3 A junxo svalbꞌat tic,

in gana val tzeyojtaquejeli to a dꞌa slajvubꞌxo tiempoal,

ay ebꞌ ol pitzvoc chaan̈,

ol comon bꞌuchvaj ebꞌ dꞌa juntzan̈ tas yic Dios.

An̈ej val juntzan̈ malaj svachꞌil bꞌaj ol yacꞌoch spensar ebꞌ.

4 Ol yalan ebꞌ:

Yacꞌnaccan stiꞌ Cristo to ol jax junelxo.

Palta,

¿bꞌaja sja ticnaic jun?

Nivanoc stan̈vejnac ebꞌ co mam quicham sjavi,

palta chamnacxo pax ebꞌ.

Ilec nabꞌi,

icha ajnac sqꞌuin̈ibꞌi jun yolyibꞌan̈qꞌuinal tic,

icha chiꞌ yaj ticnaic,

an̈ejaꞌ malaj mach sjavi,

xcham ebꞌ.

5 A ebꞌ tzꞌalan jun chiꞌ,

malaj sgana ebꞌ snacoti tas ajnac yolyibꞌan̈qꞌuinal tic dꞌa pecaꞌ chiꞌ.

Yujn̈ej tas yalnac Dios bꞌonac satchaan̈ yedꞌ sat luum tic.

Laj checlajnac lum luum dꞌa snan̈al a aꞌ.

Yuj a aꞌ chiꞌ,

vachꞌ yaj sat luum ticnaic.

6 Palta slajvinac chiꞌ,

pilan lajvinaccanel masanil tas ay dꞌa yolyibꞌan̈qꞌuinal tic yuj a aꞌ,

yujto emnaccan dꞌa yich aꞌ.

Aton juntzan̈ tic malaj sgana ebꞌ chiꞌ snacoti.

7 A satchaan̈ yedꞌ sat luum tic,

an̈ejaꞌ ayecꞌ ticnaic.

Palta yalnaccan Dios to yovalil ol cann̈ej icha tic masanto ol acꞌjoquemta cꞌacꞌ dꞌa yibꞌan̈.

Ato taꞌ ol ja jun cꞌual ayic ol ul chꞌolbꞌitaj yaj ebꞌ anima.

Axo ebꞌ malaj tzꞌoch Dios dꞌay,

ol acꞌjoccanoch yaelal dꞌa yibꞌan̈ ebꞌ dꞌa juneln̈ej.

8 Ex xajanabꞌil vuuj,

in gana snachajel eyuuj to a dꞌa Cajalil,

a jun cꞌu lajan yaj icha yecꞌ junoc mil abꞌil.

Axo jun mil abꞌil,

lajan yaj icha yecꞌ junoc cꞌual.

9 Ay ebꞌ snaani to van yecꞌ stiempoal dꞌa Cajal chiꞌ,

max elcꞌoch icha yalnaccani.

Palta man̈ ichoc snaan ebꞌ chiꞌ yaji.

Maxto javilaj,

yujto ayto snivancꞌolal.

Malaj sgana to ay junoc mach satcaneli,

palta sgana to sna sbꞌa masanil anima.

10 Palta icha sja junoc elcꞌum dꞌacꞌvalil,

icha chiꞌ ol aj sja scꞌual sjaubꞌal Cajal chiꞌ.

A dꞌa jun cꞌual chiꞌ,

ol lajvoquel satchaan̈.

Ayxo smay sn̈ilili ayic ol lajvoquel chiꞌ.

Axo juntzan̈ tas ay dꞌa yolyibꞌan̈qꞌuinal tic,

masanil ol ulaxbꞌat stzꞌabꞌat yuj jun nivan cꞌacꞌ.

Masanil sat luum tic,

ol laj tzꞌabꞌatoc yedꞌ masanil tastac ay dꞌay.

11 Tato icha chiꞌ ol aj slajviel masanil tastac,

¿tas yovalil sco cꞌulej a on̈ tic?

Aton te tojoln̈ej scutej co bꞌa,

an̈ej pax val dꞌa Dios scaqꞌuecoch co pensar,

12 yacbꞌan sco tan̈vej sja jun cꞌual yic Dios.

Caqꞌuec val quip co munlaj dꞌay,

yic elan̈chamel ol jaxoc.

A dꞌa jun cꞌu chiꞌ,

ol lajvoquel satchaan̈ yuj cꞌacꞌ.

Axo masanil tas ay dꞌa sat luum tic,

masanil ol ulaxbꞌat yuj cꞌacꞌ chiꞌ.

13 Palta a on̈xo tic,

van co tan̈van jun satchaan̈ acꞌto yedꞌ sat luum acꞌto,

yujto icha chiꞌ aj yacꞌannaccan stiꞌ Dios.

An̈ej ebꞌ tojol ol cajnaj taꞌ.

14 Ex xajanabꞌil vuuj,

van co tan̈van sja juntzan̈ chiꞌ.

Yuj chiꞌ caqꞌuec val quip yic malaj jabꞌoc co mul ol ilchaj yuuj,

malaj pax co paltail,

yic juncꞌolal ol on̈ aj yedꞌ taꞌ.

15 Nachajocabꞌel eyuuj to a Cajal,

ayto snivancꞌolal,

manto javilaj yic ay ebꞌ ol to colchajoc.

An̈ejaꞌ icha tic ix yutej pax vin̈ cucꞌtac Pablo stzꞌibꞌanxibꞌat juntzan̈ tic dꞌayex,

yujto icha chiꞌ sjelanil vin̈ acꞌbꞌil yuj Dios.

16 Ix stzꞌibꞌejbꞌat juntzan̈ tic vin̈ dꞌa scarta.

Palta ay bꞌaj pural snachajel cuuj.

Ay ebꞌ mantalaj spensar,

mantalaj stecꞌanil ebꞌ,

man̈ tojolocn̈ej syutej ebꞌ snaanel juntzan̈ chiꞌ.

Icha pax chiꞌ syutej ebꞌ snaanel juntzan̈xo slolonel Dios tzꞌibꞌyajcani,

yuj chiꞌ ol acꞌjoccanoch yaelal dꞌa yibꞌan̈ ebꞌ.

17 A exxo,

xajanabꞌil ex vuuj,

ayocto ix eyabꞌani tastac ol javoc.

Yuj chiꞌ,

tzeyil val e bꞌa dꞌa ebꞌ chuc ix val tic,

yic vachꞌ man̈ ol ex somchajel yuj juntzan̈ schꞌoc cꞌaybꞌubꞌal ebꞌ chiꞌ.

Tato maay,

ol juvoquel e pensar,

axo satxiel e tecꞌanil chiꞌ.

18 Scham val eyojtacanel Cajalil,

aton Jesucristo co Columal.

An̈ejtonaꞌ scham val e chaan svachꞌcꞌolal dꞌa junjun cꞌu.

Nivanocabꞌ yelcꞌoch Cajalil chiꞌ ticnaic yedꞌ bꞌaqꞌuin̈.

Amén.