Ábyálá Yesus
2
Melú méte,
kéza Augusto a ngá mánan ná bé láŋ bot mésí meñ mése.
2 Nláŋán bot ósúá te ó ngá bɔban éyɔŋ Sirenio a mbé ŋgɔ́vina ye á Siria.
3 Bot bése bé ngá yian ke tsiliban,
kada mot é kísoan deñ.
4 Éde José a ngá kólo á Nasaret,
ábeŋŋ sí ye á Galilea,
ná aa ke á Belén,
é kísoan David,
ábeŋŋ sí ye á Judea;
amú ná David a mbé émvámvámm deñ.
5 Á mfá ye átsiliban bá María ngéá weñ [a belé atsiŋŋ alúk bá ñí],
éñí te ñí a tɔɔ́ abum.
6 Éde fe a ngá bɔ ná,
éyɔŋ bé mbé á Belén ó wéñ,
ané é tám María a ngá yian byéñ e ngá kwíñ.
7 Éde a ngá byéñ ntóó mwán weñ,
mwán fám,
ané a ngá wɔ́gɔ ñí bítóp été,
a bwíi fe ñí á mbak biyémm byá dzí été,
amú ná bĕé mbé bé belé afóo á ndá beyéŋ.
Baángel bábe bekálá mitómá
8 Bekálá mitómá benziŋ bé mbé bebeñ á Belén béé kálá mítómá myeba éyáŋŋ été alú.
9 Éde ángel Nzamá a ngá nzu léreban ébe ébɔ́,
ané é dúmá Nzamá e ngá boman bɔ́ ya abwiññ eyéá.
Éde bé ngá sigan ya ákɔ wɔŋŋ.
10 Véa,
éde ángel a ngá dzó bɔ́ ná:
“Míní táa kɔ wɔŋŋ,
amú ná me sɔ́ ya mína é mbamba fwéñ bot bése bá ye bíra sán ya dɔ.
11 Fwéñ te e ne ná:
É mos wi,
Nkoro bot,
éñí a ne Kristo Ntí a byála yaá mína é dzeá David.
12 É dzam dí édɔ dá ye mína bɔ ndem,
mína ye koan ya mwán a bóo á mbak été,
a tɔɔ́ nwɔ́gán bítóp été.”
13 Etéññ te ébyen,
éde nsámá melúmán baángel béye á dzóp ó ngá yéneban é vóm ángel á mbé,
bé ngá lugu Nzamá,
béé dzó ná:
14 “Dúmá eé bɔɔ́ge ya Nzamá á yóp été,
mvwaá da eé bɔɔ́ge fe á sí mfá ye é bot bá sán ya mbamba nkómánn weñ!”
15 A ngá bɔ ná,
niané baángel bé ngá búlán á dzóp,
éde bekálá mitómá bé ngá dzó bébyen ya bébyen ná:
“Bí keŋán á Belén ná bí ke yén é dzam é mvá bɔban,
édí Ntí a mvá lére bía.”
16 Eyɔŋ te éde bé ngá ke avóó,
ané bé ngá koan ya María bá José,
ya mwán,
a bóo á mbak biyémm bá dzí été.
17 Niané bekálá mitómá bé ngá yén Yesus,
éde bé ngá tára ná bá kat é fwéñ ángel a ngá kat bɔ́ mfá mwán.
18 É bot bése bé ngá wók é fwéñ bekálá mitómá bé ngá kat bɔ́,
bé ngá ku avoó.
19 Ve,
María a ngá nii mam méte,
a ngá fas fe mɔ á nlém weñ été
20 Éde bekálá mitómá bé ngá búlán,
béé vé Nzamá dúmá ya olugú amú é mam mése bé ngá wók ya yén,
amú ná mam méte mése mé ngá mana dzálában ámvála ángel a ngá dzó bɔ́.
Nacimiento de Jesús
Bá lére Yesus á templo a tɔɔ́ nkéŋá
21 Niané mwán a ngá dzálá melú mmom,
éde é tám bá kele ñí e ngá kwíñ,
ané bé ngá yo ñí ná Yesus,
éyola ángel a ngá kat María kaa ná á ñɔŋ ábum.
22 Niané é tám bá fúbu méñúu meba e ngá kwíñ,
amvála ané métsiŋŋ Moisés má mánan,
éde José bá María bé ngá ke ya mwán á Yerusalen ná bé lére ñí Ntí á templo.
23 Bé ngá bɔ dɔ néa amú ná é ne ntsilann métsiŋŋ Ntí été ná:
“Ntóó mwán fám óse wá tára kwíñ ábum ñiá bá ye wɔ álwée ná,
ntélán eki ébe Ntí.”
24 Métsiŋŋ Ntí má mánan fe ná bé ve metúnŋa:
“Nzum é beáñ ngé ki biyee bí abeŋŋ bí beáñ.”
25 Mot enziŋ a mbé á Yerusalen a tɔɔ́ eyola ná Simeón.
Mot te a mbé nzósoó,
a ngá baale fe é mam Nzamá mvéáñ.
Mfúfúp Nsísim a mbé ébe Simeón te,
a ngá yana fe é tám eywiññ ye Israel dá ye tɔbɔ mveann.
