Bívévé engóngɔ́ɔ́ nkús miningá
21
Niané Yesus a ngá sám mís,
éde a ngá yén ané mikúkúmm myá wea bívévé byeba á báŋ été.
2 Ané a ngá yén fe engóngɔ́ɔ́ nkús miningá wá wá wea furá é beáñ ó véa.
3 Éde a ngá dzó ná:
“Bébélá ma dzó mína ná,
engóngɔ́ɔ́ nkús miningá dí,
éwɔ o daŋ wea álot bot bése;
4 amú ná bésesé bé mvá vé bivévé ábímm dá buk bɔ́;
ve,
éñe ya átéññ deñ,
á vé ásesé á belé ná aa niŋ ya dɔ.”
Ofrenda de una Viuda
Yesus aa kat fwéñ ná templo da ye tsam
5 Bot benziŋ bé ngá kɔ́bɔ adzó templo,
bé ngá dzó ná e ne nkomann ya mbamba mekwá,
ya fe é byém bí ne ya eban bá vé Nzamá;
éde Yesus a ngá dzó bɔ́ ná:
6 “É byém bíse mína yén bí,
melú má nzu ná akwá dăá ye lígi é bóo édí avɔ́ɔ́ áyóp;
ásesé aa ye tɔbɔ ntsamann.”
Mendem méye ámanaŋa eniŋ
7 Éde bé ngá síli ñí béé dzó ná:
“Á Nyágale,
dzam te dá ye bɔ ódén?
Ndem fé ki da ye bɔ éyɔŋ dzam te é nkún nzu bɔban?”
8 Ané ñí a ngá yalan ná:
“Tɔbɔgán ya nkée,
míní táa lík ná bé duk mína;
amú ná abwiññ dá ye sɔ́ ya éyola dam,
béé dzó ná,
‘ma me ne Kristo’,
ya ná,
‘tám eé kwíñ yaá’.
Míní táa bɔ́ bee ómvús.
9 Niané mína ye wók mefwéñ melúmán ya ntsénán mam,
míní táa kɔ wɔŋŋ;
amú ná dá yian ná mam méte mé tára bɔban,
ve memanaŋa măá ye bɔ vea etéññ te ébyen.”
10 Éde a ngá bera dzó ná:
“Ayɔŋ ya ayɔŋ aá ye lúman,
edzwée ngɔ́mán ya edzwée ngɔ́mán dá dá ye fe lúman.
11 Bora mifógán mí sí myá ye bɔ mévóm ya mevóm,
ya nzeñ ya fe ákwann dá kopban.
É mam mé ne ekɔwɔŋŋ ya bora mendem má ye bɔban ó yóp.
12 Ve,
kaa ná mam méte mé bɔ,
bá ye mína tára kee mó ó ñúu ya ádzéŋ mína ásí.
Bá ye mína kee bésinagoga ya míbok;
bá ye fe ke ya mína mésú bekéza ya bengɔ́vina amú étɔm éyola dam.
13 Éyɔŋ mína ye vé ngañiá á mfá wɔm édɔ dí.
14 Bánŋán mílém myenan été ná mínăá ye tára tém amvála mína ye ke kam ya mína bébyen;
15 amú ná mámyen ma ye mína vé bifíá ánu ya kén ámvála mínzínzíŋŋ myenan mí sés kɔk ngé ki ádwaan.
16 Atwaa beésúá benan ya bɔbéñɔŋ benan ya bívúvúmán byenan ya beñimvwíññ benan bá ye mína kuan;
bá ye fe ywíñ bevɔ́ɔ́ béye ébe mína.
17 Bot bése bá ye mína víni amú etɔm ye éyola dam.
18 Ve,
nkɔ́ esií mbɔ́ɔ́ ye nló wenan wa wăá ye dzímle.
19 Mína ye koro bíniŋ byenan ngé míní bánbe.
20 “Niané mína ye yén Yerusalen á ntɔɔ́ ndzilann ya misámá mélúmán,
tám te ébyen yemŋán ná éyɔŋ bá tsam ñí é kwíñ yaá.
21 Véa,
ébá bá ye bɔ á Judea,
bé túpge ná bé ke míkoó óyóp;
ébá bá bé ne á Yerusalen été,
bé kwíñŋe;
ébá bá bá ye bɔ méfúp,
bé táa ñíi été;
22 amú ná melú méte má ye bɔ melú mé endáglé,
á mfá ye ná édí áse é ne ntsilann é dzálában.
23 Ngwáa é biningá bá ye bɔ mebum ya fe ébá bá ye ñéa bwán melú méte!
Amú ná mitéñ abwiññ myá ye bɔ á sí ya méyéá menén á nnam wí été.
24 Bá ye ywíñ bot ya nzwaokeŋ,
bá ye fe ke ya bɔ́ míkómm ébe mesí mése.
Meyɔŋ mefé má ye tsibi Yerusalen áyóp akekwíñ é tám é nguu meyɔŋ méte da ye dzálában.
Ábúlánn é Mwán Mot
25 “Éde mendem má ye bɔ á nlódzóp,
á ngomdan ya fe átéteñ ó yóp;
á sí ó vá,
éñe meyɔŋ má ye tɔbɔ nzamzámánn ya milém mitéñ,
amú mora eduŋŋ máŋ ya mikebá.
26 Bot bá ye ku ané mibim ya é wɔŋŋ bá ye belé éyɔŋ bá tém é mam má ye nzu bɔban éniŋ ngúrá;
amú ná menguu méye á dzóp má ye tɔbɔ nsukgán.
27 Eyɔŋ te éde bá ye yén é Mwán Mot eé nzu míkút été ya nguu ya fe mora dúmá.
28 Niané é mam má má tára ná má bɔban,
dággán,
télegán fe míló myenan,
amú ná akoroga denan é ŋga sian yaá.”
29 Éde fe a ngá vé bɔ́ é nganán ñí,
ñí ná:
“Dággán elé igera,
ya bílé bíse bivɔ́ɔ́.
30 Niané mína yén mekéñ bílé má sɔŋban,
éde tám te mína yem ná esep é ntɔɔ́ bebeñ.
31 Amvála te fe,
niané mína ye yén é mam má mé ŋga bɔban yaá,
yemŋán ná édzwée ngɔ́mán Nzamá é ntɔɔ́ yaá bebeñ.”
32 “Bébélá ma dzó mína ná,
myee bot te wăá ye lot akekwíñ ané dzam te dá bɔban.
33 Dzóp ya sí byá ye lot,
ve bífíá byam byăá ye lot.
34 “Mína bébyen tɔbɔgán ya nkée ná mílém myenan mí táa tɔbɔ ndzálánn ya bembéa bivéé ya fían ya fe é mam má kele bot milém ó yóp éniŋ dzí,
á mfá ye ná mos te ó nza sian ébe mína ya nzigan
35 ané olám;
amú ná mos te wá ye sɔ́ ébe é bot bése bé ne éniŋ ngúrá.
36 Tɔbɔgán evéveññ eyɔŋ ése,
míníí yaglan á mfá ye ná míní belé nguu ye ásáale é mam mése mé nkún nzu bɔban má,
ya fe ná míní tébe tételé ébe ású é Mwán Mot.”