Bá ñɔŋ bidzí é mos Sátará
6
A ngá bɔ ná,
é mos Sátará,
Yesus a ngá lot méfúp été,
ané béyága beñ bé ngá tára ná bá téñ mebáma,
béé vea misɔ́ ya mó,
bé dzí fe myɔ.
2 Éde befariseo benziŋ bé ngá síli bɔ́ ná:
“Amú dzé mína bɔ é dzam atsiŋŋ dăá yébe é mos Sátará?”
3 Ané Yesus a ngá yalan ya bɔ́ ná:
“Ye ná mínăá bé láŋ é dzam David a ngá bɔ,
éyɔŋ éñe ya é bot béñ bé ngá wók nzeñ?
4 David a ngá ñíi é ndá Nzamá,
ané a ngá twáa mífémm mí ne ya ntélán mam áyát;
mífémm atsiŋŋ dăá yébe ná mot mfé aa dzí,
fáve befára.
Ané David a ngá dzí mifémm míte,
a vé fe myɔ é bot bábe bɔ́ bé mbé.”
5 Éde Yesus a ngá bera kɔgle ná:
“É Mwán Mot éñe aa dzwée Sátará.”
É mot a mbé a belé nkát enam
6 Éde a ngá bɔ ná,
Sátará mfé,
niané Yesus a ngá ñíi á sinagoga,
ané a ngá tára ná aa yágale.
Mot enziŋ ñí a mbé ó véa,
énam méyóm é tɔɔ́ ñí nkát;
7 éde befariseo bábe beyágale métsiŋŋ bé ngá mɔ́mɔ Yesus,
ná bá kómo yén ngé aa ye séñ mot te;
amú ná bé ngá dzéŋ étɔm bé ne sɔ́mán ya dɔ Yesus.
8 Ve,
Yesus a ngá yem ásímánn deba;
ané a ngá dzó é mot á mbé a belé nkát enam ná:
“Tébegé,
nzaá fe ébe ású bot bése.”
Ané mot te a ngá kólo ósí,
a kéñ tébe ó véa.
9 Éde Yesus a ngá dzó bɔ́ ná:
“Ye ábɔ abé,
ye ábɔ mbeŋ,
ye ákoro eniŋ mwann mot,
ye átsam dɔ,
ma síli mína ná,
atsiŋŋ dá yébe ná bé bɔ dzé é mos Sátará?”
10 Véa,
éde a ngá dága é bot bése bé mbé méféŋŋ,
ané a ngá dzó mot te ná:
“Sámŋe énam dwe.”
Éde mot te a ngá bɔ dɔ néa,
ané enam é ngá lígi ñí mvwaá.
11 Éde bé ngá tɔbɔ ndzálánn ya meyéá,
éde fe bé ngá tára ná bá kɔ́bɔ bébyen ya bébyen ná nzá dzam bé ne bɔ Yesus.
Yesus aa tɔ́p baapostol awóm ya bé beáñ
12 Melú méte,
éde Yesus a ngá ke yaglan á nkoó;
a ngá lot ngúrá ntéññ alú eé yaglan ya Nzamá.
13 Niané mos ó ngá kwíñ,
éde Yesus a ngá lwée béyága beñ,
ané a ngá tɔ́p été awóm ya bé beáñ,
éde fe a ngá yo bɔ́ ná baapostol.
14 Bíyola byeba ébyɔ bí:
Simón,
éñí Yesus a ngá yo fe ná Pedro;
Andrés,
éñe á mbé Simón mwanñaŋ;
Jakobo,
Juan,
Felipe,
Bartolomé,
15 Mateo,
Tomás,
Jakobo,
é mwán Alfeo;
Simón,
éñí bé ngá lwée fe ná Zelote;
16 Judas,
é mwán Jakobo,
ya Judas Iskariote,
éñí a ngá súgan kuan Yesus.
Discípulos Elegidos
Yesus aa yágale abwiññ bot
17 Éde Yesus a ngá sigi nkoó bábe bɔ́,
ané a ngá sim vóm enziŋ ó tɔɔ́ ndzakse;
béyága beñ bé mbé abwiññ ó véa,
ya abwiññ bot afé.
