Yesus aa sop beyága mebɔ
13
Kaa ná fét Paskua eé ku,
Yesus eé yem ná áwola deñ é kwíñ yaá ná aa kólo éniŋ dzí a kéñ ébe Tará.
Aá dziŋ áabeñ bé mbé ébá béye é sí ñí,
aá dziŋ fe bɔ́ akekwíñ asúgánn.
2 Éde,
éyɔŋ bé ngá dzí bidzí bíye alú;
ákoan ná déble a sɔ́gle yaá nlém Judas,
é mwán Simón Iskariote,
ná á kuan Yesus.
Jesús lava los pies de los discipulos (Juan 13.1-17)
3 Yesus ñí eé yem ná Tará aá kee ñí mam mése é mó meñ été,
ya fe ná,
aá sɔ́ ébe Nzamá,
éñe fe aa búlán ébe Nzamá;
4 ané a ngá tébe ó téble,
a swálá étóp deñ,
a twáa táwɔ́lá,
a bán ñí ángérgá.
5 Éñe véa a ngá swii mendzímm á falaŋgána été,
á ŋga tára ná aa sop beyága mebɔ ya á fími fe bɔ́ mɔ ya é táwɔ́lá a mbé a bán ñí ángérgá.
6 Ané a ngá sian ébe Simón Pedro,
ané ñí a ngá dzó ñí ná,
“Á Ntí,
ye ná wa wa sop ma mebɔ?”
7 Éde Yesus a ngá yalan ya ñí ná,
“Wăá bé yem édí ma bɔ éndagá,
ve wa ye dɔ yem niané é mam má má ye lot.”
8 Ané Pedro a ngá dzó ñí ná,
“Wăá ye me sop mebɔ tám enziŋ.”
Véa Yesus ñí a ngá yalan ya ñí ná,
“Ngé măá sop wa mebɔ,
wĕé belé ngap ébe ma.”
9 Éde Simón Pedro a ngá dzó ñí ná,
“Á Ntí,
se fáve mebɔ etámm,
ve ya fe binam ya nló.”
10 Ané Yesus ñí a ngá dzó ñí ná:
“Éñí á wóbán yaá,
fáve mebɔ etámm émɔ aa sop,
akála ná á ntɔɔ́ mfúbánn ásesé.
Éde mína míní ntɔɔ́ mifúbánn,
ve se mína bésesé.”
11 (Amú ná a ngá yem nzá aa ye ñí kuan;
dzam te édɔ a ngá dzó ya dɔ ná,
“Se mína bésesé míní ne mifúbánn.”)
12 Éde niané a ngá mana bɔ́ sop mebɔ,
ané a ngá twáa bítóp byeñ,
véa a bera tɔbɔ,
á ŋga dzó bɔ́ ná,
Ye mína yem nzá dzam me bɔ yaá mína?
13 Mína lwée ma ná,
‘Nyágale ya Ntí,’
mína kɔ́bɔ mvéáñ,
amú ná me ne dɔ.
14 Édɔ ná,
ngé ma Ntí ya Nyágale,
me mvá mína sop mebɔ,
mína mína yian fe sopban mebɔ bevɔ́ɔ́ ya ébá bevɔ́ɔ́;
15 amú ná me vé yaá mína efonann á mfá ye ná ámvála me bɔ yaá mína,
mína bɔgán fe.
16 Ma dzó mína bébélá ya bébélá ná,
oloá wăá lot é mása weñ,
nlómánn wá wăá lot ki éñí aá lóm ñí.
17 Ngé mína yem é mam má,
mvɔmm ya mína ngé mína dzálá mɔ.
Yesus aa lére éndéndaŋ ná nyága mbɔ́ɔ́ á ŋga nzu yaá ñí kuan
18 Măá kɔ́bɔ ya mína bésesé.
Ma yem ébá me tɔ́p yaá.
Ve á mfá ye ná Ntsili ó dzálában ná,
‘Éñí aa dzí mfémm wɔm a tébe yaá ma á ngamm áyát.’
Jesús predice la traición (Juan 13.18-38)
19 Ma tára mína dɔ dzó éndagá,
kaa ná é bɔban,
á mfá ye ná éyɔŋ dá ye bɔban,
míní bwíni ná Ma Me Ne.
20 Ma dzó mína bébélá ya bébélá ná,
éñí aa ñɔŋ é mot ma ye lóm,
ma ñí aa ñɔŋ,
éñe ñí aa ñɔŋ fe ma,
aa ñɔŋ éñí aá lóm ma.
