Ekúkwát mbaale akúmm
16
Éde fe Yesus a ngá dzó béyága beñ ná:
“Nkúkúmm mot enziŋ ó mbé ó belé mbaale akúmm,
éde bé ngá ke sɔ́mán mbaale akúmm te ébe éñe ná aa ywíñ ñí akúmm ntuk.
2 Ané é mása weñ a ngá lwée ñí,
a dzóo ñí ná:
‘Nzá dzam ma wók ébe wa dí?
Léregé ma metáŋ méye ákúmm o belé ma,
amú ná o sés fe ma bera baale akúmm.’
3 Éde mbaale akúmm te a ngá dzó á nlém weñ été ná:
‘Nzá dzam ma ye bɔ?
Amú ná é mása wɔm á ŋga vea yaá ma éséññ.
Me sés fá sí,
ma wók fe osoán ná me ke ma dzaa.
4 Me yem yaá é dzam ma ye bɔ,
á mfá ye ná éyɔŋ bá ye ma vea éséññ bot bé ñɔŋ ma méndá meba.’
5 Éde a ngá lwée kada mvómvólá ye mímvómvólá é mása weñ,
éde a ngá dzó éwí ósúá ná:
‘O belé é mása wɔm mvólá táŋ á yá?’
6 Ané mvómvólá te ó ngá dzó ñí ná:
‘Ntet bwann milígá mí mbwánn.’
Éde a ngá dzó ñí ná:
‘Twáagé é kálara mvólá we,
dzígá átɔbɔ ósí ná o tsili mewóm mé tán.’
7 Éde a ngá síli é mot mbɔ́ɔ́ ná:
‘Wa o belé táŋ á yá?’
Ané ñí a ngá yalan ná:
‘Mivakgán mí trigo táŋ ntet.’
Éde a ngá dzó ñí ná:
‘Twáagé é kálara a mvólá we,
o tsili mewóm mmom.’
8 Éde é mása ekúkwát mbaale akúmm te a ngá kɔ́bɔ ñí mvéáñ,
amú ná aa bɔ dzam te ya nkée;
amú ná bwán béye é tám ñí bé ne nkée á myee bot weba ádaŋ bwán béye éyéá.
9 “Éde ma dzó mína ná:
bɔgán memvwíññ ya mbéa akúmm míní belé,
á mfá ye ná,
niané dá mana,
bé ñɔŋ mína á méndá mé ne mbéámbéá.
10 “É mot aa túga baale avítsaŋ byém,
éñe fe aa túga baale abwiññ byém;
éñí ñí a ne ekúkwát ya avítsaŋ byém,
éñe fe a ne ekúkwát ya abwiññ byém.
11 Édɔ é ne ná,
ngé míníí ndzí túga baale mbéa akúmm,
nzá aa ye belé ngaŋŋ ye ná á téle mína á mfá ñá akúmm?
12 Ngé míníí ndzí túga baale éyá byém,
nzá aa ye mína kee é byém bí ne éebyenan?
13 “Mbɔ eséññ enziŋ ye á ndá a sés séan ya bemása bé beáñ;
aa ye víni mbɔ́ɔ́,
á ŋga dziŋ éñí mbɔ́ɔ́;
ngé ki ná,
aa ye bánbe ya mbɔ́ɔ́,
á ŋga byana fe éñí mbɔ́ɔ́.
Míní sés séan ya Nzamá,
míníí séan fe ya akúmm.”
14 Befariseo,
bedziŋŋ moann,
bé ngá wók mam méte mése béé kpógo ñí.
15 Éde a ngá dzó bɔ́ ná:
“Mína bébyen mína ñɔŋ ná míní ne benzósoó ébe ású bwann bé bot.
Ve,
Nzamá aa yem mílém myenan;
éde véa é dzam é ne ededea mbeŋ ébe ású bwann bé bot,
dá é ne dzam ye ávíni ósú Nzamá.
Nkɔɔ́ métsiŋŋ ya áyɔŋ Nzamá
16 “Nkɔɔ́ métsiŋŋ ya é mam bekúlu medzó bé ngá tsili má súgu ngerga ébe Juan.
