Yesus aa séñ óloá kaba ye Á Roma
7
Niané Yesus a ngá mana kɔ́bɔ ya bot bifíá bíte bíse,
ané a ngá ñíi á kísoan Kapernaúm.
2 Véa,
kaba ye á Roma a mbé a belé oloá,
eé vé wɔ ngaŋŋ,
ó tɔɔ́ nkúkwann ná ó nkún wú.
3 Niané kaba te a ngá wók bot bá kɔ́bɔ mfá Yesus,
éde a ngá lóm mikúkúmá bejudio minziŋ ná mí ke dzaa Yesus ná á nzu séñ óloá weñ te.
4 Éde bé ngá ke ébe Yesus,
ané bé ngá bíra fe ñí dzaa,
béé dzó ná:
“Aa yian ná,
o vwála ñí dzam te;
5 amú ná aa dziŋ áyɔŋ dea,
a lóŋ yaá fe bía sinagoga.”
6 Éde Yesus a ngá ke bábe bɔ́.
Ve,
niané bé ngá kwíñ bebeñ á ndá,
ané kaba te a ngá lóm bemvwíññ béñ ná bé ke dzó Yesus ná:
“Á Ntí,
kaa áfáŋ áwú ndzuúk,
măá yian dɔ,
ná o ñíi ma á ndá;
7 ya amú dzam te édɔ mámyen ma meé ndzí ki ñɔŋ ná ma yian nzu ébe wa;
ve,
dzóge efíá,
eyɔŋ te mbɔ biséññ wɔm aa ye tɔbɔ mvwaá.
8 Amú ná ma me ne fe mot,
me tɔɔ́ édzwée ásí;
me belé fe bénzima ma ma mánan.
Niané ma dzó éñí ná:
‘Kéŋ’,
a kéñ.
Me dzóo éñí mbɔ́ɔ́ ná:
‘Nzaá’,
a sɔ́.
Niané ma dzó óloá wɔm ná:
‘Bɔɔ́ge é dzam dí’,
ó bɔ fe dɔ.”
9 Niané Yesus a ngá wók dzam te,
ané a ngá ku avoó amú mot te;
éde fe a ngá veŋan ébe ábwiññ bot é ngá bee ñí,
a dzóo bɔ́ ná:
“Ma dzó mína ná atwaa Israel ñí măá bé ki koan ya ábímm mora mbwínánn dí.”
10 Niané é bot kaba a ngá mánan bé ngá búlán á ndá,
éde bé ngá koan ya oloá te ó ntɔɔ́ mvwaá.
Yesus aa wómo é mwán nkús miningá
11 É tám e ngá belan véa,
ané Yesus a ngá ke bábe béyága beñ,
ya abwiññ bot afé,
é kísoan bá lwée ná Naín.
12 Niané a ngá kwíñ bebeñ á mbéñ kísoan,
ané a ngá yén bá ke dzep mbim,
ná ó mbé é mwán mbɔ́ɔ́ ya mbɔ́ɔ́ ñiá,
miningá te ñí a tɔɔ́ fe nkús.
Abwiññ bot béye á kísoan te dá é mbé fe bábe miningá te
13 Niané Yesus a ngá yén miningá te,
ané a ngá kpee ñí engóngɔ́ɔ́,
éde a ngá dzó ñí ná:
“Kaa ábera yi.”
14 Niané a ngá yit bebeñ,
ané a ngá nama ewála mbim,
éde é bot bé mbé bé baga ewála bé ngá sim;
éde Yesus a ngá dzó ná:
“Á ndómán é mot,
ma dzó wa ná:
Tébegé!”
15 Eyɔŋ te éde éñí a ngá wú a ngá búlán éniŋ,
éde fe a ngá tára ná aa kɔ́bɔ;
ané Yesus a ngá kee ñí é ñiá weñ.
16 Éde wɔŋŋ ó ngá biñ bot bése;
éde fe bé ngá vé Nzamá dúmá,
béé dzó ná:
“Mora nkúlu medzó á tébe yaá énzénzaŋ dea été.”
Bé ngá dzó fe ná:
“Nzamá a nzu yaá áfép áyɔŋ deñ.”
