Yesus aa lóm beyága awóm ya bé beáñ
9
Niané a ngá kóán béyága awóm ya bé beáñ,
éde a ngá vé bɔ́ nguu ya edzwée ébe bembéa misísim memvála mése,
ya fe ná bé séñ akwann.
2 A ngá lóm bɔ́ ná bé ke bá kat fwéñ ye édzwée ngɔ́mán Nzamá,
bé ke fe bá séñ mikúkwann.
3 Ané a ngá dzó bɔ́ ná:
“Míní táa ke ya dzóm é nzenn mína ke,
kaa ntúmm,
ngé mfák,
ngé bidzí,
ngé moann,
kaa ki áke ya tsén bitóp.
4 É ndá áse mína ye ñíi,
tɔbɔgán dɔ akekwíñ ané mína ye kólo ó véa.
5 É vóm áse bá ye mína bɔ kaa áñɔŋ,
kólogán á kísoan te,
sasgán fe mbúlgé ye mébɔ menan,
dzam te dá ye bɔ́ bwaale.”
6 Éde bé ngá ke bá ke ó meá ya meá,
béé kat mbamba fwéñ béé séñ fe akwann mevóm mése.
Erodes aa síli
7 Niané nkúkúmá Erodes ó ngá wók é mam mése mé ngá bɔban,
ñí kaa áyem é dzam dá lot,
amú ná bot benziŋ bé ngá dzó ná Juan a wómo yaá miwúán été.
8 Ébá bevɔ́ɔ́ bá ná Elías a nzu yaá yéne;
ébá bevɔ́ɔ́ bá ná nkúlu medzó enziŋ ye ókuá á wómo yaá.
9 Éde Erodes a ngá síli ná:
“Ma maá kík Juan kíŋŋ,
nzá fe ñí bá kɔ́bɔ ya ñí é mam ma wók má?”
Éde Erodes a ngá dzéŋ ná á yén mot te.
Yesus aa vé bot binzuk bí tán (5,000) bidzí
10 Niané baapostol bé ngá búlán,
éde bé ngá kat Yesus é mam mése bé ngá bɔ.
Ané a ngá ñɔŋ bɔ́ etámm,
a kéñ ya bɔ́ évwíñ,
é kísoan bá lwée ná Betsaida.
11 Ve,
niané abwiññ bot é ngá yem dɔ,
éde bé ngá bee ñí ó wéñ;
ané Yesus ñí a ngá ñɔŋ bɔ́,
á ŋga kɔ́bɔ ya bɔ́ mam méye édzwée ngɔ́mán Nzamá,
eé séñ fe ébá bé ngá yi mvwaá.
12 Niané ŋgɔgɔ́ e ngá tára ná da ke,
éde baapostol bé ngá yit ébe Yesus,
béé dzó ñí ná:
“Yáágán ya ábwiññ bot dí ná bé ke bá ke á meá ya mífínn mí ne bebeñ ó vá,
ná bé dzéŋ bidzoók ya bidzí,
amú ná ó vá,
bí ne á nkáyáŋŋ été.”
13 Ané Yesus a ngá dzó bɔ́ ná:
“Váán bɔ́ bidzí.”
Éde bé ngá dzó ná:
“Bí belé fáve mifémm mí tán ya kwaás é beáñ,
ngamm ve bí ke kus é bot bése bá bidzí.”
14 Befám bé mbé ó véa ané táŋ binzuk bí tán (5,000).
Éde Yesus a ngá dzó béyága beñ ná:
“Bɔgán bɔ́ ná bé ke bá tɔbɔ mengós,
kada angós bot táŋ ané mewóm mé tán.”
15 Éde beyága bé ngá bɔ amvála te,
bé bɔ ná bot bése bé mana tɔbɔ ósí.