26 Mfúfúp Nsísim a ngá lére Simeón ná ăá ye wú kaa áyén é Kristo Ntí.
27 Ané Mfúfúp Nsísim a ngá tsíni ñí ná á ke á templo.
Niané Yesus éséá ya ñiá bé ngá ke ya ñí á templo á mfá ye ná bé dzálá amvála ané nkɔɔ́ métsiŋŋ wá mánan,
28 éde Simeón a ngá ñɔŋ mwán é mó meñ été,
ané a ngá lugu Nzamá a dzóo ná:
29 “Áwola dí,
á Ndzwée,
o ntɔɔ́ yaá yáán ya óloá we á mvwaá été,
ané o ngá dzó,
30 amú ná é mís mam mé yén yaá ákoroga dwe,
31 éwí o ngá koman ébe ású meyɔŋ mése,
32 éyéá dá ye léreban ébe é bot bé sés bejudio,
eyéá te fe é ne é dúmá Israel,
áyɔŋ dwe.”
33 Éde Yesus éséá ya ñiá bé ngá ku avoó amú é mam Simeón a ngá kɔ́bɔ mfá mwán.
34 Ané Simeón a ngá vé abwará ya bɔ́,
a kɔ́bɔ fe ya María,
Yesus ñiá,
ná:
“Béágé,
é mwán ñí a ne nlómánn á mfá ye ná abwiññ bot é ku,
ya á mfá ye ná abwiññ bot é tébe fe Israel;
aa ye fe bɔ é ndem abwiññ bot dá ye tep,
35 á mfá ye ná mésímánn méye ábwiññ milém mé kwíñ éyéá été.
Dzam te áse dá ye wa vé nlém mitéñ.”
36 Nkúlu medzó miningá ñí a mbé fe ó véa,
a tɔɔ́ eyola ná Ana.
A mbé é mwán Fanuel,
áyɔŋ Aser.
Ákoan ná Ana te a ntɔɔ́ yaá ededea nnomm,
a ngá ke álúk a tɔɔ́ ededea ngwan,
ané a ngá tɔbɔ bá nnóm táŋ mibú zaŋgbéá,
37 éde a ngá lígi nkús akekwíñ mibú mewóm mmom ya mibú mí nii.
Ĕé ngá kánan ya templo,
fáve ná aa kaŋ Ntí alú ya ó mos,
eé lot metám kaa ádzí,
eé bɔ fe meyaglán.
38 Ana te,
tám te ébyen,
a ngá nzu bebeñ é vóm bé mbé,
éde a ngá vé Nzamá akíba,
éde fe a ngá kɔ́bɔ mfá mwán ya é bot bése bé ngá yana ákoroga Yerusalen.
Ábúlánn ye á Nasaret
39 Niané bé ngá mana dzálá amvála ané métsiŋŋ Ntí má mánan,
éde bé ngá búlán á Galilea,
é dzeá deba,
Nasaret.
40 Mwán a ngá vém,
a ngá bɔ fe nguu;
a mbé ndzálánn ya kén;
é mvɔmm Nzamá da e mbé fe ébe éñe.
Yesus a ne á templo a tɔɔ́ mɔ́ŋŋ
41 Yesus,
éséá bá ñiá,
bé ngá bɔ béé ke á Yerusalen mibú míse,
ná bá ke lot é fét Paskua.
42 Bé ngá ke fét te ámvála é mbé fúlú ákoan ná Yesus a belé mibú awóm ya mí beáñ.
43 Niané fét e ngá mana,
éyɔŋ bé ngá búlán é dzeá deba,
ané mɔ́ŋŋ Yesus a ngá lígi á Yerusalen,
ve éséá bá ñiá kaa dɔ áyem.
44 Bé ngá wulu ngúrá ntéññ mos,
béé bwíni ná a mbé ébe é bot bábe bɔ́ bé ngá búlán nsámá.
Éde bé ngá tára ná bá dzéŋ ñí ébe bivúvúmán byeba ya fe méyemann meba.
45 Ve,
niané bé ngá bɔ́ kaa ñí áyén,
ané bé ngá búlán á Yerusalen ná bá ke bá dzéŋ ñí.
46 Éde a ngá bɔ ná,
niané melú mé léa mé ngá lot bé dzéŋ ñí,
ané bé ngá koan ya ñí á templo,
a tɔɔ́ énzénzaŋ beyágale,
eé béá bɔ́,
eé síli fe bɔ́ misílí.
47 É bot bése bé ngá wók ñí,
bé ngá kám nyemann weñ ya bíyalann byeñ.
48 Niané éséá bá ñiá bé ngá yén ñí ané bé ngá yágán;
éde ñiá a ngá dzó ñí ná:
“É mwán wɔm,
amú dzé ó mvá bɔ bía aaná?
Bía ésúá bí mvá dzéŋ wa ya ededea nlém mitéñ.”
49 Éde a ngá dzó bɔ́ ná:
“Amú dzé míní mvá dzéŋ ma?
Ye mínăá yem ná ma yian bɔ é mam é Tará wɔm?”
50 Ve,
béé ndzí wók é dzam Yesus a ngá dzó bɔ́.
51 Ané Yesus a ngá búlán bábe bɔ́ á Nasaret,
éde fe a ngá tɔbɔ ná aa wók bɔ́.
Ñiá a ngá baale mam méte mése á nlém.
52 Yesus a ngá vém ébe kén ya á ntéññ,
a ngá vém fe ébe é mvɔmm Nzamá ya éñí bot.
La Niñez de Jesús.