Judas aa kuan Yesus
22
Ákoan ná é fét mífémm mí ne kaa levadura,
éñí bá lwée ná Paskua,
eé ntɔɔ́ yaá bebeñ;
2 éde betébosú befára ya beyágale métsiŋŋ bé ngá dzéŋ ámvála bé ne ywíñ Yesus,
amú ná bé ngá kɔ bot wɔŋŋ.
3 Ané Sátan a ngá ñíi á nlém Judas,
é Judas bé ngá lwée ná Iskariote;
a mbé fe nyága mbɔ́ɔ́ ye béyága awóm ya bé beáñ.
4 Éde a ngá ke kɔ́bɔ ya betébosú befára ya bedzwée benzima béye á templo ámvála aa ye bɔ́ ñí kee.
5 Éde bé ngá sán,
bé kyaa fe ñí ná bá ye ñí vé moann.
6 Ané ñí a ngá yébe dɔ,
á ŋga dzéŋ fe é tám aa kee bɔ́ ñí é vóm bot bé sés abwiññ.
Beyága bá dzémle Paskua bábe Yesus
7 Éde é mos mífémm mí ne kaa levadura ó ngá kwíñ,
mos te éwɔ bé ngá yian kík mwann ntómá ye ó Paskua.
8 Ané Yesus a ngá lóm Pedro bá Juan,
a dzóo ná:
“Keŋán bía koman bidzí bí Paskua á mfá ye ná bí dzíán.”
9 Éde bé ngá síli ñí ná:
“Vóm mbé wa kómo ná bí koman dɔ?”
10 Ané Yesus a ngá yalan ya bɔ́ ná:
“Niané mína ye ñíi á kísoan,
mína ye koan ya fám deé ke ya kúlu mendzímm.
Beegán ñí akekwíñ é ndá aa ye ñíi.
11 Dzógán myenn ndá ná:
‘Nyágale aa síli wa ná:
É vóm ma ye dzí Paskua bíabe béyága bam ó ne vé?’
12 Eyɔŋ te aa ye mína lére mora abéá ndá,
é tɔɔ́ swéñ á ndá ó yóp.
Komŋán ó véa.”
13 Éde,
niané bé ngá ke,
ané bé ngá koan ya ámvála Yesus a ngá dzó bɔ́;
éde bé ngá koman Paskua.
14 Niané áwola é ngá kwíñ,
ané Yesus a ngá tɔbɔ ó téble bábe baapostol.
15 Éde a ngá dzó bɔ́ ná:
“Ntéññ avé me dzéñ yaá kómo ádzí é Paskua ñí bíabe mína,
kaa ná me tára dzuk;
16 amú ná ma dzó mína ná,
măá ye dɔ bera dzí akekwíñ ané da dzálában édzwée ngɔ́mán Nzamá.”
17 Éde a ngá twáa kɔ́p,
niané a ngá vé akíba,
ané a ngá dzó ná:
“Ñɔŋŋán ó vá,
míní ke mína kap mína ya mína;
18 amú ná ma dzó mína ná,
atéé ye áwola dí,
măá ye bera ñú vino tám enziŋ akekwíñ ané édzwée ngɔ́mán Nzamá dá sɔ́.”
19 Ané a ngá twáa fe mfémm,
niané a ngá vé akíba,
ané a ngá bák wɔ́,
a vé fe bɔ́ wɔ́,
eé dzó ná:
“É ñúu dzam édɔ ñí,
édɔ e ne nkeán amú mína.
Bɔgán é dzam dí míníí síman ma.”
20 Amvála te fe,
niané bé ngá mana dzí,
ané a ngá twáa kɔ́p,
a dzóo ná:
“É kɔ́p ñí édɔ e ne mfefeñ elat ye á mékií mam,
émá má swii amú mína.
21 “Ve,
yénŋán ná é mot aa ye ma kuan a ne ó téble ó vá bía ñí.
22 Bébélá ná,
é Mwán Mot aa ye ke amvála ané é ntɔɔ́ yaá mbánán,
ve ngwáa é mot aa ye ñí kuan!”
23 Éde bé ngá tára ná bá sílán bébyen ya bébyen ná,
nzá ye ébe bɔ́ a nkún dɔ bɔ.
La Última Cena
Nzá aa daŋ ya eban?
24 Ané beyága bé ngá bɔ mikɔ́bɔ bébyen ya bébyen,
béé síli ná nzá aa ye bɔ éñí aa daŋ ya eban.
25 Éde Yesus a ngá dzó bɔ́ ná:
“Békéza béye mésí bá dzwée ya nguu,
bédzwée beba bá bá kómo fe ná bot bé lwée bɔ́ ná bembamba bé bot.
26 Ve,
é táa bɔban néa énzénzaŋ denan été;
fáve ná,
éñí aa daŋ ya eban énzénzaŋ denan á bɔɔ́ge ané éñí a ne kaa eban;
éñí aa mánan ñí á bɔɔ́ge fe ané éñí aa séan.
27 Amú ná,
nzá aa daŋ ya eban,
ye éñí aa tɔbɔ ó téble,
ye éñí aa séan?
