Yesus aa séñ mot a ngá byála ndzímm
9
Yesus eé lot,
éde a ngá yén mot enziŋ a tɔɔ́ ndzímm atéé ye ábyálá.
2 Ané béyága beñ bé ngá síli ñí ná,
“Á Rabí,
ná éñí á byála ndzímm,
nzá aá bɔ nsémm,
ye é mot ñí émyen ye beéséá?”
Jesús cura a un ciego (Juan 9.1-41)
3 Éde Yesus ñí a ngá yalan ná,
“É mot ñí émyen eé ndzí bɔ nsémm,
ngé ki beéséá,
ve fáve ná míbɔann Nzamá mí léreban ébe éñe.
4 Bía yian bɔ míbɔann éñí a lóm yaá ma ntéññ omos ó ngén;
alú dá nzu éyɔŋ mot enziŋ a sés bɔ eséññ.
5 Éyɔŋ me ngén me tɔɔ́ é sí ñí,
me ne éyéá bot béye é sí ñí.”
6 Niané a ngá kɔ́bɔ dzam te,
á ŋga túp menden ó sí,
eé bɔ ntɔ́p,
éde a ngá wáa ndzíndzímm ntɔ́p te ó mís meñ.
7 Ané a ngá dzó ñí ná,
“Kéŋ,
o sop mís étemŋa méndzímm Siloé” (édí bá kelan ná,
“Nlómánn”).
Éde a ngá ke,
a mana sop mís,
a búlán fe eé yén.
8 Ané,
é bot bé mbé bé tɔɔ́ bábe bɔ́,
ya fe ébá bé ngá tára bɔ béé yén ané aa dzaa byém,
bé ngá dzó ná,
“Nde se éñí éñe a ngá bɔ eé ke aa tɔbɔ ósí,
eé dzaa bot byém?”
9 Bevɔ́ɔ́ benziŋ bé ngá dzó ná,
“Éñe ñí.”
Ébá bevɔ́ɔ́ bá ná,
“Kaa,
fáve ná aa fonan ya ñí.”
Ve émyen ñí a ngá dzó ná,
“Ma ñí.”
10 Éde bé ngá síli ñí ná,
“Á kúu wa mís á yá?”
11 Ané a ngá yalan ná,
“É mot bá lwée ná Yesus éñe á mana bɔ ntɔ́p,
a wáa ma wɔ ó mís,
á dzó ma ná ‘Keŋ á sop mís á Siloé.’
Éde mé ke,
me sop mís,
véa mé ŋga yén.”
12 Ané bé ngá síli ñí ná,
“Mot te a ne ó vé?”
Éde a ngá yalan ná,
“Măá yem.”
Befariseo bá síli mot te misílí
13 Ané bé ngá ke ya é mot a mbé ndzímm ébe ású befariseo.
14 (Ve é mos Yesus a ngá mana bɔ ntɔ́p a kúu fe ñí mís ó mbé é mos Sátará.)
15 Éde befariseo bá bé ngá bera ñí síli amvála avé a ngá tára ná aa yén.
Ané a ngá dzó bɔ́ ná,
“Á wáa ma ntɔ́p ó mís,
éde me ke sop mís,
véa mé ŋga yén.”
16 Ya dzam te édɔ befariseo benziŋ bé ngá dzó ná,
“É mot ñí ăá sɔ́ ébe Nzamá,
amú ná ăá baale é mos Sátará.”
Ve ébá bevɔ́ɔ́ bá ná,
“Mbɔ misémm a ne bɔ ámvála mendem te á yá?”
Éde bé ngá kánan énzénzaŋ.
17 Ané bé ngá bera síli ndzíndzímm ná,
“Wa wa dzó nzá dzam á mfá weñ,
dá é tɔɔ́ ná éñe á kúu wa mís?”
Ané a ngá dzó ná,
“A ne nkúlu medzó.”
18 Ve,
betébosú béye bejudio bá bĕé ngá yébe ná a mbé ndzímm,
ná véa á ŋga yén,
fáve ye akekwíñ ané bé ngá lwée é mot a ngá bera yén beéséá.
19 Éde bé ngá síli bɔ́ ná,
“Ye é mwán wenan ñí,
éñe mína dzó ná aá byála ndzímm?
É ne bɔ á yá ná á ŋga yén yaá éndagá?”
