Yesus aa kɔ́bɔ mfá meduk
12
Tám te,
niané nkuna bot ó ngá mana kóán binzuk ya binzuk,
akekwíñ ané bébyen ya bébyen bé ŋga tsiban,
ané Yesus a ngá tára ná aa tára kɔ́bɔ ya béyága beñ ná:
“Tɔbɔgán ya nkée ná míní nza byaran é levadura befariseo,
édɔ e ne meduk.
2 Amú ná,
dzam enziŋ dĕé búru áyóp ná dăá ye kúluban,
é sés ki ásweññ ná băá ye dɔ yem.
3 Amú áse te,
é dzam áse míní kɔ́bɔ yaá ó dzíbi ósí,
bá ye dɔ wók éyéá été;
é dzam míní kɔ́bɔ yaá melɔ́ á bidziná méndá été,
dá bá ye fe yónán mídzií áyóp.
Nzá bá yian kɔ wɔŋŋ?
4 “Á bemvwíññ bam,
ma dzó mína ná,
míní táa bɔ́ kɔ wɔŋŋ é bot bé ne ywíñ ñúu,
ve bé sés bɔ dzam afé.
5 Ma ye mína kat nzá mína yian kɔ wɔŋŋ:
kɔgán wɔŋŋ éñí aa bɔ ná niané aa ywíñ ñúu,
a belé fe nguu ye áwea ébéññ ndúán.
Bébélá,
ma dzó mína ná éñe kɔgán wɔŋŋ.
6 “Ye ná băá kuan bwann bé anwann bé tán furá é beáñ,
ngeá?
Ve déá,
Nzamá ñí ăá vwían mbɔ́ɔ́ enziŋ ye ébe ébɔ́.
7 Bébélá,
atwaa ésií é ne mína míló dá é ne nláŋán;
míní táa kɔ wɔŋŋ,
míní ne ya eban ádaŋ abwiññ anwann.
É bot bá mem Yesus ébe ású bot
8 “Ma dzó mína ná,
é mot áse aa ye ma mem ébe ású bot,
é Mwán Mot ñí aa ye fe ñí mem ébe ású é baángel Nzamá.
9 Ve,
é mot aa ye ma kat ébe ású bot,
ma ma ye fe ñí kat ébe ású é baángel Nzamá.
10 “É mot áse aa ye kɔ́bɔ é Mwán Mot éfíá é ne abé,
aa ye tɔbɔ ndzámann;
ve,
é mot aa ye tea Mfúfúp Nsísim,
ăá ye tɔbɔ ndzámann.
11 “Éyɔŋ bá ye ke ya mína bésinagoga,
mésú bekík misaŋ,
ngé ki beŋgɔ́mán,
milém mí táa mína ku ábum ná mína ye ke yalan á yá,
ngé ki ná mína ye ke dzó á yá;
12 amú ná Mfúfúp Nsísim aa ye mína yága áwola te ébyen é dzam mína yian dzó.”
Nkúkúmm mot ó mbé akút
13 Éde mot enziŋ ye á nkuna bot été ó véa a ngá dzó ñí ná:
“Á Nyágale,
dzóge mwadzaŋ ná á kap tsígá bía ñí.”
14 Ané Yesus a ngá yalan ya ñí ná:
“Á mot,
nzá aá téle ma nkík misaŋ,
ngé ki nkap byém énzénzaŋ denan été?”
15 Éde a ngá bera dzó ná:
“Dággán,
tɔbɔgán fe ya nkée amú oyéá byém óse.
Amú ná eniŋ mwann mot dĕé tsií ábwiññ akúmm a belé.”
16 Éde a ngá vé bɔ́ é nganán ñí,
a dzóo ná:
“Mífínn nkúkúmm mot enziŋ myá mana wúm abwiññ.
17 Ané a ngá tém á nlém weñ été,
a dzóo ná:
‘Ma ye bɔ á yá?
Amú ná mĕé belé fe é vóm ma ye nii bídzí byam.’
18 Éde a ngá dzó ná:
‘Ma ye bɔ aaná:
Ma ye tsam bésitúa bam,
eyɔŋ te ma ye lóŋ béfé bá daŋ ya benén,
me mana nii bídzí bíse byam été ó véa ya míbeŋ myám.
19 Eyɔŋ te éde ma ye dzó mámyen ná:
O belé abwiññ mibeŋ nián táŋ abwiññ mibú;
waabe,
dzá,
ñá,
sánŋe fe.’
20 Ve,
éde Nzamá ñí a ngá dzó ñí ná:
‘Á okúkút,
álú dí ébyen bá nzu ñɔŋ nsísim we!
