É nganán nkík misaŋ bá nkús miningá
18
Éde a ngá vé bɔ́ nganán ye ná dá yian ná bé yaglan tám áse kaa ávwat,
2 a dzóo ná:
“Nkík misaŋ enziŋ a mbé á kísoan enziŋ;
ĕé ngá kɔ Nzamá wɔŋŋ,
ĕé ngá kaŋ ki mot enziŋ.
3 Nkús miningá enziŋ wá ó mbé fe á kísoan te,
ó ngá bɔ weé ke weé dzó mot te ná:
‘Kamŋe ya ma ébe nzínzíŋŋ wɔm.’
4 Ngúrá tám ó ngá lot mot te kaa dɔ ákómo ábɔ;
ve,
véa,
éde a ngá dzó á nlém weñ été ná:
‘Afáŋbɔ ná măá kɔ Nzamá wɔŋŋ,
măá kaŋ ki mot enziŋ,
5 ma ye kam ya nkús miningá wi,
amú ná ăá lík ná aa bɔ ma sɔ́m,
á mfá ye ná a nzá bɔ eé nzu ma ndágle tám áse.’ ”
6 Éde Ntí a ngá dzó ná:
“Béágán é dzam ekúkwát nkík misaŋ dá dzó.
7 Ye ná Nzamá ñí ăá ye kam ya mítɔ́pbán myeñ,
émí myá lwée ñí oyaáp ó yóp alú ya ó mos?
Ye aa ye lík ná bé yana?
8 Ma dzó mína ná aa ye kam ya bɔ́ avóó.
Ve déá,
éyɔŋ é Mwán Mot aa ye sɔ́,
ye aa ye koan ya mbwínánn á sí ó vá?”
É nganán Fariseo ya ñɔŋmfóŋsí
9 Éde fe a ngá vé é nganán ñí ébe bot benziŋ béye bé ngá kaŋ bébyen ná bé ne benzósoó,
béé byana fe é bot bevɔ́ɔ́,
ñí ná:
10 “Bot bé beáñ bé ngá ke yaglan á templo.
Mbɔ́ɔ́ a mbé mwann fariseo;
éñí mbɔ́ɔ́ ñí a ñɔŋmfóŋsí.
11 Éde mwann fariseo,
a téle tételé,
a ngá yaglan á nlém weñ été aaná:
‘Á Nzamá,
ma vé wa akíba amú ná me sés ané é bot bevɔ́ɔ́:
ébá bé ne beñɔŋ bot byém ya meduk,
bikúkwát,
bebɔ medzíán,
me sés ki ané ñɔŋmfóŋsí ñí.
12 Ma lot metám kaa ádzí táŋ biyɔŋ bí beáñ á sóánn,
ma vé fe ngap awóm ébe é byém bíse me belé.’
13 Ve,
ñɔŋmfóŋsí ñí a téle tételé oyaáp,
mís má ĕé ngá kómo ki bére ó yóp,
fáve ná aa bere mó á nló weñ,
eé dzó ná:
‘Á Nzamá,
kpeegé ma engóngɔ́ɔ́,
me ne mbɔ misémm.’
14 Ma dzó mína ná é mot ñí a ngá búlán é ndá dzeñ ákoan ná a ntɔɔ́ yaá nzósoó ósú Nzamá,
sés éñí mbɔ́ɔ́.
Amú ná,
é mot áse aa bére émyen ó yóp,
aa ye siliban ósí,
ve éñí ñí aa sili émyen ósí,
aa ye bétban ó yóp.”
Parábola del Fariseo y el Recolector de Impuestos
Yesus aa bwárán ya bɔ́ŋŋ
15 Bé ngá nzu fe ya bwán ébe Yesus ná á nama bɔ́.
Niané beyága bé ngá yén dɔ,
éde bé ngá báma bɔ́.
16 Ve,
éde Yesus a ngá lwée bɔ́,
a dzóo ná:
“Líkgán ná bɔ́ŋŋ bé nzu ébe ma,
míní táa bɔ́ dɔ dzip,
amú ná ébɔ́ bé ne a édzwée ngɔ́mán Nzamá.
17 Ma dzó mína bébélá ná é mot aa ye bɔ kaa áñɔŋ édzwée ngɔ́mán Nzamá ané mɔ́ŋŋ,
ăá ye ñíi été.”
Yesus bá nkúkúmm mot bá kɔ́bɔ
18 Éde fe ntébe ósú enziŋ a ngá síli ñí ná:
“Á Nyágale,
wa o ne mbamba mot,
ma yian bɔ á yá ná me wún éniŋ é ne mbéámbéá?”
19 Ané Yesus ñí a ngá yalan ya ñí ná:
“Amú dzé wa lwée ma ná mbamba mot?
Mot enziŋ a sés mbamba mot,
fáve Nzamá.
