Mitómá myá yem é kíŋŋ mbaale weba
10
Bébélá ya bébélá ma dzó mína ná,
éñí aa bɔ kaa ñíi á mbéñ ábemá mitómá,
ve fáve ná aa ke bét mfá mfé,
mot te a ne ndzídzíp ya nzeé midzɔ́ŋŋ;
2 ve éñe ñí aa ñíi á mbéñ,
éñe a ne nkálá mitómá.
Jesús el buen pastor (Juan 10.1-21)
3 Mot te éñe nkálá mbéñ ábemá aa kúu mbéñ,
mitómá mí ŋga béá é kíŋŋ deñ,
ñí á ŋga lwée fe mitómá ya eyola,
véa a kéñ fe ya myɔ átán.
4 Éyɔŋ a mana yaá ákwíñ átán ya mítómá myeñ,
á ŋga ke myɔ ósú,
mitómá myá mí ŋga bee fe ñí,
amú ná myá yem é kíŋŋ deñ.
5 Ve myăá ye bee eyágán mot,
fáve ná myá ye ñí túp,
akála ná myăá yem é kíŋŋ biyágán bí bot.
6 Yesus a ngá vé bɔ́ nkaná wí;
ve bá bĕé ndzí yem é mam a ngá kɔ́bɔ bɔ́.
Yesus éñe a ne mbamba mbaale mitómá
7 Éde Yesus a ngá bera bɔ́ dzó ná,
Bébélá ya bébélá ma dzó mína ná,
ma me ne mbéñ mitómá.
8 Ébá bése bé ngá tára ma sɔ́ ósú,
bé ne midzídzíp ya benzeé midzɔ́ŋŋ;
ve mitómá myá mií ndzí bɔ́ béá.
9 Ma me ne mbéñ;
ngé mot a ñíi eé lot ébe ma,
aa ye tɔbɔ nkoránn;
véa aa ye bɔ eé ñíi,
aa ye fe bɔ eé kwíñ,
eé koan ya mevóm mé ne ya bilwá.
10 “Ndzídzíp wá sɔ́ fáve ná wá nzu dzíp,
áywíñ,
ya átsam;
ma me sɔ́ yaá á mfá ye ná míní belé eniŋ,
míní belé fe dɔ deé fwíige.
11 Ma me ne nkálá mitómá.
Mbamba nkálá mitómá aa kee éniŋ dzeñ akála mitómá.
12 Éñe ñí a ne nsán ngwan,
a sés nkálá mitómá,
a sésés ki myenn mitómá émyen niané aa yén ané ebyó dá nzu,
aa lama mitómá a túp.
Ebyó te dá é ŋga bíra biñ é ŋga bíra fe myɔ mana myean.
13 Édɔ ná,
éñe ñí aa sán ngwan ăá bís édí mitómá.
14 Ma me ne mbamba nkálá mitómá,
ma yem áamyam,
áamyam myá myá yem fe ma,
15 amvála ané Tará aa yem ma,
ma ma yem fe Tará,
éde ma kee éniŋ dzam akála mitómá.
16 Me belé fe mitómá mifé ná mí sés émí míye ábemá dí;
émí míte myá ma yian fe nzu ya myɔ,
myá mí béá fe é kíŋŋ dam;
véa,
mbamm wá ye bɔ mbɔ́ɔ́,
nkálá mitómá ñí fe mbɔ́ɔ́.
17 Dzam te édɔ Tará aa dziŋ ma ya dɔ,
amú ná ma kee éniŋ dzam,
ná véa ma bera fe dɔ ñɔŋ.
18 Mot enziŋ ăá vea ma dɔ,
fáve ná mámyen ma kee dɔ.
Me belé nguu edzwée ye ákee dɔ,
me belé fe nguu edzwée á mfá ábera dɔ ñɔŋ.
Mvéná te maá ñɔŋ dɔ ébe Tará.
19 Éde nkánán ó ngá bera bɔban énzénzaŋ bejudio ákála bífíá bíte.
20 Ané abwiññ ye été é ngá dzó ná,
“A belé mbémbéa nsísim,
á ŋga kwan yaá fe á nlém.
Akála dzé mína béá ñí?”
21 Ébá bevɔ́ɔ́ bá béé dzó ná,
“Bífíá bí,
bí sés ébí é mot a belé mbémbéa nsísim.
Ye ná mbémbéa nsísim a ne kúu midzíndzímm mís?”
Bot bá tep Yesus
22 Éde é fét mesop templo e ngá sian á Yerusalen;
a mbé metám mé mveŋ ya avép.
Jesús acusado de blasfemia (Juan 10.22-42)
23 Véa Yesus eé ke aa wulu á templo,
á nseŋ ndá Salomón.
24 Éde betébosú béye bejudio bé ngá mana ñí luŋ,
béé síli ñí ná,
“Wa ye bía kele óyóp ye akekwíñ ó dén?
Ngé wa o ne Kristo túga bía dɔ dzó éyéá été.”
25 Ané Yesus ñí a ngá yalan ya bɔ́ ná,
Me dzó yaá mína dɔ,
ve mína kaa bwíni;
míbɔann ma bɔ ébe éyola Tará,
émyɔ myá vé ma ngañiá.
26 Ve mína mínăá bwíni,
amú ná míní sés mítómá myám,
[ámvála mé dzó yaá mína].
27 Mítómá myám myá béá é kíŋŋ dzam,
ma yem myɔ,
myá myá bee fe ma.
28 Éde ma vé myɔ éniŋ é ne mbéámbéá,
myăá ye ki dzímle eyɔŋ enziŋ;
mot enziŋ ñí ăá ye ki mí dut é mó mam.
29 É Tará a vé yaá ma myɔ,
aa daŋ mot áse,
mot enziŋ ñí a sés ki myɔ dut é mó Tará été.
30 Bía Tará bí ne mot mbɔ́ɔ́.
31 Ané betébosú béye bejudio bé ngá bera twáa mekwá ná bá lúm ñí.
32 Éde Yesus a ngá dzó bɔ́ ná,
“Me lére mína abwiññ bembamba mibɔann míye ébe Tará.
Óvé ye été mína lúm ma ya wɔ mekwá?”
33 Ané betébosú béye bejudio bé ngá yalan ya ñí ná,
“Bĭá lúm wa mekwá ébe mbamba mbɔann enziŋ;
ve fáve ákála nkɔ́bɔ abyann;
amú ná wa o tɔɔ́ mot,
wa wa veŋan wámyen Nzamá.”
34 Éde Yesus ñí a ngá yalan ya bɔ́ ná,
Nde é sés ntsilann á nkɔɔ́ métsiŋŋ wenan été ná,
‘Maá dzó ná,
Míní ne benzamá?’
35 Ngé aá lwée ébá éfíá Nzamá é ngá sɔ́ ya ébɔ́ ná,
‘benzamá’,
(Ntsili wá kaa ki tɔbɔ ntsamann).
36 Ye ná éñí Tará a téle yaá eki,
aa lóm fe ñí éniŋ dzí,
éñe mína dzó ná,
nkɔ́bɔ abyann,
amú mé dzó ná,
‘Me ne é Mwán Nzamá?’
37 Ngé măá bɔ míbɔann Tará,
mínăá bwíni ma.
38 Ve ngé ma bɔ myɔ,
afáŋbɔ ná mínăá bwíni ma,
bwíniŋán mibɔann á mfá ye ná míní yem;
míní yén fe ná Tará a ne ébe ma,
ma me ne fe ébe Tará.
39 Véa éñe bé ngá bera dzéŋ ná bé biñ ñí;
éde ñí a ngá kólo é mó meba été.