Déble aa bóble Yesus
4
Yesus a tɔɔ́ ndzálánn ya Mfúfúp Nsísim,
éde a ngá kólo óswíñ bá lwée ná Yordán,
ané Nsísim a ngá ke ya ñí éyáŋŋ été.
2 A ngá tɔbɔ éyáŋŋ été weñ táŋ melú mewóm mé nii,
déble eé bóble fe ñí.
Tám te áse,
Yesus eé ndzí dzí dzóm enziŋ,
éde a ngá wók nzeñ.
3 Ané déble a ngá dzó ñí ná:
“Ngé o ne é Mwán Nzamá,
dzóge ákwá dí ná é veŋan mfémm.”
4 Yesus a ngá yalan ya ñí ná:
“Mitsilann myá dzó ná:
‘Mot ăá ye niŋ fáve ya bidzí etámm,
[ve fáve ya éfíá ése Nzamá.]’ ”
5 Ané déble a ngá bét ya ñí á nkoó á yóp,
éde,
etéññ evɔ́ɔ́ a ngá lére ñí mesí mése méye éniŋ.
6 Ané déble a ngá dzó ñí ná:
“Ma ye wa vé nguu ye ádzwée ya dúmá ye mesí méte.
Amú ná ma bé kee yaá byɔ,
ma ma vé fe byɔ éñí ma kómo byɔ vé.
7 Ngé o kútbe ó sí,
o kaŋ ma áse te aa ye bɔ áawe.”
8 Éde Yesus a ngá yalan ya ñí ná:
“Mitsilann myá dzó ná:
‘Wa ye kútbe ó sí ébe ású Ntí é Nzamá we ná wa vé ñí ngaŋŋ,
éñe etámm wa ye kaŋ.’ ”
9 Ané déble a ngá ke ya ñí á Yerusalen,
éde a ngá téle ñí á templo é vóm ó mbé oyaáp áyóp,
ané a ngá dzó ñí ná:
“Ngé o ne é Mwán Nzamá,
kpá ásí;
10 amú ná Mitsilann myá dzó ná:
‘Nzamá aa ye mánan é baángel béñ ná bé kálá wa.
11 Bá ye wa súk ya mó á mfá ye ná ábɔ dwe é nza kɔp akwá enziŋ.’ ”
12 Éde Yesus a ngá yalan ya ñí ná:
“Mitsilann myá myá dzó fe ná:
‘O táa bóble Ntí é Nzamá we.’ ”
13 Niané déble a ngá mana mebóblé méte mése,
éde a ngá ke Yesus oyaáp tám te.
El Diablo Tienta a Jesús
Yesus aa tára Éséññ Nzamá deñ á Galilea
14 Ané Yesus a ngá búlán á Galilea a tɔɔ́ ndzálánn ya nguu Mfúfúp Nsísim,
éde éwógá deñ é ngá mana ñeŋ ábeŋŋ sí te ásesé.
15 A ngá yágale bésinagoga beba,
ané bésesé bé ngá vé ñí dúmá.
Yesus a ne á Nasaret
16 Eyɔŋ te éde Yesus a ngá ke á Nasaret,
é vóm a ngá vém,
ané a ngá ñíi á sinagoga été é mos Sátará,
amvála ané é mbé ñí fúlú.
Éde a ngá tébe ná aa láŋ.
17 Ané bé ngá kee ñí mítsili nkúlu medzó Esaía,
éde a ngá kúu myɔ é vóm wá dzó ná:
18 “Nsísim Ntí ó ne ébe ma,
é tɔɔ́ ná Ntí aá tɔ́p ma ná me kat biŋgóŋgɔ́ɔ́ bí bot mbamba fwéñ;
a lóm yaá ma ná me kat mibok fwéñ é filí,
me kúu fe midzíndzímm mís;
ébá bé ne midzukgán me vé bɔ́ filí;
19 me kat fe fwéñ ná mbú mvɔmm Ntí ó tára yaá.”
20 Éde Yesus a ngá dzip mítsili,
a kee myɔ éñí a ngá vwála á sinagoga été,
ané a ngá tɔbɔ ósí.
Éde é bot bése bé mbé á sinagoga été bé ngá bem ñí mís ó ñúu.
21 Éde a ngá tára ná aa kɔ́bɔ eé dzó ná:
“É dzam má mana láŋ dí é dzálában yaá ébe ású denan é mos wi.”
22 Bot bése bé ngá kɔ́bɔ ñí mvéáñ,
bé ngá yágán fe bífíá bí mvɔmm a ngá kɔ́bɔ,
béé síli fe ná:
“Se é mwán José éñe ñí ngeá?”
23 Ané Yesus ñí a ngá yalan ya bɔ́ ná:
“Bébélá mína ye ma ku nkaná wi:
‘A dɔ́kira,
séñŋe fe wámyen!
É mam bía wók ná o ngá bɔ á Kapernaúm,
bɔɔ́ge fe mɔ é sí dwe wámyen ó vá.’ ”
24 Éde a ngá bera bere áyóp ná:
“Ma kɔ́bɔ ya mína bébélá ná,
băá yem ñɔŋ nkúlu medzó enziŋ é dzeá deñ émyen.