20 Ané beéséá bá bé ngá yalan ná,
“Bía yem ná é mwán wea éñe ñí,
ya fe ná aá byála ndzímm;
21 ve,
bĭá yem nzá ámvála aa yén éndagá;
bĭá yem ki é mot á kúu ñí mís.
Á ntɔɔ́ ñá mot.
Síligán ñí;
émyen aa ye kɔ́bɔ á mfá weñ.”
22 (Beéséá bá bé ngá dzó mam méte akála ná bé ngá kɔ betébosú béye bejudio wɔŋŋ;
amú ákoan betébosú béye bejudio bé mana yaá ábán ná,
ngé mot enziŋ a mem ná éñe a ne Kristo,
bá ye tsílán ya ñí á Sinagoga.
23 Dzam te édɔ beéséá bé ngá dzó ya dɔ ná,
“Síligán émyen;
a ntɔɔ́ ñá mot.”)
24 Éde bé ngá lwée é mot a mbé ndzímm éyɔŋ beáñ,
béé dzó ñí ná,
“Vá Nzamá dúmá;
bía yem ná mot te a ne mbɔ misémm.”
25 Ané ñí a ngá yalan ná,
“Ngé a ne mbɔ misémm,
măá yem;
dzam avɔ́ɔ́ édɔ ma yem,
fáve ná,
me mbé ndzímm,
ve éndagá mé ŋga yén yaá.”
26 Éde bé ngá síli ñí ná,
“Á bɔ wa nzá dzam?
Á kúu wa mís á yá?”
27 Ané a ngá yalan ná,
“Me tára yaá mína dɔ ádzó,
ve mína kaa ma béá.
Amú dzé mína kómo dɔ bera wók?
Ye mína mína kómo fe bɔ béyága beñ?”
28 Véa bé ŋga tea ñí,
béé dzó fe ñí ná,
“Wa o ne nyága weñ,
ve bía bí ne béyága Moisés.
29 Bía yem ná Nzamá a ngá bɔ eé kɔ́bɔ ya Moisés,
ve éñí,
bĭá yem é vóm aa sɔ́.”
30 Éde mot te ñí a ngá yalan ya bɔ́ ná,
“Dzam te édɔ dá é ne eyágán dzam,
ná mínăá yem é vóm aa sɔ́,
ve ñí a kúu yaá ma mís.
31 Bía yem ná Nzamá ăá wók bebɔ misémm,
ve ngé mot enziŋ aa kɔ Nzamá wɔŋŋ eé dzálá fe nkómánn weñ,
mot te éñe Nzamá aa wók.
32 Avé eniŋ é ngá tára,
băá bé wók ná ndzíndzímm atéé ábyálá ná mot á kúu wɔ mís.
33 Ngé é mot ñí á bɔ kaa sɔ́ ébe Nzamá,
ngé á sés bɔ dzam enziŋ.”
34 Éde bé ngá yalan ya ñí ná,
“Waá byála mbɔ mísémm,
ye ná wa ó ŋga nzu yaá bía vé ayágalé?”
Ané bé ngá tsílán ya ñí átán.
35 Niané Yesus a ngá wók ná bé tsílán yaá ñí,
éde a ngá koan ya ñí aa síli ñí ná,
“Ye wa bwíni é Mwán Mot?”
36 Éde a ngá yalan ná,
“Á ndzwée,
a ne nzá,
á mfá ye ná me bwíni ñí?”
37 Ané Yesus a ngá dzó ñí ná,
“O yén yaá ñí;
é mot aa kɔ́bɔ ya wa,
éñe ñí.”
38 Éde a ngá dzó ná,
“Á Ntí,
ma bwíni.”
Ané a ngá kútbe ó sí ná aa kaŋ ñí.
39 Éde Yesus á ngá dzó ná,
“Maá sɔ́ ébe bot béye é sí ñí á mfá nkíkgán misaŋ,
ná ébá bé ne kaa yén,
bé yén;
ébá bá bá yén,
bá bé tɔbɔ ndzímm.”
40 Niané befariseo benziŋ béye bé mbé bábe bɔ́ bé ngá wók dzam te,
ané bé ngá síli ñí ná,
“Ye ná bía bí ne fe midzíndzímm?”
41 Éde Yesus á ngá yalan ya bɔ́ ná,
“Ngé míní bɔ midzíndzímm,
ngé mínĭí belé nsémm.
Ve éndagá,
amú mína dzó ná,
‘Bía yén’,
nsémm wenan wá laŋan ó tɔɔ́.”