Checnabꞌil dꞌa ebꞌ ayxo yetbꞌeyum
3
Ex ix ayxo eyetbꞌeyum,
yovalil tze cꞌanabꞌajej ebꞌ vin̈ eyetbꞌeyum chiꞌ,
yic tato ayex mach ex max yacꞌoch scꞌool ebꞌ vin̈ eyetbꞌeyum chiꞌ dꞌa slolonel Dios,
man̈ yovaliloc ay tas tzeyal dꞌa ebꞌ vin̈,
palta ol montajoch ebꞌ vin̈ yuj e bꞌeybꞌal chiꞌ,
2 yujto ol yil ebꞌ vin̈ to munil ayex,
tzex xivpax dꞌa Dios.
3 Ayocabꞌ e vachꞌil,
man̈oclaj chajtil yilji e nivanil svalaꞌ.
Man̈ eyacꞌoch e pensar dꞌa chajtil tzeyutej e chꞌuman xil e jolom.
Man̈ eyacꞌoch e pensar dꞌa juntzan̈ qꞌuen oro yedꞌ juntzan̈ pichul caro stojol tzeyacꞌochi.
Man̈oc yedꞌ juntzan̈ chiꞌ tze bꞌo e bꞌa.
4 Palta aocabꞌ e cꞌolbꞌal tzeyacꞌ eyip e bꞌoani,
yic vachꞌ eyilji dꞌa sat Dios.
A e vachꞌil chiꞌ,
malaj bꞌaqꞌuin̈ ol lajvoc.
Tato nanam tzeyutej e pensar,
emnaquil pax tzeyutej e bꞌa,
vachꞌ yilji jun chiꞌ dꞌa sat Dios,
nivan yelcꞌoch dꞌa yichan̈.
5 A dꞌa pecaꞌ,
ay juntzan̈ ebꞌ ix ix icha chiꞌ yutejnac sbꞌeybꞌal,
yacꞌnacoch spensar ebꞌ ix dꞌa Dios.
Scꞌanabꞌajannac pax ebꞌ vin̈ yetbꞌeyum ebꞌ ix.
6 Icha chiꞌ yutejnac sbꞌa ix Sara.
Scꞌanabꞌajejnac val ix tas syal vin̈aj Abraham.
Yalnac pax ix icha tic dꞌa vin̈ “vajal ach”,*
xchi ix.
A exxo tic,
ex ix,
vachꞌ tzeyutej e bꞌeybꞌal.
Mocabꞌ ex och ilcꞌolal e naubꞌtan̈an tas xivubꞌtac ol javoc,
tato icha chiꞌ lajan e pensar yedꞌ ix Sara chiꞌ.
7 A exxo vinac ex ayxo ebꞌ ix eyetbꞌeyum,
vachꞌ tzeyutej e pensar dꞌa ebꞌ ix.
Nachajocabꞌel eyuuj to lajan ebꞌ ix icha junoc lum chen cꞌun spoji.
Ayocabꞌ yelcꞌoch ebꞌ ix dꞌa e sat,
yujto junn̈ej e qꞌuinal ix e cha yedꞌ ebꞌ ix yuj svachꞌcꞌolal Dios.
Icha chiꞌ tzeyutej e bꞌa dꞌa ebꞌ ix,
yic ol abꞌchaj e lesal yedꞌ ebꞌ ix.
Yaelal yuj co vachꞌ bꞌeybꞌal
8 An̈ejtonaꞌ,
svalan junxo tic dꞌayex.
Junxon̈ej tzeyutej e pensar e masanil.
Tato ay ebꞌ scusi,
colvajan̈ec yedꞌ ebꞌ.
Slaj e xajanej e bꞌa,
yujto eyucꞌtac eyanabꞌ e bꞌa.
Tzeyil-laj e cꞌool dꞌayex junjun ex.
Nanam tzeyutej e bꞌa junjun ex.
9 Tato ay ebꞌ chuc syutej sbꞌa dꞌayex,
man̈ chucoc tzeyutej pax e bꞌa dꞌa ebꞌ.
Tato ay ebꞌ tzex bꞌuchani,
man̈ e bꞌuch pax ebꞌ,
palta a svachꞌcꞌolal Dios tze cꞌan dꞌa yibꞌan̈ ebꞌ,
yujto ix on̈ yavtejoch Dios yicoc,
yic syacꞌ svachꞌcꞌolal dꞌayon̈.
