Vachꞌ scutej co cꞌanan copisio
4
Yabꞌnac val syail Cristo yedꞌ snivanil ayic ix chami.
Yuj chiꞌ co naec to chamnac on̈ pax yedꞌoc.
A ebꞌ chamnacxo,
man̈xalaj yalan yic ebꞌ dꞌa chucal.
2 Yuj chiꞌ ichocabꞌ taꞌ scutej co bꞌa,
yic vachꞌ ol co cꞌulej tas sgana Dios yacbꞌan ay on̈to ecꞌ dꞌa yolyibꞌan̈qꞌuinal tic.
Man̈xo co cꞌanabꞌajejec sgana co nivanil tic.
3 A dꞌa yalan̈taxo,
te nivan tiempo e cꞌulejnac juntzan̈ tas bꞌaj ayoch spensar ebꞌ anima man̈ ojtannacoc Dios.
Palta canocabꞌ juntzan̈ chiꞌ ticnaic.
Yujto a dꞌa jun tiempoal chiꞌ,
an̈ej ajmulal e cꞌulejnac,
an̈ej malaj svachꞌil e nibꞌejnacochi.
Eyucꞌnac val an̈,
ton̈ej ecꞌnac ex bꞌuybꞌonoc.
Jantac ix eyuqꞌuej an̈.
Yajbꞌentac e cꞌulejnac ayic eyalannac e bꞌa dꞌa juntzan̈ comon dios.
4 A ebꞌ man̈ ojtannacoc Dios,
sat scꞌool ebꞌ,
yujto maxtzac e cꞌulej juntzan̈ chucal chiꞌ yedꞌ ebꞌ.
Yuj chiꞌ sbꞌuchvaj ebꞌ dꞌayex.
5 Palta yovalil ol yacꞌ entregar scuenta ebꞌ dꞌa Dios.
Yujto listaxo yaj tas ol aj schꞌolbꞌitaj ebꞌ anima smasanil,
vachꞌchom ebꞌ pitzanto ma ebꞌ chamnacxo.
6 Yuj jun tic albꞌil vachꞌ abꞌix dꞌa ebꞌ chamnacxo.
Yuj chiꞌ vachꞌchom ix cham snivanil ebꞌ,
palta lajan ol aj schꞌolbꞌitaj ebꞌ yedꞌ ebꞌ anima smasanil,
palta axo spixanil ebꞌ syal schaan sqꞌuinal,
icha sqꞌuinal Dios.
7 A ticnaic,
toxo ol lajvoquel smasanil tasi.
Yuj chiꞌ co cachec och vaan co bꞌa,
n̈icanocabꞌ scutej co bꞌa yic syal tzon̈ lesalvi icha val smojal.
8 A junxo sval tic te nivan yelcꞌochi:
Co xajanejec co bꞌa dꞌa smasanil co cꞌool,
tato icha chiꞌ,
vachꞌchom ay ebꞌ te nivan smul dꞌayon̈,
scacꞌ nivancꞌolal smul ebꞌ chiꞌ.
9 Vachꞌ scutejec co bꞌa dꞌa ebꞌ slaj ecꞌ dꞌayon̈,
dꞌa smasanilocabꞌ co cꞌool sco cha ebꞌ.
10 Cacꞌlajec servil co bꞌa junjun on̈,
ato syalaꞌ tastac copisio ix yacꞌ Dios dꞌayon̈,
yujto chꞌocchꞌoc copisio ix yacꞌ dꞌayon̈ junjun on̈ yuj svachꞌcꞌolal.
11 Tato ayon̈ scalel slolonel Dios,
nachajocabꞌ el cuuj to ton̈ej van on̈ yacꞌlabꞌan Dios calanel slolonel chiꞌ.
Tato ay on̈ syal cacꞌan servil,
munlajoc on̈ dꞌa smasanil co cꞌool,
yujto a Dios tzꞌacꞌan quip.
Vachꞌn̈ej scutej smasanil,
yic ol aljoc vachꞌ lolonel dꞌa Dios yuj Jesucristo,
yujto te nivan yelcꞌochi,
te ayn̈ej pax spoder dꞌa masanil tiempo.
Amén.
Ayic sja co yaelal
12 Ex xajanabꞌil vuuj,
ayic tzon̈ acꞌji proval yuj juntzan̈ yaelal te ov,
max yal cacꞌan sat co cꞌool yuuj.
Man̈ co naec to malaj bꞌaj sjataxon juntzan̈ chiꞌ dꞌa quibꞌan̈.
13 Palta con̈ tzalajec,
yujto junxon̈ej tzꞌaj cabꞌan syail yedꞌ Cristo.
Tato icha chiꞌ scutej co bꞌa,
ayic ol quilan sjax Cristo chiꞌ dꞌa scal stziquiquial,
ol te vachꞌ ja co tzalajcꞌolal.
14 Tato ay mach tzon̈ bꞌuchani yujto ayoch co pensar dꞌa Cristo,
te vachꞌ quicoꞌ.
Yujto a Yespíritu Dios,
aton jun te nivan yelcꞌochi,
a cajanoch dꞌayon̈.
15 Tato ay junoc on̈ scabꞌ syail,
mocabꞌ yujoc macꞌojcham anima,
ma yujoc elcꞌal.
Mocabꞌ yuj junoc tas ay yovalil yuj ebꞌ yajal,
ma yuj co comon acꞌanoch co bꞌa dꞌa junoc bꞌaj malaj calan quicoꞌ.
16 Palta tato ay on̈ scabꞌ syail yujn̈ej to yic on̈ Cristo,
man̈ on̈ qꞌuixvoquec.
Calec vachꞌ lolonel dꞌa Dios,
yujto yic on̈xo Cristo chiꞌ.
17 Toxo ol ja stiempoal schꞌolbꞌitaj yaj ebꞌ anima smasanil.
A on̈ yuninal on̈xo Dios tic ol on̈ bꞌabꞌlaj chꞌolbꞌitajoc.
Tato icha chiꞌ,
¿ocxom val ebꞌ maj cꞌanabꞌajan vachꞌ abꞌix yic colnabꞌil yic Dios?
18 Tato pural ol on̈ colchaj a on̈ tojolxo co pensar tic,
¿ocxom val ebꞌ malaj yelcꞌoch Dios dꞌay yedꞌ ebꞌ malaj svachꞌil sbꞌeybꞌal?
19 Yuj chiꞌ,
ayic sja co yaelal icha tzꞌel dꞌa scꞌool Dios,
yovalil vachꞌn̈ej scutej co bꞌeybꞌal.
Scacꞌanoch co bꞌa abꞌenal dꞌa yol scꞌabꞌ Dios ix on̈ bꞌoani,
yujto tzꞌeln̈ejcꞌoch tas syalaꞌ.