17 Ané éwógá deñ é ngá mana ñeŋ á Judea ngúrá ya mébeŋŋ mé sí mése mé ne ñí méféŋŋ.
Juan el Bautista en Prisión
É bot Juan Ndubot a ngá lóm
18 Niané Juan Ndubot béyága beñ bé ngá kat ñí mefwéñ méye é mam mése má,
éde a ngá lwée bot bé beáñ béye béyága beñ;
19 ané a ngá lóm bɔ́ ébe Ntí,
ná bé síli ñí ná:
“Ye wa o ne éñí aa nzu,
ngé ná bía yian yana mfé?”
20 Niané bot béte bé ngá kwíñ ébe Yesus,
éde bé ngá dzó ñí ná:
“Juan Ndubot á lóm bía ébe wa ná bí síli wa ná:
‘Ye wa o ne éñí aa nzu,
ngé ná bía yian yana mfé?’ ”
21 Áwola te ébyen Yesus a ngá séñ ábwiññ bot é mbé é belé akwann,
mitéñ ya misísim mí abé,
a ngá kúu fe abwiññ midzíndzímm mís.
22 Éde Yesus a ngá yalan ya bɔ́ ná:
“Keŋán,
katgán fe Juan é mam míní yén ya émá míní wók:
midzíndzímm myá yén,
mibóbók myá wulu,
mizénzamm myá tɔbɔ mvwaá,
mindwándwá myá wók,
mibim myá wómo,
bá kat fe biŋgóŋgɔ́ɔ́ bí bot mbamba fwéñ.
23 Mvɔmm ya é mot aa ye bɔ kaa ádzímle mbwínánn weñ amú ma.”
24 Niané é bot Juan a ngá lóm bé ngá búlán,
éde Yesus a ngá tára ná aa kɔ́bɔ ya bot mfá Juan,
eé dzó ná:
“Dzé míní ngá ke yén éyáŋŋ été?
Ye ékoók dá sukban ya evúŋ?
25 Ngé se néa,
dzé míní ngá ke yén?
Ye é mot aa bwát bítóp bí ne táŋ ndén?
Yénŋán ná é bot bá bwát bítóp bí ne táŋ ndén,
bé belé fe abwiññ akúmm bot béte bé tɔɔ́ méndá bekéza.
26 Ve,
dzé míní ngá ke yén?
Ye nkúlu medzó enziŋ?
Bébélá,
ma dzó mína ná Juan Ndubot aa daŋ nkúlu medzó.
27 Juan te éñe mitsilann myá dzó ya ñí ná:
‘Ma lóm nkat fwéñ wɔm ósú we,
éñe aa ye kom é nzenn dwe ósú we.’
28 Ma dzó mína ná é bot bése bé byála yaá ébe biningá,
mot enziŋ a sés nnén ádaŋ Juan;
ve,
éñí aa daŋ ya avítsaŋ édzwée ngɔ́mán Nzamá été,
a ne nnén ádaŋ Juan te.”
29 Niané bot bése ya beñɔŋ mfóŋsí bé ngá wók bífíá Yesus,
ané bé ngá láŋ ná Nzamá a ne nzósoó,
amú ná Juan aá du bɔ́.
30 Ve,
befariseo ya beyem metsiŋŋ béé ndzí lík ná Juan á du bɔ́,
amvála te édɔ bé ngá tep é dzam Nzamá a ngá kómo bɔ ébe bɔ́.
31 Éde Ntí a ngá bera dzó ná:
“Dzé ma ye kanan ya dɔ ya bot béye á myee bot wi?
Bá fonan ya dzé?
32 Bá fonan ya é bɔ́ŋŋ bé tɔɔ́ á nseŋ onén,
bevɔ́ɔ́ bé yónán ébá bevɔ́ɔ́ ná:
‘Bí lɔ́ŋ yaá mína tɔ́ŋ,
mína kaa ádzém;
bí yee yaá mína byeá bí eywiññ,
mína kaa áyi.’
33 Amú ná Juan Ndubot a sɔ́ yaá,
éñe a ne kaa ádzí mfémm,
ngé áñú vino,
eyɔŋ te mína dzó ná:
‘A belé mbéa nsísim.’
