A Schabꞌil Carta
SAN PEDRO
Tzꞌel yich scarta vin̈aj Pedro
1
A in Simón Pedro in tic,
yacꞌumal in servil Jesucristo,
schecabꞌ in paxi.
Tic tzin tzꞌibꞌejbꞌat jun in carta dꞌayex mach ex ix eyacꞌoch Dios dꞌa e cꞌool quedꞌoc.
A jun bꞌaj ix cacꞌoch co cꞌool tic,
nivanocabꞌ yelcꞌoch dꞌayex.
Icha chiꞌ tzeyutej e bꞌa quedꞌoc,
yujto a co Diosal aton co Columal Jesucristo,
tojoln̈ej toni.
2 Yacꞌocabꞌ svachꞌcꞌolal yedꞌ sjuncꞌolal Dios dꞌayex,
yujto eyojtacxo yedꞌ Cajal Jesucristo.
A sbꞌeybꞌal ebꞌ yicxo Dios
3 Ay juntzan̈ tas te yovalil tzꞌoch cuuj,
yic vachꞌ scacꞌoch co pensar dꞌa Dios yacbꞌan ay on̈ ecꞌ dꞌa tic.
Yujn̈ej spoder,
ix yacꞌ juntzan̈ chiꞌ dꞌayon̈ smasanil,
yujto a Dios ix acꞌan cojtaquejel Jesucristo.
A avtannac on̈ och yicoc,
yujto nivan yelcꞌochi,
man̈ jantacoc svachꞌil.
4 Yuj svachꞌil chiꞌ,
yacꞌnaccan stiꞌ dꞌayon̈.
A juntzan̈ tas yalnaccan chiꞌ,
nivan yelcꞌochi,
man̈ jantacoc svachꞌil.
Yuj juntzan̈ chiꞌ tzon̈ colchajel dꞌa yol scꞌabꞌ juntzan̈ chucal snibꞌejoch ebꞌ ay dꞌa yolyibꞌan̈qꞌuinal tic.
Yujto a spensar Dios ayoch dꞌayon̈ yuj juntzan̈ tas yalnaccan chiꞌ.
5 Yuj chiꞌ,
man̈ ton̈ejoc scacꞌoch Dios dꞌa co cꞌool.
Yovalil scacꞌ val quip co tojolbꞌitan co bꞌeybꞌal.
Co cꞌaybꞌejec sjelanil Dios.
6 Co cachec och vaan co bꞌa.
Tecꞌan scutejec pax co bꞌa.
An̈ej dꞌa Dios scacꞌoch co pensar.
7 Sco xajanej co bꞌa yedꞌ ebꞌ quetcreyenteal,
sco xajananpax masanil anima.
8 Tato a juntzan̈ tic sco cꞌulejn̈ej dꞌa junjun cꞌu,
te ay copisio yuj Dios syal chiꞌ.
Man̈ nabꞌan̈ejoc ix cojtaquejel Cajal Jesucristo.
9 Palta a ebꞌ max bꞌeybꞌalan juntzan̈ tic,
ichato macan sat ebꞌ,
ichato max uji yilanbꞌat junoc tas ebꞌ dꞌa najat.
Yujto maxtzac snacot ebꞌ to a smul ebꞌ dꞌa yalan̈taxo,
icꞌbꞌilxocaneli.
10 Yuj chiꞌ ex vucꞌtac ex vanabꞌ,
scacꞌ val quip cojtacanel sicꞌlabꞌil to dꞌa val yel avtabꞌil on̈xo och yicoc Dios,
sicꞌbꞌil on̈xo el yuuj.
Tato icha chiꞌ scutej co bꞌa,
malaj bꞌaqꞌuin̈ ol chabꞌax co cꞌool dꞌa yic Dios bꞌaj ayon̈ ochi.
11 Tato icha chiꞌ,
malaj tas ol on̈ cachanoch vaan yic tzon̈ och bꞌaj van yacꞌan yajalil Cajal Jesucristo co Columal.
