A checnabꞌil dꞌa ebꞌ creyente
5
A ticnaic,
tic svalbꞌat juntzan̈ checnabꞌil tic dꞌayex ex anciano ay dꞌa junjun chon̈abꞌ,
yujto a in tic,
anciano in pax eyedꞌoc.
Vilnac val Cristo chiꞌ,
vilnac chajtil ajnac yabꞌan syail.
Ay valan vic in chaan svachꞌil eyedꞌoc,
aton jun toto ol checlajeloc.
2 Icha yaj ebꞌ tan̈vum calnel,
icha chiꞌ tzeyutej e tan̈van ebꞌ ay dꞌa yol e cꞌabꞌ eyilani,
yujto icha scalnel Dios yaj ebꞌ dꞌayex.
Man̈ acꞌbꞌiloc pural tzex utaji,
man̈ yujoc e nibꞌanoch tumin tzeyil ebꞌ.
Palta yujn̈ejocabꞌ to icha chiꞌ tzꞌel dꞌa e cꞌool to tzeyil ebꞌ,
yujto icha chiꞌ sgana Dios dꞌayex.
Tzex munlaj val dꞌa tzalajcꞌolal.
3 Max yal yajal tzeyutej e bꞌa dꞌa ebꞌ ay dꞌa yol e cꞌabꞌ.
Palta a e vachꞌ bꞌeybꞌal tze chꞌox yil ebꞌ,
yic a tas tze bꞌeybꞌalej chiꞌ ol sbꞌeybꞌalej ebꞌ.
4 Tato icha chiꞌ tzeyutej e bꞌa,
ayic ol ja jun Quilumal Nivan Yelcꞌochi,
ol e cha spac te nivan svachꞌil.
A jun chiꞌ malaj bꞌaqꞌuin̈ ol lajvoc.
5 A exxo ex quelemtac yedꞌ ex cobꞌestac,
tze cꞌanabꞌajej val ebꞌ anciano.
Ichocabꞌ ex chiꞌ e masanil,
emnaquil tzeyutej eyacꞌan servil e bꞌa junjun ex.
Yujto syal dꞌa Slolonel Dios Tzꞌibꞌabꞌilcan icha tic:
A Dios schacanel ebꞌ syicꞌchaan̈ sbꞌa,
axo pax dꞌa ebꞌ emnaquilal syutej sbꞌa,
syacꞌ val svachꞌcꞌolal,
xchi.
6 Yuj chiꞌ emnaquil scutejec co bꞌa dꞌa yol scꞌabꞌ Dios,
yujto te nivan spoder.
Tato icha chiꞌ,
nivan ol on̈ ajelcꞌoch yuuj,
ayic ol ja stiempoal.
7 Caqꞌuecoch masanil quilcꞌolal dꞌa yol scꞌabꞌ,
yujto aypaxoch ilcꞌolal cuuj.
8 Lista scutej co bꞌa co macvaji,
yujto icha yaj nocꞌ choj tzꞌel yav tzꞌecꞌ sayecꞌ schibꞌej,
icha chiꞌ yecꞌ vin̈ ajcꞌool dꞌa co patic quichan̈,
aton vin̈ diablo.
9 Te tecꞌanocabꞌ scutej cacꞌanoch Dios dꞌa co cꞌool,
yic ol yal co colan co bꞌa dꞌa vin̈.
Yujto cojtac to a ebꞌ quetcreyenteal sacleminac yajbꞌat dꞌa yolyibꞌan̈qꞌuinal tic,
van pax yabꞌan juntzan̈ yaelal ebꞌ icha on̈ tic.
10 Ayic ol lajvoc cabꞌan syail janicꞌoc tiempoal,
axo Dios ol on̈ vachꞌ tzꞌactzitanoc,
ol svachꞌ aqꞌuej co tecꞌanil yedꞌ quip.
Man̈ jantacoc svachꞌcꞌolal,
yuj chiꞌ ix on̈ yavtejoch yicoc,
yic vachꞌ ay calan quic dꞌa svachꞌil ay dꞌa juneln̈ej,
yujto junxon̈ej caj yedꞌ Jesucristo.
11 Nivanocabꞌ yelcꞌochi,
nivanocabꞌ spoder dꞌa masanil tiempo.
Amén.
Tzꞌacꞌjibꞌat stzatzil scꞌool ebꞌ
12 A vin̈ cucꞌtac Silvano tic,
vojtac spensar vin̈,
scꞌanabꞌajej val vin̈.
A vin̈ ol icꞌanbꞌat jun in carta tic dꞌayex.
Tzin tzꞌibꞌejbꞌat jay bꞌelan̈ lolonel tic,
yic ol vachꞌ ja e pensar.
A juntzan̈ tic tzꞌalani chajtil syutej Dios yacꞌan svachꞌcꞌolal dꞌayon̈ dꞌa val yel.
A dꞌa svachꞌcꞌolal tic,
tecꞌan tzeyutej e bꞌa.
13 A ebꞌ quetcreyenteal ay dꞌa Babilonia tic,
sicꞌbꞌilxoel ebꞌ eyedꞌoc,
syacꞌbꞌat stzatzil e cꞌool ebꞌ.
Yedꞌ pax vin̈aj Marcos tic,
vin̈ icha vuninal yaji,
syacꞌpaxbꞌat stzatzil e cꞌool vin̈.
14 Slaj eyacꞌlaj stzatzil e cꞌool yuj e xajanan e bꞌa.
Yacꞌocabꞌ sjuncꞌolal Dios dꞌayex e masanil ex yic exxo Jesucristo taꞌ.