10 Yujto icha tic syal dꞌa Slolonel Dios Tzꞌibꞌabꞌilcani:
Tato syal e cꞌool snajatbꞌi e qꞌuinal,
e gana pax tzalajcꞌolal tzꞌecꞌ junjun cꞌu eyuuj,
man̈xo eyal chucal lolonel,
man̈xo eyesej.
11 Iqꞌuequel e bꞌa dꞌa chucal,
axo vachꞌil tze cꞌulej,
man̈xo eyacꞌ oval,
a juncꞌolal tze bꞌeybꞌalejn̈ej.
12 Yujto a Dios Cajal stan̈van ebꞌ anima vachꞌ sbꞌeybꞌal,
smaclan val yabꞌi ayic syalan sbꞌa ebꞌ dꞌay,
palta aycot yoval scꞌool dꞌa ebꞌ scꞌulan chucal,
xchicani.
13 Tato an̈ej vachꞌil sco cꞌulej,
¿mach junoc ol icꞌanchaan̈ chucal dꞌa co patic?
14 Palta tato yujn̈ej co vachꞌ bꞌeybꞌal scabꞌ syail,
te vachꞌ quicoꞌ.
Yujto tzꞌibꞌyajcani:
Man̈ eyec xiv e bꞌa e naan yuj tas ijan tzex yutej ebꞌ.
Man̈ e cha somchajel e pensar,
xchicani.
15 Co naocabꞌi to a Cristo ayoch Yajalil dꞌayon̈,
Axon̈ejochi.
Listaocabꞌ scutej co bꞌa calan yabꞌ ebꞌ scꞌanbꞌan dꞌayon̈ tas yuj scacꞌoch Cristo chiꞌ yipoc co cꞌool.
Emnaquilocabꞌ scutej calan dꞌa ebꞌ,
cꞌununiocabꞌ scutej calani,
16 yujto ayoch co pensar dꞌa Cristo chiꞌ.
Vachꞌ scutej co bꞌeybꞌal yic vachꞌ malaj tas syal jun tzꞌacꞌan cojtaquejeli tas vachꞌ yedꞌ tas chuc,
yic vachꞌ a ebꞌ tzon̈ bꞌuchan yuj co vachꞌ bꞌeybꞌal yujto creyente on̈,
ol qꞌuixvoc ebꞌ.
17 Te vachꞌ tato scabꞌ syail yuj co vachꞌ bꞌeybꞌal,
tato icha chiꞌ tzꞌel dꞌa scꞌool Dios,
dꞌa yichan̈ to yuj co chuc bꞌeybꞌal scabꞌ syail.
18 Yujto a Cristo ix abꞌan syail.
Ix cham yuj co mul junel.
Te tojol spensar.
A on̈xo tic,
man̈ tojoloc co pensar,
palta Aꞌ ix yabꞌ syail cuuj,
yic tzon̈ yicꞌbꞌat dꞌa Dios.
A snivanil ix chami,
palta axo yic ix pitzvixi,
a Espíritu ix acꞌanxi pitzvoc.
19 Yuj Espíritu chiꞌ,
ix xidꞌecꞌ yalel slolonel Dios dꞌa juntzan̈ pixan preso yajcani,
20 aton dꞌa spixanil ebꞌ man̈ cꞌanabꞌajannacoc Dios dꞌa pecaꞌ dꞌa stiempoal vin̈aj Noé.
A dꞌa jun tiempoal chiꞌ,
nivan yutejnac scꞌool Dios dꞌa ebꞌ,
yic stan̈vej sbꞌo jun nivan barco.
A yuj teꞌ barco chiꞌ ay jayvan̈ ebꞌ colchajnac el dꞌa a aꞌ.
Vajxacvan̈ ebꞌ colchajnaccaneli.
21 A jun tas ujinac chiꞌ,
chꞌoxnabꞌil yaji,
yujto yuj a aꞌ yedꞌ bautismo tzon̈ colchaj ticnaic yujto ix pitzvixi Jesucristo.
A jun bautismo tic,
man̈ yopisiooc yicꞌanel smical co nivanil,
palta a schꞌoxani,
to man̈ chabꞌcꞌolaloc ix cacꞌ co tiꞌ dꞌa Dios.
22 Paxnacqꞌue Jesucristo chiꞌ dꞌa satchaan̈.
A dꞌa svachꞌ cꞌabꞌ Dios ayecꞌ ticnaic.
A tzꞌacꞌan mandar masanil ebꞌ ángel,
masanil juntzan̈xo ay yopisio man̈ chequeloc yedꞌ ebꞌ ay spoder.