A yopisio Cajal chiꞌ,
ayn̈ejecꞌ dꞌa juneln̈ej.
12 Yuj chiꞌ vachꞌchom eyojtacxo juntzan̈ tic,
tecꞌan exxo dꞌa juntzan̈ cꞌaybꞌubꞌal yel bꞌaj ayxo och e pensar,
palta ol veccot e naꞌa.
13 Tzin naꞌ to smoj vecan e naꞌa,
svacꞌan nachaj juntzan̈ tic eyuuj,
yacbꞌan pitzan into.
14 Yujto a Cajal Jesucristo ix acꞌan nachajel vuuj to quenxon̈ej tiempo ay in eqꞌui.
15 Yuj chiꞌ svacꞌ vip,
yic vachꞌ ol yal e naꞌann̈ejcot juntzan̈ cꞌaybꞌubꞌal tic dꞌa masanil tiempo,
ayic man̈xo ayoc in eqꞌui.
Te nivan yelcꞌoch Jesucristo
16 Calnacxocan dꞌayex to ay val spoder Cajal Jesucristo,
to yovalil ol jax dꞌa schaelal.
Palta a juntzan̈ chiꞌ,
man̈ comon loloneloc,
man̈ ton̈ejoc ix co naelta dꞌa yol quicoꞌ.
Yujto quilnac val Cajal chiꞌ yedꞌ co sat,
man̈xo jantacoc pax svachꞌil.
17 A on̈ val lacꞌan quilnac yacꞌan stziquiquial co Mam Dios dꞌay.
Cabꞌnac pax yalan Dios to te nivan yelcꞌochi.
Yalannac emta Dios icha tic dꞌa scal jun snivan tziquiquial chiꞌ:
Aton jun Vuninal tic,
xajanabꞌil vuuj.
Tzin tzalaj val yedꞌoc,
xchi.
18 A jay bꞌelan̈ lolonel albꞌilemta dꞌa satchaan̈ chiꞌ,
cabꞌnac val,
yujto ay on̈ ecꞌ yedꞌ Cajal chiꞌ dꞌa jun tzalan bꞌaj emnacul Dios chiꞌ.
19 An̈ejtonaꞌ,
ayocto sja Cajal,
stzꞌibꞌannaccan yabꞌixal ebꞌ schecabꞌ Dios.
An̈ejaꞌ ayecꞌ Slolonel Tzꞌibꞌabꞌilcan yuj ebꞌ chiꞌ ticnaic.
A tas syal Slolonel chiꞌ te yel.
Vachꞌn̈ej scutej co bꞌa,
tato an̈ejaꞌ cacꞌanoch co pensar dꞌa tas tzꞌibꞌabꞌilcan yuj ebꞌ chiꞌ.
Yujto a Slolonel chiꞌ,
lajan icha junoc tas copanel scꞌacꞌal dꞌa cal qꞌuicꞌalqꞌuinal.
Syacꞌ yoc dꞌayon̈,
masanto sacbꞌi ayic sjavi cꞌu.
Icha cꞌu chiꞌ icha chiꞌ yaj Cristo ayic ol jaxoc,
axo svachꞌ acꞌan saquilqꞌuinal chiꞌ dꞌayon̈.
20 A ebꞌ schecabꞌ Dios dꞌa pecaꞌ,
ayocto stzꞌibꞌannaccan ebꞌ yuj tastac ol javoc.
Palta yovalil scojtaquejeli to malaj junoc mach scomon alan dꞌa yol yicoꞌ tas syalelcꞌoch juntzan̈ tzꞌibꞌabꞌilcan chiꞌ.
21 Yujto a ebꞌ chiꞌ,
malaj junoc ebꞌ munil snanac elta dꞌa sjolom ayic stzꞌibꞌannaccan ebꞌ.
Yujto sicꞌbꞌil yajel ebꞌ yuj Dios.
Axo Yespíritu acꞌannac nachajel yuj ebꞌ chajtil yutejnac ebꞌ yalancanel slolonel chiꞌ,
stzꞌibꞌannaccan ebꞌ.