Akólo ye tám te,
éde bá kat mbamba fwéñ ye édzwée ngɔ́mán Nzamá,
bot bése bá vé fe nguu ná bé ñíi été.
17 “Ve,
dá daŋ ya ebúbú ná dzóp ya sí bí mana,
ya ná,
mwann ekaŋŋ mbɔ́ɔ́ ye á nkɔɔ́ métsiŋŋ été á bɔ kaa eban.
Mvas
18 “É mot áse aa vas ébe ngéá weñ,
a lúk miningá mfé,
mot te aa bɔ medzíán;
é mot ñí aa lúkgan fe ya é miningá a ne mvasann ébe nnóm,
mot te ñí aa bɔ fe medzíán.
Nkúkúmm mot bá Lásaro
19 “Mot enziŋ a mbé nkúkúmm,
a ngá bɔ eé bwát bítóp bí ne ededea mvéáñ ya táŋ ndén,
a ngá bɔ fe eé bɔ bora méfét bidzí kada mos.
20 Ve,
engóngɔ́ɔ́ mot enziŋ,
é tɔɔ́ eyola ná Lásaro,
é mbé ndzálánn ya mefóó ó ñúu,
é ngá bɔ deé bómo á mbéñ aká mot te;
21 é ngá kómo bɔ deé dzéa abum ya médzá mé ngá bɔ meé ku é téble nkúkúmm te;
atwaa bemvú bá bé ngá bɔ béé nzu béé ñéa ñí mefóó.
22 Éde a ngá bɔ ná,
niané engóngɔ́ɔ́ mot te é ngá wú,
éde baángel bé ngá ke ya ñí,
bé tɔɔ ñí ébe Abraam.
Éde fe nkúkúmm wa ó ngá wú,
ané bé ngá ke wɔ́ ádzep.
23 “Éde,
eé wók mitéñ minén á sí békónn été,
a ngá sám mís a yén Abraam oyaáp ya Lásaro a yága ñí ó twíñ.
24 Éde a ngá yónán,
eé dzó ná:
‘Á tará Abraam,
yénŋe ma engóngɔ́ɔ́,
lómŋe fe Lásaro ná á bwala é swá onuú deñ méndzímm ná a vóbo ma dém,
amú ná ma dzuk ya é ndúán ñí.’
25 Ve,
éde Abraam a ngá dzó ná:
‘Á mwán,
símaŋán ná waá ñɔŋ míbeŋ mwe éniŋ dzwe,
amvála te fe Lásaro ñí aá ñɔŋ mebé;
ve,
áwola dí,
bé foŋ yaá ñí ó vá,
éyɔŋ wa wá dzuk.
26 Éde,
ya áse te,
mora yee a yéŋán énzénzaŋ bíabe mína,
á mfá ye ná é bot bé ne kómo ákígán ó vá ná bá nzu ébe mína,
bé nza bɔ dɔ;
ébá bá bé ne ó wéñ,
bá bé nza ki kígán óná.’
27 “Éde nkúkúmm ó ngá dzó ná:
‘Á tará Abraam mé ŋga dzaa yaá wa engóngɔ́ɔ́ ná o lóm Lásaro é ndá éséá wɔm;
28 me belé bɔbéñaŋ bé tán,
ná á ke bɔ́ báma á mfá ye ná bá bé nza nzu fe éndáglé vóm dí.’
29 Ve,
éde Abraam a ngá yalan ya ñí ná:
‘Bé belé Moisés ya bekúlu medzó,
bé wókge bɔ́.’
30 Ané ñí a ngá dzó ñí ná:
‘Kaa,
á tará Abraam,
ngé mot enziŋ ye ébá bé wú yaá a kéñ ébe bɔ́,
bá ye dzoban.’
31 Ané,
Abraam a ngá dzó ñí ná:
‘Ngé băá wók Moisés ya bekúlu medzó,
băá ye ki wók,
atwaa mot enziŋ ye bewú á wómo.’ ”