndagá,
kaa ná é bɔban,
á mfá ye ná éyɔŋ dá ye bɔban,
míní bwíni.
30 Măá ye fe daŋ bera ákɔ́bɔ bíabe mína,
amú ná ndzwée ye éniŋ dzí á ŋga nzu yaá,
ñí ĕé belé ki dzam enziŋ ébe ma.
31 Ve á mfá ye ná bot béye é sí ñí bé yem ná ma dziŋ Tará,
ya ámvála Tará a ngá mánan ma,
néa éñe ma bɔ.
Tébegán,
bí kólogán ó vá.