20 Wa yem memvéná:
‘O táa bɔ medzíán,
o táa ywíñ mot,
o táa dzíp,
o táa vé é ngañiá e ne mineá,
sémeŋé ésúá bá ñuá.’ ”
21 Éde a ngá dzó ná:
“Me baale yaá mam méte mése atéé ye me mbé ndómán.”
22 Niané Yesus a ngá wók dɔ,
ané a ngá dzó ñí ná:
“Dzam avɔ́ɔ́ é ngén dá dzéŋ wa:
Kuugán é byém bíse o belé,
o kap byɔ biŋgóŋgɔ́ɔ́ bí bot,
véa wa ye belé ntam á dzóp été;
nzaá,
o béé fe ma.”
23 Niané a ngá wók dɔ,
ané a ngá bíra tɔbɔ eywiññ,
amú ná a mbé mora nkúkúmm.
24 Niané Yesus a ngá yén ná mot te a bíra yaá tɔbɔ eywiññ,
éde a ngá dzó ná:
“É ne ndzuúk abwiññ ná é bot bé belé akúmm bé ñíi édzwée ngɔ́mán Nzamá!
25 Amú ná dá daŋ ya ebúbú ná kamelio eé túgan ávéŋŋ ondondɔɔ été ya ná nkúkúmm mot ó ñíi édzwée ngɔ́mán Nzamá.”
26 Ané é bot bé ngá wók dɔ bé ngá síli ná:
“Nzá fe aa ye tɔbɔ nkoránn?”
27 Éde Yesus ñí a ngá yalan ya bɔ́ ná:
“É dzam é sés bɔban mfá bwán bé bot,
é ne bɔban mfá Nzamá.”
28 Ané Pedro a ngá dzó ñí ná:
“Dággé,
bía bí lík yaá é mam mea ná bía bee wa.”
29 Éde Yesus ñí a ngá yalan ya bɔ́ ná:
“Bébélá,
ma dzó mína ná,
é mot áse aa lík ndá,
ngé ngéá,
ngé bɔbéñaŋ,
ngé éséá ya ñiá,
ngé ki bwán amú etɔm ye édzwée ngɔ́mán Nzamá,
30 mot te aa ye ñɔŋ ededea abwiññ é tám ñí;
éniŋ é ne mbéámbéá dá aa ye fe ñɔŋ é tám da nzu.”
Yesus aa bera kat ámvála aa ye wú
31 Niané Yesus a ngá ñɔŋ baapostol awóm ya bé beáñ,
éde a ngá dzó bɔ́ ná:
“Dággán,
bía ke á Yerusalen,
é vóm mam mése má ye mana dzálában,
é mam bekúlu medzó bé ngá tsili ákála é Mwán Mot.
32 Amú ná bá ye ñí kee é mó meyɔŋ mefé,
bá ye ñí kpógo,
bá ye ñí tea,
bá ye fe ñí túp menden;
33 niané bá ye ñí mana yít,
eyɔŋ te bé ywíñ ñí.
Ve,
aa ye wómo álú léa.”
34 Ve,
béé ndzí wók dzam enziŋ ye été.
Dzam te é mbé é swala bɔ́,
béé ndzí wók ayílíga ye é mam a ngá kɔ́bɔ ya bɔ́.
Jesús Predice Su Muerte y Resurrección
Yesus aa séñ ndzíndzímm á Jerikó
35 A ngá bɔ ná,
éyɔŋ Yesus a ngá kwíñ bebeñ á Jerikó,
ndzíndzímm ó mbé ó tɔɔ́ ó féŋŋ nzenn,
weé dzaa ntólo.
36 Niané ó ngá wók nkuna bot wá lot,
éde mot te a ngá síli ná dzé dá lot.
37 Ané bé ngá yalan ya ñí ná:
“Yesus ye á Nasaret éñe aa lot ó véa.”
38 Éde a ngá yónán,
a dzóo ná:
“Á Yesus,
é Mwán David,
kpeegé ma engóngɔ́ɔ́!”
39 Ané é bot bé ngá ke ósú bé ngá báma ñí ná á sis evóó;
ve,
a ngá bera bíra yónán ná:
“É Mwán David,
kpeegé ma engóngɔ́ɔ́!”
40 Éde Yesus a ngá tébe,
a mánan fe ná bé nzu ya ñí.
Niané a ngá kwíñ ñí bebeñ,
ané a ngá síli ñí ná:
41 “Wa kómo ná me bɔ wa á yá?”
Éde a ngá yalan ná:
“Á Ntí,
ma kómo bera yén.”
42 Ané Yesus a ngá dzó ñí ná:
“Beragá yén.
Mbwínánn we ó koro yaá wa.”
43 Etéññ te ébyen éde mot te a ngá bera yén,
á ŋga bee fe Yesus,
eé vé fe Nzamá dúmá.
Éde fe,
niané bot bése bé ngá yén dzam te,
ané bé ngá vé Nzamá olugú.
Sanación de Bartimeo