25 “Ve,
bébélá ná abwiññ mikús mí biningá é mbé Israel été métám Elías,
éyɔŋ nzeñ ndén e ngá kwíñ ébe sí áse,
amú ná dzóp é ngá dzip táŋ mibú mí léa ya etun kaa ná mveŋ da nɔ́ŋ.
26 Ve,
Nzamá eé ndzí lóm Elías ébe nkús miningá enziŋ ye Israel,
fáve ébe nkús miningá ye á Sarepta,
sí ye á Sidón.
27 Abwiññ mizénzamm dá é mbé fe Israel é tám nkúlu medzó Eliseo,
ve mbɔ́ɔ́ enziŋ weé ndzí séñban,
fáve Naamán,
mot ye á Siria.”
28 Niané é bot bése bé mbé á sinagoga été bé ngá wók dɔ,
ané bé ngá bíra yéá.
29 Éde bé ngá tébe,
bé ngá ke fe bá tsíni ñí nnam átán akekwíñ á dólbé nkoó áyóp,
nkoó nnam ó mbé bɔ́ nlóŋán,
á mfá ye ná bé sɔ́gle ñí ásí.
30 Ve,
éde Yesus a ngá lot bɔ́ énzénzaŋ été,
ané a ngá ke.
Jesús Proclama el Cumplimiento de las Escrituras
Yesus aa tsílán ya mbéa nsísim
31 Ané Yesus a ngá ke á Kapernaúm,
dzeá ye á Galilea,
éde a ngá yága bot é mos Sátará.
32 Ané bot bése bé ngá kám áyágalé deñ,
amú ná a ngá yágale ya edzwée.
33 Éde,
mot enziŋ a mbé á sinagoga été,
a belé nsísim mvin,
ané nsísim mvin te ó ngá yónán oyaáp ó yóp ná:
34 “Á kíé!
Bí belé wa dzé,
á Yesus mot ye á Nasaret?
Ye o sɔ́ yaá bía tsam?
Ma yem wa;
o ne Mfúfúp Mot Nzamá.”
35 Ve,
Yesus a ngá báma nsísim te ná:
“Dzipge anu,
kólogé fe ébe mot te!”
Eyɔŋ te éde nsísim mvin te ó ngá kpoo mot te ósí ébe ású mot áse,
ané ó ngá kólo ébe éñe kaa ñí ádzugu amvála enziŋ.
36 Éde bot bése bé ngá sigan,
ya a síli fe bébyen ya bébyen ná:
“Nzá amvála bifíá dí?
Ya edzwée ya nguu é mot ñí aa báma misísim mí mvin ná mí kólo,
eyɔŋ te mí kólo!”
37 Éde éwógá deñ é ngá mana ñeŋ ábeŋŋ sí te mevóm mése.
Yesus aa séñ Simón Pedro nkiá
38 Éde Yesus a ngá tébe a kólo á sinagoga été,
ané a ngá ke é ndá Simón.
Simón nkiá ñí a ngá kwan,
ya abwiññ avép;
éde bé ngá dzaa Yesus ná a vwála miningá te.
39 Ané Yesus a ngá yit bebeñ ébe éñe,
a mánan avép,
ané avép é ngá mana ñí ó ñúu.
Etéññ te ébyen éde miningá te a ngá tébe,
ané a ngá tára fe ná aa belan ya bɔ́.
Yesus aa séñ abwiññ mikúkwann
40 Éyɔŋ nlódzóp ó ngá ke dzím,
éde bot bé ngá ke ya mikúkwann mendzaŋ mése ébe Yesus;
ané a ngá ke aa nama kada mot,
éde bé ngá lígi mvwaá.
41 Bembéa misísim bé ngá kólo fe ébe abwiññ mikúkwann;
misísim míte mí ngá yónán mií dzó ná:
“Wa o ne é Mwán Nzamá!”
Ve,
Yesus a ngá mánan myɔ,
kaa álík ná mí kɔ́bɔ,
amú ná misísim míte mí ngá yem ná Yesus éñe a ne Kristo.
Yesus aa kat Mbamba Fwéñ
42 Niané kírí e ngá léne,
éde Yesus a ngá kólo á kísoan été,
ané a ngá ke vóm enziŋ émyen etámm.
Ve,
niané bot bé ngá tára ná bá dzéŋ ñí,
éde bé ngá ke kwíñ é vóm a mbé;
ané bé ngá dzaa ñí engóngɔ́ɔ́ ná a táa ke.
43 Ve,
Yesus a ngá dzó bɔ́ ná:
“Ma yian fe a kat meá mefé mbamba fwéñ ye édzwée ngɔ́mán Nzamá,
amú ná ya dzam te édɔ Nzamá a ngá lóm ma.”
44 Amvála te édɔ Yesus a ngá ke aa kat fwéñ á besinagoga béye á Judea [Galilea].