21 Éde Yesus eé dzó dɔ,
á ŋga wórán abé á nsísim été,
ané á ngá vé ngañiá ná,
“Ma dzó mína bébélá ya bébélá ná,
mot mbɔ́ɔ́ ye ébe mína aa ye ma kuan.”
22 Véa beyága bé ŋga ke bá dággán bevɔ́ɔ́ ya ébá bevɔ́ɔ́,
bé tɔɔ́ nzamzámánn ya ná,
nzá aa dzó ya ñí.
23 Éde nyága mbɔ́ɔ́ ye béyága beñ,
éñí Yesus a ngá dziŋ,
a mbé a yága Yesus ó twíñ.
24 Ané Simón Pedro a ngá vé ñí ndem ná aa síli ná aa dzó ya nzá.”
25 Éde éñí a mbé a yága Yesus ó twíñ a ngá dzó ñí ná,
“Á Ntí,
a ne nzá?”
26 Ané Yesus a ngá yalan ná,
“A ne éñí ma ye vé mfémm ma du.”
Éde niané a ngá du mfémm,
a ñɔŋ wɔ a kee fe wɔ Judas,
é mwán Simón Iskariote.
27 Niané Judas a ngá ñɔŋ mfémm te,
ané Sátan a ngá ñíi ébe éñe.
Éde Yesus a ngá dzó ñí ná,
“Édí wa nzu bɔ,
bɔɔ́ge dɔ avóó.”
28 (Ve mbɔ́ɔ́ enziŋ ye bábe bɔ́ bé mbé bé tɔɔ́ ó téble,
eé ndzí yem akála dzé aá dzó ñí dɔ;
29 amú ná bevɔ́ɔ́ benziŋ bé ngá tém ná akála Judas éñe a mbé a belé ekpea moann,
édɔ Yesus a ngá dzó ya ñí ya dɔ ná,
aa ke kus é byém bá yi ó fét;
ngé ki ná,
á vé mitétéññ dzóm enziŋ.)
30 Éde niané Judas a ngá ñɔŋ mfémm,
véa a kwíñ átán.
(Á koan ná alú é ntɔɔ́.)
Yesus aa kat fwéñ ye étɔɔ́ dúmá deñ
31 Éde,
éyɔŋ a kwíñ yaá átán,
ané Yesus a ngá dzó ná,
Áwola dí é Mwán mot a ñɔŋ yaá dúmá,
Nzamá ñí a ñɔŋ yaá fe dúmá ébe éñe.
32 Édɔ ná,
ngé Nzamá aa ñɔŋ dúmá ébe éñe,
véa Nzamá aa ye ñí vé dúmá ébe émyen,
á nkún fe ñí ánzu vé dúmá.
33 Á bɔ́ŋŋ,
me ngén me tɔɔ́ bíabe mína oyomm abɔ́ŋŋ tám.
Mína ye ma dzéŋ,
ámvála me ngá dzó betébosú béye bejudio,
mína ma dzó fe dɔ éndagá ná,
‘Míní sés nzu é vóm ma ke.’
Mfefeñ mvéná
34 Ma vé mína mfefeñ mvéná,
ná míní dziŋan bevɔ́ɔ́ ya ébá bevɔ́ɔ́,
ámvála me dziŋ yaá mína,
amvála te mína dziŋŋán fe bevɔ́ɔ́ ya ébá bevɔ́ɔ́.
35 Ébe édí te bot bésesé bá ye yem ná míní ne béyága bam,
ngé míní belé edziŋŋ bevɔ́ɔ́ ya ébá bevɔ́ɔ́.
Yesus aa lére ná Pedro aa ye ñí kat
36 Ané Simón Pedro a ngá síli ñí ná,
“Á Ntí,
wa ke ó vé?”
Éde Yesus a ngá yalan ya ñí ná,
“O sés ma bee éndagá ébe é vóm ma ke,
ve wa ye ma súgan bee.”
37 Ané Pedro a ngá sili ñí ná,
“Á Ntí,
amú dzé me sés wa bee éndagá?
Ma ye kee éniŋ dzam ákála dwe.”
38 Éde Yesus ñí a ngá yalan ná,
“Ye wa ye kee éniŋ dzwe ákála dam?
Ma dzó wa bébélá ya bébélá ná,
kaa ná nnóm kúp á lɔ́ŋ,
ákoan ná o kat yaá ma táŋ biyɔŋ bí léa.”