Yesus aa vé bot binzuk bí tán bidzí
6
Niané mam te mé ngá lot,
ané Yesus a ngá ke á máŋ méye Galilea áyát,
émá Tiberias.
2 Éde bora nkuna bot ó ngá bee ñí,
amú ná bé ngá yén méndem a ngá bɔ ébe mikúkwann.
Jesús alimenta una multitud (Juan 6.1-15)
3 Ané Yesus a ngá bét á nkoó ó yóp a kéñ tɔbɔ ósí ó véa bábe béyága beñ,
4 ákoan ná Paskua,
é fét bejudio é ntɔɔ́ bebeñ.
5 Niané Yesus a ngá bére mís a yén ná bora nkuna bot wá nzu ébe éñe,
éde a ngá dzó Felipe ná,
“Vóm mbé bí ne kus mifémm,
á mfá ye ná ngé é bot bá bé ne dzí?”
6 Ve Yesus ñí a ngá dzó dɔ,
eé kyak ñí,
amú ná a ngá yem é dzam a mbé ná a nkún nzu bɔ.
7 Ané Felipe a ngá yalan ya ñí ná,
“Mifémm táŋ bedenario mitet mí beáñ myá myăá ye ki yian ná kada mot a ne ñɔŋ avítsaŋ.”
8 Éde Nyága mbɔ́ɔ́ ye béyága beñ,
Andrés,
Simón Pedro mwanñaŋ,
a ngá dzó Yesus ná,
9 “Omómɔ́ŋŋ ó ne vá,
ó belé mifémm mí sebada mí tán ya kwaás é beáñ;
ve dá é ne ki dzé ábímm bot dí?”
10 Ané Yesus a ngá dzó ná,
“Bɔgán bot ná bé tɔbɔ ósí,”
obut wá ó mbé fe abwiññ ó véa.
Éde befám bebeñ ané binzuk bí tán,
bé ngá mana tɔbɔ ósí.
11 Véa éñe Yesus a ngá twáa mifémm,
éde niané a ngá mana vé akíba,
á ŋga kap myɔ é bot bé mbé bé tɔɔ́ ósí.
Néa fe a ngá bɔ ya kwaás ébe ábímm bé ngá kómo.
12 Niané bé ngá dzéñ,
éde a ngá dzó béyága beñ ná,
“Keŋán mína twáa bífús bí mvá buk,
á mfá ye ná dzóm enziŋ é nza wú ntuk.”
13 Ané bé ngá mana byɔ kóán ébe mifémm mí sebada mí tán bot bé ngá dzí,
bé dzálá awóm mikpéñ ya mikpéñ mí beáñ ya mebukga.
14 Niané bot bé ngá yén é ndem a ngá bɔban,
bé ŋga dzó ná,
“Bébélá é mot ñí éñe a ne nkúlu medzó a mbé ná aa nzu éniŋ dzí.”
15 Édɔ ná,
Yesus eé yem ná bé nkún ñí nzu ñɔŋ ya nguu ná bá téle ñí kéza,
ané a ngá bera búlán á nkoó émyen etámm.
Yesus aa wulu méndzímm áyóp
16 Niané ŋgɔgɔ́ e ngá kwíñ,
ané béyága beñ bé ngá sigi ó máŋ.
Jesús camina sobre el agua (Juan 6.16-22)
17 Éde bé ngá mana daŋ á byéa été,
bé ŋga kígán máŋ á mfá á Kapernaúm.
Ákoan ná dzíbi é ntɔɔ́,
véa Yesus ñí ăá bé ki nzu koan ya bɔ́,
18 dá é tɔɔ́ ná máŋ má mé ngá tára fe ná má ñan ákála bora evúŋ.
19 Niané a ngá bɔ ná bé dúk yaá táŋ ané mekwá mé tán ngé ki mé saman,
ané bé ngá yén Yesus eé wulu á máŋ áyóp eé nzu bebeñ é vóm byéa ó mbé,
eyɔŋ te bá bé ŋga kɔ wɔŋŋ.
20 Ve ñí a ngá dzó bɔ́ ná,
“A ne ma;
míní táa kɔ wɔŋŋ.”
21 Véa bá bé ŋga kómo ñí ñɔŋ á byéa,
etéññ te ébyen éñe byéa ó ngá ke sian ó sí é vóm bé ngá ke.
Yesus émyen éñe a ne mfémm ye éniŋ
22 É mos ó ngá belan véa,
nkuna bot ó mbé ó téle á máŋ áyát,
ané ó ngá yén ná byéa ofé wĕé mbé ó véa,
fáve ovɔ́ɔ́,
ya fe ná Yesus eé ndzí daŋ á byéa été bábe beyága beñ,
ve fáve ná béyága beñ bé ngá ke etámm.
El pan de vida (Juan 6.22-71)
23 Dá é tɔɔ́ fe ná mébyéa mefé mé mbé ó véa ná me ngá sɔ́ á Tiberias,
bebeñ é vóm bé ngá dzí mifémm Ntí a ngá mana vé akíba ya myɔ.
