Áwú Lásaro
11
A ngá bɔ ná mot enziŋ a mbé nkúkwann,
a tɔɔ́ eyola ná Lásaro,
mot ye á Betania,
é dzeá María bá mwanñaŋ Marta.
2 (María éñe a ngá wáa Ntí mbwánn enum,
a fími fe ñí mebɔ ya ésií dzeñ.
María te,
ndóm Lásaro édɔ é mbé nkúkwann.)
Jesús resucita a Lázaro (Juan 11.1-57)
4 Niané Yesus a ngá wók dɔ,
ané a ngá dzó ná,
“Okwann te ó sés á mfá ye áwú,
ve fáve ébe é dúmá Nzamá,
ná é Mwán Nzamá á ñɔŋ dúmá ébe éwɔ.”
5 (Ve Yesus ñí a ngá dziŋ Marta,
bá mwanñaŋ,
ya fe Lásaro.)
6 Éde niané a ngá wók ná a ne nkúkwann ané a ngá bera lígi a tɔɔ́ é vóm á mbé táŋ melú mé beáñ.
7 Nia véa,
éde a ngá dzó béyága ná,
“Bí beragán ke á Judea.”
8 Ané beyága bá bé ngá dzó ñí ná,
“Á Rabí,
betébosú béye bejudio bé ndem wa ye álúm mekwá.
Ye ná wa ó ŋga bera yaá ke ó wéñ?”
9 Éde Yesus a ngá yalan ná,
“Nde dzóp dĕé belé awóm méwola ya méwola mé beáñ?
Ngé mot aa wulu ó mos,
ăá kɔp obaá,
amú aa yén eyéá ye éniŋ dzí.
10 Ve ngé mot enziŋ aa wulu á alú,
aa kɔp obaá,
amú ná eyéá é sés ébe éñe.”
11 Niané a ngá mana dzó mam méte,
ané ngá dzó bɔ́ ná,
“Mvwíññ dzea Lásaro é ntɔɔ́ óyó;
ve ma ke á mfá ye ná me suk ñí óyó.”
12 Éde beyága bá bé ngá dzó ñí ná,
“Á Ntí,
ngé a ne óyó,
aa ye tɔbɔ mvwaá.”
13 (Yesus ñí a ngá kɔ́bɔ á mfá áwú Lásaro;
ve beyága bá bé ngá tém ná aa dzó ya óyó mot áse aa ke.)
14 Véa éñe Yesus a ngá túga bɔ́ kelan ná,
“Lásaro a wú yaá,
15 éde fe ma sán ákála denan,
amú ná măá tɔɔ́ ó wéñ,
á mfá ye ná míní bwíni.
Ve bí keŋán é vóm a ne.”
16 Ané é Tomás (éñí bé ngá lwée ná mbyás) a ngá dzó béyága bevɔ́ɔ́ ané éñe ná,
“Bía bí keŋán fe á mfá ye ná bí kean fe wú bíabe bɔ́.”
Yesus aa wómo Lásaro
17 Éde Yesus a ngá sian,
a koan ná avé bé dzep ñí ó sɔŋ é ntɔɔ́ melú mé nii.
18 (Betania ñí a mbé fe bebeñ ya Yerusalen táŋ ané mekwá mé léa,
19 éde abwiññ bot béye bejudio bé ngá mana sɔ́ ébe Marta bá María,
ná bá nzu tɔbɔ ya bɔ́ akála é ndóm deba.)
20 Niané Marta a ngá wók ná Yesus á ŋga sian yaá,
ané a ngá ke toban ya ñí;
ve María ñí aá lígi a tɔɔ́ ósí á ndá.
21 Ané Marta a ngá dzó Yesus ná,
“Á Ntí,
ngé á bɔ ná o bɔ ó vá,
ngé ndóm dam deé ndzí wú.
22 Ve ma yem fe ná,
atwaa éndagá,
é dzam áse wa dzaa Nzamá,
Nzamá aa ye wa dɔ vé.”
23 Éde Yesus a ngá dzó ñí ná,
“Ñu ndóm da ye wómo.”
24 Ané Marta a ngá yalan ya ñí ná,
“Ma yem ná aa ye wómo éyɔŋ miwúán myá ye wómo,
é mos wá súgán.”
25 Éde Yesus a ngá dzó ñí ná,
“Ma me ne nwómán miwúán ya fe eniŋ;
éñí áse aa bwíni ma afáŋbɔ ná aa wú,
aa ye niŋ;
26 éñí áse ñí aa niŋ aa bwíni fe ma,
ăá ye wú amvála enziŋ.
Ye wa bwíni dɔ?”
27 Ané Marta a ngá yalan ya ñí ná,
“Á Ntí,
ãá,
me bwíni yaá ná wa o ne Kristo,
é Mwán Nzamá éñí aa nzu é sí ñí.”
28 Éde ñí eé dzó dɔ,
ané a ngá ke lwée mwanñaŋ María évwíñ,
a dzó ñí ná,
“Nyágale a ntɔɔ́ vá,
aa lwée fe wa.”
29 Éde niané a ngá wók dɔ,
ané ñí a ngá dzíga fe tébe avóó,
a kéñ ébe éñe.
30 (Ákoan Yesus a ngén é vóm Marta a ngá ke tóban ya ñí,
kaa ná á ñíi á dzeá été.)
31 Éde béjudio bé mbé á ndá ná bá nzu tɔbɔ ya ñí,
niané bé ngá yén María aa dzíga kólo ó sí a kwíñ átán,
éde bé ngá bee ñí,
béé tém ná aa ke ó sɔŋ ná éñe aa ke yi ó wéñ.
