Yesus aa lére ámvála bá yian yaglan
11
A ngá bɔ ná,
Yesus a ngá yaglan vóm enziŋ,
niané a ngá mana yaglan,
éde nyága enziŋ ye áabeñ a ngá dzó ñí ná:
“Á Ntí,
léregé bía ámvála bá yaglan,
amvála ané Juan ñí a ngá lére béyága beñ.”
2 Ané Yesus a ngá dzó bɔ́ ná:
“Éyɔŋ mína yaglan,
dzógán ná:
‘Á Tará [wea á ne á dzóp été],
éyola dwe é tɔbɔgé eki ádaŋ biyola bíse.
Édzwée ngɔ́mán dwe é nzaá.
[Nkómánn we ó bɔɔ́ge á sí,
ámvála wá bɔban fe á dzóp.]
3 Vá bía bídzí bíye kada mos.
4 Dzwiigé bía ya mísémm myea,
amú ná bía bía dzwii fe ébá bésesé bá bɔ bía abé.
O táa ki bía téle mébóblé été,
[fáve ná,
korogé bía ébe mbéa mot].’ ”
El Padre Nuestro
5 Ané a ngá bera bɔ́ dzó ná:
“Nzá ye ébe mína a ne belé mvwíññ,
a kéñ ébe éñe énzénzaŋ alú,
a dzóo fe ñí ná:
‘Á mwíi,
kólogé ma mifémm mí léa,
6 amú ná mvwíññ dzam da sɔ́ ékena,
ma mĕé belé é dzóm me ne ñí vé ná á dzí.’
7 Ané é mot a ne á ndá été ñí aa yalan ya ñí,
a dzóo ñí ná:
‘O táa ma bɔ sɔ́m,
mbéñ ó dzip yaá,
bíabe bwán bí mbóo yaá ósí;
me sés fe bera tébe ná me vé wa myɔ?’
8 Ma dzó mína ná ngé ăá ye tébe ná á vé ñí myɔ ámvála a ne ñí mvwíññ,
ve aa ye tébe ná á vé ñí ásesé aa kómo,
amú ye ná aa yémle ya ñí.
9 Éde ma dzó mína ná:
Dzaagán,
bá ye mína vé;
dzéŋŋán,
mína ye yén;
kutgán mbéñ,
bá ye mína wɔ́ ákúu.
10 Amú ná éñí áse aa dzaa,
aa ñɔŋ;
éñí aa dzéŋ,
aa yén;
éñí ñí aa kut mbéñ,
ñí a bá ye fe wɔ́ ákúu.
11 “Nzá ye ébe mína a ne bɔ ná,
a tɔɔ́ éséá bwán,
ngé é mwán weñ a dzaa ñí kwaás,
a lík ná á vé ñí dɔ,
eyɔŋ te a vé ñí ñó?
12 Ngé ki ná,
ngé a dzaa ñí akií kúp,
eyɔŋ te ñí aa vé ñí káráolere?
13 Ngé mína,
míní tɔɔ́ bembéa bé bot,
mína yem vé é bwán benan bembamba bé dás,
ndagan Éséá a ne á dzóp été,
aa ye vé é bot bá dzaa ñí Mfúfúp Nsísim!”
Yesus ya Beelzebú
14 Yesus a ngá tsílán ya mbéa nsísim,
éwɔ ó ngá lík mot ná á tɔbɔ mvúk;
éde a ngá bɔ ná,
niané mbéa nsísim te ó ngá kólo,
ané mvúmvúk ó ngá kɔ́bɔ;
éde nkuna bot ó ngá kám dɔ.
15 Ve,
bot benziŋ ó véa bé ngá dzó ná:
“aa vea bembéa misísim ya é nguu Beelzebú,
ndzwée a bembéa misísim.”
16 Ébá bevɔ́ɔ́ bá béé kyak ñí,
bé ŋga dzaa ñí ndem ye á dzóp.
17 Ve,
Yesus eé yem ásímánn deba,
éde a ngá dzó bɔ́ ná:
“Édzwée ése é ne nkapbann mengamm ya mengamm dá tsam;
é ndá e ne nkapbann mengamm ya mengamm da da ku fe.
18 Édɔ é ne ná,
ngé Sátan a ne mengamm ya mengamm,
édzwée deñ é ne tsíni ósú á yá?