24 Éyɔŋ nkuna bot te ó yén yaá ná Yesus a sés fe ó véa ngé ki béyága beñ,
ané bé ngá daŋ mébyéa été,
bé kéñ á Kapernaúm béé ke bá dzéŋ Yesus.
25 Éde niané bé ngá koan ya ñí á máŋ áyát,
ané bé ngá síli ñí ná,
“Á Rabí,
o sɔ́ ó vá ódén?”
26 Éde Yesus ñí a ngá yalan ya bɔ́ ná,
“Bébélá ya bébélá ma dzó mína ná,
mína dzéŋ ma,
se amú ná mínaá yén mendem,
ve fáve amú ye ná mínaá dzí mifémm míní dzéñ fe.
27 Bɔgán eséññ se akála bídzí bíye byá wú ntuk,
ve fáve ákála bídzí byá tɔbɔ akekwíñ éniŋ é ne mbéámbéá,
ébí é Mwán Mot aa ye mína vé,
amú ná éñe Tará Nzamá a bem yaá é sitám dzeñ.”
28 Ané bá bé ngá síli ñí ná,
“Bía yian bɔ dzé á mfá ye ná bí bɔ bíséññ Nzamá?”
29 Éde Yesus a ngá yalan ya bɔ́ ná,
“Éséññ Nzamá édɔ dí,
ná míní bwíni éñí émyen á lóm yaá.”
30 Véa éñe,
bé ngá síli ñí ná,
“Nzá ndem wa lére á mfá ye ná ngé bí ne yén,
ya fe ná ngé bí ne wa bwíni?
Nzá dzam fá wa bɔ?
31 Betará bé ngá dzí manná éyáŋŋ été,
ámvála é ne ntsilann ná,
‘A ngá vé bɔ́ ná bé dzí mfémm ye á dzóp.’ ”
32 Dzam te édɔ Yesus ñí á ngá dzó bɔ́ ná,
“Bébélá ya bébélá ma dzó mína ná,
se Moisés éñe aá vé mína mfémm ye á dzóp,
ve Tará,
éñe aa vé mína ñá mfaŋ mfémm ye á dzóp.
33 Amú ná,
mfémm Nzamá éwɔ ó ne éñí a ngá sigi á dzóp été ná aa vé bot béye é sí ñí eniŋ.”
34 Éde bé ngá dzó ñí ná,
“Á Ntí,
vá bía mfémm te eyɔŋ ése.”
35 Ané Yesus a ngá dzó bɔ́ ná,
Ma me ne mfémm ye éniŋ,
éñí a nzu ébe ma ăá ye wók nzeñ eyɔŋ enziŋ.
Éñí ñí aa bwíni fe ma,
ñí ăá ye ki bera wók evéé eyɔŋ enziŋ.
36 Ve ma me mvá mína dzó ná míní yén yaá ma,
véa mína kaa ábwíni.
37 Éñí áse Tará aa vé ma,
aa ye nzu ébe ma;
éñí ñí aa nzu fe ébe ma,
ma măá ye ki tsílán ya ñí amvála enziŋ.
38 Dá é tɔɔ́ ná ma me sigi yaá á dzóp,
se á mfá ye ná me bɔ nkómánn wɔm,
ve fáve nkómánn Éñí a ngá lóm ma.
39 Édɔ ná nkómánn Éñí a ngá lóm ma éwɔ wí ná,
me táa dzímle mbɔ́ɔ́ enziŋ ye ébá bésesé a vé yaá ma,
ve fáve ná ma ye ñí wómo é mos wá súgan.
40 Amú ná nkómánn Tará éwɔ wí ná,
é mot áse aa yén Mwán,
a bwíni fe ñí,
a ne belé eniŋ é ne mbéámbéá,
mámyen ma ma ye fe ñí wómo é mos wá súgan.
41 Dzam te édɔ bejudio bé ngá tára ná bá kɔ́bɔ ya ñí miswa,
amú aá dzó ná,
“Ma me ne mfémm ó ngá sigi á dzóp.”
42 Ané bé ngá síli bevɔ́ɔ́ ya ébá bevɔ́ɔ́ ná,
“Ye ná se Yesus,
é mwán José éñe ñí,
éñí bía yem fe éséá bá ñiá?
A ne dzó áwola dí á yá ná,
‘Me sigi yaá á dzóp?’ ”
43 Éde Yesus a ngá yalan ya bɔ́ ná,
Míní táa kɔ́bɔ miswa bevɔ́ɔ́ ya ébá bevɔ́ɔ́.
44 Mot enziŋ a sés nzu ébe ma,
ngé se é Tará a ngá lóm ma,
éñe aa dulu ñí,
ma me wómo fe ñí é mos wá súgan.
