A Sbꞌabꞌel Carta
SAN PEDRO
Tzꞌel yich scarta vin̈aj Pedro
1
A in Pedro in tic,
schecabꞌ in Jesucristo,
tzin tzꞌibꞌejbꞌat jun in carta tic dꞌayex,
a ex sacleminac eyajcanbꞌat dꞌa yol yic Ponto,
Galacia,
Capadocia,
Asia yedꞌ dꞌa yol yic Bitinia.
2 A on̈ tic,
sicꞌbꞌil on̈xo el yuj co Mam Dios,
yujto atax dꞌa pecaꞌ icha chiꞌ ajnac snaan Dios dꞌa quibꞌan̈.
Yuj Yespíritu ix on̈ yacꞌoch yicoc,
yic vachꞌ sco cꞌanabꞌajej tas syal Jesucristo,
yic tzꞌicꞌjipaxel co mul yuj schiqꞌuil.
Nivanocabꞌ svachꞌcꞌolal Dios yedꞌ sjuncꞌolal syacꞌ dꞌayex taꞌ.
Scacꞌoch Cristo yipoc co cꞌool
3 Calec vachꞌ lolonel dꞌa Dios,
aton Smam Cajal Jesucristo,
yujto ix ocꞌ val scꞌool dꞌayon̈.
Ix on̈ yacꞌxi aljoc dꞌa schaelal,
yujn̈ej to pitzvinacxi Jesucristo,
yuj chiꞌ aton val jun tic ayoch yipoc co cꞌool to a ol acꞌan co qꞌuinal.
4 Yujto a Dios ol acꞌan jun quic dꞌayon̈,
aton jun sicꞌan yuuj dꞌa satchaan̈.
A jun quic chiꞌ ayn̈ejecꞌ dꞌa masanil tiempo,
max ixtaxlaj,
an̈ejtonaꞌ max cꞌalaj.
5 Yujto scacꞌoch Dios dꞌa co cꞌool,
yuj chiꞌ van on̈ stan̈van yedꞌ spoder masanto ol co vachꞌ chaej co colnabꞌil.
A jun co colnabꞌil tic,
listaxo yaji yic vachꞌ ol checlajel dꞌa slajvubꞌxo tiempoal.
6 Yuj chiꞌ tzon̈ tzalaj val.
Vachꞌchom scabꞌ syail nivac proval jabꞌoc tiempoal ticnaic,
palta tzon̈ te tzalaji.
7 Icha tzꞌaj yacꞌji proval qꞌuen oro dꞌa scal teꞌ cꞌacꞌ,
icha chiꞌ tzꞌaj cacꞌji proval tato yel scacꞌoch Dios dꞌa co cꞌool.
Yujto ayic scacꞌanoch Dios chiꞌ dꞌa co cꞌool,
más te nivan yelcꞌoch dꞌa yichan̈ qꞌuen oro chiꞌ,
yujto a qꞌueen,
slajvin̈ej el qꞌueen.
Tato scacꞌ techaj proval chiꞌ,
ol on̈ aljoc vachꞌil ayic ol jax Jesucristo.
Nivan ol on̈ ajoc.
Nivan ton ol aj quelcꞌoch yedꞌ taꞌ.
8 A ex tic,
vachꞌchom malaj bꞌaj ix eyil Jesucristo,
palta tze xajanej val.
Vachꞌchom man̈ vanoc eyilan ticnaic,
palta ayoch yipoc e cꞌool.
Tzex tzalaj val.
A val e tzalajcꞌolal chiꞌ,
maxtzac yal-laj yalchaji jantac.
Man̈xo jantacoc svachꞌil.
9 A co colnabꞌil ol co cha chiꞌ,
aton jun chiꞌ tzacꞌvabꞌil cuuj,
yuj chiꞌ ix cacꞌoch Jesucristo dꞌa co cꞌool.
10 A ebꞌ schecabꞌ Dios dꞌa pecaꞌ,
yacꞌnac val yip ebꞌ sayan tas yaj jun co colnabꞌil tic.
Yacꞌlejnac ebꞌ snaaneli.
Ayocto yalannaccan ebꞌ to ol yacꞌ svachꞌcꞌolal Dios dꞌayon̈.
11 A Yespíritu Cristo ayoch dꞌa ebꞌ,
a acꞌjinac nachajel yuj ebꞌ to a Cristo yovalil ol yabꞌ syail.
Slajvi chiꞌ ol och Yajalil.
Axo ebꞌ chiꞌ,
yacꞌlejnac ebꞌ snaaneli mach jun ol javoc chiꞌ yedꞌ tas tiempoal ol javoc.
12 Palta acꞌjinac yojtaquejel ebꞌ yuj Dios to a juntzan̈ yalnaccan ebꞌ chiꞌ,
man̈ yujoc snachajel yuj ebꞌ yalnaccan ebꞌ,
palta yuj snachajel cuuj a on̈ tic.
A jun tic ix acꞌji eyojtaquej yuj ebꞌ ix alanel jun lolonel yic co colnabꞌil yuj yipalil Espíritu Santo acꞌbꞌilcot dꞌa satchaan̈.