Ma dzó dɔ amú mína dzó ná ma tsílán ya bembéa misísim ya é nguu Beelzebú.
19 Ngé ma ma tsílán ya bembéa misísim ya é nguu Beelzebú,
béyága benan bá bá tsílán ya myɔ ya é nguu nzá?
Ya amú dzam te,
ébɔ́ bá ye mína bɔ bekík misaŋ.
20 Ve,
ngé ma tsílán ya bembéa misísim ya é nguu Nzamá,
é ne ná édzwée ngɔ́mán Nzamá é sian yaá ébe mína.
21 “É tám ngunguú mot ó baga mengéá,
weé kálá é ndá dzeñ,
ákúmm deñ dá dá tɔbɔ fe mvwaá.
22 Ve,
niané é mot ñí aa daŋ ngunguú mot te ya nguu aa sɔ́,
a wún ñí,
a dut fe ñí méngéá a mvá tɔbɔ ya mɔ mebúnn,
a ñɔŋ ákúmm mot te,
á ŋga kap fe dɔ.
23 “Éñí bía ñí bí sés ngamm,
a ne ma é ngamm áyát;
éñí ñí ăá vwála ki ma kóán,
aa myean.
Nsísim mvin wá búlán
24 “Niané nsísim mvin wá kólo mot ó ñúu,
wá ke wá wulu mévóm mé ne mikɔ́t,
weé dzéŋ mvwéñánn awaabé;
niané wá bɔ kaa áyén awaabé,
éde wá dzó ná:
‘Ma ye búlán é ndá dzam me ngá kólo.’
25 Niané wá sian á ndá te,
ó koan e tɔɔ́ ya nkomann mvéáñ été.
26 Eyɔŋ te ó kéñ,
ó ñɔŋ fe mísísim mivɔ́ɔ́ zaŋgbéá myá daŋ ñí ya abé,
misísim míte mí ñíi,
mí tɔbɔ fe ó véa,
éde étɔɔ́ ye ásúgánn mot te dá ye daŋ ya abé álot ómvús.”
Mésán mé ne bébélá
27 É tám Yesus a ngá dzó mam méte,
éde miningá enziŋ ye á bot été ó véa a ngá bére kíŋŋ,
a dzóo ñí ná:
“Mvɔmm ya ábum é ngá byéñ wa,
ya fe mébéñ o ngá ñáŋ.”
28 Ve,
éde Yesus a ngá dzó ná:
“Mésán má daŋ mé ne ya é bot bá wók éfíá Nzamá,
bé baale fe dɔ.”
Bendecidos Son Aquellos que Escuchan y Obedecen
Bot bá dzaa ndem
29 Éde,
niané nkuna bot ó ngá mana dzéñ,
ané a ngá tára dzó ná:
“Bot béye métám má bé ne mikwát,
bá síli ndem,
ve băá ye yén ndem fé,
fáve éñí Jonás.
30 Ámvála Jonás á mbé ndem ébe bot béye á Nínive,
amvála te fe é mwán Mot aa ye bɔ ébe bot béye métám má.
31 Kéza miningá ye á Sabá da ye tébe á nkíkgán misaŋ bábe bot béye métám má,
aa ye bɔ́ kpoo;
amú ná a ngá sɔ́ ó suga sí,
ná aa nzu wók é kén Salomón,
ve yénŋán ná éñí a ne nnén álot Salomón a ne ó vá.
32 Bot béye á Nínive bá ye tébe á nkíkgán misaŋ bábe bot béye métám má,
bá ye kpoo é bot bá,
amú ná niané Jonás a ngá kat bɔ́ fwéñ,
ané bé ngá dzoban;
ve,
yénŋán ná éñí a ne nnén álot Jonás a ne ó vá.
Láma ye ó ñúu
33 “Mot enziŋ ăá bwaa láma eyɔŋ te a nii ñí ásweññ,
ngé ki éwála ásí,
ve aa téle ñí ó yóp á mfá ye ná é bot bá ñíi bé yén eyéá.
34 É mís mwe émɔ mé ne láma ye é ñúu dwe;
éyɔŋ é mís mwe mé ne mvéáñ,
é ñúu áse dwe da e ne fe ndzálánn ya eyéá;
ve,
éyɔŋ é ne ekúkwát,
é ñúu dwe da da ye fe tɔbɔ ó dzíbi ósí.