Se éñí aa tɔbɔ ó téble,
ngeá?
Ve déá,
me ne énzénzaŋ denan ané éñí aa séan.
28 “Mína míní tɔbɔ yaá mbán bíabe mína míkat myám été.
29 Dzam te édɔ ma kee mína dɔ edzwée ngɔ́mán,
amvála ané Tará ñí a ngá kee fe ma dɔ;
30 á mfá ye ná míní dzí ya áñú é téble dzam édzwée ngɔ́mán dam,
ya fe ná míní tɔbɔ bítɔɔ́ bekéza,
á mfá ye ná míní kík misaŋ ébe awóm meyɔŋ ya meyɔŋ mé beáñ méye Israel.
Yesus aa dzó ná Pedro aa ye ñí kat
31 “Á Simón,
á Simón,
dággé ná Sátan á dzaa ná á sigle mína ané bá sigle misɔ́ mí trigo.
32 Ve,
me yaglan yaá mfá we ná mbwínánn we ó táa mana;
niané wa búlán ébe ma,
véa,
wa yémŋe bɔbéñɔŋ.”
33 Ve,
Pedro ñí a ngá dzó ñí ná:
“Á Ntí,
me ntɔɔ́ yaá nkomann ná atwaa ma ke á mbok bía wa ya áwú.”
34 Ané Yesus ñí a ngá dzó ñí ná:
“Á Pedro,
ma dzó wa ná,
émuú,
wa ye dzó ná wăá yem ma táŋ biyɔŋ bí léa kaa ná nnóm kúp á lɔ́ŋ.”
Bá koman ná bá ke á nkoó Álíba
35 Éde a ngá síli bɔ́ ná:
“Éyɔŋ me ngá lóm mína kaa mfák,
kaa ekpea moann,
kaa ki ya mengop,
ye dzóm enziŋ dá dzéŋ mína?”
Ané bé ngá yalan ná:
“Kaa dzóm.”
36 Éde Yesus a ngá dzó bɔ́ ná:
“Ve,
éyɔŋ dí,
éñí a belé mfák,
á twáagé wɔ́,
éñí ñí a belé ekpea moann,
ñí á twáagé fe dɔ;
éñí ñí ĕé belé nzwaokeŋ,
á kuugán ékót deñ,
á kus nzwaokeŋ.
37 Amú ná ma dzó mína ná,
édí é ne ntsilann mfá wɔm dá yian dzálában,
ná:
‘Bé ngá láŋ ñí bábe bembéa bé bot;’
amú ná édí dá nama ma Mítsili été,
dá dzálában.”
38 Ané bé ngá dzó ná:
“Á Ntí,
dággé,
nzwaakeŋ é beáñ édɔ ñí.”
Éde a ngá dzó bɔ́ ná:
“Abímm te.”
Enseñanza en la Habitación Superior
Yesus aa yaglan á nkoó Álíba
39 Éde,
niané Yesus a ngá kólo,
ané a ngá ke á nkoó Álíba,
amvála ané é mbé ñí fúlú.
Ané beyága bá bé ngá bee fe ñí.
40 Niané a ngá sian vóm te,
éde a ngá dzó bɔ́ ná:
“Yaglánán á mfá ye ná míní nza ku mébóblé été.”
41 Ané a ngá kanan ya bɔ́ ntéññ avé mot aa wea akwá,
éde a ngá kútbe ó sí á ŋga yaglan,
42 eé dzó ná:
“Á Tará,
ngé wa kómo,
veagé é kɔ́p ñí ébe ma;
ve,
se nkómánn wɔm,
fáve nkómánn we éwɔ ó dzálában.”
43 Éde ángel ye á dzóp a ngá yéne ébe éñe mfá ye ávé ñí nguu.
44 Ñí a tɔɔ́ ya nlém mitéñ,
éde a ngá bíra yaglan akekwíñ ané éduduk deñ é ŋga ku metwéñ ósí ané mekií.
45 Éde,
niané a ngá tébe ná a mana yaá yaglan,
ané a ngá búlán ébe beyága,
éde a ngá koan ya bɔ́ óyó,
amú ná bé mbé eywiññ.
46 Ané a ngá síli bɔ́ ná:
“Amú dzé mína ke óyó?
Tébegán,
yaglánán fe á mfá ye ná míní nza ku mébóblé été.”
Bá biñ Yesus
47 Ákoan ná Yesus a ngén aa kɔ́bɔ,
ané nkuna bot ó ngá sian;
éñí bé ngá lwée ná Judas,
a mbé nyága mbɔ́ɔ́ ye béyága awóm ya bé beáñ;
éñe a ngá nzu nkuna bot te ósú,
éde a ngá yit Yesus bebeñ mfá ye áke ñí ñáŋ ámáŋŋ.
48 Ané Yesus a ngá síli ñí ná:
“Á Judas,
ye wa kuan é Mwán Mot ya ñáŋ ñí ámáŋŋ?”
