A ebꞌ cꞌaybꞌum yaj dꞌa juntzan̈ es
2
A dꞌa scal ebꞌ quetisraelal dꞌa pecaꞌ,
ay ebꞌ yalnacoch sbꞌa schecabꞌoc Dios.
An̈ejtonaꞌ ay ebꞌ ol pitzvoc chaan̈ dꞌa co cal,
ol stzꞌacan yaloch sbꞌa ebꞌ cꞌaybꞌumoc,
ol scꞌaybꞌan ebꞌ quetanimail ebꞌ dꞌa juntzan̈ es dꞌa cꞌubꞌeltac,
yic ay on̈ ol on̈ juvoquel yuj ebꞌ.
Malaj tzꞌoch Cajal dꞌa ebꞌ,
vachꞌchom a ix cham yuj stupiloc smul ebꞌ.
Yuj chiꞌ,
munil syicꞌcot ebꞌ dꞌa yibꞌan̈.
Elan̈chamel ol satxicanel ebꞌ dꞌa juneln̈ej.
2 Tzijtum ebꞌ ol bꞌeybꞌalan jun schuc bꞌeybꞌal ebꞌ chiꞌ.
Yuj ebꞌ ol aljoc to a jun bꞌeybꞌal yel bꞌaj ayon̈ och tic,
malaj yelcꞌochi.
3 Yuj specꞌ tuminal ebꞌ,
vachꞌxon̈ej ol yutoc ebꞌ yalanel juntzan̈ lolonel to dꞌa yol yic ebꞌ snaqꞌuei yic syicꞌanel tumin ebꞌ dꞌayex.
Palta atax dꞌa pecaꞌ nabꞌilcan yuj Dios to ol yacꞌoch yaelal dꞌa yibꞌan̈ ebꞌ dꞌa juneln̈ej,
yuj chiꞌ tan̈vabꞌil ebꞌ yuj yaelal chiꞌ.
4 Co naeccot tas ajnac ebꞌ ángel ochnac smul dꞌa Dios.
Juneln̈ej man̈ acꞌjinacoc nivancꞌolal ebꞌ.
Acꞌbꞌilbꞌat ebꞌ dꞌa jun lugar scuchan Tártaro.*
Tzecꞌbꞌilcan cꞌotan ebꞌ dꞌa qꞌuen cadena.
Preso yajcan ebꞌ dꞌa cal qꞌuicꞌalqꞌuinal ticnaic,
masanto ol chꞌolbꞌitaj tas yaj ebꞌ.
5 An̈ejtonaꞌ,
man̈ yacꞌnacoclaj nivancꞌolal ebꞌ anima Dios dꞌa pecaꞌ,
yuj chiꞌ yacꞌnaccot jun oval aꞌ mucvajum dꞌa yibꞌan̈ ebꞌ chuc chiꞌ.
An̈ej vin̈aj Noé colchajnaccanel yedꞌ ucvan̈ ebꞌ yicoꞌ.
A vin̈aj Noé chiꞌ alannaccanel dꞌa scal ebꞌ anima to yovalil tojol syutej sbꞌa ebꞌ.
6 An̈ejtonaꞌ,
a Dios chiꞌ satjinacpaxel Sodoma yedꞌ Gomorra.
Pilan lajvinaquel chabꞌ chon̈abꞌ chiꞌ stzꞌabꞌat yuj cꞌacꞌ.
Nabꞌa taan̈xon̈ej ajnaccan smasanil.
A ebꞌ lajvinaquel chiꞌ,
chꞌoxnabꞌil yaj ebꞌ dꞌa ebꞌ malaj yelcꞌoch Dios dꞌa sat.
7 An̈ej val vin̈aj Lot colchajnaccanel dꞌa scal ebꞌ,
yujto tojol spensar vin̈.
Ayic manto lajviel-laj ebꞌ chiꞌ,
ochnac pitzꞌan cuselal dꞌa scꞌool vin̈.
