Yesus aa séñ é mot aa kwan mendzímm ó ñúu
14
A ngá bɔ ná,
é mos Sátará,
niané Yesus a ngá ñíi é ndá nkúkúmá befariseo enziŋ,
ná aa dzí,
ané befariseo bé ngá tára ná bá mɔ́mɔ ñí.
2 Véa,
mot enziŋ a mbé a téle ñí ású,
eé kwan mendzímm ó ñúu.
3 Éde Yesus a ngá síli beyem metsiŋŋ ya befariseo,
a dzóo ná:
“Ye atsiŋŋ dá yébe,
ngé ki dăá yébe ná bé séñ mot é mos Sátará?”
4 Ve,
éde bé ngá sis bivóó.
Ané a ngá ñɔŋ nkúkwann te,
a séñ wɔ́,
a dzóo fe wɔ́ ná ó ke.
5 Éde a ngá dzó bɔ́ ná:
“Nzá ye ébe mína a ne bɔ ná,
ngé é mwán weñ,
ngé ki éña deñ,
dzóm ye été é kpéñ ñí étam été é mos Sátará,
eyɔŋ te éñe kaa dɔ ávea etéññ te ébyen?”
6 Bĕé mbé dwaan ya ñí ya mam méte.
É bot bé belé ekígá alúkgán
7 Niané a ngá yén ámvála é bot bé mbé mbánán bé ngá ke bá tɔ́p bítɔɔ́ ósúá,
éde a ngá vé bɔ́ é nganán ñí,
a dzóo ná:
8 “Ngé mot a bána wa ó fét alúkgán,
o táa tɔbɔ étɔɔ́ ósúá,
a nza bɔ ná nde é mot mfé bá vé ngaŋŋ álot wa ñí a mot te á bána fe;
9 ané é mot a mvá bána mína bé beáñ aa sɔ́,
a dzóo wa ná:
‘Vá é mot ñí etɔɔ́,’
eyɔŋ te wa ye tára ná wa ke tɔbɔ étɔɔ́ é ne ómvúmvús ya osoán.
10 Dá daŋ ya mvéáñ ná,
ngé bé bána wa,
kéŋ tɔbɔ étɔɔ́ é ne ómvúmvús,
á mfá ye ná niané é mot á bána wa aa sɔ́,
aa dzó wa ná:
‘Á mwíi,
nzaá tɔbɔ é vóm wá daŋ ya mvéáñ.’
Eyɔŋ te wa ye ñɔŋ dúmá ébe ású é bot bése mínabe bɔ́ mína dzí ó téble.
11 Amú ná,
é mot áse aa bére émyen ó yóp,
aa ye siliban ósí,
éñí ñí aa sili émyen ósí,
ñí aa ye bétban ó yóp.”
12 Éde fe a ngá dzó é mot a ngá bána ñí ná:
“Éyɔŋ wa bɔ bidzí bíye ó mos ngé ki bidzí bíye alú,
o táa bána beñimvwíññ,
ngé bɔbéñɔŋ,
ngé bívúvúmán bwe,
ngé ki míkúkúmm mínabe bɔ́ míní tɔɔ́;
ngé o bɔ dɔ,
bá bá ye fe wa bána,
eyɔŋ te o ñɔŋ é máán mwe véa.
13 Ve,
éyɔŋ wa koman bidzí,
lwéegé biŋgóŋgɔ́ɔ́ bí bot,
é bot bé ne kaa binam,
mibóbók ya midzíndzímm.
14 Eyɔŋ te éde mvɔmm dá ye bɔ ya wa,
amú ná bé sés yáán ya wa dɔ;
wa ye ñɔŋ é máán mwe éyɔŋ benzósoó bé bot bá ye wómo.”
É nganán mora fét bidzí
15 Niané a ngá wók dzam te,
éde mot mbɔ́ɔ́ ye bábe bɔ́ bé ngá dzí ó téble a ngá dzó ñí ná:
“Mvɔmm ya é mot áse aa ye dzí mfémm édzwée ngɔ́mán Nzamá.”
16 Éde Yesus ñí a ngá dzó ñí ná:
“Mot enziŋ a ngá bɔ mora fét bidzí,
ané a ngá mana bána abwiññ bot.