Bot béte bé ngá sɔ́ á Judea áse,
á Yerusalen,
ya fe á misá mí máŋ míye á Tiro ya Sidón.
18 Bé ngá nzu ñí áwók,
ya áséñban fe ákwann deba.
É bot bé ngá dzuk ya misísim mí mvin bé ngá tɔbɔ mvwaá.
19 Éde mot áse a ngá dzéŋ ná á nama Yesus,
amú ná nguu e ngá sɔ́ ébe éñe,
nguu te édɔ e ngá séñ bot bése.
Mvɔmm ya bengwáa
20 Ané Yesus a ngá sám mís ébe béyága beñ,
a dzóo bɔ́ ná:
“Mvɔmm ya mína biŋgóŋgɔ́ɔ́ bí bot,
amú ná mína míní ne ya édzwée ngɔ́mán Nzamá.”
21 “Mvɔmm ya mína,
mína é bot mína wók nzeñ áwola dí,
amú ná mína ye tɔbɔ ndzálánn.”
“Mvɔmm ya mína,
mína é bot mína yi,
amú ná mína ye weñ.”
22 “Mvɔmm ya mína,
éyɔŋ bot bá ye mína víni,
éyɔŋ bá ye kánan ya mína amvála etámm,
ya kɔ́bɔ mína abé,
ya éyɔŋ bá ye fe ñɔŋ éyola denan ané dzimm,
amú é Mwán Mot.
23 Sánŋán mos te,
yóogán fe ya mesán amú ná é máán menan mé ne menén á dzóp;
amú ná amvála te édɔ fe bímvámvámm byeba bí ngá bɔ ya bekúlu medzó.”
24 “Ve,
ngwáa mína,
mikúkúmm!
Amú ná mílém myenan mí mana yaá tɔbɔ mfoŋann.”
25 “Ngwáa mína,
mína é bot míní ne ndzálánn áwola dí!
Amú ná mína ye wók nzeñ.”
“Ngwáa mína,
mína é bot mína weñ áwola dí!
Amú ná mína ye tɔbɔ ya meyep,
mína ye fe yi.”
26 “Ngwáa mína,
éyɔŋ bot bése bá kɔ́bɔ ya mína mvéáñ!
Amú ná amvála te édɔ fe bímvámvámm byeba bí ngá bɔ ya minéneá bekúlu medzó.”
Las Bienaventuranzas
Ádziŋ minzínzíŋŋ
27 “Ve,
mína é bot mína wók ma,
ma dzó mína ná:
Dziŋŋán mínzínzíŋŋ myenan;
é bot bá víni mína,
bɔgán fe bɔ́ mbeŋ,
28 ébá bá boŋ mína,
váán bɔ́ abwará;
yaglánán amú é bot bá ndágle mína.
29 Ngé mot a bími wa ámáŋŋ,
léregé fe ñí ámáŋŋ avɔ́ɔ́;
ngé mot a dut wa ekót,
o táa ki kam ya ñí elíŋŋá.
30 Vá é mot áse aa dzaa wa;
ngé mot a dut wa é dzóm é ne éedwe,
o táa ñí dɔ síli.
31 Bɔgán ya é bot bevɔ́ɔ́ ámvála mína kómo ná bá bé bɔ fe ya mína.”
32 “Ngé mína dziŋ é bot bá bá dziŋ fe mína,
nzá akíba mína ye ñɔŋ?
Amú ná amvála te édɔ fe bebɔ misémm bá bá bɔ.
33 Ngé mína bɔ mbeŋ é bot bá bá bɔ fe mína mbeŋ,
nzá akíba mína ye ñɔŋ?
Amú ná amvála te édɔ fe bebɔ misémm bá bá bɔ.
34 Ngé mína koo bot amú ye ná mína yana ná bá ye mína búlu,
nzá akíba mína ye ñɔŋ?
Bebɔ misémm bá bá koan fe bébyen ya bébyen,
á mfá ye ná bé bera ñɔŋ abímm te.
35 Ve,
dziŋŋán mínzínzíŋŋ myenan,
bɔgán bɔ́ mbeŋ,
váán fe bɔ́ bikoó,
kaa ná mína yana dzóm enziŋ été.
