Yesus aa lére é nguu deñ á nywíñán kwaás
5
Mos enziŋ,
Yesus a mbé á nsá máŋ méye á Genesaret,
ané abwiññ bot é ngá mana ñí dzéñ méféŋŋ ná bá wók éfíá Nzamá.
2 Éde a ngá yén méa mé beáñ mé tɔɔ́ á nsá máŋ;
ákoan ná beyɔ́p kwaás bé kólo yaá á méa méte été ná bá sop mévwát meba.
3 Ané Yesus a ngá daŋ byéa ovɔ́ɔ́ ye été,
éwí Simón,
éde a ngá dzaa ñí ná á tsíni ñí á máŋ été avítsaŋ;
ané Yesus a ngá tɔbɔ ósí á byéa été,
éde a ngá tára ná aa yágale bot,
a tɔɔ́ á byéa été.
4 Niané a ngá mana kɔ́bɔ,
éde a ngá dzó Simón ná:
“Kéŋ ya byéa mfá wá daŋ edwá,
weagán mévwát menan,
á mfá ye ná míní biñ.”
5 Ané Simón a ngá yalan ya ñí ná:
“Á Nyágale,
bí séñ yaá ngúrá ntéññ alú kaa áywíñ dzóm;
ve,
ma ye wea mevwát amú ná wa wa dzó dɔ.”
6 Niané bé ngá bɔ dɔ,
éde bé ngá dzili abwiññ kwaás,
ané mevwát mé ngá tára ná má ñaba bɔ́.
7 Éde bé ngá lére bemvwíññ béye ékamá ndem,
ébá bé mbé é byéa ovɔ́ɔ́,
ná bé nzu bɔ́ vwála.
Ané bé ngá ke,
éde bé ngá dzálá méa mé beáñ táŋ avé má ye ñáŋán.
8 Niané Simón Pedro a ngá yén dzam te,
éde a ngá kútbe ébe ású Yesus,
ané a ngá dzó ñí ná:
“Á Ntí,
kólogé é vóm mé ne,
amú ná me ne mbɔ misémm.”
9 Amú ná éñe ya é bot bése bé mbé bábe bɔ́ bé ngá ku avoó ya ábímm kwaás bé ngá biñ.
10 Amvála te édɔ fe Juan bá Jakobo,
é bwán Zebedeo,
bábe Simón bé mbé ékamá,
bá bé ngá ku fe avoó.
Éde Yesus a ngá dzó Simón ná:
“O táa kɔ wɔŋŋ,
atéé ye áwola dí wa ye yɔ́p bot.”
11 Niané bé ngá ke ya méa á kíníŋé,
ané bé ngá lík mam mése,
éde bé ngá bee Yesus.
Captura Milagrosa de Peces
Yesus aa séñ nzénzamm
12 A ngá bɔ ná,
Yesus a tɔɔ́ dzeá enziŋ,
ané nzénzamm ó ngá yit ñí bebeñ.
Niané mot te a ngá yén Yesus,
ané a ngá ku asú ósí,
eé dzaa fe ñí engóngɔ́ɔ́ ná:
“Á Ntí,
ngé wa kómo,
o ne ma fúbu.”
13 Ané Yesus a ngá sám wéá,
á nama ñí,
a dzóo fe ñí ná:
“Ma kómo,
bɔɔ́ge mfúbánn.”
Eyɔŋ te ébyen éde nzamm e ngá dzáŋ ñí,
14 éde fe Yesus a ngá mánan ñí ná:
“O táa dɔ kat mot enziŋ;
fáve ná,
kéŋ léreban ébe fára ná o ntɔɔ́ yaá mfúbánn.
Vá metúnŋa amú étɔɔ́ mfúbánn dwe,
amvála ané métsiŋŋ Moisés má mánan.
Dzam te dá ye bɔ́ bɔ ngañiá”
15 Ve,
éwógá Yesus é ngá ñeŋ abwiññ ya abwiññ;
éde fe ededea abwiññ bot é ngá bɔ deé kóán ná bá wók ñí,
ya ná á séñ fe bɔ́ ákwann deba.
16 Ve,
Yesus ñí a ngá bɔ eé ke mévóm etámm,
eé ke yaglan.
Yesus aa séñ mbóbók
17 Mos enziŋ Yesus a ngá yágale;
befariseo ya beyágale métsiŋŋ benziŋ bé mbé ó véa;
bé ngá sɔ́ á meá mése méye á Galilea,
Judea ya Yerusalen.
Éde é nguu Ntí é ngá léreban ébe Yesus á mfá ye ná á séñ mikúkwann.
18 Ané bot benziŋ bé ngá sɔ́ bé baga mbóbók á mwann enɔŋŋ été.
Bé ngá kómo ke ya wɔ́ á ndá été ná bé bwíi wɔ́ ébe ású Yesus.
19 Ve,
bĕé mbé dɔ bɔ,
amú ná abwiññ bot é mbé;
éde bé ngá bét á ndzií áyóp ané bé ngá kúu ndzií,
éde bé ngá sili mbóbók te á mwann enɔŋŋ été,
énzénzaŋ bot été,
ané bé ngá bwíi ñí ébe ású Yesus.