8 Vachꞌn̈ej sbꞌeybꞌal vin̈aj Lot chiꞌ,
palta masanil cꞌu an̈ej chucal scꞌulej ebꞌ yabꞌnac vin̈ yilannac pax vin̈,
te cusnac vin̈ yuj ebꞌ.
9 An̈ejtonaꞌ,
icha pax chiꞌ ticnaic.
Yojtac Dios tas syutej scolan ebꞌ ayoch spensar dꞌay,
ayic tzꞌacꞌji proval ebꞌ.
Yojtac paxi chajtil ol yutoc yacꞌanbꞌat ebꞌ man̈ tojoloc spensar dꞌa syaelal.
Ol cann̈ej ebꞌ taꞌ masanto ol ja jun cꞌu ayic ol chꞌolbꞌitaj tas yaj ebꞌ.
10 Ay ebꞌ syacꞌoch spensar scꞌulan juntzan̈ chucal yedꞌ snivanil.
Malaj tzꞌoch ebꞌ ayoch yopisio yuj Dios dꞌa ebꞌ.
Aton ebꞌ chiꞌ ol vachꞌ acꞌjoccanoch dꞌa syaelal.
Acꞌumtac syutej sbꞌa ebꞌ.
Max bꞌalaj xivlaj ebꞌ sbꞌuchan juntzan̈ ebꞌ te nivan yelcꞌochi.
11 A ebꞌ ángel,
yel ton val nivan spoder ebꞌ dꞌa yichan̈ ebꞌ sbꞌuchvaj chiꞌ,
palta max stecꞌbꞌejlaj sbꞌa ebꞌ sbꞌuchvaj dꞌa ebꞌ nivan yelcꞌoch chiꞌ,
ayic tzꞌalji smul ebꞌ yuj ebꞌ dꞌa yichan̈ Cajalil.
12 Ton̈ej scomon bꞌuchvaj ebꞌ dꞌa juntzan̈ tas man̈ yojtacoc.
Icha nocꞌ nocꞌ malaj spensar icha chiꞌ yaj ebꞌ,
an̈ej val sgana snivanil ebꞌ scꞌulej.
Yuj chiꞌ ol satcanel ebꞌ dꞌa juneln̈ej,
icha nocꞌ nocꞌ yictaxon yaj syamchaji smiljichamoc,
icha chiꞌ ol aj ebꞌ.
13 Icha chiꞌ ol aj schaan spac chucal scꞌulej ebꞌ chiꞌ.
Vachꞌchom cꞌualil,
syacꞌn̈ejoch spensar ebꞌ scꞌulan juntzan̈ tas sgana,
yic syacꞌ sgana ebꞌ yedꞌoc.
Qꞌuixvelal yajoch ebꞌ dꞌa e cal.
Chuclaj eyilji dꞌa sat Dios yuj ebꞌ.
Yujto ton̈ej scomon och ebꞌ vael eyedꞌoc ayic tzeyacꞌan mol vael.
Ayic tzꞌoch ebꞌ eyedꞌoc,
ton̈ej sqꞌuechaan̈ ebꞌ yedꞌ juntzan̈ tas snibꞌejoch chiꞌ.
14 Yalxon̈ej mach junoc ix ix syil ebꞌ,
snibꞌejn̈ejoch ix ebꞌ.
Malaj bꞌaqꞌuin̈ syactejcan ebꞌ yem dꞌa ajmulal.
Axo ebꞌ manto tecꞌanoc,
smontajbꞌat ebꞌ yuj ebꞌ scꞌulan pax chucal.
Cꞌajan ebꞌ snibꞌanoch tastac.
Yuj juntzan̈ chiꞌ,
aycot yoval scꞌool Dios dꞌa yibꞌan̈ ebꞌ.
15 Syactancan jun tojol bꞌeybꞌal ebꞌ,
satxicanbꞌat ebꞌ.