45 É ne ntsilann mébá bekúlu medzó ná,
“Bésesé bá ye ñɔŋ ayágalé ébe Nzamá.”
Ya fe ná éñí áse a wók yaá,
a ñɔŋ yaá fe ayágalé aa nzu ébe ma.
46 Se ná mot enziŋ a yén yaá Éséá;
fáve éñe a ne éñí Nzamá,
éñí te éñe a yén yaá Éséá.
47 Bébélá ya bébélá ma dzó mína ná,
éñí aa bwíni,
a belé éniŋ é ne mbéámbéá.
48 Ma me ne mfémm ye éniŋ!
49 Beésúá bé ngá dzí manná éyáŋŋ été,
véa bé wú fe.
50 Mfémm wí éwɔ wá sigi á dzóp été,
ná éñí áse aa dzí wɔ́ á bɔ kaa áwú.
51 Ma me ne ntétéá mfémm,
éwí ó sigi yaá á dzóp été.
Ngé mot enziŋ aa dzí mfémm te aa ye niŋ kɔ́mm áse;
mfémm ma ye vé á mfá ávé bot béye é sí ñí eniŋ,
ó ne é ñúu dam.
52 Éde bejudio bé ngá bɔ mikéá bébyen ya bébyen,
béé dzó ná,
“Éñí a ne bía vé é ñúu deñ ná bí dzí dɔ á yá?”
53 Ané Yesus ñí a ngá yalan ya bɔ́ ná,
Bébélá ya Bébélá ma dzó mína ná,
ngé mínăá dzí é ñúu é Mwán Mot,
ya fe áñú mékií meñ,
mínĭí belé eniŋ ébe mína bébyen.
54 Éñí aa dzí é ñúu dam ya fe áñú mékií mam,
a belé éniŋ é ne mbéámbéá,
ma ma ye fe ñí wómo é mos wá súgan.
55 Amú ná é ñúu dam é ne ñá mfaŋ bidzí,
mékií mam fe má mé ne ñá mfaŋ meñú.
56 Éñí aa dzí é ñúu dam ya fe áñú mékií mam,
aa laŋan a tɔɔ́ ébe ma,
ma fe ntéññ mbɔ́ɔ́ ébe éñe.
57 Ámvála é Tará a ne ntétéá a ngá lóm ma,
ma ma niŋ fe ákála Tará,
éñí ñí aa dzí fe ébe ma,
éñí te ñí aa ye fe niŋ ákála ma.
58 Mfémm wí éwɔ ó sigi yaá á dzóp été;
se ané éwí beésúá bé ngá dzí,
véa bé wéñ;
ve éñí ñí aa dzí mfémm wí aa ye niŋ kɔ́mm áse.
59 Yesus a ngá dzó mam méte á sinagoga enziŋ été,
eé vé ayágalé á Kapernaúm.
Mfúfúp Nsísim éñe aa vé eniŋ
60 Dzam te édɔ,
abwiññ béyága béye áabeñ,
béé wók dɔ,
ané bé ngá dzó ná,
“Áyágalé dí é ne ayéñ;
nzá a ne dɔ yébe?”
61 Ve Yesus,
ñí eé yem á nlém weñ été ná béyága beñ bá ke bá kɔ́bɔ dɔ biswaáswaá á mfá dzam te,
éde á ngá dzó bɔ́ ná,
“Ye dzam te dá bɔ ná míní kɔp obaá?
62 Éde á yá,
ngé é bɔ ná mína yén é Mwán Mot eé bét é vóm a ngá tára tɔbɔ?
63 Nsísim éñe aa vé eniŋ;
ñúu é mot dăá vé abúánn enziŋ;
bífíá me kɔ́bɔ yaá mína bí ne nsísim,
bí ne fe eniŋ.
64 Ve,
bot benziŋ béye ébe mína băá bwíni.”
Amú ná Yesus a ngá bem tára yem benzá béye ébe bɔ́ bé mbé kaa ábwíni,
ya fe éñí a mbé ná aa ye ñí kuan.
65 Éde a ngá dzó ná,
“Akála te édɔ,
me dzó yaá mína ná,
mot enziŋ a sés nzu ébe ma ngé băá bé ñí dɔ vé ébe Tará ná a bɔ dɔ.”
66 Atéé ye eyɔŋ te,
abwiññ beyága béye áabeñ bé ngá lík ná bá bee ñí,
ébɔ́ kaa fe áwulu bábe bɔ́ nsámá.
67 Éde Yesus a ngá síli beyága awóm ya beyága bé beáñ ná,
“Ye mína mína kómo fe ke?”
68 Ané Simón Pedro a ngá yalan ya ñí ná,
“Á Ntí,
bía ye ke ébe nzá.
Wa o belé bífíá bíye éniŋ é ne mbéámbéá;
69 bía bí bwíni yaá,
bí yem yaá fe ná wa o ne Mfúfúp Mot Nzamá [Kristo,
é mwán é Nzamá á ne ntétéá].”