34 É Mwán Mot ñí a sɔ́ yaá,
éñe aa dzí ya ñú,
eyɔŋ te mína ná:
‘Yénŋán,
éñí a ne ndzí bidzí ya ñú vino,
a ne fe é mvwíññ beñɔŋ mfóŋsí ya bebɔ misémm.’
35 Ve,
é bwán kén bése bá láŋ ná kén é ne nzósoó.”
Yesus a ne é ndá Fariseo Simón
36 Fariseo enziŋ a ngá bána Yesus ná á ke dzí é ndá dzeñ;
niané Yesus a ngá ñíi é ndá fariseo te,
ané a ngá ke ó téble ná aa dzí;
37 éde mbɔ misémm miningá enziŋ ye á kísoan ó véa,
niané a ngá wók ná Yesus aa dzí é ndá fariseo te,
ané a ngá sɔ́ ya afoná mbwánn enum.
38 Éde a ngá tébe á mvús mébɔ Yesus,
á ŋga yi,
ané a ngá tára ná aa bwala mébɔ Yesus ya é míige meñ,
eé fími fe mebɔ méte ya ésií deñ;
éde fe a ngá ñáŋ ñí mebɔ,
a wáa fe mɔ mbwánn.
39 Niané é fariseo a ngá bána Yesus a ngá yén dzam te,
éde a ngá tém ná:
“Ngé é mot ñí á bɔ nkúlu medzó,
ngé aa yem nzá ñí,
nzá amvála miningá ki dá nama ñí dí,
amú ná miningá te a ne mbɔ misémm.”
40 Éde Yesus a ngá dzó ñí ná:
“Á Simón,
me belé dzam ye ádzó wa.”
Ané fariseo ñí a ngá yalan ya ñí ná:
“Á Nyágale,
dzóge ma dɔ.”
41 Yesus ñí ná:
“Bot bé beáñ bé mbé bé belé mvé bikoó enziŋ moann.
Mbɔ́ɔ́ a mbé a belé ñí bedenario mitet mí tán;
éñí mbɔ́ɔ́ ñí a belé ñí mewóm mé tán;
42 ya amú ye ná bĕé mbé bé belé ámvála bé ne yáán ya ñí,
éde a ngá dzáma bé beáñ béte ya memvólá méte.
Éde nzá ye bé beáñ béte aa ye fá ñí daŋ ádziŋ?”
43 Ané Simón a ngá yalan ya ñí ná:
“Ma tém ná éñí mot te a ngá dzáma ya ñí ya mora mvólá.”
Éde Yesus a ngá dzó ñí ná:
“O kík yaá nsaŋ ó ne tételé.”
44 Ané Yesus a ngá veŋan ébe miningá te,
éde a ngá dzó Simón ná:
“Ye o téa é miningá ñí?
Me ñíi é ndá dzwe,
wa kaa ma ávé mendzímm ná me sop mébɔ mam,
ve é miningá ñí a bwala yaá ma mebɔ ya é míige meñ,
a fími yaá fe mɔ ya ésií deñ.
45 We ndzí ma ñáŋ vóm enziŋ,
ve avé meé ñíi ó vá é miningá ñí ăá bé dzáma ná aa ñáŋ ma mebɔ.
46 We ndzí ma wáa mbwánn nló,
ve ñí a wáa yaá ma mbwánn enum mébɔ.
47 Ya amú dzam te,
ma dzó wa ná ábwiññ mísémm deñ é ntɔɔ́ yaá ñí ndzámann,
amú ná á dziŋ abwiññ.
Ve,
é mot bá dzáma ya ñí ya avítsaŋ,
ñí aa dziŋ fe avítsaŋ.”
48 Éde Yesus a ngá dzó miningá te ná:
“Mísémm mwe mí ntɔɔ́ yaá ndzámann.”
49 Eyɔŋ te éde,
é bot bábe bɔ́ bé mbé ó téble bé ngá tára ná bá dzó mílém myeba été ná:
“Nzá ñí,
ná atwaa misémm myɔ aa dzáma fe?”
50 Ané Yesus a ngá dzó miningá te ná:
“Mbwínánn we ó koro yaá wa;
kéŋ mvwaá.”
Mujer Pecaminosa Perdonada