32 Éde María a ngá ke é vóm Yesus a mbé,
niané a ngá yén ñí,
éde a ngá ku ñí mébɔ ó sí,
eé dzó ñí ná,
“Á Ntí,
ngé á bɔ ná o bɔ ó vá,
ngé ndóm dam deé ndzí wú.”
33 Éde niané Yesus a ngá yén ñí eé yi,
ya fe bejudio bé ngá ke bá bee ñí bá béé yi fe,
á ŋga bíra wórán abé á nsísim été,
á ŋga tɔbɔ fe ya eywiññ.
34 Ané a ngá síli ná,
“Mínaá bwíi ñí vóm mbé?”
Éde bé ngá dzó ñí ná,
“Á Ntí,
nzaá yén.”
37 Ve bevɔ́ɔ́ béye été bá bé ŋga dzó ná,
“É mot a ngá séñ ndzíndzímm ñí,
ye ná ăá tɔɔ́ fe bɔ ná Lásaro a táa wú?”
38 Éde Yesus a ngá bera daŋ wórán mitéñ á nlém weñ été,
véa aa kéñ á sɔŋ.
(Aa mbé ndá ákwá,
akwá dá é mbé fe éyéŋán dɔ áyóp.)
39 Ané Yesus a ngá dzó ná,
“Veagán akwá.”
Véa éñe Marta,
kéá ye á nwú,
a ngá dzó ñí ná,
“Á Ntí,
á ŋga num yaá,
amú ná á ntɔɔ́ melú mé nii.”
40 Éde Yesus a ngá síli ñí ná,
“Ye ná măá dzó yaá wa ná,
ngé wa bwíni,
wa ye yén é dúmá Nzamá?”
41 Ané bé ngá vea akwá.
Éde Yesus a ngá bére mís ó yóp eé dzó ná,
“Á Tará,
ma vé wa akíba amú ná o wók yaá ma.
42 Éde,
me mvá fe yem ná wa wók ma eyɔŋ ése;
ve me dzó dɔ akála nkuna bot wá boman ma,
á mfá ye ná bé bwíni ná wa o lóm yaá ma.”
43 Éde,
eé dzó dzam te,
ané a ngá yónán ya kíŋŋ oyaáp ó yóp ná,
“Lásaro,
kwíñŋe átán!”
44 Éde éñí á mbé nwú a ngá kwíñ átán,
a tɔɔ́ nwɔ́gán á bitóp été ó mó ya mebɔ;
ású deñ dá é tɔɔ́ mvígilán á népken été.
Ané Yesus a ngá dzó bɔ́ ná,
“Tsiigán ñí,
míní lík ñí ná á ke!”
Bá bɔ eswaá ná bá ywíñ Yesus
45 Dzam te édɔ abwiññ bejudio é ngá nzu ébe María,
niané bé yén édí a ngá bɔ,
éde bé ngá bwíni ñí.
46 Ve bevɔ́ɔ́ benziŋ bá bé ngá ke ébe befariseo,
bé kat bɔ́ fwéñ é dzam Yesus a ngá bɔ.
47 Ané betébosú befára ya befariseo bé ngá bɔ ekóánn betébosú,
béé dzó ná,
“Nzá dzam bía bɔ?
Amú ná é mot ñí á ŋga bɔ yaá abwiññ biyágán mendem.
48 Ngé bí lík ñí néa,
bot bése bá ye ñí bwíni,
véa bwann beromano bá ye sɔ́,
bé vea bía é vóm wea,
ya fe áyɔŋ dea.”
49 Éde Kaifas,
mot mbɔ́ɔ́ ye ébe bɔ́,
ntébosú befára ye á mbú te,
a ngá dzó bɔ́ ná,
“Míní ne kaa yem dzam enziŋ,
50 ye mínăá ñú táŋ ná,
é ne mvéáñ ná mot mbɔ́ɔ́ éñe á wú ákála bot bése,
se ná ayɔŋ ngúrá édɔ é mana dzáŋ.”
51 (Ve eé ndzí dzó dzam te ébe á mfá weñ émyen;
ve fáve ná éñe a tɔɔ́ ntébosú befára ye á mbú te,
aá kúlán ná Yesus á nkún wú ákála ayɔŋ ngúrá.
52 Se ki fáve ákála ayɔŋ etámm,
ve ya fe ná áfulan é bwán Nzamá bé ne myeann.)
53 Édɔ ná,
atéé ye mos te,
éñe bé ngá kík ná bá ywíñ ñí.
54 Ya dzam te édɔ Yesus ĕé ngá bɔ fe eé wulu á bot été énzénzaŋ bejudio,
fáve ná a ngá kólo ó véa a kéñ ábeŋŋ sí é mbé bebeñ éyáŋŋ été,
é kísoan bá lwée ná Efraím,
ané a ngá tɔbɔ ó wéñ bábe beyága.
55 Ákoan ná é fét Paskua bejudio eé ntɔɔ́ bebeñ,
éde abwiññ bot ye mevóm mése é ngá mana bét á Yerusalen kaa ná fét eé bɔ,
ná bá ke fúbu méñúu meba bébyen.
56 Véa bé ŋga dzéŋ Yesus,
béé ke bá tébe á templo béé kɔ́bɔ bevɔ́ɔ́ ya ébá bevɔ́ɔ́ ná,
“Mína yén á yá?
Ye ná ăá ye sɔ́ ó fét?”
57 (Ákoan ná betébosú befára ya befariseo bé mánan yaá ná,
ngé mot enziŋ aa yem é vóm Yesus a ne,
á kéŋ dɔ kat fwéñ,
á mfá ye ná bé biñ ñí.)