2
Yuj chiꞌ yovalil scactejcan masanil chucal.
Max cacꞌ musansatil quetanimail.
Man̈ chabꞌsatoc scutej co bꞌa.
Max och chiꞌan co cꞌool dꞌa quetanimail,
max on̈ bꞌuchvaj dꞌa spatic ebꞌ.
2-3 Tato dꞌa val yel ix cojtaquejeli to vachꞌ Cajal dꞌayon̈,
ichaocabꞌ junoc neneꞌ unin sgana schuni,
ichocabꞌ taꞌ scutej co nibꞌanoch scꞌaybꞌubꞌal Dios,
aton jun malaj spaltail,
yic ol on̈ vachꞌ tecꞌcꞌaj dꞌa co colnabꞌil.
Lajan Cristo yedꞌ junoc qꞌuen qꞌueen
4 Icha tzꞌaj yacꞌjiqꞌue junoc qꞌuen qꞌueen dꞌa yibꞌan̈ yipumal yich junoc pat,
ichocabꞌ chiꞌ scutej co nitzanoch co bꞌa dꞌa Cajal Jesús.
A Cajal chiꞌ lajan yedꞌ jun qꞌuen qꞌueen ix actajcan yuj ebꞌ vin̈ bꞌoum pat,
palta sicꞌbꞌilel yuj Dios,
te nivan yelcꞌoch dꞌa yichan̈.
5 Yuj chiꞌ caqꞌuecoch co bꞌa dꞌa yol scꞌabꞌ Dios yic tzon̈ och stemplooc bꞌaj ol on̈ och sacerdoteoc yuj cacꞌan silabꞌ dꞌay yuj Jesucristo,
aton juntzan̈ silabꞌ schec Yespíritu Dios cacꞌaꞌ.
Ste tzalaj val yedꞌ juntzan̈ silabꞌ chiꞌ.
6 Yuj chiꞌ,
icha tic yajcan yalan Dios dꞌa Slolonel Tzꞌibꞌabꞌilcani:
A in val svacꞌcanoch jun qꞌuen qꞌueen dꞌa Sion yic tzꞌoch dꞌa sjolom schiquin junoc pat,
sicꞌbꞌilel vuuj,
te nivan yel pax cꞌochi.
A mach tzꞌacꞌanoch jun qꞌuen qꞌueen chiꞌ yipoc scꞌool,
man̈ ol canlaj dꞌa qꞌuixvelal,
xchi Dios.
7 A on̈ scacꞌoch Cristo dꞌa co cꞌool,
te nivan yelcꞌoch dꞌayon̈.
Ay pax ebꞌ max acꞌanoch dꞌa scꞌool.
Yuj ebꞌ chiꞌ,
syalanpax icha tic dꞌa Slolonel chiꞌ:
A jun qꞌuen qꞌueen malaj yelcꞌoch dꞌa yichan̈ ebꞌ bꞌoum pat,
aton qꞌuen ix och sjolomoc schiquin teꞌ pat,
xchi.
8 Syalanpax junxo tic:
Icha junoc qꞌueen bꞌaj stenoch yoc ebꞌ anima,
stelvi pax ebꞌ yuuj,
icha chiꞌ yaj dꞌa sat ebꞌ,
xchicani.
Yujto icha chiꞌ yaj Cristo dꞌa ebꞌ max acꞌanoch dꞌa scꞌool.
Ton̈ej somchajel ebꞌ yuuj,
yujto max scꞌanabꞌajej slolonel ebꞌ.
Atax dꞌa pecaꞌ,
chequeltaxon yaj ebꞌ to icha chiꞌ ol yutoc sbꞌa ebꞌ.
Yic exxo Dios quedꞌoc ticnaic
9 Palta a on̈ tic,
junxon̈ej quin̈tilal dꞌa yichan̈ Dios,
sicꞌbꞌil on̈ och sacerdoteal,
yic scacꞌan servil co Reyal,
syalelcꞌochi aton Dios.
Schon̈abꞌxo Dios caji,
ix on̈ siqꞌueli yic tzon̈ ochcan yicoc,
yic scalan pax el svachꞌilal.
Yujto a ix on̈ icꞌanelta dꞌa scal qꞌuicꞌalqꞌuinal,
ix on̈ yacꞌanoch dꞌa saquilqꞌuinal satubꞌtac yilji.
10 A dꞌa yalan̈taxo,
man̈ ex schon̈abꞌoc Dios,
palta schon̈abꞌ exxo ticnaic.
A dꞌa yalan̈tax chiꞌ,
malaj mach tzꞌocꞌ scꞌool dꞌayex.
Axo ticnaic,
tzꞌocꞌ scꞌool Dios dꞌayex quedꞌoc.
Yovalil an̈ej Dios scacꞌ servil
11 Ex xajanabꞌil vuuj,
man̈ co chon̈abꞌoclaj jun yolyibꞌan̈qꞌuinal tic,
yujto eqꞌuelbꞌan̈ej quecꞌ dꞌay.
