Yesus aa séñ nkúkwann fám
5
Niané mam méte mé ngá lot,
fét bejudio enziŋ e mbé,
ané Yesus a ngá bét á Yerusalen.
2 Á Yerusalen ó véa,
etemŋa méndzímm é mbé édí mitómá,
bé ngá lwée dɔ á nkɔ́bɔ Ebreo ná Betesda,
e belé fe miseŋ mí tán mí tɔɔ́ ya midzií.
Jesús cura en Sábado (Juan 5.1-15)
3 Abwiññ bot é mbé é bóo mevóm méte;
mikúkwann,
ya midzíndzímm,
ya mibóbók,
ya fe ébá mesúk mé ñúu mé mbé mikát,
[béé yana ná mendzímm mé fógan,
4 amú ná ángel enziŋ a ngá bɔ eé sigi metám mé enziŋ étemŋa te,
ná aa fógo mendzímm.
Éde,
é mot ósúá a ngá tára bɔ eé sigi etemŋa niané mendzímm má fógan,
a ngá bɔ eé tɔbɔ mvwaá ébe ámvála okwann óse a mbé a belé].
5 Mot enziŋ a mbé ó véa,
ákoan ná a tɔbɔ yaá nkúkwann táŋ mibú mewóm mé léa ya mibú mmom.
6 Éyɔŋ Yesus a yén yaá ñí a bóo ó véa,
eé yem fe ná a tɔbɔ yaá ó véa abwiññ tám,
éde a ngá dzó ñí ná,
“Ye wa kómo tɔbɔ mvwaá?”
7 Ané nkúkwann te ó ngá yalan ya ñí ná,
“Á Ntí,
mĕé belé é mot a ke ya ma étemŋa éyɔŋ mendzímm má fógan.
Niané ma ke sian,
ma koan ná mot mfé a sigi yaá ma ósú.”
8 Éde Yesus a ngá dzó ñí ná,
“Tébegé,
twáagé é mwann enɔŋŋ we,
o wulu fe.”
9 Etéññ te ébyen mot te a ngá tɔbɔ mvwaá,
ané a ngá twáa é mwann enɔŋŋ weñ,
á ŋga wulu.
Á mbé fe é mos Sátará.
10 Ya dzam te édɔ betébosú béye bejudio bé ngá dzó é mot a ngá tɔbɔ mvwaá ná,
“É mos wí ó ne mos Sátará,
atsiŋŋ dăá yébe wa ná o baga é mwann enɔŋŋ we.”
11 Ve mot te ñí a ngá yalan ya bɔ́ ná,
“É mot a mvá ma séñ éñe á dzó ma ná,
‘Twáagé é mwann enɔŋŋ we,
o wulu.’”
12 Ané bé ngá síli ñí ná,
“Nzá a ne é mot a mvá wa dzó ná,
‘Twáagé,
o wulu fe?’”
13 Ve,
é mot a ngá séñban,
ñí ĕé ngá yem nzá a mbé été,
amú ná Yesus aá mana dzámán á nkuna bot ó mbé ó véa été.
14 Niané mam méte mé ngá lot,
véa éñe Yesus a ngá koan ya ñí á templo,
ané a ngá dzó ñí ná,
“Béŋ yén ná o ntɔɔ́ mvwaá;
o táa bera bɔ nsémm,
a nza bɔ ná é dzam dá daŋ ya abé é lot ya wa.”
15 Ané mot te a ngá ke dzó betébosú béye bejudio ná,
Yesus éñe a ne é mot a ngá tɔɔ ñí mvwaá.
16 Ya dzam te édɔ betébosú béye bejudio bé ngá dzéŋ Yesus ásí,
[bé ŋga kómo ñí áywíñ],
akála ná a ngá bɔ mam méte é mos Sátará.
Jesús defiende su autoridad (Juan 5.16-47)
17 Ve Yesus a ngá dzó bɔ́ ná,
“Ya anzukwíñ áwola dí,
Tará a ngén aa bɔ eséññ,
ma ma bɔ fe eséññ.”
18 Akála te édɔ,
betébosú béye bejudio bé ngá bíra dzéŋ ná bé ywíñ ñí,
amú ná se fáve ná a ngá tsam é mos Sátará,
ve ya fe ná a ngá dzó ná Nzamá éñe a ne Éséá weñ émyen,
ná a ne ntéññ mbɔ́ɔ́ bá Nzamá.
É Mwán Mot a belé nguu á mfá ákík misaŋ
19 Éde Yesus a ngá yalan ya bɔ́ ná:
Bébélá ya bébélá ma dzó mína ná,
Mwán a sés bɔ dzam enziŋ ébe émyen,
fáve édí aa yén Éséá eé bɔ.
Amú ná é dzam áse Éséá a bɔ,
édɔ fe Mwán ñí aa bɔ amvála avɔ́ɔ́ ya avɔ́ɔ́.
20 Amú ná Éséá aa dziŋ Mwán,
éde fe aa lére ñí é dzam áse Émyen aa bɔ;
aa ye fe ñí lére míbɔann myá daŋ ya minén álot émí,
á mfá ye ná míní yágán.
21 Akála te édɔ,
ámvála Éséá aa wómo miwúán,
eé vé myɔ eniŋ,
amvála te fe Mwán ñí aa vé é bot aa kómo eniŋ.