16 Niané Yesus a ngá ñɔŋ mifémm mí tán ya kwaás é beáñ te,
éde a ngá bére mís ó yóp,
a vé abwará ya byém bíte,
éde a ngá kap byɔ,
a kee fe byɔ béyága beñ á mfá ye ná bé ke bá vé byɔ bot béte.
17 Ané bot bése bé ngá dzí,
bé mana fe dzéñ;
éde bé ngá wólo ábímm é ngá buk,
ané é ngá kwíñ awóm mikpéñ ya mí beáñ.
Jesús Alimenta a 5,000
Pedro aa lére ná Yesus éñe a ne Kristo
18 A ngá bɔ ná,
mos enziŋ Yesus a ngá yaglan etámm,
béyága beñ bá bé mbé fe bábe bɔ́,
éde a ngá síli bɔ́ ná:
“Bot bá dzó ná me ne nzá?”
19 Ané bé ngá yalan ná:
“Bot benziŋ bá dzó ná o ne Juan Ndubot;
ébá bevɔ́ɔ́ bá ná Elías;
ébá bevɔ́ɔ́ bá bá dzó ná o ne nkúlu medzó enziŋ ye ókuá,
ná á wómo yaá.”
20 Ve,
a ngá dzó bɔ́ ná:
“Mína,
mína dzó ná me ne nzá?”
Ané Pedro a ngá yalan ná:
“O ne é Kristo Nzamá.”
Yesus aa kɔ́bɔ mfá áwú deñ
21 Ve,
Yesus a ngá mánan bɔ́ ná bé táa dɔ dzó mot enziŋ.
22 Éde fe a ngá dzó bɔ́ ná:
“Dá yian ná é Mwán Mot á dzuk abwiññ,
ya ná mikúkúmá ya betébosú befára ya fe beyágale métsiŋŋ bé tep ñí.
Bá ye ñí ywíñ,
ve aa ye wómo álú léa.”
Pedro Declara a Jesús como Cristo
23 Éde a ngá dzó bésesé ná:
“Ngé mot enziŋ aa kómo ma bee á tepge émyen,
á baggé é krús deñ kada mos,
a bee fe ma.
24 Amú ná,
éñí áse aa kómo koro éniŋ dzeñ,
aa ye dɔ dzímle;
ve,
éñí áse aa dzímle éniŋ dzeñ amú ma,
aa ye dɔ koro.
25 Amú ná,
dá ye vwála mot á yá,
ngé a mana wún eniŋ ngúrá,
ve a dzímle,
a tsam ki émyen?
26 Amú ná éñí aa wók ma osoán ya bífíá byam,
é Mwán Mot ñí aa ye fe ñí wók osoán éyɔŋ aa ye sɔ́ é dúmá deñ été,
ya édí Éséá,
ya édí mífúfúp mí baángel.
27 Ve,
bébélá ma dzó mína ná bot benziŋ bé ne ó vá ná băá ye wú kaa ná bé tára yén édzwée ngɔ́mán Nzamá.”
É ñúu Yesus da tsén
28 A ngá bɔ ná,
niané a ngá mana kɔ́bɔ bifíá bíte,
é ntɔɔ́ ané melú mmom,
éde Yesus a ngá ñɔŋ Pedro bá Juan ya Jakobo,
ané bé ngá ke á nkoó óyóp,
ná aa ke yaglan.
29 É tám a ngá yaglan,
éde ású deñ é ngá tsén,
ané bítóp byeñ bí ngá veŋan mifúm,
bí ŋga bíra fe feañ.
30 Éde,
véa,
bot bé beáñ bé ngá kɔ́bɔ ya ñí;
a mbé Moisés bá Elías,
31 bé ngá yéne á dúmá été,
béé kɔ́bɔ fe mam méye méke Yesus mé mbé ná mé nkún dzálában á Yerusalen.
32 Pedro ya é bot bábe bɔ́ bé mbé,
óyó ó mbé bɔ́ abwiññ ó mís,
ve niané bé ngá túga mana vee,
éde bé ngá yén é dúmá Yesus;
bé ngá yén fe é bot bé beáñ bábe Yesus bé mbé.