20 Niané Yesus a ngá yén mbwínánn bé mbé bé belé,
éde a ngá dzó nkúkwann te ná:
“Á mot,
mísémm mwe mí ntɔɔ́ yaá ndzámann.”
21 Ané befariseo ya beyágale métsiŋŋ bé ngá tára tém ná:
“Nzá aa kɔ́bɔ ya Nzamá ya abyann aaná?
Niané ve Nzamá etámm,
ye mot mfé a ne dzáma mísémm?”
22 Niané Yesus a ngá yem átémŋa deba,
éde a ngá síli bɔ́ ná:
“Mína tém á yá mílém myenan été?
23 Dzé dá daŋ ya ebúbú ádzó:
‘Ye ná,
mísémm mwe mí ntɔɔ́ yaá ndzámann,
ye ná,
tébegé,
o wulu fe?’
24 Ve,
ma kómo ná míní yem ná é Mwán Mot a belé nguu edzwée á sí ó vá ná aa dzáma mísémm.”
Éde a ngá dzó mbóbók ná:
“Ma dzó wa ná,
tébegé,
twáagé é mwann enɔŋŋ we,
kéŋ fe é ndá dzwe.”
25 Etéññ te ébyen,
éde mbóbók te ó ngá tébe ébe ású bot bése,
a twáa é mwann enɔŋŋ á mbé a bóo été,
ané a ngá ke é ndá dzeñ,
eé vé Nzamá dúmá.
26 Ané bot bése bé ngá ku avoó,
bé vé fe Nzamá dúmá.
Éde fe bésesé bé ngá bíra kɔ wɔŋŋ,
béé dzó ná:
“É mos wí fá bí yén é mam bot băá bé tára yén.”
Yesus aa lwée Leví
27 Niané mam méte mé ngá lot,
éde Yesus a ngá kólo,
ané a ngá yén ñɔŋmfóŋsí enziŋ béé lwée ñí ná Leví,
a tɔɔ́ é vóm bá ñɔŋ mfóŋsí;
éde Yesus a ngá dzó ñí ná:
“Beegé ma.”
28 Éde Leví a ngá tébe,
a mana lík mam mése,
ané a ngá bee ñí.
29 Éde Leví a ngá bɔ mora fét é ndá dzeñ ákála Yesus;
beñɔŋ mfóŋsí bá bé mbé fe ó véa ededea abwiññ,
ya abwiññ bot afé,
bé dzí bábe Yesus ya Leví.
30 Ve,
niané befariseo ya beyágale métsiŋŋ bábe bɔ́ bé mbé nsámá bé ngá yén dzam te,
éde bé ngá tára ná bá swa béyága Yesus,
béé dzó bɔ́ ná:
“Amú dzé mína dzí ya ñú fufúlu mínabe beñɔŋ mfóŋsí ya bebɔ misémm?”
31 Ané Yesus a ngá yalan ya bɔ́ ná:
“É bot bé ne mvwaá băá yi dɔ́kira,
fáve ébá bé ne mikúkwann.
32 Meé ndzí nzu lwée benzósoó bé bot,
fáve ébá bé ne bebɔ misémm,
á mfá ye ná bé dzoban.”
Jesús Pasa Tiempo con Pecadores
Fúlú ye álot metám kaa ádzí
33 Eyɔŋ te ané bé ngá dzó Yesus ná:
“Béyága Juan bé wóla lot metám kaa ádzí,
bé yaglan fe;
ébá befariseo bá fe ámvála déá.
Ve,
béyága bwe bá dzí,
bá ñú fe.”
34 Éde Yesus a ngá yalan ya bɔ́ ná:
“Ye míní ne mánan é bot bé belé ekígá alúkgán ná bé lot metám kaa ádzí,
éyɔŋ bé ngén bé tɔɔ́ bábe é mot aa lúkgan?
35 Ve,
melú má nzu,
mélú é mot aa lúkgan aa ye kólo énzénzaŋ deba;
eyɔŋ te,
véa,
éñe bá ye lot metám kaa ádzí.”
36 Éde fe a ngá vé bɔ́ éfonann dí:
“Mot enziŋ ăá kík abeét étóp é ne mfefeñ ná aa kom nnomm elíŋŋá;
ngé a bɔ dɔ néa,
aa ye ndámán mfefeñ etóp;
abeét te dá dăá ye ki ñep ya nnomm elíŋŋá te.
37 Mot enziŋ ñí ăá wa ki mfefeñ vino méndák mé ne miyomm été;
ngé a bɔ dɔ néa,
véa mfefeñ vino wá ye bwíñ mendák méte,
eyɔŋ te vino a mana swii,
mendák má mé dzímle fe.
38 Amú dzam te,
bá yian swii mfefeñ vino méndák mé ne mifefeñ.
39 Éde mot enziŋ ye a ñú yaá nnomm vino ăá kómo fe ñú éñí a ne mfefeñ,
amú aa dzó ná:
‘Nnomm vino éwɔ wá daŋ nzám.’ ”