Amvála te édɔ mína ye bɔ é bwán é Nzamá a ne oyaáp ó yóp,
néa fe é máán menan ma ye bɔ menén;
amú ná Nzamá a ne añep ya é bot bé ne kaa áláŋ mbeŋ,
a ne fe dɔ ya bebɔ abé.
36 Ámvála Éséá wenan a ne nlém engóngɔ́ɔ́,
amvála te fe mína bɔgán.”
Sermón en el Monte
Kaa kík é bot bevɔ́ɔ́ nsaŋ
37 “Míní táa kík nsaŋ,
bá bé nza fe mína kík nsaŋ;
míní táa vé meku,
bá bé nza fe mína vé meku.
Dzwiigán,
bá bá ye fe mína dzwii.
38 Váán,
bá bá ye fe mína vé.
Bá ye mína vé é mó menan été mbamba abímm;
é tɔɔ́ mfítán,
é tɔɔ́ nsiglann,
deé fwíige fe.
Amú ná ábímm mína vak,
abímm te édɔ fe bá bá ye mína vak.”
39 Éde fe Yesus a ngá vé bɔ́ é nganán ñí,
eé dzó ná:
“Ye ndzíndzímm ó ne wulu ya ndzíndzímm ovɔ́ɔ́?
Bé beáñ béte băá ye ku ébéññ,
ngeá?
40 Nyága enziŋ ăá daŋ nyágale weñ,
ve éyɔŋ a mana yaá kelan,
aa ye bɔ ané nyágale weñ.
41 “Amú dzé wa dága é ndúŋŋ e ne mwanñɔŋ á dzís,
ve wa kaa ábís nkwaá ó ne wámyen á dzís?
42 O ne dzó mwanñɔŋ á yá ná:
‘Mwadzaŋ,
líkge ná me vea wa é ndúŋŋ e ne wa á dzís’,
wa kaa ádága nkwaá ó ne wámyen á dzís?
Á mot meduk!
Táragé ávea nkwaá ó ne wámyen á dzís,
véa,
éñe wa ye yén mvéáñ,
á mfá ye ná o vea é ndúŋŋ e ne mwanñɔŋ á dzís.
Bá yem elé ya bíbumá byeñ
43 “Mbamba elé ăá wúm bembéa bibumá,
mbéa elé ñí ăá wúm ki bembamba bibumá.
44 Amú ná bá yem kada elé ya bíbumá byeñ:
Édɔ é ne ná,
băá fwát ebumá igera á míséé été,
ebumá ye á ndzík vino dá băá fwát ki ábwiñ.
45 Mbamba mot aa kɔ́bɔ bembamba bé mam,
amú ná mbeŋ ó ne ñí á nlém été;
mbéa mot ñí aa kɔ́bɔ fe bembéa bé mam,
amú ná abé é ne ñí á nlém été.
Amú ná é mam má buk mot á nlém été,
émɔ ánu deñ dá kɔ́bɔ.
Mibókga mí beáñ
46 “Amú dzé mína dzó ná ma ma dzwée mína ané Ntí,
mína kaa ábɔ é dzam ma dzó?
47 Ma ye mína kat é mot bá fonan ya ñí ébá bésesé bá nzu ébe ma,
bé wók bífíá byam,
bé bɔ fe édí ma dzó.
48 Bot béte bé ne ané é mot a ngá lóŋ ndá;
a ngá tára fá sí edwá á mfá ye ná á ve mbókga ndá ákwá áyóp.
Niané vóm te ó ngá bíra ñíŋ,
ané abwiññ nden é ngá yimi ndá te.
Ve,
nden te dĕé mbé kpoo ndá te ósí,
amú ná e mbé nlóŋán mvéáñ.
49 Ve,
ébá bésesé bá wók é mam ma dzó,
kaa mɔ ábɔ,
bot béte bá fonan ané é mot a ngá lóŋ ndá ósí kaa mbókga.
Niané nden e ngá yimi ndá te,
éde ndá e ngá ku ósí,
ané é ngá mana tsam áse.”