33 É tám bot béte bé ngá kánan ya Yesus,
éde Pedro a ngá dzó Yesus ná:
“Á Ndzwée,
é ne mvéáñ ná bí tɔbɔ ó vá,
bí lóŋ fe bíbemm bí léa;
wa evɔ́ɔ́,
Moisés evɔ́ɔ́,
Elías ñí a fe evɔ́ɔ́.”
Pedro ĕé ngá yem é dzam a ngá kɔ́bɔ.
34 Ákoan ná a ngén aa kɔ́bɔ dɔ,
éde nkút ó ngá mana bɔ́ nzu boman,
ané bé ngá kɔ wɔŋŋ,
niané bé ngá ñíi a nkút été.
35 Éde kíŋŋ e ngá sɔ́ á nkút été deé dzó ná:
“Éñí éñe a ne é Mwán wɔm,
Ntɔ́pbán wɔm,
éñe béágán.”
36 Niané kíŋŋ e ngá mana kɔ́bɔ,
éde bé ngá koan ya Yesus á ntéle etámm,
ané bé ngá ku bivóó;
ve,
beyága bé ngá baale dɔ ásweññ,
bá kaa dɔ ákat mot enziŋ melú méte.
La Transfiguración
Yesus aa séñ é mwán a mbé a belé nsísim mvin
37 É mos ó ngá belan véa,
niané bé ngá sɔ́ á nkoó óyóp,
éde ededea abwiññ bot é ngá nzu koan ya Yesus.
38 Éde mot enziŋ ye á bot été ó véa a ngá yónán,
eé dzó ná:
“Á Nyágale,
ma dzaa wa engóngɔ́ɔ́ ná o yén é mwán mbɔ́ɔ́ ya mbɔ́ɔ́ wɔm;
39 nsísim ó wóla ñí biñ;
éyɔŋ wá sɔ́,
wá bɔ ñí ná á yón,
wá suk ñí ededea nguu,
wá bɔ fe ñí ná á kúlu avúu;
wá dzugu ñí,
ó ne fe ndzuúk ná ó kólo ébe éñe.
40 Me dzaa yaá béyága bwe engóngɔ́ɔ́ ná bé tsílán ya wɔ́;
ve,
béé ndzí wɔ́ kɔk.”
41 Éde Yesus a ngá yalan,
a dzóo ná:
“Á myee bot ó ne kaa ábwíni,
ó tɔɔ́ fe ekúkwát!
Ma yian tɔbɔ bíabe mína,
meé nzomo fe mína akekwíñ tám fé?
Nzaá ya é mwán we óná.”
42 É tám mwán a ngá yit ébe Yesus,
ané mbéa nsísim ó ngá kpoo ñí ósí,
ó ŋga suk ñí nguu;
ve,
éde Yesus a ngá mánan nsísim mvin te,
ané a ngá séñ mwán te,
éde fe a ngá búlán ñí éséá weñ.
43 Éde bot bése bé ngá ku avoó ya ábímm nnén Nzamá a ne.
Jesús sana a un muchacho del espíritu del mal
Yesus aa kɔ́bɔ mfá awú deñ éyɔŋ beáñ
É tám bot bé mbé bé voó néa ya é mam mése Yesus a ngá bɔ,
éde a ngá dzó béyága beñ ná:
44 “Bɔgán ná bífíá bí bí túga mína ñíi melɔ́:
bé nkún kee é Mwán Mot é mó bot été.”
45 Ve,
béé ndzí yem é dzam a ngá dzó bɔ́.
Dzam te é mbé bɔ́ nswalann,
á mfá ye ná bé nza dɔ yem;
bé ngá kɔ fe wɔŋŋ ná bé síli ñí dɔ.
Nzá aa daŋ ya eban?
46 Éde beyága bé ngá tára ná bá bɔ mikéá bébyen ya bébyen ná:
nzá aa daŋ ya eban.