49 Niané é bot bé mbé Yesus méféŋŋ bé ngá yén é dzam é ngá nzu bɔban,
éde bé ngá síli ñí ná:
“Á Ntí,
ye bí baa ya nzwaokeŋ?”
50 Ané mbɔ́ɔ́ ye ébe ébɔ́ a ngá vé óloá ntébosú á befára avéŋŋ,
éde a ngá kík ñí álɔ́ meyóm.
51 Ve,
éde Yesus a ngá yalan,
a dzóo ná:
“Líkgán abímm te.”
Éde a ngá nama mot te alɔ́,
a séñ ñí.
52 Ané Yesus a ngá dzó betébosú befára ya bedzwée benzima béye á templo ya mikúkúmá,
ébá bé ngá nzu ñí ábiñ,
ñí ná:
“Ye mína nzu ma biñ ya nzwaakeŋ ya mibéŋŋ mí elé ané me ne nzeé midzɔ́ŋŋ?
53 Átɔɔ́ ná ma tɔɔ́ bíabe mína á templo kada mos,
mína kaa ma ábiñ.
Ve,
áwola denan édɔ dí,
édí nguu ye ó dzíbi ósí da dzwée.”
Jesús es Traicionado y Arrestado
Pedro aa kat Yesus
54 Niané bé ngá biñ Yesus,
éde bé ngá ke ya ñí,
bé kéñ ñíi ya ñí é ndá ntébosú befára.
Pedro a ngá nzu aa bee bɔ́ oyaáp ómvús.
55 Éde,
niané bé ngá koman ndúán á yát été,
bé mana dɔ tɔbɔ méféŋŋ;
Pedro ñí a mbé ó véa bábe bɔ́.
56 Ané mbɔ biséññ miningá enziŋ a ngá yén ñí,
a tɔɔ́ á ndúán mféŋŋ,
éde miningá te a ngá túga ñí bem mís,
a dzóo ná:
“É mot ñí,
ñí a tɔɔ́ fe bá ñí.”
57 Ve,
éde Pedro ñí a ngá kat dɔ,
eé dzó ná:
“Á miningá,
măá yem ñí.”
58 Éde,
niané oyomm abɔ́ŋŋ tám ó ngá lot,
ané mot mfé ñí a ngá yén ñí,
a dzóo ná:
“Wa o ne fe mot mbɔ́ɔ́ ye ébe ébɔ́.”
Ve,
éde Pedro a ngá dzó ná:
“Á mot,
se ma ñí.”
59 Éde,
niané áwola déá é ngá lot,
ané mot mfé ñí a ngá yémle,
eé dzó ná:
“Bébélá,
é mot ñí a tɔɔ́ bá ñí,
amú ná ñí a ne fe mot ye á Galilea.”
60 Éde Pedro a ngá dzó ná:
“Á mot,
măá yem é dzam wa dzó.”
Etéññ te ébyen,
eé kɔ́bɔ,
ané nnóm kúp a ngá lɔ́ŋ.
61 Éde Ntí a ngá veŋan,
a dága Pedro.
Ané Pedro a ngá síman é dzam Ntí a ngá dzó ñí ná:
‘Émuú,
kaa ná nnóm kúp á lɔ́ŋ,
wa ye ma kat biyɔŋ bí léa.’
62 Éde Pedro a ngá kwíñ átán,
á ŋga daŋ bíra yi.
Pedro Niega a Jesús
Bá kpógo Yesus
63 É bot bé ngá kálá ñí,
bé ngá kpógo ñí bé ngá yít fe ñí.
64 Ané bé ngá dzip ñí mís,
[bé ŋga bími ñí ású],
bé ŋga síli ñí ná:
“Túpge,
nzá á bími wa?”
65 Bé ngá tea ñí,
béé dzó fe ñí abwiññ mam mefé.
Bá kík Yesus misaŋ
66 Niané kírí e ngá léne,
éde mikúkúmá míye á nnam,
betébosú befára ya fe beyágale métsiŋŋ bé ngá bɔ ekóánn,
bé kéñ fe ya ñí ékóánn médzó te,
ná bé kík ñí misaŋ.
Ané bé ngá síli ñí ná:
67 “Ngé wa o ne Kristo,
dzóge bía dɔ!”
Ve,
éde Yesus ñí a ngá yalan ya bɔ́ ná:
“Ngé me dzóo mína dɔ,
mínăá ye dɔ bwíni.
68 Ya fe ná,
ngé ma me síli mína nsílí,
mínăá ye yalan ya ma.
69 Ve,
atéé ye áwola dí,
é Mwán Mot,
aa ye ke átɔbɔ á mfá méyóm é Nzamá a ne nguu.”
70 Ané bésesé bé ngá síli ná:
“Édɔ ná,
o ne é Mwán Nzamá,
ngeá?
Ané Yesus ñí a ngá yalan ya bɔ́ ná:
“Ané mína dzó,
me ne ñí.”
71 Éde bé ngá dzó ná:
“Amú dzé fe bía bera kómo ngañiá?
Bía bébyen bí wók yaá dɔ ánu deñ.”
Jesús es Burlado e Interrogado