É byém o mvá nii,
nzá aa ye lígi ya byɔ?’
21 Dzam te édɔ fe dá lot ya é mot aa bɔ báŋ mfá émyen;
ve,
a sés kúmá á mfá Nzamá.”
Nzamá aa baale é bot béñ
22 Éde Yesus a ngá dzó béyága beñ ná:
“Amú dzam te,
ma dzó mína ná:
Éniŋ denan é táa mína kpoo milém ábum ná,
mína ye dzí dzé;
ngé ki é ñúu denan ná,
mína ye bwát dzé.
23 Amú ná,
eniŋ dá lot bidzí;
ñúu da da lot fe bitóp.
24 Bíligán ná bendongórgó băá beñ,
băá yoo ki bidzí;
bĕé belé sitúa ngé ki kɔ́bwat;
ve déá,
Nzamá ñí aa vé bɔ́ bidzí.
Mína míní ne ya eban ádaŋ anwann!
25 Nzá ye ébe mína a ne bera kɔgle éniŋ dzeñ áwola déá áyóp,
éfáŋ ñí kpoo nlém ábum?
26 “Édɔ é ne ná,
ngé míní sés bɔ édí é ne ededea avítsaŋ,
amú dzé milém myá kelebe mína ó yóp ya é mam mése mevɔ́ɔ́?
27 “Dággán ámvála mesamm má vém;
măá vyás,
măá séñ ki;
ve déá,
ma ma dzó mína ná,
atwaa Salomón ya é dúmá deñ áse,
ñí eé ndzí ki bwát ané asamm avɔ́ɔ́ ye été.
28 Édɔ é ne ná,
ngé Nzamá aa bwára elwá ye éyáŋŋ été néa,
édí é ne é mos wi,
ve ookírí bé wea fe dɔ á ndúán été,
ndagan mína,
é bot míní belé mbwínánn avítsaŋ!
29 “Édɔ é ne ná,
míní táa vuŋ ná dzé mína ye dzí,
ngé ki ná dzé mína ye ñú;
míní táa kele milém ó yóp.
30 Amú ná mam méte mése bot béye éniŋ bá dzéŋ mɔ milém mí kele bɔ́ ó yóp;
ve,
Ésúá wenan ñí aa yem ná mína yi byém bíte.
31 Dá daŋ ya mvéáñ ná míní dzéŋ édzwée ngɔ́mán Nzamá,
véa,
éñe bá ye mína kɔgle mam méte.
Enseñando Sobre Oración y Fe
Ánii akúmm á dzóp été
32 “O táa kɔ wɔŋŋ,
á mwann nseŋ mitómá;
amú ná Ésúá wenan aá yén mvéáñ ná á vé mína édzwée deñ.
33 Kuugán é byém míní belé,
váán fe biŋgóŋgɔ́ɔ́ bí bot.
Bɔgán mína bébyen mífák mí ne kaa áyombe,
ntam ó ne kaa ávée á dzóp été,
é vóm ndzídzíp ó sés kwíñ,
ngé ki ná sígbém dá dá ywíñ dzóm ntuk.
34 Amú ná,
é vóm ntam we ó ne,
ó véa éñe fe nlém we wá ó ne.
Átɔbɔ nkomann
35 “Tɔbɔgán mbwátán ya nkomann;
béláma benan bá béé yóŋ fe.
36 Mína bɔgán fe efonann ané é bot bá yana é mása weba,
á mfá ye ná éyɔŋ aa ye sɔ́ fét alúkgán,
niané aa sian,
a lwée fe,
bá bé kúu fe ñí etéññ te ébyen.
37 Mvɔmm ya aloá te,
édí é mása weba aa ye koan ya dɔ é tɔɔ́ evéveññ éyɔŋ aa ye sɔ́.
Bébélá,
ma dzó mína ná,
mása te aa ye tébe mbwátán ná aa belan dɔ,
á ŋga seŋ fe bidzí,
eé ke aa lot ébe kada mot.
38 Éde a ne bɔ ná,
ané aa sian énzénzaŋ alú,
ngé ki á nnóm kúp ósúá,
ngé aa koan ya bɔ́ néa,
mvɔmm ya bɔ́.
39 Ve,
yemŋán ná,
ngé myenn ndá á yem áwola ndzídzíp wá ye sian,
ngé ăá ye lík ná ndzídzíp te ó bwíñ ñí ndá.
40 Édɔ é ne ná,
tɔbɔgán nkomann,
amú ná é Mwán Mot aa ye sɔ́ áwola mínăá tém.”