Yuj chiꞌ tzin tevi dꞌayex to man̈ e cꞌulej juntzan̈ snibꞌejoch e nivanil.
Yujto a juntzan̈ chiꞌ,
tzon̈ ixtaxel yuuj.
12 Vachꞌn̈ejocabꞌ tzeyutej e bꞌeybꞌal yil ebꞌ manto ojtannacoc Dios.
Yuj chiꞌ,
vachꞌchom syal ebꞌ ticnaic to te chuc ex.
Palta tato syil ebꞌ to vachꞌ e bꞌeybꞌal,
ol yal vachꞌ lolonel ebꞌ dꞌa Dios ayic ol javoc scꞌual schꞌolbꞌitan tas caj co masanil.
13 Yujto sco xajanej Cajal Jesús,
yuj chiꞌ smoj sco cꞌanabꞌajej pax masanil ebꞌ ay yopisio yuj ebꞌ anima.
Sco cꞌanabꞌajej vin̈ sat yajal,
aton vin̈ tzꞌacꞌan mandar ebꞌ smasanil.
14 Sco cꞌanabꞌajanpax juntzan̈xo ebꞌ yajal,
yujto ay yopisio ebꞌ yuj vin̈ sat yajal chiꞌ,
yic tzꞌacꞌjioch syaelal ebꞌ max cꞌanabꞌajan sley ebꞌ.
Syalanpax svachꞌil ebꞌ vachꞌ sbꞌeybꞌal ebꞌ.
15 Sgana Dios vachꞌ scutej co bꞌeybꞌal,
yic man̈xo ol yal-laj yalan chucal ebꞌ malaj spensar dꞌa co patic.
16 A on̈ tic,
librexo caji.
Yuj chiꞌ ichocabꞌtaꞌ scutej co bꞌa.
Palta max yal-laj co naani to syal co cꞌulan juntzan̈ chucal yujto librexo caji.
Ocxo jun,
co naeccoti to schecabꞌ on̈ co Mam Dios.
17 Ayocabꞌ yelcꞌoch junjun anima dꞌayon̈.
Sco xajanej ebꞌ quetcreyenteal.
Con̈ xivec dꞌa Dios.
Nivanocabꞌ yelcꞌoch vin̈ sat yajal dꞌayon̈.
Ix yabꞌ syail Cristo cuuj
18 A ex checabꞌ eyaj dꞌa e patrón,
cꞌanabꞌajejec ebꞌ.
Ayocabꞌ yelcꞌoch ebꞌ dꞌayex.
Man̈ocn̈ej ebꞌ vachꞌ spensar,
ebꞌ snaan eyuuj,
tze cꞌanabꞌajej.
Tze cꞌanabꞌajej pax ebꞌ ov.
19 Tato yujn̈ej to ayoch co pensar dꞌa Dios,
scomon acꞌjioch yaelal dꞌa quibꞌan̈,
tato scacꞌ pax techajoc,
stzalaj Dios quedꞌoc.
20 Qꞌuinaloc sja co yaelal yuj juntzan̈ chucal sco cꞌulej,
¿tom yujn̈ej cacꞌan techaj jun yaelal chiꞌ,
vachꞌ quicoꞌ?
Maay.
Palta tato tzꞌacꞌjioch co yaelal yuj junoc tas vachꞌ sco cꞌulej,
tato stechaj pax cuuj,
vachꞌ jun chiꞌ dꞌa yichan̈ Dios.
21 Ix on̈ yavtejoch Dios yicoc,
yic scabꞌ syail yuj co vachꞌ bꞌeybꞌal tic.
Yabꞌnac syail Cristo cuuj.
Icha chiꞌ yutejnac schꞌoxan jun vachꞌ bꞌeybꞌal dꞌayon̈,
yic a sco bꞌeybꞌalej yedꞌoc.
22 A Cristo,
malaj jabꞌoc smul ochnac.
Malaj pax bꞌaj yesejnac juneloc.
23 Ayic ix bꞌuchji,
maj spaclaj sbꞌa.
Ayic ix och dꞌa syaelal,
maj yal-laj tato ol spac sbꞌa.
An̈ej dꞌa yol scabꞌ Dios ix yacꞌoch sbꞌa,
yujto an̈ejton jun Juez te tojol.
24 A Cristo ix icꞌancanbꞌat co chucal yedꞌ snivanil ayic ix cham dꞌa teꞌ culus,
yuj chiꞌ man̈xalaj yalan yic chucal dꞌayon̈,
ichato chamnac on̈xo el dꞌay.
Icha chiꞌ ix on̈ yutej,
yic vachꞌn̈ej scutej co bꞌa.
Ix yabꞌ val syail cuuj,
yic vachꞌ tzon̈ colchajcaneli.
25 A dꞌa yalan̈taxo,
satnac on̈ icha nocꞌ calnel satnacbꞌati.
Axo ticnaic,
ix on̈ meltzajxicot dꞌa Quilumal,
co Tan̈vumal paxi.