Yuj chiꞌ a sbꞌeybꞌal vin̈aj Balaam dꞌa pecaꞌ,
vin̈ yuninal vin̈aj Beor,
a sbꞌeybꞌalej ebꞌ.
A vin̈ chiꞌ,
yalnacoch sbꞌa vin̈ schecabꞌoc Dios,
palta an̈ej qꞌuen tumin sgana vin̈ yacꞌnac ganar dꞌa spatic chucal.*
16 Axo nocꞌ bꞌuru,
cojtac to max yal-laj slolon nocꞌ,
palta a nocꞌ cachjinac vin̈ dꞌa smul chiꞌ.
Lolonnac nocꞌ icha anima.
A nocꞌ cachannac och vaan vin̈ yuj sman̈ pensaril van scꞌulan chiꞌ.
17 A ebꞌ tzꞌesan dꞌa co cal tic,
icha yaj sjaj a aꞌ tupnac,
icha chiꞌ yaj ebꞌ.
An̈ejtonaꞌ icha asun ton̈ej sbꞌeyecꞌ yuj icꞌ,
icha chiꞌ yaj ebꞌ.
Yovalil ol bꞌatcan ebꞌ dꞌa jun qꞌuicꞌalqꞌuinal dꞌa juneln̈ej.
18 Ton̈ej syicꞌchaan̈ sbꞌa ebꞌ yalan juntzan̈ malaj yelcꞌochi.
Syal ebꞌ icha tic:
Syal co cꞌulann̈ej tastac chucal.
Syal co cꞌulan yaln̈ej tas snibꞌej co nivanil tic,
xchi ebꞌ.
Icha chiꞌ syutej ebꞌ yacꞌan scꞌool juntzan̈ ebꞌ van scolchajel dꞌa scal chucal.
19 Syalan ebꞌ:
Libre co cꞌulan yaln̈ej tas co gana,
xchi ebꞌ.
Palta a ebꞌ chiꞌ man̈ libreoclaj yaj ebꞌ,
yujto van yacꞌan servil chucal ebꞌ.
Yujto a mach scan dꞌa yalan̈ yuj junoc tasi,
syalelcꞌochi ayoch pax yacꞌumaloc servil jun chiꞌ.
20 Atax yic ix yojtacanel Cajal Jesucristo co Columal ebꞌ,
ix colchajel ebꞌ dꞌa yol scꞌabꞌ schucal jun yolyibꞌan̈qꞌuinal tic.
Palta tato tzato yacꞌxioch sbꞌa ebꞌ dꞌa juntzan̈ chucal chiꞌ,
ol bꞌat yolax ebꞌ yuuj.
Tato icha chiꞌ,
másxo te chuc yic ebꞌ icha dꞌa yalan̈taxo.
21 A ebꞌ scꞌulan icha chiꞌ,
octom max yacꞌoch spensar ebꞌ dꞌa jun vachꞌ bꞌeybꞌal tic,
yic vachꞌtacto val jabꞌoc yic ebꞌ.
Ocxo jun to ix yacꞌoch spensar ebꞌ dꞌay,
palta a ticnaic ix yactejcan jun checnabꞌil yic Dios ebꞌ acꞌbꞌil dꞌay.
Yuj chiꞌ,
yel ton val chuc yic ebꞌ ticnaic.
22 Ay jun lolonel aycani,
a tzꞌalan icha tic:
A nocꞌ tzꞌiꞌ,
slajvi xej nocꞌ,
scha lecꞌanxiqꞌue nocꞌ.
Yedꞌ nocꞌ chitam,
slajvi sbꞌicchaj nocꞌ,
sbꞌat sjucubꞌanxi sbꞌa nocꞌ dꞌa scal lum socꞌom.
Icha nocꞌ chiꞌ,
icha chiꞌ ebꞌ sval tic.