35 Édɔ é ne ná,
tɔbɔgé ya nkée ná éyéá é ne ébe wa é nza bɔ dzíbi.
36 Édɔ é ne ná,
ngé é ñúu dwe áse e ne ndzálánn ya eyéá,
kaa ná é belé dzíbi vóm enziŋ,
eyɔŋ te da ye tɔbɔ éyéá été ásesé,
amvála ané éyɔŋ láma aa lére wa ya éyéá deñ.”
Yesus aa sɔ́mán Befariseo bábe Beyágale nkɔɔ́ métsiŋŋ
37 Niané Yesus a ngá mana kɔ́bɔ,
ané fariseo enziŋ a ngá dzaa ñí ná á ke dzí bá ñí;
éde,
niané Yesus a ngá ñíi á ndá,
ané a ngá ke tɔbɔ ó téble.
38 Éde fariseo te a ngá yágán niané a ngá yén Yesus aa dzí kaa átára sop mó.
39 Ané Ntí a ngá dzó ñí ná:
“Mína,
befariseo,
mína sop bilas ya bifela átán,
ve été a tɔɔ́ ndzálánn ya odurá,
ya bikúkwát bí mam.
40 Á mekút mé bot!
Éñí a ngá bɔ átán se éñí fe a ngá bɔ été ngeá?
41 Ve déá,
váán ntólo ye é dzóm é ne mína été,
éde véa,
ásesé aa ye tɔbɔ mfúbánn ébe mína.
42 “Ve,
ngwáa mína,
befariseo!
Amú ná mína vé Nzamá mesep,
ndóŋŋ ya fe bilwá bí súp bíse ngap awóm,
míníí sáale nsaŋ ya édziŋŋ Nzamá,
a tɔɔ́ ná é mam má émɔ mína yian bɔ;
ve,
kaa ki ádzáma ná mína bɔ émá mevɔ́ɔ́.
43 “Ngwáa mína,
befariseo!
Mína,
mína dziŋ mína tɔbɔ bítɔɔ́ bíye ósú bésinagoga été,
ya fe ná bé ke bá sómo mína mibóló míseŋ minén été.
44 “Ngwáa mína,
[beyágale métsiŋŋ ya befariseo,
bot méduk],
amú ná míní ne ané mésɔŋ mé ne kaa áyéne,
é bot bá bá lot mɔ áyóp băá yem dɔ!”
45 Éde nyem metsiŋŋ enziŋ a ngá yalan ya Yesus ná:
“Á Nyágale,
é tám wa kɔ́bɔ é mam má,
bía wa kɔ́bɔ fe abé.”
46 Ané Yesus a ngá dzó ná:
“Ya fe mína,
ngwáa mína,
beyem metsiŋŋ!
Amú ná mína dea bot míbaga bé sés nzomo,
ve mína bébyen míní sés ki nama mibaga míte ya ánuú denan.”
47 “Ngwáa mína,
amú ná mína lóŋ mésɔŋ bekúlu medzó,
ébá bímvámvámm byenan bí ngá ywíñ!
48 Ya amú dzam te,
míní ne bengañiá,
mína yébe fe é mam bímvámvámm byenan bí ngá bɔ,
amú ná,
bébélá,
ébɔ́ bé ngá ywíñ bekúlu medzó béte.
Ve,
mína téle bekúlu medzó béte mekwá mésɔŋ áyóp.
49 “Amú dzam te,
é kén Nzamá é ngá dzó ná:
‘Ma ye bɔ́ lóm bekúlu medzó ya baapostol;
bá ye ywíñ bevɔ́ɔ́,
bá ye fe dzéŋ ébá bevɔ́ɔ́ ásí.’
50 Ya amú áse te,
bá ye síli bot béye métám má mékií bekúlu medzó bése mé ngá swii ósí,
atéé ye métáraga mé eniŋ;
51 atéé ye mékií Abel akekwíñ émá Zakarías,
éñí bé ngá ywíñ énzénzaŋ altar metúnŋa ya templo.
Bébélá,
ma dzó mína ná bá ye síli bot béye métám má mekií méte.
52 “Ngwáa mína,
beyem metsiŋŋ!
Amú ná míní dzip yaá nzenn ye á nyemann;
mína bébyen míníí ndzí ñíi,
é bot bá bé ngá kómo ñíi bá míní dzip yaá fe dɔ.”