Bebɔ biséññ memvála mé beáñ
41 Éde Pedro a ngá síli ñí ná:
“Á Ntí,
é nganán o mvá vé,
e ne ákála benzá?
Ye ákála dea,
ngé ki ákála bot bése?”
42 Ané Ntí a ngá yalan ná:
“Nzá a ne mbɔ biséññ aa túga baale ya nkée,
éñí é mása weñ aa lík ya bebɔ biséññ,
á mfá ye ná a vé bɔ́ ngap bidzí é tám dá yian?
43 Mvɔmm ya óloá é mása weñ aa ye koan ya wɔ́ weé bɔ amvála te éyɔŋ aa ye sɔ́.
44 Ma dzó mína ná,
bébélá,
aa ye wɔ́ átéle ná ó dzwée míbeŋ myeñ míse.
45 Ve,
ngé oloá te ó dzóo á nlém weñ été ná:
‘É mása wɔm ăá ye dzíga sian,’
ó tára ná wá ke wá yít bebɔ biséññ befám ya biningá,
ó tébe fe ná wá dzí,
ya áñú,
ya áfían;
46 é mása oloá te aa ye sɔ́ é mos wĕé mvá yana;
ya fe áwola wĕé mvá yem;
aa ye wɔ́ bíra ándágle,
aa ye fe wɔ́ átéle bábe bebɔ mebé.
47 “Óloá wá bɔ ná,
weé yem é dzam é mása weñ aa kómo,
ve wá kaa ákoman,
kaa ábɔ ané é mása weñ aa kómo,
wá ye ñɔŋ abwiññ eyíra.
48 Ve,
óloá wá bɔ é mam má yian ya eyíra,
éwɔ kaa dɔ áyem,
wá ye ñɔŋ eyíra avítsaŋ;
amú ná é mot áse aa ñɔŋ abwiññ,
éñe fe bá ye síli abwiññ;
éñí ñí a bé kee abwiññ,
bá ye fe ñí síli ededea abwiññ.
Metsamann énzénzaŋ bot ya bot
49 “Maá nzu bwaa ndúán á sí ó vá.
Ma kómo fe dzé ngé eé bwaaban yaá!
50 Me belé ná ma ñɔŋ nduann.
Dá lík fe ma eywiññ akekwíñ ané dá dzálában!
51 Ye mína tém ná maá nzu vé mvwaá á sí ó vá?
Móamó!
Ma dzó mína ná,
fáve metsamann.
52 Amú ná,
atéé ye áwola dí akekwíñ ósú,
bot bé tán béye á ndá bot fɔ́ɔ́ bá ye kaban,
bé léa bá ye ke bé beáñ á ngamm áyát;
bé beáñ bá bá ye ke bé léa á ngamm áyát.
53 Éséá aa ye tsaman bá mwán,
mwán ñí aa ye fe tsaman bá éséá;
ñiá aa ye tsaman bá ngwan dzeñ,
mwán miningá ñí aa ye fe tsaman bá ñiá;
nkiá aa ye tsaman bá mbɔ́m weñ,
mbɔ́m wá wá ye fe tsaman bá nkiá.”
Méndem má lére metám
54 Éde fe Yesus a ngá dzó nkuna bot ná:
“Éyɔŋ mína yén mikút myá sɔ́ é vóm nlódzóp wá dzím,
eyɔŋ te ébyen éde mína dzó ná:
‘Mveŋ da ye nɔ́ŋ.’
Éñe fe dzam te dá bɔban néa.
55 Éyɔŋ evúŋ ye nkyeññ dá dá lot fe,
éde mína dzó ná:
‘Ayóŋ dá ye bɔban.’
Éñe fe dzam te dá dá bɔban néa.
56 Á bot meduk!
Mína yem kelan éfonann dzóp ya édí sí ó vá,
amú dzé míní ne kaa áyem ákelan métám má?
Dzéŋŋe mvwaá ya nzínzíŋŋ we
57 “Amú dzé mína bébyen mínăá kík nsaŋ édí é ne nzósoó?
58 Éyɔŋ mína nzínzíŋŋ we mína ke ébe nkík misaŋ,
dzéŋŋe ná o kom ya ñí á nzenn,
á mfá ye ná a nzá ke aa dulu wa ébe ású nkík misaŋ,
eyɔŋ te nkík misaŋ ñí a kee wa ébe mwann benzima,
mwann benzima ñí a dum wa á mbok.
59 Ma dzó wa bébélá ná,
wăá ye kólo ó véa,
akekwíñ ané wa yáán é furá e ne ó ngerga.”