47 Éde Yesus,
eé yem ásímánn é mbé bɔ́ mílém myeba été,
ané a ngá ñɔŋ omómɔ́ŋŋ,
a téle wɔ́ ákann,
48 éde a ngá dzó bɔ́ ná:
“É mot áse aa ñɔŋ é mwán ñí ya éyola dam,
má aa ñɔŋ ñíi;
é mot ñí aa ñɔŋ ma,
a ñɔŋ yaá fe éñí a ngá lóm ma.
Amú ná éñí aa daŋ ya avítsaŋ énzénzaŋ denan mína bésesé été,
mot te éñe aa daŋ ya eban.”
Nzá a ne é ngamm dzeá?
49 Éde Juan a ngá ñɔŋ efíá,
a dzóo ná:
“Á Ndzwée,
bí yén mot enziŋ eé tsílán ya bembéa misísim ya éyola dwe;
éde bí kili ñí dɔ;
amú ná ăá wulu bíabe bɔ́.”
50 Éde Yesus a ngá dzó ná:
“Míní táa ñí dɔ kili,
amú ná é mot a sés bía á ngamm áyát,
a ne é ngamm dzeá.”
Yesus aa báma Jakobo bá Juan
51 Éde a ngá bɔ ná,
niané é tám Yesus a ngá yian búlán á dzóp e ngá kwíñ,
ané a ngá bán ná á ŋga ke yaá á Yerusalen.
52 Éde Yesus a ngá lóm bekat fwéñ ósú weñ,
ané bé ngá ke dzeá enziŋ ye á Samaria,
ná bé ke ñí bɔ nkomann.
53 Ve,
bot béye á Samaria béé ndzí ñí ñɔŋ,
amú bá yem ná Yesus aa ke á Yerusalen.
54 Niané beyága bé ngá yén dɔ,
éde Jakobo bá Juan bé ngá dzó ná:
“Á Ntí,
ye wa kómo ná bí lwée ndúán ná eé sigi á dzóp,
[ámvála Elías a ngá bɔ,]
eé mana bɔ́ ywíñ?”
55 Ve,
éde Yesus a ngá veŋan ébe bɔ́,
ané a ngá báma bɔ́,
[eé dzó ná,
“Mínăá yem ámvála nsísim é ne ébe mína.
56 Éde véa é Mwán Mot eé ndzí sɔ́ ná a nzu tsam eniŋ bwann bé bot,
fáve ná aa koro dɔ.”]
Éde bé ngá ke dzeá afé.
É bot bé ngá kómo bee Yesus
57 É tám bé ngá ke á nzenn,
éde mot enziŋ a ngá dzó Yesus ná:
“Ma ye wa bee é vóm áse wa ye ke.”
58 Ané Yesus a ngá dzó ñí ná:
“Mvaá é belé bidzoók,
anwann ye á dzóp dá é belé fe mumá;
ve,
é Mwán Mot ĕé belé é vóm a ne bwíi nló.”
59 Éde a ngá dzó é mot mbɔ́ɔ́ ná:
“Beegé ma.”
Ve,
mot te ñí a ngá dzó ñí ná:
“Líkge ma ná me tára ke ádzep tará.”
60 Éde Yesus a ngá dzó ñí ná:
“Líkge ná bewú bé dzep béwú bevɔ́ɔ́;
ve,
wa,
kéŋ wa kat fwéñ ye édzwée ngɔ́mán Nzamá.”
61 Éde fe mot mfé ñí a ngá dzó Yesus ná:
“Á Ntí,
ma ye wa bee,
ve líkge ma ná meé tára ke yáán ya bot béye é ndá dzam.”
62 Ve,
Yesus a ngá dzó ñí ná:
“É mot a biñ yaá efebga ó mó,
a bera dága ómvús,
mot te a sés ya eban édzwée ngɔ́mán Nzamá.”