A ebꞌ ángel snibꞌej pax ebꞌ snachajel juntzan̈ tic yuuj.
Snibꞌej Dios to vachꞌ on̈
13 Yuj chiꞌ tecꞌan tzeyutej e pensar.
Lista tzeyutej e bꞌa.
Tzeyacꞌ val och yipoc e cꞌool tas ol yacꞌ Dios dꞌayon̈ yuj svachꞌcꞌolal ayic ol jax Jesucristo.
14 A ex tic,
yuninal exxo Dios vedꞌoc,
yuj chiꞌ cꞌanabꞌajejec.
A dꞌa yalan̈taxo tzijtum chucal e nibꞌejnacochi,
yujto manto eyojtacoc Dios taꞌ.
Axo ticnaic,
man̈xo e bꞌeybꞌalej icha chiꞌ.
15 A jun avtannac on̈ och yicoc,
vachꞌn̈ej toni,
malaj jabꞌoc spaltail,
yuj chiꞌ ichocabꞌtaꞌ tzeyutej e bꞌa,
vachꞌn̈ejocabꞌ tzeyutej e bꞌeybꞌal.
16 Yujto icha tic yajcan yalan Dios dꞌa Slolonel Tzꞌibꞌabꞌilcani:
A ex tic,
vachꞌn̈ejocabꞌ tzeyutej e bꞌa,
yujto a in tic,
te vachꞌ inn̈ej,
xchi.
17 A Dios ol chꞌolbꞌitan tastac sco cꞌulej junjun on̈.
Malaj co qꞌuexan̈il dꞌa yichan̈ ayic ol schꞌolbꞌitan tas caj junjun on̈.
Yuj chiꞌ,
tato scal co Mamoc,
con̈ xivec dꞌay yacbꞌan ayon̈to ecꞌ dꞌa yolyibꞌan̈qꞌuinal tic.
18 A juntzan̈ scꞌulejnac ebꞌ co mam quicham,
an̈ejaꞌ co cꞌulejnac dꞌa yalan̈taxo,
palta nabꞌan̈ej quixtejnac co bꞌa.
Axo ticnaic,
colchajnac on̈xo dꞌa yol scꞌabꞌ juntzan̈ chiꞌ.
Eyojtacxo jun co colnabꞌil tic,
man̈oc yedꞌ juntzan̈ tastac eqꞌuelbꞌan̈ej yecꞌ bꞌaj manbꞌil,
icha qꞌuen tumin.
19 Palta a schiqꞌuil Cristo ix acꞌan ganar smanani,
yujto nivan yelcꞌochi.
Yujto ix miljicham silabꞌoc icha junoc nocꞌ calnel malaj spaltail,
malaj pax jabꞌoc chucal tzꞌilchaj dꞌay.
20 Ayic manto sbꞌo jun yolyibꞌan̈qꞌuinal tic Dios,
nabꞌilxo yuuj to icha chiꞌ ol aj yelul dꞌa yibꞌan̈ Cristo.
Palta ato dꞌa jun slajvubꞌ tiempoal tic ix yacꞌ checlaj yuj co vachꞌiloc.
21 Yuuj scacꞌoch Dios dꞌa co cꞌool ticnaic,
yujto a Dios chiꞌ acꞌjinac pitzvoc dꞌa scal ebꞌ chamnac,
te nivan ix aj yelcꞌoch yuuj.
Yuj val chiꞌ,
scacꞌ val och Dios dꞌa co cꞌool,
scacꞌanpax och yipoc co cꞌool.
22 A ticnaic,
yuj Yespíritu Dios ix co cꞌanabꞌajej jun cꞌaybꞌubꞌal te yel tic.
Icha chiꞌ scutej co tojolbꞌitan co bꞌeybꞌal,
sec yuj chiꞌ yel sco xajanej ebꞌ cucꞌtac ebꞌ canabꞌ.
Yuj chiꞌ yovalil sco xajanej co bꞌa dꞌa smasanil co cꞌool yedꞌ dꞌa smasanil quip.
23 A on̈ tic,
ix on̈ alji dꞌa schaelal.
Man̈oc dꞌa co mam co nun chamelbꞌa yaj ix on̈ aljixi,
palta yujn̈ej slolonel Dios,
yujto aj qꞌuinal yaji.
A slolonel tic ayn̈ejecꞌ dꞌa juneln̈ej.
24 Yujto icha tic syal dꞌa Slolonel Tzꞌibꞌyajcani:
A sqꞌuinal ebꞌ anima smasanil,
lajan icha an̈ an̈cꞌultac.
Lajan svachꞌil ebꞌ icha xumaquil an̈ an̈cꞌultac chiꞌ.
Yujto a an̈ chiꞌ,
junn̈ej rato stacjiel an̈.
Axo sxumaquil an̈,
ton̈ej tzꞌel bꞌulnajoc.
25 Palta axo slolonel Dios Cajal,
ayn̈ejecꞌ dꞌa juneln̈ej,
xchicani.
A slolonel tic,
aton jun vachꞌ abꞌix yic colnabꞌil albꞌilcan dꞌayex.