Ntómá ó ngá dzími
15
Éde beñɔŋ mfóŋsí bése ya bebɔ misémm bé ngá yit ébe Yesus ná bá wók ñí,
2 ané befariseo ya beyágale métsiŋŋ bé ngá swa ñí,
béé dzó ná:
“É mot ñí aa ñɔŋ bebɔ misémm,
aa dzí fe bábe bɔ́.”
3 Ané ñí a ngá vé bɔ́ é nganán ñí,
a dzóo ná:
4 “Mot mbé ye ébe mína a ne bɔ ná a belé ntet mitómá,
ngé ntómá mbɔ́ɔ́ ye été ó dzími ñí,
eyɔŋ te éñe kaa álík mítómá mewóm ebuú ya ebuú mí éyáŋŋ été,
ná aa ke aa dzéŋ éwí ó mvá dzími,
akekwíñ ané aa yén wɔ́?
5 Éde,
niané aa yén wɔ́,
a baga wɔ́ mébán ya mesán.
6 Niané aa sian á ndá,
a kóán bémvwíññ béñ ya é bot bábe bɔ́ bé tɔɔ́,
a dzóo fe bɔ́ ná:
‘Sánŋán ya ma,
amú ná me yén yaá ntómá ó ngá dzími ma.’
7 Ma dzó mína ná amvála te fe mesán má ye bɔ á dzóp amú mbɔ misémm mbɔ́ɔ́ aa dzoban,
ádaŋ amú benzósoó bé bot mewóm ebuú ya ebuú bé ne kaa dzam enziŋ ná bá dzoban.
É moann mí ngá dzími miningá
8 “Ngé ki ná,
miningá mbé a ne bɔ ná,
ngé a belé awóm bedrakma,
ngé drakma fɔ́ɔ́ e dzími ñí,
éñe kaa ábwaa láma,
a mana vwéñ ndá,
eyɔŋ te,
á ŋga túga dzéŋ,
akekwíñ ané aa yén dɔ?
9 Niané aa yén dɔ,
a kóán bémvwíññ béñ ya é bot bé tɔɔ́ bábe bɔ́,
a dzóo bɔ́ ná:
‘Sánŋán ya ma,
amú ná me yén yaá é drakma e ngá dzími ma.’
10 Ma dzó mína ná amvála te fe mesán mé ne ébe ású baángel Nzamá amú mbɔ misémm mbɔ́ɔ́ aa dzoban.”
É mwán a ngá dzímle
11 Éde fe Yesus a ngá dzó ná:
“Mot enziŋ a mbé a belé bwán bé beáñ;
12 ané é mwán a mbé mɔ́ŋŋ a ngá dzó éséá ná:
‘Á tará,
vá ma é ngap akúmm dam.’
Éde éséá a ngá mana bɔ́ kap akúmm.
13 Niané ayomm melú é ngá lot,
ané é mwán á mbé mɔ́ŋŋ a ngá mana kóán ásesé á mbé a belé,
ané a ngá ke sí fé oyaáp;
éde ó véa a ngá mana ywíñ ákúmm deñ ntuk weñ,
eé niŋ éndendea été.
14 Niané a ngá mana dzímle ásesé,
éde nzeñ ndén e ngá kwíñ sí te,
ané a ngá tára ná aa wók nzeñ.
15 Éde a ngá ke síli eséññ ébe mot enziŋ ye ébá béye á kísoan ye sí te;
éde mot te a ngá lóm ñí á mífínn myeñ ná á ke ñí baale bengwiññ.
16 A ngá kómo fe ádzálá ábum deñ ya bídzí bengwiññ bé ngá dzí;
ve,
mot enziŋ ñí ĕé ngá vé ñí byɔ.
17 Éde,
niané a ngá biñ kén,
ané a ngá dzó ná:
‘Bebɔ biséññ táŋ á yá bé ne é ndá tará ná bidzí byá buk bɔ́,
ve ma ma dzuk ya nzeñ ó vá!
18 Ma ye tébe,
eyɔŋ te me búlán ébe tará,
me dzóo ñí ná:
Á tará,
me bɔ yaá nsémm ébe ású Nzamá ya ébe ású dwe;
19 măá yian fe ná bé lwée ma ná é mwán we;
ñɔŋŋe ma ané mbɔ biséññ mbɔ́ɔ́ ye bébɔ biséññ bwe.’
20 Éde a ngá tébe,
a kéñ ébe éséá weñ.
“Ákoan ná a ngén oyaáp,
ané éséá a ngá yén ñí,
éde a ngá kpee ñí engóngɔ́ɔ́.
Ané éséá a ngá mára mbíí,
a kéñ wúbán ya ñí,
á ŋga ñáŋ fe ñí memáŋŋ.
21 Éde mwán a ngá dzó ñí ná:
‘Á tará,
me bɔ yaá nsémm ébe ású Nzamá ya ébe ású dwe;
măá yian fe ná bé lwée ma ná é mwán we.’
22 Ve,
ané éséá a ngá dzó áloá deñ ná:
‘Avóó,
twáagán ñí elíŋŋá dá daŋ ya mvéáñ,
míní bwára ñí dɔ.
Bwátgán fe ñí elwaná ónuú,
míní bwára fe ñí mengop mébɔ.
23 Nzaán fe ya é mwann ñát á ntɔɔ́ nnén,
míní kík ñí,
ná bí dzíán,
bí sánŋán fe,
24 amú ná é mwán wɔm ñí a mbé nwúán,
ve a bera yaá niŋ;
a mbé ndzímlán,
ve a yéne yaá.’
Éde bé ngá tára ná bá bɔ fét.
25 “Mwán te,
é mwanñaŋ á mbé ñí ósú ñí a mbé á mfínn tám te.
Niané a ngá sɔ́,
ákoan ná a ntɔɔ́ bebeñ á ndá,
ané a ngá wók mendzík ya mebók.
26 Éde a ngá lwée mbɔ biséññ mbɔ́ɔ́ enziŋ ó véa,
a síli ñí ná dzé dá lot.
27 Ané mbɔ biséññ te ñí a ngá dzó ñí ná:
‘Mwanñɔŋ a sɔ́ yaá,
éde ésúá á kík é mwann ñát a ne nnén,
amú ná á bera ñí ñɔŋ mvwaá.’
28 Éde mwán te a ngá yéá,
éñe kaa fe ákómo áñíi;
ané éséá a ngá kwíñ átán,
á ŋga dzaa ñí engóngɔ́ɔ́ ná á ñíi.
29 Ve,
ñí a ngá yalan ya éséá a dzóo ñí ná:
‘Yénŋe ábímm mibú me séan yaá ya wa,
ma kaa wa ábɔ melɔ́ mvéná enziŋ,
atwaa mwann kábán mbɔ́ɔ́ ñí wăá bé ki ma vé ná me bɔ fét bíabe bemvwíññ bam.
30 Ve,
niané é mwán we ñí á sɔ́,
éñí a mvá mana wa ndámán akúmm ya bindendea bí biningá,
o kík yaá ñí é mwann ñát a ne nnén.’ ”