22 Amú ná Éséá ñí ăá kík fe mot enziŋ nsaŋ,
fáve ná nkíkgán misaŋ óse,
a kee yaá wɔ Mwán,
23 á mfá ye ná mot áse a vé Mwán ngaŋŋ,
ámvála aa vé fe Éséá ngaŋŋ.
É mot a ne kaa ávé Mwán ngaŋŋ,
ăá vé ki Éséá ngaŋŋ,
éñí a ngá lóm ñí.
24 Bébélá ya bébélá ma dzó mína ná,
é mot aa béá éfíá dam,
eé bwíni fe éñí a ngá lóm má,
mot te a belé éniŋ é ne mbéámbéá.
Éñí te ăá ye ñɔŋ nkíkgán misaŋ,
fáve ná a kólo yaá áwú été,
ve a ñíi yaá éniŋ été.
25 Bébélá ya bébélá ma dzó mína ná,
tám dá nzu,
é ntɔɔ́ fe,
éyɔŋ miwúán myá ye wók é kíŋŋ é Mwán Nzamá,
véa ébá bá wók dɔ,
bá ye tɔbɔ ya eniŋ.
26 Amú ná,
ámvála Éséá émyen a belé eniŋ,
néa fe a vé yaá Mwán ná émyen a belé eniŋ ébe émyen.
27 Éde a ngá vé ñí nguu edzwée á mfá nkíkgán misaŋ,
amú ná éñe a ne é Mwán Mot.
28 Míní táa yágán dzam te,
amú ná tám dá nzu,
éñí é bot bése bé ne mésɔŋ ó sí,
bá ye wók é kíŋŋ deñ,
29 véa ébá bé ngá bɔ édí é ne mvéáñ bá ye kwíñ átán á mfá nwómán miwúán ye éniŋ.
Ve ébá bá bé ngá bɔ́ mbéa bé mam,
bá ye wómo á mfá nkíkgán misaŋ.
30 Éde mámyen me sés bɔ dzam enziŋ;
ámvála ma wók,
néa éñe ma kík nsaŋ.
Nkíkgán misaŋ wɔm,
wá ó ne fe nzósoó,
amú ná măá dzéŋ nkómánn wɔm,
fáve nkómánn éñí a ngá lóm ma.
Bébélá ngañiá á mfá Yesus
31 Ngé ma vé ngañiá á mfá wɔm mámyen,
é ngañiá wɔm a sés bébélá.
32 Ve mot mfé éñe aa vé ngañiá á mfá wɔm,
ma ma yem fe ná é ngañiá aa vé á mfá wɔm a ne bébélá.
33 Mínaá lóm bot ébe Juan,
ñí a vé yaá fe ngañiá á mfá bébélá.
34 Ve ma măá ñɔŋ é ngañiá mwann mot;
fáve ná ma kɔ́bɔ mam méte á mfá ye ná míní tɔbɔ nkoránn.
35 Éñe a mbé é láma a ngá yóŋ ya á feañ,
mína míní tɔ́p fe ná mína sán ya éyéá deñ oyomm tám enziŋ.
36 Ve me belé é ngañiá aa lot éñí Juan,
akála ná míbɔann Tará a ngá vé ma ná me dzálá myɔ,
mibɔann míte émyɔ fe myá vé ma ngañiá ná Tará aá lóm ma.
37 É Tará a ngá lóm ma,
ñí a vé yaá fe ngañiá á mfá wɔm.
Mína mínăá bé wók é kíŋŋ deñ tám enziŋ,
mínăá bé ki ñí yén ámvála a ne.
38 Mínĭí belé éfíá déñ,
dá dăá tɔbɔ ki ébe mína,
amú ná éñí a ngá lóm,
éñí te éñe mínăá bwíni.
39 Mína fas Mitsili amú mína tém ná éñe míní belé éniŋ é ne mbéámbéá été;
émyɔ fe myá myá vé ngañiá á mfá wɔm;
40 éde mína mínăá kómo nzu ébe ma,
ná míní belé eniŋ.
41 Măá ñɔŋ dúmá ébe bot;
42 ve me yem yaá mína,
ná édziŋŋ Nzamá mínĭí belé dɔ ébe mína.
43 Me sɔ́ yaá ébe éyola Tará,
mína kaa ma áñɔŋ;
ve ngé mot enziŋ mfé aa sɔ́ ébe éyola deñ émyen,
éñí te éñe mína ye ñɔŋ.
44 Éñe mína ye bwíni á yá,
míníí ñɔŋ dúmá bevɔ́ɔ́ ya ébá bevɔ́ɔ́,
mína kaa ádzéŋ é dúmá dá sɔ́ ébe é Nzamá etámm a ne mbɔ́ɔ́ ya mbɔ́ɔ́?
45 Mína táa tém ná ma ma ye mína sɔ́mán ébe ású Tará;
mot mbɔ́ɔ́ a ne ná éñe aa sɔ́mán mína,
é Moisés míní mana yaá tɔbɔ ya ñí mebúnn.
46 Amú ná,
ngé á bɔ ná mínaá bwíni Moisés,
ngé mína bwíni fe ma;
amú ná éñí te éñe aá tsili á mfá wɔm.
47 Ve,
ngé mínăá bwíni mítsili myeñ;
éñe míní ne bwíni bífíá byam á yá?