17 Niané áwola bidzí é ngá kwíñ,
éde a ngá lóm óloá weñ ná ó ke dzó é bot bé mbé mbánán ná:
‘Nzaán,
amú ná áse á ntɔɔ́ yaá nkomann.’
18 Ve,
éde bé ngá tára ná bá vé benzósoó,
bésesé éyɔŋ déá.
É mot ósúá ñí ná:
‘Me ndem kus afóo sí,
ma yian dɔ a ke yén;
ma dzaa fá wa engóngɔ́ɔ́ ná o dzwii ma.’
19 Éñí mbɔ́ɔ́ ñí a dzóo ná:
‘Me ndem kus awóm biña,
ma ke byɔ ákyak,
ma dzaa fá wa engóngɔ́ɔ́ ná o dzwii ma.’
20 Éñí mbɔ́ɔ́ ñí ná:
‘Me sés ke,
amú ná me ndem lúkgan.’
21 Ané oloá ó ngá búlán,
ó kat fe é mása weñ fwéñ te.
Éde myenn ndá a ngá yéá,
ané a ngá dzó óloá weñ ná:
‘Kéŋ avóó míseŋ minén ya míseŋ mitwá míye á kísoan,
nzaá ya biŋgóŋgɔ́ɔ́ bí bot,
ya é bot bé ne kaa binam,
mibóbók,
ya midzíndzímm.’
22 Ané oloá ó ngá dzó ná:
‘Á mása,
é dzam o mvá mánan é ntɔɔ́ yaá mbɔann,
ve afóo é ngén.’
23 Éde mása a ngá dzó wɔ́ ná:
‘kéŋ wa ke ménzenn ya meyát,
yémlé fe bɔ́ ná bé nzu ñíi,
á mfá ye ná é ndá dzam eé dzéñ.
24 Amú ná ma dzó mína ná,
mot enziŋ ye é bot me mvá bána á ye fe kyak bídzí byam.’ ”
Ngé mot aa kómo ábɔ nyága Yesus
25 Mikuna mí bot minén mí ngá wulu bábe Yesus,
ané a ngá veŋan ébe ébɔ́,
a dzóo bɔ́ ná:
26 “Ngé mot enziŋ aa nzu ébe ma,
mot te kaa ma ádziŋ ádaŋ ábímm edziŋŋ aa dziŋ éséá weñ,
ñiá weñ,
ngéá weñ,
é bwán béñ,
bɔbéñaŋ béñ,
bekéá béñ,
atwaa éniŋ dzeñ ébyen,
a sés bɔ nyága wɔm.
27 É mot áse ñí a ne kaa ábaga é krús deñ a bee fe ma,
a sés bɔ nyága wɔm.
28 “Amú ná,
nzá ye ébe mína a ne kómo álóŋ nkum,
mot te kaa átára tɔbɔ ósí,
a mana vakgan ábímm dá ye dzímle,
á mfá ye ná á yén ngé a belé ábímm a ne mana ya dɔ nkum te?
29 A nza bɔ ná niané aa mana vé mbókga,
éñe kaa fe wɔ́ mana;
eyɔŋ te é bot bése bá ye dɔ yén bá ye tára ná bá kpógo ñí,
30 béé dzó ná:
‘É mot ñí a ngá tára ná aa lóŋ,
ve eé ndzí fe mana.’
31 Ngé ná,
kéza mbé aa ye ke álúmán ya é kéza mbɔ́ɔ́,
éñe kaa átára tɔbɔ ósí ná aa vakgan ngé ya bot awóm binzuk a ne lúman ya éñí ñí aa nzu ya bot binzuk mewóm mé beáñ?
32 Ngé é sés bɔban,
éde kéza te aa ye tára lóm betébe nzaŋŋ á mfá ye ná bé ke dzaa mvwaá éyɔŋ é kéza mbɔ́ɔ́ a ngén oyaáp.
33 Amvála te fe,
é mot áse ye ébe mína aa ye bɔ kaa átep míbeŋ míse a belé,
a sés bɔ nyága wɔm.”
Éyɔŋ nkuú wá sám dak